Лука 1
1
Лука ме̄йо Рохеллис Хабар
(Иса авараглис хабар)
1 къаьм
Байбикил
1-2Илоъ эᵸдо йахъийо шинаб жо, аьᵸйдда̄кьа бехъхъа йега̄йа̄на Каламлил хъуллухъ богьцала̄на йеᵸйагьийа̄ хабалла ча̄хал муьхобалъна зукъойо тели аьдамла. 3Вагьалълъобза, муьгьканлъилаъ вагьалъос нисол-илӀена, гьихъхъалакьа̄ къацӀцӀо йахъийа жойлас дул чахал гьоькмо бахъийо диена, гьуьрмат кьодда̄с Теофил, 4дул малъзи йо̄йо шинаб жо гьаькъкъаб гаьгьийакьа дибо йакӀо йоᵸкъалъгъа.
Закариял Рохеллис Хабар тухъийо
5Гьерод Ягьудиялиъ ханлъилаъ гаьгьийа замаллиъ, зукъона гей Абия тухумлис#1:5 Кашишла̄с гьоᵸсцойс тухум. ЗакариялӀо нисоцас гьоᵸс кашиш. Гьолцос ахъона зукъойо Гьарун авараглила наслолас аьдам. Гьолълъос ца̄ᵸна зукъойо Элисабет. 6Гьолло̄л къонана зувакъона Аллагьлис ма̄цова валийа. БетӀергьаллис къацӀцӀо амрона, муъмин-лагъликьа тӀаддаб жона йакӀо нилӀна йова̄гьийо гьолло. 7Амма гьоллос къова зувакъеэш. Элисабет зукъона къова ба̄хъаъцас аьдам. Гьолло̄л къонана зувакъона мех мекьейа̄ сукӀоба.
8Гьоᵸс водолалъ Закария, гьидела тухумликьа ирга мокъолъ, Аллагьлил хъуллухъ богьцас зукъойо. 9Кашишла̄ла аьдатликьа гьолцокьа цӀула йоᵸкъойо БетӀергьаллила билӀоъ эᵸкьена маьгь нийа̄ боха̄с готӀ мейал. 10Вагьли йогьцалаъ, гисда̄ гаьгьийа къацӀцӀола аьдамла̄ какла йовагьийо. 11Вагьалълъо мехлаъ Закариял эга̄л итӀилло Бичаслис малаик. Малаик эчейо маьгь нийа̄ боха̄с готӀ богьцала хирияб мицала кӀетӀакьала рахълиъда̄. 12Гьули эгалъ, Закария гьаьгьелъна гьихлъойо ва йилӀа гьиᵸчӀейо. 13Малаикли гьолцохъа нисойо:
– Ми гьицӀа̄къа Закария, Аллагьлил дибо гьари-доьъа тухъийо. Дибола ахъхъа, Элисабети, дул оьжо о̄с. Ягья гула ми оьждикьа ца̄ᵸна. 14Дул талигьна рохелна бахъца, тели аьдамла рази ба̄хъца гьули ахъийакьа, 15судлӀо нисода БетӀергьаллидой аьᵸйда̄ гьули кьодда̄с ахъца. Гьолцо гъинона чӀаъана хулӀаъас. Ийола оᵸхаъзу Илагьияб Ругьлис оцца. 16Израиллис телида̄с аьдамла гьолцо гьидела БетӀергьан Аллагьлилъда̄ муьвахолча. 17Иляс авараглислъийо къудратна гьаьлкӀолъина бахъна оᵸкъос гьули Гьокцогъа аьᵸйда̄: ийо-абосна къовасна сидил-гьоᵸсо йакӀодана йуьᵸвахолал, Аллагьликьа мутӀиъ бахъаъцасна муъмилла̄ла гьинолкьа мокъолал, Кьодда̄с оᵸкъолъол халкъ гьаьдур бовал.
18Закария малаиклихъа нисолло:
– Лъинкьад дил вагьли йикъеш? Дона ицлолъна гей, дие ахъона мех мекьейо аьдам гей.
