Mark 7

Yěsû a saʼà pɨ̀Farìsî mbə̀ʼə mbòomə àlaʼà

(Mat 15.1-9)

1Pɨ̀Farìsî pobə pɨ̀nèrə̀ mbòomə pɨ̀tse pyə̀ nɨ pɨ lə̀ furə̀nə a Yèrusalèmə̀ lə̀ tô nshwatə̀ a nɨ̀pwùnə Yěsû. 2Tsaʼnə pobə pɨ pobə lə̀ nwuunə̀nə la, pobə lə̀ zəənə̀ lo ɨ̀zùŋə̀ ndzùmə̀ Yěsû pɨ̀tse lə̀ mə ndzɨghə̀ nɨ mbô nɨ mɨ pənə nɨ ntsɨ̀ŋnə ntiinə ka pobə lə̀ sùu a ghobə a mèrə amwuə ndwuumə̀ nɨ mbòomə pɨ̀Farìsî à lə̀ tàʼnə lo pobə̂ sùu, 3mbə̀ʼnə ka pɨ̀Farìsî pobə pɨ̀Jew pɨ̀tsùmə̀ lə̀ mə ndzɨghə̀ a ghobə tɨ sùu mbô ɨ̀mobə ndzùŋə̀ a mbòomə nɨ pɨ̀tǎ pɨ̀tǎ ɨ̀pobə lə̀ nèrə̀nə. 4Nkwùə̀ nɨ pobə kwə̂nə a mɨ̀tàanə ka pobə lə̀ mə ndzɨghə̀ a ghobə tɨghu pobə sùu mbɨ̀ŋmə̀ ɨ̀zobə ɨ laanə̀. Pɨ̀mbòomə pɨ̀noʼnə lə̀ kɨ mbə ghu tsaʼa nɨ̀sùu pɨ̀tɨtoʼo nɨ mɨkɨŋə pobə pɨ̀tse ɨ̀pwuumə̀ nɨ pɨ lə̀ tsùŋə̀nə nɨ àtɨ̀ŋnə yè pùgrə̀nə.

5Lenəla, pɨ̀Farìsî ghobə pɨ̀nèrə̀ mbòomə lə̀ pyiitə̀ a Yěsû lo, “A ghɨ̀rə̀ àkə ka ɨ̀zùŋə̀ ndzùmə̀ ɨ̀pô mə ndzùŋə̀ a ghobə a mbòomə nɨ pɨ̀tǎ pɨ̀tǎ lə̀ nùŋə̀nə, la mə ndzɨghə̀ a ghobə nɨ mbô nɨ mɨ pənə nɨ ntsɨ̀ŋnə?”

6A kẅùə̀ lo, “Ngàŋə̀ ntwuumə̀ Nẅùə̀ Ìsayà à lə̀ zəənə̀ tyìʼə̀ ɨ̀shìʼnə̀ a nɨ ŋwàʼnə̀ mbə̀ʼə pɨghə ngàŋə àpə̀grə̀:

‘Pànə̀ pə ghuʼtə̀ mə̀ pə nɨ ɨ̀kòbə̀ ntswùə̀

la mɨ̀ntɨŋmə̀ ɨ̀mobə pə e a ndyə̌ sàa aŋunə mɨ̀ŋə̀;

7pobə ghuʼtə̀ mə̀ pə àfǐfǐ

nnèrə̀ pə pɨ̀mbòomə pɨ pànə̀ pɨ mɨsoŋə ka pə e ɨ̀pâ.’ 8Nɨ̀ waʼà mɨ̀ntə̌ mɨ Nẅùə̀ ntyiʼə̀ ndzùŋə̀ pə pɨ mbòomə pyə̀ nɨ pànə̀ pɨ mɨsoŋə nùŋə̀nə.”

9Yěsû a kẅùə̀ ambo pobə lo, “Nɨ̀ wa nɨ àlàŋə yè ɨ̀shìʼnə̀ a nɨ lòo ntwuunə̀ mɨ̀ntə̌ mɨ Nẅùə̀ mbə̀ʼə zùŋə̀ pɨ̀mbòomə pɨ àlaʼà ɨ̀pɨghə. 10Mbə̀ʼnə Mǔsî à lə̀ shwəŋə̀nə lo, ‘Zuʼnə̀ a tǎ ɨwɨghə pobə mǎ o,’ nkɨ nchi nshwəŋə̀ lo, ‘Ŋònə̀ nɨ à shwəŋə̀nə ànwùə̀ tɨ̀pòŋə̀ mbə̀ʼə mǎ e kə̀ tǎ ɨghobə à kùʼnə̀ lo pɨ̀ zhwuutə̀ e.’ 11La nɨ̀ shwəŋə̀ àzɨghə lo mbə̀ʼə ŋwùə̀ à tə shwəŋə̀ ambo tǎ ɨghobə kə̀ mǎ e lo, ‘Àzwuumə̀ nɨ ǹtənə mbə ŋâ ambo ghò a yè Kobànə̀’ (nɨ ɨ̀sùmə pənə lo, a yè Nẅùə̀), 12lenəla, ka à chi mbə ghɨ̀rə̀ e ànwùə̀ àtse ambo tǎ ɨghobə kə̀ mǎ e, 13nɨ ndwuumə̀ wə̀, nɨ̀ tyiʼə̀ ndòo pɨ̀mbòomə pɨ àlaʼà nɨ pɨ lə̀ furə̀nə ambo pɨ̀tǎ ɨ̀pɨghə pɨ ntsàambyə̀ ndòo mbə̀ŋə̀ àshwəŋnə̀ Nẅùə̀ a tyiʼə̀ e àfǐfǐ. Nkɨ ngɨ̀rə̀ mɨ̀nwùə̀ mɨ̀noʼnə tsaʼa zèrə zə.”

