Lukə̀ 3

Jònə ngàŋə̀ àŋâ àkẅiirə̀ nchyə a pìʼnə̀ a nɨ chwìitə̀ ntwuumə̀ Nẅùə̀

1Aŋunə nòmbàa nguʼu ntsòbə̀ ɨtaanə̀ tsaʼnə Kaasà Tìberyùsə̀ à lə̀ pənə ɨ̀fò ngẅùunə amwuə àlaʼà Romə̀; Pontyòsə̀ Palètə̀ à lə̀ pə govɨnò pàa àlaʼà nɨ pɨ lə̀ mənə nfuŋə̀ nɨ Judyà, Heròdə̀ a kɨ mbə govɨnò amwuə pàa àlaʼà nɨ pɨ lə̀ mənə nfuŋə̀ nɨ Galìlyə̂, ndyimə e Filibə̀ a pə ŋònə̀ ngẅùunə a Ìturyà pobə Tràkònitìsə̀; Lisanyàsə̀ à lə̀ pə govɨnò àlaʼà Abilènə̀, 2amwuə nkwùə̀ za nɨ Anàsə̀ pobə Kayafàsə̀ lə̀ pənə ɨ̀twuə̀ pɨ̀fò màʼà Nẅùə̀. Amwuə nkwùə̀ ghu, ntwuumə̀ Nẅùə̀ ɨ lə̀ tô ambo Jònə nɨ à lə̀ pənə a alyiʼə waakə mbə moonə̀ Tsàkàriyà. 3Jònə à lə̀ lèrə̀ amwuə ɨ̀laʼà ɨ̀tsùmə̀ a nɨ̀pwùnə nchyə Jodànə̀ mmə nchwìitə̀ lo, “Nɨ̀ pə̀ŋə̀ aŋunə tɨ̀pòŋə̀, nkẅiirə̀ nchyə, Nẅùə̀ â lə̀ənə̀ a tɨ̀pòŋə̀ ɨwɨghə.” 4Tyìʼə̀ tsaʼnə ngàŋə̀ ntwuumə̀ Nẅùə̀ Ìsayà à lə̀ ŋwàʼnə̀nə lo, “Ŋònə̀ ɨ̀tse à wə̀ nkyiinə̀ amwuə àlaʼà waakə nshwəŋə̀ lo, ‘Tsùŋə̀ àlàŋə ambo Ndòʼnə̀mbyə̂, ngɨ̀rə̀ àlàŋə â təəmə̀ ambo ze. 5Pɨ ghǎ lẅenə̀ mɨ̀ndòorə̀ mɨ̀tsùmə̀, shwuʼkə̀ mɨ̀mbarə̀ ghobə pɨ̀kòŋə̀ pɨ̀tsùmə̀, shìitə̀ ɨ̀làŋə pɨ̀ŋotə̀nə ɨ̀tsùmə̀, lẅentə̀ ɨ̀làŋə pɨ̀kòtə̀nə ɨ̀tsùmə̀. 6Lenəla, ŋwùə̀ ntsùmə̀ à ghǎ zəənə̀ a nɨ̀chwarə̀ wa nɨ Nẅùə̀ à wa ndòo ntô la.” 7Jònə a tyiʼə̀ nshwəŋə̀ ambo ɨ̀pùŋə̀ pə̀ənə̀ nɨ laʼa mmə ntô lo â ŋâ ghobə nɨ àkẅiirə̀ nchyə lo, “Àpùŋə̀ ɨ̀poonə̀ pɨ ɨ̀nyoorə̀! A wɨghə à kwàtə̀ ɨ̀wə̌ lo nɨ̀ kɨ̀ɨrə̀ àtsə̂ ntɨŋmə̀ Nẅùə̀ nɨ ǎ tô? 8Nɨ̀ zumə̀ mɨ̀ntàamə amwuə nɨ̀chyə̂mbyə̂ ɨwɨghə a nɨ nèrə̀ lo nɨ̀ pə̀ŋə̀ aŋunə tɨ̀pòŋə̀ ɨwɨghə. Kò nɨ̀ shwəŋə̀ amwuə mɨ̀ntɨŋmə̀ ɨ̀mɨghə lo, ‘Pəə pə̀ nɨ Abràhamə̀ tsaʼa tǎ ɨwəə.’ Ǹtiitə̀ a wɨghə lo mbə̀ʼə Nẅùə̀ a pə̀ʼkə̀ mɨ̀ghòorə mə aŋunə ɨ̀poonə̀ ambo Abràhamə̀. 9Ndzaamə ɨ̀ zə ntyiʼə̀ aŋunə mɨŋaŋə a nɨ tserə̀ àtɨ̀ghə àtsùmə̀ nɨ ka à pə zumə̀ e mɨ̀ntàamə mɨ̀shìʼnə̀ màʼà amwuə ɨ̀mǔ.”

10Àpùŋə̀ pə̀ənə̀ ghu a lə̀ tyiʼə̀ mbyiitə̀ e lo, “Mbə̀ʼə pəə tyiʼə̀ ngɨ̀rə̀ lə ɨla?”