19-20Малаикли гьолцол жаваб нилӀийо:
– До гей Аллагьлидой аьᵸйда̄ гаьгьийо Жабраил. Гьолцо эᵸгьна гей дӯхъа икълашанна рохел нисанна. Гьинила замаллиъ йахъцала до нисова йаьжла̄кьа божаъалъ, гьуна же дул йикъе, дибо йаьже йохца, дӯхъа гьоьшшона нисона йахъаъас, до нисойо жо йахъцал.
21Вагьалълъо мехлаъ халкъ гисда̄ гувабацӀона бечена зукъойо Закария оᵸкъаллахъа. Суле Аллагьлила билӀоъос гиса говаъаслӀона гьикмат ба̄хъна зувакъойо гьолло̄л. 22Гиса оᵸкъолъ, Закария халкъилахъа икълашена ахъеэш. Гьоглол биджи йахъийо Аллагьлила билӀоъ гьолцол Аллагьли илгьам#1:22 Илгьам – Аллагьли тухъал (йикъал) йитӀилло йаьже. гуллолъи. Гьолълъогъа муьгъатта̄ гьоглохъа ко̄да̄д ишан богьна икълашейо; Закария йаьже йохна гьихлъойо. 23Аллагьлила билӀоъ хъуллухъ богьцас водбо йовалъолъ, Закария билӀогъа эᵸкьейо.
24Ласона гаьчӀел гьолцос ахъо Элисабет оᵸх гаьгьийо йахъийо. Лъина боцо мекьецал, гього аьдамла̄ъ гисакеэш. 25ГьоглӀо нисос зукъойо:
– Гьуна, вагьла̄ йогьна гей Кьодда̄ла БетӀергьалли, вагьалло водла̄ъ дӣхъа гьаьй йеᵸхелло аьдамла̄ъ эᵸдо дӣкьас рогьона болъонна#1:25 Аллагьли цӀоб гулечӀе къова ба̄хъаъалъ, ийола̄кьа рогьо мокъос зукъона..
Жабраил малаикли Мариянхъа Рохеллис Хабар нисос
26Илънасла бицоъ Галилейлила Назарет шагьарбаъ, 27Давудила наслолала УсуплӀо нисойо сукӀол йоᵸкъал гьаьдур йо̄йо киббадой Аллагьли Жабраил малаик э̄ᵸш. Гьолълъо киббасна ца̄ᵸ зукъойо Мариян. 28Малаикли эᵸдокна нисос:
– Рази йахъ, Аллагьлис баркат михъойо! БетӀергьан Аллагь дӯгъой гей.
29Нисова жойлакьа гьайран йахъна гьихлъойо гьоло, вагьло сийо саламди бахъал нуцӀослӀо нисона.
30– ГьицӀа̄къа Мариян, – лӀо нисойо малаикли гьолълъохъа, – Бичаслис раьгьмат михъойо дул, 31Гьуна, ми оᵸх гаьгьийона йахъна дул оьжо ахъца. Иса гула Гьолцокьа ца̄ᵸна. 32Ца̄ᵸ йеᵸкьейо сукӀо ахъца Гьолцоъкьа̄. Кьодда̄лас ОьжолӀо нисас Гьолцохъа. БетӀергьан Аллагьли Гьули Давудила – гьинила абола#1:32 Гьолцола наслолас або Давуд авараг зукъойо. – тахликьа#1:32 Тах – ханлъилас къо̄ (трон). голца. 33Гьули ахъца нитоназу Якъубила халкъилал пачалъилаъ, ханлъина гьолцос гьоᵸсна йолъаъас.
34Марияни малаиклихъа нисолло:
– Ахъо йеᵸкьеэшла дил нигъад вагьли ахъца?