Ɨ̀pwuumə̀ nɨ pèrə pa ngɨ̀rə̀ lo kò ŋwùə̀ a laanə̀ e

(Mat 15.10-20)

14Yěsû a chi nfuŋə̀ pànə̀ pa nshwəŋə̀ ambo pobə lo, “Pɨghə pɨ̀tsùmə̀ tsùŋə̀ nzhwiʼtə̀ ànwùə̀ nɨ ngwə̀ nshwəŋə̀, ɨ̀twuə̀ ɨ̀pɨghə laanə̀. 15Ka àzwuumə̀ àtse â pə e a àpyìinə nɨ mbə̀ʼə a kwuunə̀ amwuə ŋwùə̀ ngɨ̀rə̀ lo kò a laanə̀. La a mɨ̀nwùə̀ myə̀ nɨ mɨ ma nfurə̀ amwuə ntɨŋmə̀ ŋwùə̀ nɨ mèrə ma ngɨ̀rə̀ lo kò ze laanə̀ e.” 16[“Ŋònə̀ nɨ à pənə nɨ mɨtugrə a nɨ zuʼù, â zuʼù.”]

17Nkwùə̀ nɨ à lə̀ myàʼtə̀nə pànə̀ nkwuunə̀ ndèrə̀ amwuə ndâ, ɨ̀zùŋə̀ ndzùmə̀ ɨ̀pe lə̀ pyiitə̀ e nɨ ɨ̀sùmə àshwəŋnə̀ nàanə nàanə zə. 18Yěsû a shwəŋə̀ ambo pobə lo, “Ka nɨ̀ pə a wɨghə àzɨghə nɨ àzhìʼtə̀ a nɨ zhyə̂ lo àzwuumə̀ àtsùmə̀ nɨ a furə̀nə a àpyìinə nkwuunə̀ amwuə ŋwùə̀ ka a ghɨ̀rə̀ e lo â laanə̀? 19Mbə̀ʼnə ka zèrə a kwuunə̀ e amwuə ntɨŋmə̀ e, a kwuunə̀ e la a nɨ̀pùmə̀ ze nkɨ ndàŋə̀ nfurə̀.” (Nɨ ndwuumə̀ wə̀, Yěsû à lə̀ shwəŋə̀ la lo mɨ̀zɨghə̀ mɨ̀tsùmə̀ laanə̀ nkùʼnə̀ ambo ŋwùə̀ a nɨ zɨghə̀.) 20A làŋə̀ nɨ mbyə̀ nshwəŋə̀ lo, “A ŋònə̀ la a tsə̀ŋə̀ àzwuumə̀ àtsùmə̀ nɨ a za nfurə̀ a ntswùə̀ ze ngɨ̀rə̀ lo kò a laanə̀ e. 21Mbə̀ʼnə ànwùə̀ tɨ̀pòŋə̀ àtsùmə̀ tsaʼa ɨ̀kwàŋə̀ tɨ̀pòŋə̀, nɨ ànwùə̀ məghàbə̀, nɨ ɨ̀zə̀ərə̀, nɨ nɨ̀zhwuutə̀, nɨ ànwùə̀ àfànə̀, 22nɨ àghə̀ʼə̀, nɨ ntɨŋmə̀ ghù shyə, nɨ àfɨ̀ghə̀, nɨ ànyònə̀, nɨ àghə̀ʼnə̀, nɨ nɨ̀tə̂ ànwùə̀ àtwuə̀ ŋwùə̀, nɨ àkoʼò mbɨ̀ŋmə̀, nɨ àkɨ̀ghə̀ a za nfurə̀ la amwuə ntɨŋmə̀ ŋwùə̀. 23Ɨ̀nwùə̀ tɨ̀pòŋə̀ pèrə pə ɨ̀tsùmə̀ furə̀ la amwuə ŋwùə̀ ngɨ̀rə̀ lo kò a laanə̀ e.”

