Mark 6
6
Pɨ twuunə̀ a Yěsû a Nazarètə̀
(Mat 13.53-58; Luk 4.16-30)
1Yěsû pobə ɨ̀zùŋə̀ ndzùmə̀ ɨ̀pe tyiʼə̀ nfurə̀ alyiʼə ghu ndèrə̀ a Nazarètə̀, a àlaʼà pobə. 2A gha mbə njyə̂ àlaʼà pɨ̀Jew, â lèrə̀ a ndâ àshwatə̀ pobə mmə nnèrə̀ mɨ̀nwùə̀ ghu. A lə̀ lanə mbə tyiʼə̀ ànwùə̀ yè yerə̀nə yerə̀nə ambo pànə̀ nɨ pɨ lə̀ pənə ghu mmə ndzuʼù mɨ̀nwùə̀ myə̀ nɨ a lə̀ mənə nnèrə̀, ntyiʼə̀ mbyiitə̀ pobə nɨ pobə lo, “Ŋònə̀ wə̀ à lòo mɨ̀nwùə̀ mə lə ɨghə? Mbuurə̀ àzhìʼtə̀ zə̀ ɨ̀ furə̀ lə ɨghə? Nɨ̀ zəənə̀ mɨ̀nwùə̀ mɨ yerə̀nə yerə̀nə nɨ à ghɨ̀rə̀nə! 3Ka lə a pə e kapɨndà wa, moonə̀ Màriyà, mbə momaa Jemə̀ nɨ Jòsebə̀ nɨ Yudà nɨ Shimùnə̀? Ka pɨ̀momaa ɨ̀pe pɨ pə̀ngyə̌ pə a ghobə a nɨ̀ghə̂ pə̀ənə̀ pɨ pobə?” Pobə shwəŋə̀ a lenə la ndzùŋə̀ mbìʼnə̀ a nɨ zaŋə̀ a loŋə pobə pɨ pobə.
4Yěsû a shwəŋə̀ ambo pobə lo, “Pɨ pa nguʼtə̀ a ngàŋə̀ ntwuumə̀ Nẅùə̀ alyiʼə àtsùmə̀, la ka mə ghuʼtə̀ e a ye amwuə àlaʼà àzobə, kə̀ amwuə ngẅàrə̀ pobə, kə̀ a ɨmwuə alyiʼə pobə.”
5Ka a lə̀ chi ngɨ̀rə̀ mɨ̀nwùə̀ mɨ yerə̀nə yerə̀nə mɨ̀tse alyiʼə ghu ndàŋə̀ e tsaʼnə a lə̀ nùŋə̀nə mbô ɨ̀me aŋunə ndùnə̀ pɨghoonə pɨ̀tse mbarə̀ a ghobə. 6A lə̀ lanə ntsàarə̀ a Yěsû amwuə ndwuumə̀ nɨ ka pànə̀ pə lə̀ pə a ghobə nɨ àpyiimə̀ ntɨŋmə̀.
Yěsû a twuumə̀ ngàŋə ntwuumə̀ ɨ̀ze ntsòbə̀ ɨpaa
(Mat 10.5-15; Luk 9.5-6)
Yěsû a tyiʼə̀ nfurə̀ ngyìinə̀ nchwìitə̀ ntwuumə̀ amwuə ɨ̀laʼà nɨ pənə a nɨ̀pwùnə àlaʼà àzobə.