35Малаикли жаваб богьна нисос:
– Илагьияб Ругь мокъос дӯкьа. Кьодда̄лала гьаьлкӀолъилас гьидоци йахъца дул. Вагьалълъобза гьолцо къовахъа илагьиябна Аллагьлис ОьжоналӀо нисос. 36Гьуна, дибо аьгарай, къова ба̄хъаъцаслӀо нисоцас Элисабетна, же ицлолъа̄лъо оᵸх гаьгьийо йахъийо. Гьолцо къовал илънас боцо гей, 37Аллагьлихъа йахъаъцас жо гьоьшшона гаьъа.
38Бета Марияни нисойо:
– Гьуна, до БетӀергьаллис лагъ гей! Ми нисогъа йахъала дил.
Бета малаик гьолълъодойс оьчойо.
Ахъо-къова Мариян Элисабетила билӀоъ
39Лади водла̄ъас эдеъзи йахъна Мариян йеᵸкьеш Ягьудиялила ма̄ьда̄ла улкалиъ гаьгьийа шагьарбаъ. 40Закарияла билӀоъна эᵸдокна, гьолълъо Элисабетил салам бо̄с. 41Мариянис салам тухъийоназу, Элисабетила оᵸхаъ гаьгьийо къова лахдас, гьоло Илагьияб Ругьлис йоцца. 42Бета гьолълъо йукъо тухъинна нисос:
– Барка дул, Мариян! КъацӀцӀа̄ ийола̄ъ эᵸдо же ми баркат михъойо йахъийо. Баркат гаьгьийо гей дибола оᵸхаъас къова. 43Дӣгъа Кьодда̄лас ийо дӣдой йоᵸкъойо – на̄сди дил вагьдо баркат! 44Гьуна, дибо салам дил тухъийоназу, цӀилӀона диела оᵸхаъас къова лахда̄йо. 45Гьолълъокьа божийо ми гьардараб гей, судлӀо нисода БетӀергьалли дӯхъа нисойо жо йахъца.
Мариянис рец-бакълис кечӀ
46Марияни нисойо:
– Диела йакӀи БетӀергьан кьодда̄кӀца,
47ЦӀилӀона гей дие ругьна диела Аллагьли тиса багъоцалакьа,
48СудлӀо нисода гьаьй йеᵸхелло гьинила пакъираб лагъликьа.
Гьуна, дил баркат михъолъ желагъа муьгъатта̄ къацӀцӀола агьлова̄ дил рец бовас,
49ГьаьлкӀолъи йо̄лъ дил Къудратаб БетӀергьалли.
Гьогцос ца̄ᵸна илагьияб гей.
50Гьинхъа гьийабачӀецала агьло-агьлола̄кьа раьгьмат гулца.
51Гьинила кад къуватабла ишла йовагьийо.
ЦацакӀзи бовагьийо йакӀо чӀугьарабла аьдамла.
52Гьогцо залимабла – тахла̄кьас тӀуватӀийо, пакъирабла – кьоддаба̄кӀийо.
53Нувабакова̄л гьолцо кӀетӀо шинаб жо нилӀийо, бечедабла гьоьшшона гаьчӀел меццабакӀийо.
54-55Гьолцо комак бо̄йо Израиллила халкъилал – гьинила лагъла̄л;
Аллагьлил йакӀкьа гей илла умумаллил – Ирбагьинил, гьолцола къавмалил абадул-абадийалъ раьгьмат бовал нисойо къутӀи.
56Гьулиъ лъаналъийо боцона багъона, Мариян кьа̄ь билӀогъа йеᵸкьейо.