Àpyiimə̀ ntɨŋmə̀ mə̀ngyə̌ Sirofònisyà

(Mat 15.21-28)

24Yěsû a lə̀ myàʼtə̀ alyiʼə ghu nfurə̀ ndèrə̀ a pàa àlaʼà Tayə̀ ghobə Sidònə̀, nkwuunə̀ amwuə ndâ ɨ̀tse, ka mə tàʼà e lo pɨ zhyə̂, la a tɨ̀ŋnə̀ ambo ze a nɨ ghɨ̀rə̀ lo kò pɨ zhyə̂. 25La tyìʼə̀ nkwùə̀ ghu, mə̀ngyə̌ ɨ̀tse nɨ mɨlyiʼə moonə̀ e yi mə̀ngyə̌ nɨ a lə̀ pənə nɨ àzhwùə̀ tɨ̀pòŋə̀ a lə̀ zuʼù lo Yěsû a ẅùə̀ amwuə ndâ gha, ntô nkunə̀ a mɨ̀kwùə̀ ze. 26Mə̀ngyə̌ ẅèrə wə̀ à lə̀ pə mə̀ngyə̌ Greek, ẅùə̀ nɨ pɨ lə̀ pyə̂nə e a àlaʼà Fònisyà amwuə Siryà. A lə̀ puʼù mbô ambo Yěsû lo â fuukə̀ àzhyə̂ nɨ a pənə amwuə moonə̀ e. 27Yěsû a shwəŋə̀ ambo ze lo, “Tyiʼə̀ pɨ̀ pyə̀ ndzə̂ àghòbə zaʼà, mbə̀ʼnə ka a kùʼnə̀ e lo pɨ̀ lòo àpaanə̀ àghòbə mmàʼà ambo mɨ̀ngwɨghə̀.”

28La mə̀ngyə̌ wa a kẅùə̀ ambo ze lo, “Ee Ndòʼnə̀mbyə̂, la tyìʼə̀ mɨ̀ngwɨghə̀ nɨ mɨ ma nnwuunə̀ a ɨ̀sùmə tepèrə̀ ma ndyàa ɨ̀chepə̀ mɨ̀zɨghə̀ mɨ àghòbə ndzɨghə̀.”

29Yěsû a tyiʼə̀ nshwəŋə̀ ambo ze lo, “Tsaʼnə wə̀ shwəŋə̀nə nɨ ndwuumə̀ wə̀ la, wə̀ chyə̂ lèrə̀ o; àzhyə̂ za a myàʼtə̀ mə a moonə̀ o.”

30Tsaʼnə à lə̀ kẅirə̀nə nkwə̂ a ɨmwuə alyiʼə, à lə̀ zəənə̀ a moonə̀ e wa a nwuunə̀ aŋunə ɨ̀kwùunə nɨ àzhyə̂ za a furə̀ mə e amwuə ze.

Yěsû a parə̀ a paapa

31Yěsû a lə̀ myàʼtə̀ a pàa àlaʼà Tayə̀ ndàŋə̀ a Sidònə̀ nshwuʼə̀ ndèrə̀ a atəŋə Galìlyə̂ nkɨ ndàŋə̀ amwuə pàa àlaʼà mɨ̀mbòmpə mɨ ɨ̀laʼà ma nɨ̀ghumə̀. 32Pànə̀ pɨ̀tse lòo a paapa ntô a alyiʼə ghu, mbuʼù mbô ambo Yěsû lo a nùŋə̀ àpô e aŋunə ze. 33Yěsû a lə̀ lòo a paapa wə̀ nfurə̀ amwuə pə̀ənə̀, nchyâ pɨ̀shwuə̀ pɨ mbô ɨ̀pe amwuə mɨtugrə mɨ ŋònə̀ wa, ntẅùə̀ mɨ̀tẅuə̀ ndòo mbètə̀ àləəmə̀ paapa wa ghu. 34Yěsû a lə̀ pə̀ʼkə̀ àtwuə̀ e nnaŋə̀ nɨ̀pwuurə̀, ntswaamə̀ a chwèrə̀, nshwəŋə̀ ambo ŋònə̀ ghu lo, “Ephphatha” nɨ ɨ̀sùmə ɨ̀ pənə lo, “Nyaʼkə̀!”

35Tyiʼə̀ nkwùə̀ ghu, mɨtugrə mɨ ŋònə̀ wa lə̀ nyaʼkə̀, àləəmə̀ e a kɨ nshwèntə̀ a pìʼnə̀ a nɨ shwəŋnə̀ tyìʼə̀ ɨ̀shìʼnə̀. 36Yěsû a lə̀ kwàtə̀ pànə̀ pa lo kò pobə shwəŋə̀ a ghobə ànwùə̀ ghu ambo ŋònə̀ ɨ̀tse. La tsaʼnə à lə̀ mənə nkwàtə̀ a ghobə, pobə lə chi nshwəŋə̀ ndèrə̀ pə nɨ mbyə̀. 37Pànə̀ pɨ̀tsùmə̀ nɨ pɨ lə̀ zuʼnə lə̀ yerə̀, ntyiʼə̀ nshwəŋə̀ lo, “A ghɨ̀rə̀ ànwùə̀ àtsùmə̀ ɨ̀shìʼnə̀, ngɨ̀rə̀ àpuʼkə̀ mɨtugrə a zuʼù, paapa a kɨ nshwəŋnə̀.”

Currently Selected:

Mark 7: pny

Highlight

Copy