7À lə̀ fuŋə̀ ngàŋə ntwuumə̀ ɨ̀ze za ntsòbə̀ ɨpaa a alyiʼə moʼo ntsàa a ghobə a àpyìinə pɨpaa pɨpaa, ŋŋâ a ghobə nɨ ɨ̀tɨ̀ŋnə̀ lo pobə fuukə̀ ɨ̀zhwùə̀ tɨ̀pòŋə̀ amwuə pə̀ənə̀, 8nshwəŋə̀ ambo pobə lo, “Kò nɨ̀ lòo a wɨghə àzwuumə̀ àtse aŋunə àkwùə̀ nɨ̀yìinə̀ zə̀; ndàŋə̀ e mɨ̀mbàŋə̀ ɨ̀mɨghə. Kò nɨ̀ lòo a wɨghə àpaanə̀, kə̀ àpàamə̀, kə̀ nkɨ nchyâ nkabə̀ amwuə ɨ̀pàamə̀ ɨ̀pɨghə. 9Nɨ̀ ẅî ɨtabə, la kò nɨ̀ twuʼtə̀ a wɨghə a pɨ̀tse ɨtsəʼə.” 10A lə̀ chi nshwəŋə̀ ambo pobə lo, “Nɨ̀ pəla ngə̀ alyiʼə àtsùmə̀ nɨ pɨ kẅiirə̀nə a wɨghə, nɨ̀ nwuunə̀ amwuə ndâ ghu tə mbyàa nkwùə̀ nɨ nɨ̀ ghǎ myàʼtə̀ alyiʼə ghu lèrə̀. 11Nɨ̀ tə mbəla nkwuunə̀ amwuə mbòmpə àlaʼà nɨ ka pɨ kẅiirə̀ e a wɨghə, kə̀ ka zuʼnə̀ e a wɨghə, nɨ̀ myàʼtə̀ alyiʼə ghu nkwùrə̀ àpùbə nɨ a pənə a mɨ̀kwùə̀ pɨghə ndèrə̀ a wɨghə. Zèrə za a pə tsaʼa àlènə̀ a nɨ nèrə̀ a ghobə lo ka pobə ghɨ̀rə̀ a ghobə ànwùə̀ yè ɨ̀shìʼnə̀.” 12Pobə lə̀ tyiʼə̀ nfurə̀ ndèrə̀ nchwìitə̀ ntwuumə̀ lo pànə̀ pə̀ŋə̀ mɨ̀ntɨŋmə̀ ɨ̀mobə mmyàʼtə̀ a tɨ̀pòŋə̀ ɨ̀ghobə. 13Pobə lə̀ fuukə̀ ɨ̀zhyə̂ pɨ̀noʼnə amwuə pobə, ndzoʼò mɨ̀ghurə̀ aŋunə pɨghoonə pɨ̀noʼnə mbarə̀ a ghobə.
Tsaʼnə Jònə ngàŋə̀ àŋâ àkẅiirə̀ nchyə à lə̀ kwɨghə̀nə
(Mat 14.1-12; Luk 9.7-9)
14Ɨ̀fò Heròdə̀ à lə̀ zuʼù ànwùə̀ zèrə zə̀ àtsùmə̀, ntiinə a lə̀ kɨ pə la nɨ ànwùə̀ mbə̀ʼə nɨ̀linə̀ nɨ Yěsû a sìimə̀ mə a ɨlyiʼə ɨ̀tsùmə̀. Pànə̀ pɨ̀tse pə nshwəŋə̀ lo, “Jònə ngàŋə̀ àŋâ àkẅiirə̀ nchyə à kẅirə̀ nkwə̂ mbə yi ntɨ̀ŋnə̀! La ɨ̀sùmə nɨ a pənə nɨ ɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mɨ yerə̀nə yerə̀nə.”
