Акълова 28
28
28 къаьм
1МуьгъалӀ гогьцас сукӀо ахъаъдана, лъаькъейо сукӀо оьчош,
муъмин-сукӀо гъалбацӀдолана гьицӀаъас.
2Улкалиъ бегъ-бувагъо̄лъи телилъда, гьаькимлана дӣсбалъца,
амма аᵸкъилаб-цӀодорабли сукӀо адло-низам бо̄с.
3Язихла̄л зулмо богьцас мискин-сукӀо
эᵸлъейо ахъца мицалъ гаьгьийосинаб муькъо-бох йугъолцала гитӀна гугьцала водилъ.
4Къанон#28:4 Къанон – Муса авараглидой Аллагьли йоᵸвакъолла̄ тели амрована жугьутӀалли чара гаьчӀел йовал нуцӀоцас оьмролас йегабалла̄ къацӀцӀа̄ гьинодана. йечаннейа аьдамли лъаькъейа̄ сукӀоба вецци бо̄с,
Къанонликьа уьᵸхоь-аьᵸхецас сукӀо гьоллол данде эгъдас.
5Чикейа сукӀоба̄л йикъаъас сийо аьᵸхъейо-хелло гаьгьийона,
гьиде БетӀергьан иᵸзцала̄л гьули йикъеш.
6Гьаьлаллъилаъ эᵸкье-гогьцас мискин-сукӀо кӀетӀо гей,
мекъабли гьинолкьалкьа̄ эᵸкье-гогьцала бечедабли сукӀогъа.
7ЦӀодораб оьжо Къанонликьа уьᵸхо-аьᵸхеш,
оᵸх чикейа̄ла вацца абол рогьо-ниц бо̄с.
8Нагьлъилаъ нилӀийагъана окко кьодо йагъоваъкьа̄ сукӀо бечед ахъца.
ЙоцӀол окко нилӀийаъкьа̄ бечелъи телилъца.
Амма ахирна гьули мискилла̄кьа йакӀо йугъоцалал йиᵸхъал йахъца.
9Къанонлихъа энекзи ахъцалӀо нисона гьолълъодойс аьᵸгъа ата̄ йолъолцала сукӀос гьари-доьъана БетӀергьаллидой аьᵸйда̄ нуькучӀаб жо гей.
10Муъмин-сукӀо чикейа гьинолкьа уьᵸхолло сукӀо гьинизу йоьᵸтӀова хъарандийаъ экца,
амма йакӀо йаᵸцова сукӀол кӀетӀослъи йиᵸхъос.
11Бечедабли сукӀол гицца жу аᵸкъил гейлӀона,
цӀодорабли мискин-сукӀоллӀо нисода, гьолцоъ йалӀоъкьа̄ канлъи йегас.
12Муъмилла̄л бергьенлъи йиᵸхъолъ, букъо рохел кьодо мокъос,
амма лъаькъейа̄ сукӀоба кьодо мокъолъ, аьдамла̄ мувацал маьче мизца.
13Гьинис мунагь муцоцала сукӀол талигь нилӀаъас,
мунагьла̄кьа мукӀур ахъна, кешлъи йечаннейал Аллагьли баркат гулца.
14Гьардараб гаьъад нитоназу БетӀергьаллихъа гьичӀейо сукӀо,
гьинис йакӀо хетӀелъал йе̄ᵸйал балагь кьодо мокъос.
15ХъаьлӀецала гъалбацӀлилъна, хъантӀизи бахъийа сӣᵸлъна
эᵸлъейо ахъца заипаб халкъилакьа кьодо голло лъаькъейо хан.
16Аᵸкъло гаьччо гьаьким укъо зулмо-сукӀо ахъца,
гьаьрамаб боцӀи-ризкъи батӀаъцалас оьмро бихалолъца.
17СукӀо икьейадда̄ла иᵸзцас бидулав шуна̄дой оᵸкъоцал чӀанагъос,
лъо̄лна иᵸхъечӀе гьихлъалъгъа.
18ЙакӀо йаᵸцона, уьᵸхо-аьᵸхейал гьичӀейолъи гаьъа,
мекъаб гьидкьа̄ эᵸкье-гогьцас сукӀо, йакӀкьа гаьчӀел, къе̄ экца.
19Гьинис маьче богьдагулцалал оᵸх йоцӀлал оьлло баьба михъос,
пикрола̄д болӀова мица аьдам къацӀцӀо мискиндокӀца.
20РитӀухъаб сукӀокьа баркат гулца, бечелъина йиᵸхъос,
бечед ахъал икье-аькьецас тамбигь михъечӀе гьихлъаъас.
21Аьйда̄-муьгъалӀ говацӀована судлис гьоькмо бо̄йолъи кӀетӀо жо гаьъа,
баьбалаш лукӀмаладда̄лана сукӀо мунагь-гьаькълиъ эᵸхеш.
22Бахилаб сукӀол угъалдола йилӀа бечелъи йацца,
гьолцол йикъаъас гьинкьа кьодо мискинлъи йоᵸкъоцаслъи.
23МатӀаъ рец богьна, икълашецала сукӀогъа ахирна,
жу кантӀизи ахъал, какзи огьна, икълашецас сукӀо ацца.
24Гьинис ийо-або мовакьолцас,
гьолълъос мунагь бахъаъаслӀо нисоцас сукӀо ахъца пасалъи йогьцала къачагъла̄с вацца.
25ХъантӀлъила даьъба-йаьже йо̄с,
БетӀергьалликьа тӀутӀийал баркат гулца.
26Гьинил йакӀкьа йоᵸкъойо йогьцас сукӀо аьбдал гей,
аᵸкълолакьа уьᵸхо-аьᵸхейо хъосар ахъца.
27Мискиллил жо ниццас сукӀо гьоьшшона гаьчӀел гьихлъаъас,
нилӀал йатӀечӀе гьаьйда йиᵸйацолла̄л михъоцас наьъана тели бахъца.
28Лъаькъейа̄ сукӀоба кьодо мокъолъ, аьдамла̄ мувацал маьче мизца,
гьолло̄л пасад ба̄хълъо, муъмилла телибалъца.
Currently Selected:
Акълова 28: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