Ягья ахъийо
57Мех мокъолъ, Элисабетил оьжо ахъийо. 58Аллагьли букъо гургьел богьна гьолълъол оьжо ахъийо тухълъо, гьолълъогъой мадугьаллана аьгарлъина рази бахъийо. 59БелӀнасла водиъ оьждил суннат бовал мокъова̄ сукӀоба̄л йатӀийолӀо абокьацой оьждикьана Закария ца̄ᵸ гулал#1:59 ЖугьутӀаллис аьдат гей оьжо ахъна белӀнасла водиъ суннат богьцас; вагьалълъо водиъ ца̄ᵸ гулцас аьдатна зукъона гей гьоглӀо замалла̄ъ.. 60Амма ийо нисойолӀо оьждикьа Ягья ца̄ᵸ гулал нуцӀослӀо нисона. 61Вагьаллийо ца̄ᵸ гаьгьийо сукӀозу гаьъа дибола аьгарлъилаълӀо нисойолӀо гьогло гьолълъохъа. 62Бета ко̄да̄д ишан богьна абохъа нисолло оьждикьа нӣйо ца̄ᵸд гулал дул йаццалӀо. 63Гьоᵸс кьокькьона йакъоллина Закария гьолълъокьа кьодо чахийо: «Оьждикьа Ягья ца̄ᵸ гула». КъацӀцӀа̄ аьжаиб ба̄хъийо. 64Йаьже йохийо Закария вагьаллиъисзу Аллагьлил рецна богьна икълашал уьᵸхолъийолӀо. 65Гьулиъ со̄ᵸгъой гаьгьийа̄ аьдамла йилӀа гьийабачӀейо; вагьло хабар Ягьудияллила къацӀцӀа̄ ма̄ьда̄кьа митемекьейо. 66Вагьло хабар тухъийа̄ пикро бо̄с зукъойо:
– Нӣйо сукӀод ахъал вагьакцо оьждиъкьа̄, – лӀо нисона.
Зукъанна Бичаслис гьаьлкӀолъи зукъона гей гьокцоъ.
Закарияс рец-бакълис кечӀ
67Илагьияб Ругьлисна оцӀна, Ягьяла або Закария, Аллагьлила каламликьа нисос:
68– Букъо рец БетӀергьаллил, Израиллила Аллагьлил, судлӀо нисода, Гьогцо оᵸкъона Гьинис халкъ тиса багъойо. 69-70Гьогцо гьехзу, гьинила илагьиябла аварагла̄ъкьа̄ илол йоᵸкъолал кьодо йохийо хъосарлъи жейса йоᵸкъойо Гьинис лагъ Давудила билӀоъкьа̄. 71Аллагьли нисойо вагьда̄: илла тушмалла̄кьасна, къацӀцӀа̄ иле ба̄тӀаъцала̄кьасна хъосар боваллӀо. 72-73Илла агьлолал кьодо бохийо раьгьмат бованна, вагьла̄зу Гьинис илагьияб бугъаъцас къутӀина илос або Ирбагьинил нилӀийо гьа̄на йакӀкьа йоᵸкъолална. 74Аллагьли нилӀийа къутӀилакьа зукъойо нисона иле тушмалла̄кьас хъосар бо̄слӀо, бета Гьогцол гьийабачӀечӀе ибадатна бо̄слӀо. 75Нитоназу илла оьмролаъ Аллагьлил ибадат бовал Гьогцос ма̄цова̄ валийацойна ба̄хъна. 76Мина, Оьжо, Бичаслила авараглъилаъ бикӀзи овас, Ми э̄ᵸш Кьодда̄ла гьингъа аьᵸйда̄ Гьинил гьино йеᵸлъелал, 77Гьинила халкъилал хъосарлъи – мунагь-гьаькълиъис гьогго̄л ма̄цолцаслъи – нисал, 78Бичаслила гилъилла раьгьмола мехелло бохъ кьодда̄кьа мокъос илол, 79колӀлӀаъна хеллила гьидоцилаъна бечейа̄л бахъалъгъа, илос хаьба̄на рекъеллила гьинолкьа йеᵸйагьалъгъа.
80Ягья укълъис зукъойо, аᵸкъло-лъайликьа оᵸкъос зукъойо.
Израиллила халкъилал ваъзалил аьгъиъцал, гьолцо оьмро бо̄йо боьчӀчӀа авлахълиъ.
Currently Selected:
Лука 1: KapPROLUK
Highlight
Share
Copy
Want to have your highlights saved across all your devices? Sign up or sign in
© Библия таржама йогьцас Институт, 2005 (PRO)
© Басмалаъ йагъойо Библия таржама йогьцала Институтли, 1999 (LUK)