15Pɨ̀tse pə nshwəŋə̀ lo, “A Elijah.” Pɨ̀tse kɨ nchi mmə nshwəŋə̀ lo, “A ngàŋə̀ ntwuumə̀ Nẅùə̀ tsaʼa ngàŋə ntwuumə̀ Nẅùə̀ yɨ̀ ntsàambyə̀ za yɨ̀tse.” 16La nkwùə̀ nɨ Heròdə̀ à lə̀ zuʼnə zə̀, a shwəŋə̀ lo, “A Jònə ngàŋə̀ àŋâ àkẅiirə̀ nchyə wa nɨ ndə̀ lə̂nə àtwuə̀ e la nɨ à kẅirə̀nə nzhwuumə̀ a nɨ̀wɨghə̀.” 17Mbə̀ʼnə Heròdə̀ àtwuə̀ ɨ̀pɨ̀ŋmə̀ e à lə̀ shwəŋə̀ mə lo pɨ kô a Jònə nkorə̀ nchyâ a ɨ̀tsaŋə̀. Heròdə̀ à lə̀ ghɨ̀rə̀ a lenə la ntiinə à lə̀ kẅiirə̀nə Hèrodyàsə̀ ngẅùə ndyimə e Filibə̀ ndzoʼò e. 18Tsaʼnə Heròdə̀ à lə̀ zoʼnə e la, Jònə ngàŋə̀ àŋâ àkẅiirə̀ nchyə à lə̀ shwəŋə̀ ambo Heròdə̀ lo, “Ka a kùʼnə̀ e amwuə mbòomə lo wə̀ sàʼà a ngẅùə ndyimə o ndzoʼò.” 19Lenəla, Hèrodyàsə̀ à lə̀ pə nɨ àzaŋə̀ loŋə mbə̀ʼə Jònə mmə ntàʼà àlàŋə nɨ mbə̀ʼə a làŋə̀ aŋunə nzhwuutə̀ e la ka mə zəənə̀ e. 20Heròdə̀ à lə̀ mə mbô a Jònə ntiinə à lə̀ zhyə̂nə lo a ŋònə̀ ɨ̀shìʼnə̀ nkɨ ndaanə̀. À lə̀ tyiʼə̀ ndòo e ngə̀ ndòʼnə̀ lo kò ànwùə̀ àtse a ghɨ̀rə̀ e a ye. À lə̀ kòŋə̀ a nɨ mə ndzuʼù àshwəŋnə̀ e nkwùə̀ ɨ̀tsùmə̀, mbaa pə tsaʼnə à lə̀ pənə nɨ ntòmnə̀ nkwùə̀ nɨ à zuʼnə àshwəŋnə̀ e. 21A gha mbə njyə̂ nɨ Heròdə̀ à lə̀ ghɨ̀rə̀nə nɨ̀ghaʼà njyə̂ nɨ̀pyə̂ e, nfuŋə̀ ngàŋə àfàʼà yè ẅùunə, pobə ɨ̀twuə̀ pɨ̀soyì nɨ pànə̀ pɨ ẅùunə pɨ̀tsùmə̀ nɨ pɨ lə̀ pənə a àlaʼà Galìlyə̂, Hèrodyàsə̀ à lə̀ pə nɨ ɨ̀sàanə̀ a nɨ ghɨ̀rə̀ ànwùə̀ nɨ à lə̀ tàʼnə. 22Moonə̀ Hèrodyàsə̀ ghu mə̀ngyə̌ à lə̀ kwuunə̀ mbinə̀ àpinə̀ a pòŋə̀ a Heròdə̀ ghobə pɨ̀ghɨ̀ɨnə̀ ɨ̀pe. A shwəŋə̀ ambo moonə̀ wa lo, “Pyiitə̀ mə̀ nɨ àzwuumə̀ àtsùmə̀ nɨ wə̀ tàʼnə, mbɨ ŋâ wa.” 23Heròdə̀ à lə̀ kàʼà ambo ze lo, “Àzwuumə̀ àtsùmə̀ nɨ wə̀ pyiitə̀nə mbɨ ŋâ ambo ghò, a tə pə pə taʼà pàa àlaʼà mə̀ wə̀ ghùtse nɨ wə̀ pyiitə̀nə ǹkɨ ŋŋâ mə̀ ŋânə!” 24A shwəŋə̀ a lenə la mômə̀ngyə̌ wa a furə̀ ngə̀ mbyiitə̀ mǎ e lo, “M̂byiitə̀ àkə?”
Mǎ e a kẅùə̀ lo “Pyiitə̀ àtwuə̀ Jònə ngàŋə̀ àŋâ àkẅiirə̀ nchyə.”