11Jònə a kẅùə̀ lo, “Ŋònə̀ nɨ à pənə nɨ ɨtsəʼə ɨpaa â ŋâ a taʼà ambo ŋònə̀ nɨ ka à pə e nɨ yètse, ŋònə̀ nɨ à pənə nɨ mɨ̀zɨghə̀ â kɨ ngɨ̀rə̀ tyìʼə̀ a lenə.”

12Pɨ̀nkẅiirə̀ pɨ̀taghə̀ pɨ̀tse laʼa nkɨ ntô a nɨ kẅiirə̀ nchyə, mbyiitə̀ e lo, “Ɨ̀nèrə̀ ɨ̀nwùə̀, Pəə ghɨ̀rə̀ àzəə ɨla?”

13Jònə a shwəŋə̀ ambo pobə lo, “Kò nɨ̀ chi nkẅiirə̀ pɨ̀taghə̀ ndàŋə̀ ndwùnə̀ nɨ pɨ pyə̀nə ntiitə̀ lo nɨ̀ kẅiirə̀.”

14Pɨ̀soyì pɨ̀tse kɨ mbyiitə̀ e lo, “Pəə ghɨ̀rə̀ àzəə ɨla?”

A kẅùə̀ ambo pobə lo, “Kò nɨ̀ kẅiirə̀ àzwuumə̀ ŋwùə̀ nɨ ɨ̀tɨ̀ŋnə̀. Kò nɨ̀ shwəŋə̀ ànwùə̀ yè fuə aŋunə ŋwùə̀ a nɨ kẅiirə̀ ɨ̀pwuumə̀ ɨ̀pe. Nɨ̀ zwurə̀ nkabə̀ nɨ pɨ pa ntwuə̀ a wɨghə nɨ zèrə.”

15Pànə̀ pɨ̀ghu lə̀ mə mbyabə̀, a tyiʼə̀ mmə nkə̀ʼnə̀ a ghobə lo kə̀nə Jònə à pənə lə Ghù Ndzoʼnə wa. 16Jònə a kẅùə̀ ambo pobə pɨ̀tsùmə̀ lo, “Ngwə̀ ŋŋâ a wɨghə nɨ àkẅiirə̀ nchyə nɨ nchyə, la ghùtse nɨ à tsàarə̀nə mə̀ ǎ tô, mbə ẅùə̀ nɨ ka ǹkùʼnə̀ mə̀ a nɨ kyàatə̀ mɨnkirə mɨ atabə ɨ̀me. Ǎ ŋâ a wɨghə nɨ àkẅiirə̀ nchyə nɨ Àzhwùə̀ Nẅùə̀ ghobə ɨ̀mǔ. 17Àsə̀ŋə̀ Nẅùə̀ a zə̀ ambo ze a nɨ fə̂ ɨ̀kɨ̀ghɨɨ ɨ̀tsùmə̀ tòonə̀ amwuə ɨ̀mǔ tɨ̀pyaatə̀, tyiʼə̀ lòʼnə̀ mbyə ɨ̀shìʼnə̀ a ntaŋə mɨ̀zɨghə̀ ze.”

18Jònə à lə̀ shwəŋə̀ mɨ̀nwùə̀ mɨ̀noʼnə mɨ̀nyaanə a nɨ nèrə̀ pə̀ənə̀, farə a nɨ kɨ nchwìitə̀ ntwuumə̀ ghù ɨ̀shìʼnə̀ wa ambo pobə. 19A lə̀ kɨ pə lə la nɨ Jònə à saʼà mə a Heròdə̀ ntiinə à lə̀ kẅiirə̀nə Hèrodyàsə̀ ngẅùə momaa e ndzoʼò e nkẅìʼnə̀ aŋunə mɨ̀nwùə̀ mɨ tɨ̀pòŋə̀ mɨ̀noʼnə nɨ à lə̀ ghɨ̀rə̀nə. 20A nɨ chi nkẅìʼnə̀ aŋunə mɨ̀nwùə̀ mə, Heròdə̀ à lə̀ kô Jònə nfɨ̀ŋnə̀ a ɨ̀tsaŋə̀.

Àkẅiirə̀ nchyə Yěsû

(Mat 3.13-17; Mrk 1.9-11)

21Nkwùə̀ nɨ Jònə à lə̀ myàanə̀nə a nɨ ŋâ àkẅiirə̀ nchyə ambo ŋwùə̀ ntsùmə̀, à lə̀ kɨ ŋŋâ àkẅiirə̀ nchyə ambo Yěsû. Tsaʼnə Yěsû à lə̀ tyiʼnə mmə nchàʼtə̀ a Nẅùə̀, nɨ̀pwuurə̀ lə̀ nyaʼkə̀, 22Àzhwùə̀ Nẅùə̀ a furə̀ a nɨ̀pwuurə̀ tsaʼa àlwuʼə̀ nshwuʼə̀ ntəəmə̀ a àtwuə̀ ze, ngyə̀ ɨ̀ furə̀ a nɨ̀pwuurə̀ nshwəŋə̀ lo, “Ghò la moonə̀ mə̀ nɨ ǹkòŋə̀nə, ngwə̀ nɨ nɨ̀ghaʼà mbə̀ʼə o.”

