Акълова 29
29
29 къаьм
1Лади кантӀизи огьдана, нисойо йойчӀе, болъо бегалцас сукӀо, шак гаьчӀел гьалаг ахъца,
гьолцол комак михъаъас.
2Муъмилла кьоддаба̄клъо, халкъ рази бахъца,
лъаькъейа сукӀоба ханлъи йо̄слаъ, халкъ зигардизи бахъца.
3Аᵸкъиллъи йаццала оьжди або рази о̄с,
хъаьгьба̄гъой къацӀо эчейа – абос бечелъи пасад йо̄с.
4БитӀараб гьоькмо богьцала пачали улка йилӀакъолца, халкъилакьа кьодо гулло магъало теликӀийа улка йугъолца.
5Мадугьаллил рец богьцас сукӀо ахъца
гьогцола хаьбала̄л къор гулцас аьдам.
6Чикейа сукӀол гьинила мунагьла̄ къор гулца,
муъмин-сукӀо рохеллихъа илӀелацас ахъца.
7Муъмин-сукӀо икье-аькьеш мискинлил, ритӀухъаб гьоькмо бовал,
лъаькъейа сукӀол гьолълъос ургъенна бахъаъас.
8Йаьгь-ламус гаьчча̄ аьдамла̄ шагьарбаъ бегъ-бугъо̄лъи йо̄с,
амма аᵸкъилла̄ аьдамла̄ш симо болъолца.
9Аᵸкъилли аьбдал диваллил илӀеда аьбдалли гьулиъ гъалмагъал бо̄с,
йана, йилӀа лъоᵸвана, – гьоллос раьгьат бугъолца.
10Гьеᵸ къе̄ мейал батӀийал ритӀухъаб сукӀо атӀаъас,
гьолло муъмилла бийакьал бикье-бакьеш.
11Аьбдалли гьинис къацӀцӀо симо гиса чӀалӀеш,
аᵸкъиллихъа гьинил йогъо йеᵸхенна йахъца.
12Гьаьким кӀортоллихъа энекзи ахъца зогъда,
гьолцос къацӀцӀа̄ нукарла лъаькъебалъца.
13Мискинна зулмо-сукӀона мелъейа гей,
гьолло къонина гьаьйда̄л канлъи БетӀергьаллийа̄ъ нилӀна.
14Пачали мискилла̄л битӀараб гьоькмо бо̄с зогъда,
гьолцос ханлъи гьоᵸсна йугъаъас.
15Насигьатлила цӀицӀа аᵸкъло мокъолца,
эᵸлъа ойчӀе эчанне̄йа къова ийокьа рогьо-ниц бо̄с.
16Лъаькъейа аьдамла кьоддаба̄клъо, мунагьла дӣсбалъца,
амма муъмилла̄л йегас гьолло̄л къаьм лӀийода̄ бийакьейо мех.
17Дибола оьждил адло бова, – гьолцо ми рази о̄с,
дибо йакӀона гигъа йеᵸкьеш.
18Аллагьлис калам тухъеэш халкъ бадагъударлиъ бахъца,
гьардараб гаьъад Къанонликьа уьᵸхо-аьᵸхецас сукӀо.
19Малъзи йогьналӀона лагълис аьмал хужаъаш, –
ми нисойо жо гьолцол биджи йахъдана, гьолцо аьᵸдалаъ йеᵸйаъас.
20Икълашал охойлъеэш сукӀо эга̄йод дул?
Гьолцоллагъа ахо йахъца аьбдаллил.
21ИтӀина̄кьазу лагъ кацлӀолда, – бета гьолцо балагь мокъолца.
22Симо бӣйа сукӀо питна баьгъиъилца,
симо гьех бигьцаласна мунагьла телибалъца.
23Букъа аьмалли инсан лӀийода̄кӀца,
йакӀиъ гьеренлъи-гьалимлъи гаьгьийа гьуьрмат-хъатир кьодо кьисас.
24ЦӀогьорлигъой къацӀо эчейо сукӀо гьинилзу жу атӀаъцас сукӀо ахъца.
Суд йогьцала сукӀоба̄дой аьᵸйда̄ гьаьдаладана, гьолцо гаьлъгъа нисаъас.
25Инсаллихъа гьичӀейолъи – вагьли гьичӀейа сукӀол къор гей,
БетӀергьалликьа тӀутӀна йечанне̄йал гьичӀейолъи гаьъа.
26Телилал йацца даьъба-йаьжиъ гьаькимла̄ гьидес рахъ бохал,
амма ритӀухъаб гьоькмо БетӀергьаллила каъ гей.
27Муъмилла̄л чикейа̄ сукӀоба ба̄тӀаъас,
лъаькъейа аьдамла̄л иман гулла̄на ба̄тӀаъас.
Currently Selected:
Акълова 29: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