25Moonə̀ wa a tyiʼə̀ nfurə̀ nɨ mɨ̀ndəənə̀ ntô nkwuunə̀ nshwəŋə̀ ambo ɨ̀fò lo, “Ǹtàʼà lo wə̀ ŋâ àtwuə̀ Jònə ngàŋə̀ àŋâ àkẅiirə̀ nchyə amwuə àpàpə̀ àkaŋə̀ ambo mɨ̀ŋə̀ tɨ̀tsòŋə̀ wə̀!” 26Mbɨ̀ŋmə̀ ɨ̀fò ɨ̀ lə̀ lanə nkwɨghə̀ mbə̀ʼə ànwùə̀ zèrə zə̀; la tsaʼnə à lə̀ kàʼà mə a mbyə̀ pə̀ənə̀ ɨ̀pe la, ka à lə̀ tàʼà e a nɨ pəʼə̀ nkàʼnə nɨ à kàʼnə ambo moonə̀ e wə̀. 27Lenəla, ɨ̀fò à lə̀ zùŋə̀ ntsàa a taʼà ŋwùə̀ soyì e nshwəŋə̀ ambo ze lo â ghə̀ ndòo àtwuə̀ Jònə ntô nɨ zèrə. A ghə̀ a ndâ ɨ̀tsaŋə̀ ndə̂ àtwuə̀ ghu, 28nchyâ amwuə àpàpə̀ àkaŋə̀ ntô ŋŋâ ambo mômə̀ngyə̌ wa, mômə̀ngyə̌ wa a tyiʼə̀ ŋŋâ a zèrə ambo mǎ e. 29Nkwùə̀ nɨ ɨ̀zùŋə̀ ndzùmə̀ Jònə lə̀ zuʼnə, pobə lə̀ tô ndòo àkwuə̀ e ngə̀ ntẅəŋə̀.
Yěsû a zə̂ pànə̀ nkaamə̀ ɨtaanə̀
(Mat 14.13-21; Luk 9.10-17; Jòn 6.5-13)
30Ngàŋə ntwuumə̀ Yěsû za lə̀ kẅirə̀ nkwə̂ ambo ze ntiitə̀ e nɨ ànwùə̀ àtsùmə̀ nɨ pobə lə̀ ghɨ̀rə̀nə nkɨ nnèrə̀. 31Ntiinə pànə̀ pɨ̀noʼnə lə̀ pənə ntô ambo ze, pyə̀ pə ntô pyə̀ pə ndèrə̀ nɨ ka nkwùə̀ ɨ̀ lə̀ chi mbə e ghu ambo pobə ɨ̀zùŋə̀ ndzùmə̀ ɨ̀pe a nɨ nwuunə̀ a ɨ̀shyə̂ ndzɨghə̀ kə̀ nzhwùutə̀. Lenəla, a shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ tô pə̀ənə̀ lèrə̀ alyiʼə nɨ ka pànə̀ pə e ghu nzhwùutə̀ aŋunə mətùmə nkwùə̀.” 32Lenəla, pobə lə̀ tyiʼə̀ ngə̀ nkwuunə̀ amwuə àkànwuʼə ndèrə̀ alyiʼə nɨ ka pànə̀ pə e ghu. 33La pànə̀ pɨ̀noʼnə nɨ pɨ lə̀ zəənə̀nə a ghobə nzhyə̂ a ghobə tyiʼə̀ nfurə̀ amwuə mɨ̀mbòmpə mɨ ɨ̀laʼà nkɨ̀ɨrə̀ nɨ mɨ̀kwùə̀ ngə̀ mbyàa alyiʼə ghu zaʼà pobə pòŋə̀ tô. 34Nkwùə̀ nɨ Yěsû à lə̀ furə̀nə amwuə àkànwuʼə, à lə̀ zəənə̀ àpùŋə̀ pə̀ənə̀, mbə nɨ àsòmnə̀ mbə̀ʼə pobə ntiinə pobə lə̀ tyiʼnə mbə tsaʼa mɨ̀mbyə̂ mɨ̀ndzìrə̀ tɨ ɨ̀mbyabə̀, a tyiʼə̀ mbìʼnə̀ a nɨ nèrə̀ a ghobə nɨ mɨ̀nwùə̀ mɨ̀noʼnə. 