Акълова 24
24
24 къаьм
Кици 19
1Чикейа̄ аьдамла̄д йакӀо йагъолла̄къа,
гьоллогъой гьалмагълъина йова̄къа.
2Гьоллола йакӀиъ зулмова̄ъ бади жо гаьъа,
гьоллола сикӀана сукӀол кешлъиласса̄ъ бади жо нисаъас.
Кици 20
3Аᵸкъиллъила билӀо гулца,
цӀодорлъилана гьолълъол бигъа гулца.
4Илмо-лъайлина гьули батӀ-батӀаябли къиматаблина къанаъатаблина жойлас йоцӀилца.
Кици 21
5Аᵸкъилаб сукӀо къуватаб ахъца,
илмо-лъай гаьгьийас гуч дӣслъис.
6Рагълил эгъал нуцӀода, аᵸкъилабла̄хъа энекзи ахъал нуцӀос,
аᵸкъилла телибалъийодола тушмалла̄кьа бийажейолъина йикъейозу жо гей.
Кици 22
7Аᵸкъиллъилал аьбдаллис ко̄ йоᵸкъойхъаъас,
будакӀаллиъ нисал хабарна гьолцос бахъаъас.
Кици 23
8Кешлъи йовал йакӀкьа гаьгьийа сукӀохъа питна-кьаллис сукӀолӀо нисос.
9Аьнтлъила бахъилла пикрола мунагьлиъ кьисабас,
йаьгь-ламус гаьччо сукӀо аьдамла̄л эга̄нна атӀаъас.
Кици 24
10Йукъо къарилъи-балагь йоᵸкъова водиъ чучзи ахъда,
йилӀа мукъсанабба̄ъ къуват зукъона гаьъа дӯъ.
Кици 25
11Бийакьал бейажецас аьдамла хъосар бовагьа,
бийакьецасана хеллиъис тиса ба̄гъа.
12Вагьли илол икъаъас зукъойолӀо ми нисодана,
дибола йакӀис гьаьл бикъелцалал йикъаъасди Гьули,
дибо руьгь цӀуми богьцалал йега̄ъасди,
Шибаблила ишла̄кьа гаьъад Гьолцо битӀараб гьоькмо богьцас.
Кици 26
13Ми, дие оьжо, нуцо йуьᵸхъа, –
тӀотӀила нуцода йис-йакӀо нийакӀца.
14Гьолълъолъ йеᵸлъеш дибола къаьмис аᵸкъиллъи.
Дул гьули йиᵸхъода, хисала водкьа гьоло дибо кулна аьдада бугъаъас,
дул йатӀийо жона йахъца.
Кици 27
15Къачагъцой, муъмин-сукӀола кавлидой уᵸцолана эᵸкьа̄къа,
раьгьатлиъ гьули гаьгьийа мицалъна ми ко̄ йеᵸхела̄къа.
16АлӀовахна къе̄ экдана, муъмин-сукӀо кьа̄ь аьгъиъца,
амма лъаькъейа сукӀоба̄ букъо балагьна мокъона бейакца.
Кици 28
17Дибо тушман къе̄ экда, ми рази ахъа̄къа,
гьолцос хаьба хих тӀудда, гьоллъокьана йакӀо цӀилӀа̄къа.
18Бетана БетӀергьаллил гьули йегас, Гьолцола йакӀил оьлаъаш,
гьула̄зу дибола тушмалликьа Гьолцос зукъойо симона болъос.
Кици 29
19Кешлъи йогьцала̄хъа говацӀона симо бийа̄къа,
гьаькъирлъи йакӀиъ гаьгьийа̄д йакӀо йагъолла̄къа.
20Чикейа сукӀос хисала водкьа кул къабул бахъаъас,
лъаькъейа сукӀоба̄с канлъина йедна йолъос.
Кици 30
21БетӀергьаллихъа гьичӀе, дие оьжо, пачалхъана гьичӀе,
питна-сукӀоба̄гъойна къацӀо эца̄къа.
22ЙакӀкьа гаьчӀелла̄ъ питна-сукӀоба̄кьа хел мокъос,
йакӀкьа гаьчӀела мехлаъ гьоллокьа БетӀергьаллина пачалина балагь мокъолца.
Аᵸкъилабла̄с баддо̄нна аᵸкълова
23Гьула аᵸкъилабла̄с баддо̄лна аᵸкълова: суд йо̄слаъ аьᵸйда̄-муьгъалӀ говацӀона гьоькмо бо̄йолъи кӀетӀо жо гаьъа.
24Аьйиб гаьгьийахъа ми битӀараб гейлӀо нисоцалал халкъила наьъана ницца,
аьдамла̄на нисос гьолцол наьъана зогъалалӀо нисона.
25Аьйиб гаьгьийал битӀун гьоькмо богьцалас иш ахо бахъца,
кӀетӀо баркатна мокъос гьолцокьа.
26БитӀараб нисона ниццас жаваб – сикӀакьа баълӀо̄лъи гей.
27Аьгьбаъ гьаьлтӀина лъикъона, мицалъ муькъона йиᵸжена муьгъатта̄ гула билӀол бигъа.
28Мадугьаллил оᵸтӀолана нуьълъи йова̄къа,
дибола йаьжла̄д аьдамла моватӀа̄къа.
29Гьогцо дил йо̄йо кешлъи до гьогцолна йоваллӀо нисона,
гьокцо йо̄вас къисас бокчислӀо нисона ниса̄къа.
30До эᵸкьеш зукъойо кӀаъаб сукӀола мицадой шеблаъкьа̄,
гьула̄зу аᵸкъло гаьчча сукӀола венахийадой шеблаъкьа̄.
31Гьула вагьлиъ тӀитӀас ван йахъна гей,
на̄назу чӀагь йеᵸкьена, со̄ᵸгъой йо̄йо кьалис йоᵸсона йугъонна гей.
32Гьоллохъа говацӀона йакӀил асар бахъийо,
хал бо̄лъ дил гьули дарслъилаъ йахъийо.
33Даьгьабба̄жана уьча̄хаш, даьгьабба̄жана гьаьйда йиᵸйацолас,
сидкьа гьоᵸсо ко̄дана гуванна йоькькьаша̄жана утӀна эцас ми, –
34вагьалълъо мехлаъ, къачагъцой, йоᵸкъас дудой мискинлъи,
лъаькъейо сукӀоцой, йоᵸкъас дудой язихлъина.
Currently Selected:
Акълова 24: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
