Акълова 26
26
26 къаьм
1Азодо гӯва оᵸзилъна, муькъо йуьгьчала мехлаъ гӯва водилъна
йеᵸлъейо йахъца аьбдаллис къадро-къимат бо̄йолъи.
2Мигьна богицӀна мекьешлаъцой,
койдакӀо гьабода парбалӀонна богиццалаъцой,
вагьалла̄ аьйиб гаьчча сукӀокьа бо̄йо наьъана гьолцокьа кьодо бецаъас.
3Шугал – чурукь,
аᵸъул – каьчӀо,
аьбдаллила михъа̄л – цӀицӀо.
4Аьбдаллил гьолцола аьнтлъилакьа мелъейо жаваб нилӀа̄къа,
мизуна гьолцолъ эᵸлъейо ахъалаъ.
5Аьбдаллил гьолцола аьнтлъилакьа мелъейо жаваб нилӀа,
бетана – гьолцола йакӀил гицца жуна цӀодораб сукӀо гейлӀона.
6Аьбдаллихъа лъо̄лди цӀигьи йе̄ᵸйо сукӀо
эᵸлъейо ахъца гьинис хаьба̄ йуьвачӀийона балагь кьодо бокчийона сукӀолъ.
7Хаьба бишейо сукӀо лаьхъдайчӀе гьихлъаъас,
аьбдаллила сикӀаъ аᵸкъилаб кицина кьухъаъас.
8Йикьецас цӀулу-цӀаъа йиᵸцова сукӀолъ
эᵸлъейо йахъца аьбдаллис гьуьрмат богьцас сукӀо.
9Цихийа сукӀола каъ гаьгьийа хаьла-аьжа̄ кӀобалалилъ
мелъейо бахъца аьбдаллила сикӀаъ аᵸкъилаб кици.
10Йиᵸхъо-йаᵸхъа̄цо цӀулу тӀуццала сукӀолъ
эᵸлъейо ахъца иᵸхъо-аᵸхъийо аьбдал оьгьдаголал эжеллицас сукӀо.
11Гьинизу чӀалӀейо бек муьхъал во кьа̄ь вагьаклӀозу мицаъ гугьцалаъцой,
аьбдална гьинила аьнтлъилагъой кьа̄ь кӀаьйухона го̄с.
12Гьинилзу жу аᵸкъилабна цӀодорабна гейлӀо гиццас сукӀо эга̄д дул?
Гьолцоллагъа ахо йахъца аьбдаьллил.
13КӀаъабли нисос къатӀлиъ гъалбацӀ гейлӀо нисона,
къатӀлиъ лъаькъейо жанавар гейлӀо нисона.
14Аᵸц килла̄кьа кьодо кӀаьйлӀош,
кӀаъаб сукӀо мокӀолакьа кьодо кӀаьйлӀош.
15КӀаъабли ко̄ хаьтӀаъ йечанне̄ш,
амма кьа̄ь сикӀадой гьули йезал загьмат йахъца.
16КӀаъаблил йакӀил пикро бахъца
аᵸкъло нилӀна бахъцала алӀон сукӀогъа цӀодораб жу гейлӀона.
17СукӀола даьъба-йаьжиъ алӀокийо сукӀо эᵸлъейо ахъца гьицалкьа̄ лӀийахона мекьецала войс къонана аьᵸгъа̄ йовахцала сукӀолъ.
18Аьдамла̄л цӀойсна хеллисна цӀулува тӀуваццас къаьм кӀаьйлӀойо сукӀо эᵸлъейо ахъца
19мадугьал оᵸтӀоцасна бета гьоло махсара зукъойолӀо нисоцала сукӀолъ.
20Гьудо болъода цӀо йецца,
балӀо миц зогъаъда, даьъба-йаьже йолъос.
21Гьудо – цӀо йекӀелал гей,
гьа̄ьмо – цӀо йохал гей,
сикӀо чикейо сукӀо – даьъба-йаьже йовал гей.
22Мицахъаллис йаьжбо – энекзи ахъцалал бишун кӀетӀо кен гей,
лазатликьа йаьᵸчибацӀилца гьолцо гьолло̄л.
23Кьей йолъойо окко кьодо йе̄ᵸйо мизалила кӀеᵸйаᵸлилъ
эᵸлъейо ахъца сикӀо нийа̄на, йакӀо цӀодолона сукӀо.
24Гьаьликатли гьинис кешлъи нийа̄ сикӀад йуᵸцос,
кешлъи эᵸдо гаьгьийо йакӀона йахъца гьолцос.
25Гьолцола бихха каламликьа божа̄къа.
АлӀна къабигьлъи-къадарлъи йахъца гьолцола йакӀиъ.
26Ми гьокцол бо̄ва рецли симо муцона зогъда,
гьолцола йакӀиъ гаьгьийо кешлъи жамаъатлил йикъечӀе гьихлъаъас.
27СукӀол хъаранди йоьᵸтӀода жужу эᵸдо экца,
гердена кьода̄ йежеллида, кьа̄ь гаргийа̄гъа йеᵸкьейо гьули гьинилзу йеᵸхеш.
28ЙоᵸтӀолацала сукӀол йатӀаъас гьиниъкьа̄ зарал бахъцас аьдаьмла.
МатӀаъ рец богьцала сикӀа инсан лӀийо экилца.
Currently Selected:
Акълова 26: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