35Nkwùə̀ ɨ̀ lə̀ tyiʼə̀ mmə nkwɨghə̀ ndèrə̀, ɨ̀zùŋə̀ ndzùmə̀ ɨ̀pe tô nshwəŋə̀ ambo ze lo, “Lə̌ alyiʼə nɨ ka pànə̀ pə e ghu, nkwùə̀ ɨ̀ kɨ mmə ndèrə̀ ka mɨ̀zùŋə, 36njiilo, tsàa pànə̀ pɨ̀ lèrə̀ amwuə ɨ̀laʼà a mbwùnə ghə mbə̀ʼə pobə zwuunə̀ àzwuumə̀ àtse ndzɨghə̀.” 37La Yěsû à lə̀ kẅùə̀ ambo pobə lo, “Nɨ̀ ŋâ àzwuumə̀ àtse pobə zɨghə̀.” Pobə chi mbyiitə̀ e lo, “Zə̀ chyə̂ a nɨ lòo nkabə̀ nɨ mbə̀ʼə pɨ twuə̀ a ŋwùə̀ ghu aŋunə ŋwɨgrə̀ nɨ̀fàamə̂!#6.37 Taʼà denarii à chyə̂ mbə nkabə̀ nɨ mbə̀ʼə pɨ twuə̀ a ŋònə̀ ghu aŋunə njyə̂. Njiilo pəə tsə̀ŋə̀ ndwùnə̀ nkabə̀ wə̀ ndzwuunə̀ àpaanə̀ ghu ŋŋâ pobə kwurə̀?” 38Yěsû a chi mbyiitə̀ a ghobə lo, “Nɨ̀ wə̀ nɨ ɨ̀tùmə ɨ̀paanə̀ ɨshiʼə? Nɨ̀ naŋə̀ pə̀ənə̀ zəənə̀.”
Pobə lə̀ naŋə̀ ntô nshwəŋə̀ ambo ze lo â ndàʼà ɨ̀tùmə ɨtaanə̀ nɨ ɨ̀swuə̀ ɨpaa. 39Yěsû a tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe pa lo, pobə ghɨ̀rə̀ pànə̀ nwuunə̀ ɨ̀kẅìrə ɨ̀kẅìrə aŋunə nɨ̀yìinə ghù fiitə̀nə. 40Pànə̀ lə̀ nontə̀ ɨ̀kẅìrə ɨ̀kẅìrə, pɨ̀tse pə pànə̀ nkɨrə, pɨ̀tse pə pànə̀ mɨ̀ghumə̀ mɨntaanə̀. 41Yěsû a tyiʼə̀ ndòo àpaanə̀ za ɨ̀tùmə ɨtaanə̀ nɨ ɨ̀swuə̀ ɨpaa mbə̀ʼkə̀ àtwuə̀ e a àtɨ̀ghə ŋŋâ a mɨyàa ambo Nẅùə̀ mbiʼtə̀ àpaanə̀ za ŋŋâ ambo ɨ̀zùŋə̀ ndzùmə̀ ɨ̀pe lo pobə ghàbə̀ ambo pànə̀ pa, a lə̀ kɨ nchi ngàbə̀ ɨ̀swuə̀ za ɨpaa ambo pobə pɨ̀tsùmə̀. 42Ŋwùə̀ ntsùmə̀ à lə̀ zɨghə̀ ndzwurə̀. 43Lenəla, ɨ̀zùŋə̀ ndzùmə̀ ɨ̀pe lə̀ lyàa ɨ̀chepə̀ ɨ̀pwuumə̀ pɨ̀ghu ɨ̀tsùmə̀ ndẅenə̀ mɨnkaamə ntsòbə̀ ɨpaa. 44Pànə̀ nɨ pɨ lə̀ zɨghə̀nə àpaanə̀ ghu a lə̀ pə mbyàŋnə̀ nkaamə̀ ɨtaanə̀.