Pɨ̀tǎ pɨ̀tǎ pɨ Yěsû

23Nkwùə̀ nɨ Yěsû à lə̀ pənə tsaʼa nguʼu mɨ̀ghumə̀ mɨntarə, à lə̀ pìʼnə̀ àfàʼà e. Pànə̀ lə̀ mə nkwàŋə̀ lo tǎ pɨ Yěsû la Jòsebə̀ moonə̀ Hèli. 24Hèli a pə moonə̀ Matàtə̀, Matàtə̀ a pə moonə̀ Levì, Levì a pə moonə̀ Melkì, Melkì a pə moonə̀ Janàyə̀, Janàyə̀ a pə moonə̀ Jòsebə̀. 25Jòsebə̀ à lə̀ pə moonə̀ Màtatyàsə̀, Màtatyàsə̀ a pə moonə̀ Emòsə̀, Emòsə̀ a pə moonə̀ Nahùmə̀, Nahùmə̀ a pə moonə̀ Eslì, Eslì a pə moonə̀ Nagaì. 26Nagaì à lə̀ pə moonə̀ Matə̀, Matə̀ a pə moonə̀ Màtatyàsə̀, Màtatyàsə̀ a pə moonə̀ Semènə̀, Semènə̀ a pə moonə̀ Josèkə̀, Josèkə̀ a pə moonə̀ Jodà. 27Jodà à lə̀ pə moonə̀ Jòanànə̀, Jòanànə̀ a pə moonə̀ Resà, Resà a pə moonə̀ Zèrubabèlə̀, Zèrubabèlə̀ a pə moonə̀ Sheatyèlə̀, Sheatyèlə̀ a pə moonə̀ Nerì, 28Nerì a pə moonə̀ Melkì, Melkì a pə moonə̀ Adì, Adì a pə moonə̀ Kosàmə̀, Kosàmə̀ a pə moonə̀ Elmadàmə̀, Elmadàmə̀ a pə moonə̀ Erə̀. 29Erə̀ à lə̀ pə moonə̀ Joshua, Joshua a pə moonə̀ Eleazà, Eleazà a pə moonə̀ Jorìmə̀, Jorìmə̀ a pə moonə̀ Matàtə̀, Matàtə̀ a pə moonə̀ Levì. 30Levì à lə̀ pə moonə̀ Simyònə̀, Simyònə̀ a pə moonə̀ Judà, Judà a pə moonə̀ Jòsebə̀, Jòsebə̀ a pə moonə̀ Jonàmə̀, Jonàmə̀ a pə moonə̀ Èlyakìmə̀, 31Èlyakìmə̀ a pə moonə̀ Meleyà, Meleyà a pə moonə̀ Menà, Menà a pə moonə̀ Màtatà, Màtatà a pə moonə̀ Natànə̀, Natànə̀ a pə moonə̀ Dàfirə̀, 32Dàfirə̀ a pə moonə̀ Jesè, Jesè a pə moonə̀ Obèdə̀, Obèdə̀ a pə moonə̀ Boàzə̀, Boàzə̀ a pə moonə̀ Salmònə̀, Salmònə̀ a pə moonə̀ Nashònə̀, 33Nashònə̀ a pə moonə̀ Àminadàbə̀, Àminadàbə̀ a pə moonə̀ Admìnə̀, Admìnə̀ a pə Moonə̀ Anì, Anì a pə moonə̀ Hezrònə̀, Hezrònə̀ a pə moonə̀ Perèzə̀, Perèzə̀ a pə moonə̀ Judà, 34Judà a pə moonə̀ Yàkobə̀, Yàkobə̀ a pə moonə̀ Isàkə̀, Isàkə̀ a pə moonə̀ Abràhamə̀, Abràhamə̀ a pə moonə̀ Terà, Terà a pə moonə̀ Nahòo, 35Nahòo a pə moonə̀ Serùgə̀, Serùgə̀ a pə moonə̀ Reù, Reù a pə moonə̀ Pelègə̀, Pelègə̀ a pə moonə̀ Ebè, Ebè a pə moonə̀ Shelà, 36Shelà a pə moonə̀ Kainànə̀, Kainànə̀ a pə moonə̀ Afazàdə̀, Afazàdə̀ a pə moonə̀ Shemə̀, Shemə̀ a pə moonə̀ Noà, Noà a pə moonə̀ Lamèkə̀, 37Lamèkə̀ a pə moonə̀ Mètuselà, Mètuselà a pə moonə̀ Enòkə̀, Enòkə̀ a pə moonə̀ Jarèdə̀, Jarèdə̀ a pə moonə̀ Màhalalèlə̀, Màhalalèlə̀ a pə moonə̀ Kenànə̀, 38Kenànə̀ a pə moonə̀ Enòshə̀, Enòshə̀ a pə moonə̀ Setə̀, Setə̀ a pə moonə̀ Adàmə̀, Adàmə̀ a pə moonə̀ Nẅùə̀.

Currently Selected:

Lukə̀ 3: pny

Highlight

Copy