Акълова 23
23
23 къаьм
Кици 6
1Халлигъой къацӀо эсцалаъ, ми ахо гоцӀохъ дудой аьᵸйда̄ сийо гуллахъана.
2Оᵸх чикейо сукӀо ми зогъда, дибола йислиъ цӀитӀ хаьлӀа.
3Гьолцола бесал гулла гемоябла ниъматла̄кьа кул бова̄къа, ми оᵸтӀоцас кен гей гьули.
Кици 7
4Бечед ахъаллӀона ми икье-аькьа̄къа,
оьрхъилаъас гисакечӀе гьихлъал нуцӀос ми.
5Дибо гьаьй йеᵸхейоназу бечелъи аьᵸйда̄ш йоъца –
гьабода йа̄хъилца гьолълъо, цуᵸгьацойна гьасаъ йогицца.
Кици 8
6Гьаьй хоькӀкӀа сукӀос баьба муьхъа̄къа,
гьолцола ниъматликьана кул бова̄къа.
7Гьинхъас йеᵸкьецала харжлила пикрола̄кьа нитоназу гьули ахъца.
Йуьᵸхъ-хулӀалӀо нисос, амма гьолцос йакӀо дудойс цӀихода̄ йахъца.
8Муьхъийа баьбалаш лукӀмана бек чӀалӀена гиса гувас,
гьолцол нийасова̄ дибозу гьеренабла йаьжбона аьдада йа̄хъца.
Кици 9
9Аьбдаллихъа икълаша̄къа, –
дибо аᵸкъилабла йаьжбо гьолцо инжит-гьаькъир йовагьца.
Кици 10
10Аьᵸйд гулло оьрхъи-бигъа бадо̄цо хуьжа̄къа,
бестӀалла̄ла мицалъна эᵸкьа̄къа.
11Гьоллос рахъ бохцас Къудратаб Аллагь гей,
дул данде диваллинна аьгъиъца Гьули.
Кици 11
12Аᵸкъло-насигьатлидойл йакӀо эдеъзи йова,
аᵸкъилабла йаьжла̄л аьᵸгъа̄на эдеъзи йовагьа.
Кици 12
13Оьждил адло бойчӀе бечаннейа̄къа,
ми цӀицӀолид аькьеллолӀо нисона гьули угъаъас.
14Ми гьули цӀицӀолид аькьелца, –
гьолцос руьгьна журжагьлиъис хъосар бахъас.
Кици 13
15Йе дие оьжо! Дибола къаьмиъ аᵸкълона цӀодорлъина йахъда, дибола йакӀиъ рохелна бахъца.
16Дибола сикӀа битӀун нисослаъ, диела къацӀцӀа магъоъ рохел телилъца.
Кици 14
17Мунагьла йовагьцала̄кьа дибо йакӀо йагъола̄къа;
нитоназу БетӀергьаллихъа гьичӀена эцал гьаьракат багъа.
18Гьоᵸс водо йоᵸкъоцаслъи гьаькъкъаб гей,
гьолълъол гаьгьийо дибо кул аьдада бугъаъас.
Кици 15
19Дӣхъа энекзи ахъ, дие оьжо, цӀодорлъилаъ эᵸкье-гогь;
дибола йакӀил йатӀна, йаᵸкъойцӀо̄ гьинона кьодос гьакӀа.
20Цихцал гъино хулӀоцала̄гъой къацӀона эца̄къа,
холод оᵸх йоцӀилцала̄гъойна къацӀо эца̄къа.
21Хувадагина, эсахона мискиндобалъца,
малӀо йилӀа йатӀийа̄на дӯкьа кьодо кьакь-макьало лъицӀо лъичӀелца.
Кици 16
22Дибола абохъа энекзи ахъ: гьолцохъа ахъийо оьжо гей ми,
ицлолъа̄лъо ийохъана гоцӀохъечӀе эца̄къа.
23РитӀухълъи ми йиᵸсона йоха,
аᵸкъиллъина, илмо-лъайна, аᵸкъло-насигьатна мисал ми уьᵸхолъа̄къа.
24Муъмин-сукӀо або йилӀа рази о̄с,
цӀодораб оьжо ахълъо гьолцокьана рази ба̄хъца.
25Ийо-або рази ба̄хъала дӯкьа, ми о̄ва̄на рази ба̄хъала.
Кици 17
26Ми дибо йакӀо дидойда̄ йуьᵸхола, дие оьжо,
до йегалло гьинолхъа гувабацӀала дибо гьаьйда.
27Дул йикъе: хъаьгьба йахъца гилъилло хъарандилъийо аьдам,
сукӀос ахъона йахъца гилъилло куво
28Гьолълъо, къачагълицой гьино йохца,
аьдамла̄ъ эᵸдо мунапикълана телибакӀца.
Кици 18
29Огь-агьлӀо нисона сукӀод зигардизи ахъца?
Пайда сийодлӀо нисона лъод нисос?
Даьъба-йаьже лъойсди йахъца?
Ийана макъо лъод йагъос?
Аьдада лаьхъла гувалал лъо̄лди йа̄цца?
Гьаьйда лъойсди цӀудобалъна йа̄хъца?
30Вагьли йахъца нише йалӀохъовадда̄кцал къе̄на бечена гъино хулӀоцала̄с,
ицӀцӀо гъино нӣйо гаьгьийона хал бовал гӯва̄с.
31Гъино дул кӀетӀо бикъа̄къа, гьоло цӀуддо бахъдана,
кӀотхолаъ гьоло бабалолъдана, бигьазу хулӀона мекьеш зогъдана.
32Бета гьолълъо бекелалицой сила гулца,
цӀодола бекелалицой гьолълъо загьруна чӀалӀеш.
33Дибола гьаьйда̄дой аьᵸйда̄ тамашаябла жобо йа̄хъца,
къаьмиъна йиᵸхъо-йаьхъийа̄ пикрова йоᵸвакъос.
34Ми ахъца ралъадбаъ алӀлӀода̄,
гамалила рулликьа кьодо уьча̄хейаъцой.
35«До зукӀна гей – кӀокӀоллеэш,
дил баькьенна гей – лаьхъла йийакъаъас.
Суд до хулӀоваъас лъуьълӀаъаш, дил бадина хулӀал жо йатӀна гей», – лӀо нисос.
Currently Selected:
Акълова 23: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
