Акълова 25
25
25 къаьм
Сулайбан пачалис аᵸкъилабла йаьжбо
1Гьула Сулайбанис баддо̄нна аᵸкъилабла йаьжбо. Ягьудиялила пачалила – Гьизкъиялила аьдамла̄ бадлохъас ча̄хна гьоллол.
2Иле Аллагьлил рец бо̄с, Гьолцо балъгоябна йуᵸцона гаьлълъо;
пача̄л рец бо̄с, гьолло балъгоябна гиса йагъолъ.
3Гьаса̄с гьоъо̄лъина, мицас гилъиллолъина,
пача̄ла йакӀкьа гаьгьийо жона гьоᵸссидинна йикъаъас.
4Йуᵸцолла окколаъас учузаб кил-мих йолъолда,
устарли гьолълъос хаьтӀа бахъилца.
5Лъаькъейо аᵸкълочи пачалидойс ата̄ охда, ритӀухълъи йижеш,
гьолцос тахна билӀакъос.
6Пачалидой аьᵸйда̄ дибо йукъолъи йегала̄къа,
букъа̄ сукӀоба бечейа мицаъна эца̄къа.
7ВагьалӀоъ гогьлӀо гьолцо нисойолъи ахо гей дул,
гьулиъ гаьгьийа̄ гьаькимла̄дой аьᵸйда̄кьа̄ олъо гьолӀоъослӀо нисона гьолцо инжит-гьаькъир огьцал.
8Судлиъ мизос даьъба гиса багъал эдеъзи ахъа̄къа,
дибола дандеябли ламус огьда, сийод ми йо̄с?
9Мадугьаллигъой даьъба бахълъо,
мизоъ эᵸдо гаьгьийо жо гиса йагъа̄къа;
10дӯхъа энекзи ахъийа мизу инжит-гьаькъир о̄слӀо нисона,
кӀетӀо ца̄на дудой тӀокӀаб кьа̄ь йоᵸкъаъаслӀо гицӀна.
11Гьинила мицаъ нисойо йаьже йеᵸлъейо йахъца окколала цӀараъбакьа кьухълал гулла меседлила гьаьйлилъ.
12Аᵸкъиллила аᵸкъло-малъилахъа энекзи ахъийас аᵸкъло мелъейо бахъца меседлила кӀоййалъ,
йаᵸцова меседлила рахасбалъна.
13Муькъо йуьгьчала водиъ, оᵸзила гьайрилалъ эᵸлъейаълъийо ахъца, жу э̄ᵸйа сукӀол божараб чапар.
Гьинила БетӀергьаллис йакӀо рази йо̄с гьолцо.
14Гьас-мус йоᵸкъойо, залӀо йикьейо, амма водо гуйэш –
гьолълъолъ эᵸлъейо ахъца нилӀал йакӀкьа гаьчча̄ сайгъатла нилӀаллӀо нисона икълашецас сукӀо.
15Сабруябли каламли гьаькимна бицдокӀца,
бихха мица лӀоᵸвана йишелца.
16Дул нуцо йиᵸхъода, гьули дул йуьᵸхъакъо̄долас йуьᵸхъа,
бетана гьолълъо дибо йакӀо сисих йе̄ᵸш, бек чӀалӀеллис.
17Мадугьаллидой тели ми эᵸкье-гова̄къа,
бетана тели эᵸйакьейахъа гьолцол ми чӀаръин ахъца.
18КӀондахийалъна, балъайалъна, аᵸцӀцӀо цӀулалилъна –
вагьаллолъ эᵸлъейо ахъца мадугьаллил данде оᵸтӀолана нуьълъи йогьцас сукӀо.
19КӀокӀова силалилъна бишейа хаьбалалъна –
вагьаллолъ эᵸлъейо ахъца къарилъи йоᵸкъова водиъ иᵸхъаъцала сукӀокьа божийолъи.
20ЙаьчӀчӀа водиъ сукӀокьас лъицӀо йагъоцала сукӀолъна,
гьула̄зу судалиъ эᵸдо къанцӀа гитӀийа аьдамлилъна
эᵸлъейо ахъца йакӀо пашманлъилаъ гаьгьийа̄л кечӀ илӀецас сукӀо.
21Дибо тушман нукона зогъда баьба нилӀна огъа,
гьули лъи йатӀна угъос зогъда оьлчал лъи туха.
22Вагьалълъоъкьа̄ гьолцола къаьмкьа кьодо ми гъадрийа гувалца.
Бета БетӀергьалли дул гьолълъос кири чахча.
23Оᵸкъаъда̄кьа йикьецала залӀи водо йакъос,
мицахъаллила мица аьдамла̄ш мотӀова хъимабакӀца.
24Кьамала кьохъкьа оьмро бо̄йолъи ахо гей,
сикӀо чикейа ахъхъагъой къацӀо сид билӀоъ эчейагъа.
25Аᵸхъа̄йа сикӀо-йислил йаьчӀчӀо лъилъийо жо гей
цӀихода̄кьа мокъоцас кӀетӀо хабар.
26ГъаьгъатӀокӀийо лъӣлъ, бугъова тагьризлилъ#25:26 Тагьриз – гуцӀойо лъи йоьхчаш гилъилло хъаранди (колодец).
эᵸлъейо ахъца лъаькъейа сукӀол гьино ниццас муъмин-сукӀо.
27Тели нуцо йуьᵸхъийолъина кӀетӀо жо гаьъа,
дӣс рец-бакъ гьинил мизийолъина кӀетӀо жо гаьъа.
28Со̄ᵸгъой гаьгьийо йоᵸсо йугъолла шагьарлилъ
эᵸлъейо ахъца гьинил йогъо гунна йахъаъцас сукӀо.
Currently Selected:
Акълова 25: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
