Акълова 30
30
30 къаьм
Агурис аᵸкъилабла йаьжбо
1Якъейис оьжо Агурис – Массаъ агьлола сукӀос йаьжбо, гьолцо Итиэллинна, гьула̄зу Итиэллинна Ухалинна бо̄йо калам.
2Аьдамла̄ъ эᵸдо бисун аᵸкъло-лъай гаьччо сукӀо гей до,
аьдамла̄ъ гаьгьийо бичӀи-лъайна гаьъа дӣъ.
3Аᵸкъиллъина дил йиᵸкъеэш,
Кьодда̄ла лъайлис дил илмона насиб бахъеэш.
4Гьасаъ сукӀод эᵸкьейо, кьа̄ь сукӀод лӀийо оᵸкъойо,
къиденад залӀо лъод йокӀолло,
лъо̄хъад мухунаъ ралъад бокӀонна бахъийо?
Дунналлил раьъал лъо̄хъад гунна бахъийо?
Вагьаллийа сукӀокьа сийод ца̄ᵸ гей,
гьолцола оьждикьа сийо ца̄ᵸд гей?
Дул йикъеш зогъца вагьли?
5Аллагьлис шибаб йаьже йаᵸцойо гей.
ЙакӀо йоᵸкъонна, Гьолцокьа кул бахъийа сукӀоба̄л
магъо цӀуми бовал аьᵸйда̄ йохийо кил гей Гьули.
6Аллагьлила йаьжла̄ъ эᵸдо ми гьоьшшона лъичӀ-хочӀла̄къа, гьолцо ми нуькучӀ о̄с,
бета ми оᵸтӀолаги гаьгьийолъи икъелца.
7Йе БетӀергьан, къона жо гьарзи йо̄с до Дӯхъа,
до угъоцал йова Ми вагьли:
8пайда гаьччо михъо-махъийо хабарна оᵸтӀола̄лъина дидойс ата̄кӀа; йа мискинлъина, йа бечелъина нилӀа̄къа дил.
БетӀербахъи боваллабза баьба-цаᵸйа̄ъ бади жона нилӀа̄къа Ми дил.
9Дие оᵸх йоцӀна муьгъатта̄, до Дӯкьас инкар бойчӀе эцалъгъа,
БетӀергьан сукӀо ахъцана дил икъаъаслӀо нисечӀе эцалъгъа.
Мискиндолъна муьгъатта̄на, гигьла̄л уьᵸхолълъо,
до вагьла̄ йогьна Аллагьлис ца̄ᵸ чикелечӀе гьихлъалъгъа.
10Лагъ какзи огьна гьолцола бетӀергьаллихъа миц бова̄къа –
гьолцо лагъли дул наьъана ницца, бета гьолълъодда̄ла дул балагь мокъос.
11Балагь-азаб мизол, гьинила абол наьъана ниццас,
баркат гулалалӀо гьидела ийокьа нисаъцас насло!
12Балагь-азаб мизол, гьиделзу жуво̄л ма̄цова̄ гейлӀо гиццас,
амма гьидес аᵸза̄лъи ла низадана гьоᵸсна йолъаъцас насло!
13Балагь-азаб мизол, мизола гьайда̄ъ чӀугьи-пахрулъи гей,
гьаьйда гуцӀобахъийаъ мизос букъо аьмал гаьгьийолъина йегас.
14Балагь-азаб мизол, дунналикьа гаьгьийа̄ мискилла̄с ризкъина, ракьликьа кьодо гаьгьийа̄ язихла̄с баьба-цана йуьᵸхъанна, гьолло̄л бувагъолална сила̄ балъаййа̄лъ йеᵸлъелло,
гьулазу гажода цӀитӀа̄лъ йеᵸлъелло насло!
15ЦӀурбелалис къона кид гей,
къонникьана ца̄ᵸда «нилӀа», «нилӀа» гей.
Оᵸх йоцӀийолъи йикъаъцас лъана жо гей,
оьлчалӀо гьоᵸсна нисаъцас оьᵸкъонашна гей:
16Журжагьна, къова ахъаъцас оᵸхна,
регьеллихъа боцӀаъцас ракьна,
гьула̄зу гьудо оьлчалӀо нисаъцас цӀона.
17Абокьа лъоᵸвацаласна ийо йеᵸлъа йоваъцаласна гьаьйда авлахълила гъаьди йа̄гъос,
гьоллос хона къоргийалли йуьᵸхъча!
18Лъана жо гей дил балъгояб,
оьᵸкъонашна гей дил йикъаъцас:
19гьасаъкьа̄ богиццала цуᵸгьалис гьинона, шедилъкьа̄ мекьецала бекелалис гьинона,
ралъадбакьа кьодолакьа̄ мекьецала гамалис гьинона,
гьула̄зу къимако киббадой экьецала оьждис гьинона.
20КӀаьйлӀочала ахъхъас нӣйо аьмалди бахъца?
Йесца, сикӀо йаᵸцолца, гьула̄зу до гьоᵸсна чикейо аьмал богьна гаьъалӀо нисос гьолълъо.
21Лъана жо гей маьче лахлӀолцас,
оьᵸкъонашна гей гьолълъохъа йежена йахъаъцас:
22пачалъилаъ оᵸкъойо лагъна,
оᵸх йоццал эсал баьба-цаᵸ йиᵸхъойо аьбдална,
23аьдамла̄ъ нуькучӀ йахъна ахъо йеᵸкьейо аьдамна,
гьинила бикалис маьче бохийо гъарабашна.
24ВагьалӀо дунналликьа бишун итӀина̄,
амма йилӀа цӀодорлъи-аᵸкъиллъи йиᵸхъова̄ оьᵸкъона ругьчӀаголъи гей:
25гьуᵸца̄ – гьолло̄л гей тоьба̄ жобо,
амма азодо гьидел бета муьгъалӀил бесал кен йокӀолца гьолло;
26бизова̄кьа йа̄хъцас аᵸкъбона лъаькъейо агьло гаьъа,
амма шед-бачла̄ъ гьидел къоьчӀова йовагьца гьолло;
27мицакьа йа̄хъцас муькъо-бох угъолцас хацӀбо –
ханлъи йовал гьоллос укъона гаьъа,
амма рагълиъ мекьецала̄слъийо михо йахъца гьоллос;
28кӀемуса̄на дӯхъа кад йовахна йа̄хъца,
амма гьолло̄л пача̄ла хъала̄ъна йа̄хъца.
29Лъана жо гей вагьалӀо дунналликьа чӀугьзи йа̄хъна йеᵸкье-гугьцаса, оьᵸкъонашна –
гьинис гьеба кӀетӀо гаьгьийо:
30гъалбацӀ къацӀцӀола жанаварла̄ъ эᵸдо къуватаб гей,
гьоло гьоᵸсна муьгъатта̄ буькьаъаш,
31бета мамалина, рехъеллис букъо – билъова̄с тӀигана,
йукъа аскарлила гьазлис укъо – пачана.
32Букъа аьмаллиъкьа̄ дӯхъа гьоᵸс аьнтлъи йахъна зогъда,
йана дӯхъа гьилла-макро йахъна зогъда,
вагьалълъо саъатбаъзу дибола сикӀакьа ко̄ гула.
33Кьодос йагъойо гьиᵸ йикьеда – йеᵸлъ йахъца,
мотӀолиъ биза баькьелда – гьеᵸ гӯс,
симо бигьда – даьъба-йаьже йахъца.
Currently Selected:
Акълова 30: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
