Акълова 27
27
27 къаьм
1ИжейцӀа̄къа хиса дул йахъцала жойлакьа,
хисас водо нӣйо йоᵸкъоцасна йикъаъас.
2Мизу ми вецци ова̄къа – бадло вецци овал эчаннейа,
дибола сикӀа гаьчӀел сукӀола сикӀа вецци овалалӀо ниса.
3Кьало йаькъкъо жо гей, мисона баькълъис,
амма аьбдаллидда̄ла мокъоцас балагь – бишун йаькъкъо йаькъ йахъца.
4Симо – гьалагаб жо гей, гьалаглъина – йоᵸкъойо эᵸхелъийо жо гей,
амма шаклъилаъкьа̄ бахъийа симал данде эчена ахъийо сукӀо сукӀод гей.
5Нисона аьйиб гуллолъи ахо гей,
лъо̄нна йикъаъцала рокьилагъа.
6Ваццаъкьа̄ лаьхъ йахъдана божилъи бугъаъас,
тушман баъдадана гьолцокьа божал ахъаъас.
7Оᵸх йоцӀийа сукӀол тӀотӀис нуцона никъалъца,
нувабакова̄л никъа̄на нийа̄ йикъеш.
8Сиᵸ йечаннегьна мекьейа мигьналилъ эᵸлъейо ахъца
гьинис билӀо йечаннегьна эᵸкьейо сукӀо.
9Маьгь кӀетӀа̄ бохана, магь нийа̄ йеᵸлълина йакӀо авадан йо̄с,
ваццас кӀетӀо йакӀо – гьолцо нилӀийа аᵸкълолаъ йикъеш.
10Дибо ваццана абос къайсадахъна бечабаннейа̄къа,
дӯкьа къарилъи йоᵸкъова водиъ истӀила къайбакьа эᵸкьа̄къа:
цӀихо гаьгьийа истӀигъа шеблаъ гаьгьийо мадугьан ижеш.
11Йе дие оьжо, аᵸкъилцой уьᵸхо-аьᵸхе ми, дие йакӀо рази йова.
До гъаьбахъа аькьелцала̄л жаваб нилӀна бахъца дӣхъа вагьалълъо мехлаъ.
12Шед-баьчлидой оᵸкъолъ, цӀодораб сукӀо балӀо гьидлакьа̄ эᵸкьеш,
амма кьолло сукӀо эченоцӀечӀе аьᵸйда̄ эᵸкьеш, бета балагьлиъна кези ахъца.
13Йагъа кьодос лъицӀо сукӀола сукӀос жо кьодо йохийа сукӀохъас;
багъа балӀо гулло къай сукӀола ахъхъас жо кьодо бохийа сукӀохъас.
14Хискьа къайкьа аьгъиъна, мадугьаллис раьгьатна бугъонна гьолцол баркат гулалалӀо нисона йукъо илӀела̄лъи йикъелца гьогцол наьъана нилӀийолъилаъ.
15СикӀо чикейо ахъо йеᵸлъейо йахъца
водо гугьцала водиъ гьоᵸсна йечечӀе ахатӀо гугьцала кьамалъ.
16Гьоло ахъо йечелал уьᵸхолъийо сукӀо эᵸлъейо ахъца
залӀо йеченуцӀлал, йана лъикко йеᵸлъ каъ йоьхал уьᵸхолъийа сукӀолъ.
17Килли кил ацӀкӀис,
инсанна инсалли ацӀцӀо о̄с.
18Легъилала хоьхил хъулухъ богьцала,
гьолълъокьа кьодос пихъ йуьᵸхъча,
гьинила бетӀергьаллил хъулухълиъ эчейа
лагълисна гьуьрмат бойчӀе гьихлъаъас.
19Лъи – инсаллис эᵸдо мотӀо бегацас цӀика гей,
йакӀона – инсаллила аьмал-хасиятлис цӀика гей.
20Журжагьна Жагьандаманна йовацӀаъцас жобо гей, инсаллис гьаьйна йоцӀаъас.
21Окколас гьаьл бикъелца цӀойла пирали,
меседлис гьаьл бикъелца цӀойла котакли,
инсаллис гьаьл бикъелца гьолцол ца̄ᵸ-рец богьна.
22Цобохналиъна гонна гендуралид ишелдана аᵸциъ эжена кьодо йал йолдана, аьбдаьллиъис аьнтлъи йолъаъас.
23Дибола бикьла̄л тимар ахо бова,
дибола рехъелла̄с тӀалабна бова.
24СудлӀо нисода бечелъи нитоназу гьихлъоцас жо гаьъа,
пачалис тажна къацӀцӀо наслолал ирслиъ йиᵸхъоцас жо гаьъа.
25ИцӀцӀо бох цӀицӀилӀас, бох-нахо гуцӀас,
ма̄ьда̄кьаш бох йагъогьна гьаьдур йогьна муьгъатта̄,
26ЛӀилейа̄ лъицӀол лъуᵸ ницца,
тӀига̄ йиᵸйасона, аьгь-маьчейа йовагьца.
27Цанна̄с гьиᵸ оьлча дул эсанна,
билӀос агьло богъанна, гъарабашла бегъабакӀанна.
Currently Selected:
Акълова 27: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