Yěsû a yìinə̀ àtwuə̀ nchyə
(Mat 14.22-33; Jòn 6.15-21)
45Yěsû à lə̀ zùŋə̀ ngɨ̀rə̀ ɨ̀zùŋə̀ ndzùmə̀ ɨ̀pe pa kẅirə̀ nkwuunə̀ amwuə àkànwuʼə mbə a mbyə̀ ntwuumə̀ ndèrə̀ a Betsedà, a ghoŋə̀ a ndzùmə̀ ntyiʼə̀ ngɨ̀rə̀ àpùŋə̀ pànə̀ za a sìimə̀. 46Nkwùə̀ nɨ à lə̀ làʼnə̀nə pobə ɨ̀zùŋə̀ ndzùmə̀ ɨ̀pe à lə̀ koʼò ndèrə̀ àtwuə̀ mbarə̀ a nɨ chàʼtə̀ Nẅùə̀. 47Nkwùə̀ nɨ nkwə̌ ɨ̀ lə̀ kùʼnə̀, àkànwuʼə za a lə̀ pə a tɨ̀tɨ̀rə̀ atəŋə, Yěsû a tyiʼə̀ mbə a ɨsɨghə ze nɨ ze, 48ndzəənə̀ lo a lə̀ mə ntsàarə̀ ɨ̀zùŋə̀ ndzùmə̀ ɨ̀pe a nɨ tinə̀ àkànwuʼə za, ntiinə fèrə̀ à lə̀ pənə ntinə̀ a ghobə nkẅùə̀ nɨ̀ ndzùmə̀. A tô mbə a nkòʼò njyə̂, Yěsû a mə ngyìinə̀ àtwuə̀ nchyə mmə ntô làŋə̀ a nɨ̀pwùnə pobə, 49la nkwùə̀ nɨ pobə lə̀ zəənə̀nə e a mə ngyìinə̀ àtwuə̀ nchyə, pobə lə̀ kwàŋə̀ lo a àwuə̀, ntyiʼə̀ nkyiinə̀, 50ntiinə pobə pɨ̀tsùmə̀ lə̀ zəənə̀ e mbə nɨ àkẅàrə̀.
La Yěsû a zùŋə̀ shwəŋə̀ ambo pobə lo, “Nɨ̀ ẅìimə̀ mɨ̀ntɨŋmə̀ ɨ̀mɨghə, a mɨ̀ŋə̀, kò nɨ̀ pô.” 51Tsaʼnə à lə̀ shwəŋə̀nə a lenə la, à lə̀ koʼò nkwuunə̀ amwuə àkànwuʼə za pobə pɨ pobə, fèrə̀ wa zùŋə̀ ndəənə̀. A lanə mbə tyìʼə̀ ànwùə̀ yerə̀nə yerə̀nə ambo ɨ̀zùŋə̀ ndzùmə̀ ɨ̀pe pa. 52Ntiinə ka pobə lə̀ zhyə̂ a ghobə ɨ̀sùmə ànwùə̀ mbə̀ʼə àpaanə̀, mbə̀ʼnə mɨ̀ntɨŋmə̀ ɨ̀mobə lə̀ tɨ̀ŋnə̀.
Yěsû a parə̀ pɨghoonə a Gennesaret
(Mat 14.34-36)
53Yěsû pobə ɨ̀zùŋə̀ ndzùŋə̀ ɨ̀pe lə̀ twuumə̀ ngə̀ nkwuunə̀ a Gennesaret, ntɨ̀ŋnə̀ àkànwuʼə a nɨ̀pwùnə nɨ atəŋə. 54Tyiʼə̀ tsaʼnə pobə lə̀ furə̀nə amwuə àkànwuʼə, pànə̀ lə̀ zùŋə̀ ndzəənə̀ a Yěsû nzhyə̂, 55nkɨ̀ɨrə̀ ndèrə̀ amwuə mɨ̀kwurə̀ ɨ̀mobə ndòo pɨghoonə mbìʼì amwuə mɨ̀kwùunə ndzùŋə̀ e alyiʼə àtsùmə̀ nɨ pɨ lə̀ zuʼnə lo Yěsû à wə̀ ghu. 56Lenəla, ɨlyiʼə ɨ̀tsùmə̀ nɨ Yěsû à lə̀ lèrə̀nə, amwuə ɨ̀laʼà, mɨ̀mbòmpə mɨ ɨ̀laʼà kə̀ mbwùnə mɨ àlaʼà, pànə̀ lə̀ nùŋə̀ pɨghoonə ɨ̀pobə amwuə ɨlyiʼə mɨ̀tàanə. Pobə lə̀ puʼù mbô ambo ze lo â myàʼtə̀ pɨghoonə pètə̀ àtsəŋə̀ atsəʼə e, lenəla, ŋwùə̀ wa ntsùmə̀ nɨ à lə̀ pètə̀nə e à lə̀ fiitə̀.
Currently Selected:
Mark 6: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
