Lukə̀ 4
4
Satàanə̀ a kwàʼnə̀ Yěsû
(Mat 1.1-11; Mrk 1.12-13)
1Yěsû à lə̀ mə nfurə̀ a nchyə Jodànə̀ nɨ Àzhwùə̀ Nẅùə̀ a lẅenə̀ mə ntɨŋmə̀ e ngɨ̀rə̀ a lèrə̀ alyiʼə waakə. 2À lə̀ pə ghu njyə̂ mɨ̀ghumə̀ nɨ̀kwàa, Satàanə̀ a kwàʼnə̀ e. Aŋunə ndwùnə̀ mɨ̀njyə̂ mə ka à lə̀ zɨghə̀ e àzwuumə̀ àtse, lenəla njyə̀ ɨ̀ mə ndzaŋə̀ e.
3Satàanə̀ a shwəŋə̀ ambo ze lo, “Wə̀ tə mbə Moonə̀ Nẅùə̀ nkǔŋə nkuŋə, wə̀ shwəŋə̀ ambo nɨ̀ghòorə tsə̀ lo tsèrə̂ pə̀ŋə̀ ntyiʼə̀ àpaanə̀.”
4Yěsû a kẅùə̀ ambo ze lo, “Pɨ ŋwàʼnə̀ amwuə àŋwàʼnə̀ Nẅùə̀ lo, ‘Ka ŋwùə̀ a chyə̂ e ghù ntɨ̀ŋnə̀ la mbə̀ʼə àpaanə̀ ndàʼà.’ À chyə̂ pə mbə̀ʼə àshwəŋnə̀ àtsùmə̀ nɨ a furə̀nə a ntswùə̀ Nẅùə̀.”
5Satàanə̀ a chi ndòo e nkoʼò ndèrə̀ alyiʼə ŋaŋnə̀nə nnèrə̀ e nɨ ɨlyiʼə nɨ̀fò àtwuə̀ ɨ̀shyə̂ àtsùmə̀ aŋunə mətùmə nkwùə̀, 6nshwəŋə̀ ambo ze lo, “Mbɨ ŋâ o nɨ ɨ̀tɨ̀ŋnə̀ lo wə̀ tyiʼə̀ mbuʼtə̀ ɨlyiʼə nɨ̀fò pèrə pə tyìʼə̀ ɨ̀tsùmə̀ nɨ ɨ̀pwuumə̀ ɨ̀pe ɨ̀tsùmə̀, ntiinə pɨ ŋâ mə ɨlyiʼə pèrə pə ɨ̀tsùmə̀ ambo mɨ̀ŋə̀, m̀bə nɨ ɨ̀tɨ̀ŋnə̀ a nɨ ŋâ ambo ŋònə̀ nɨ ǹkòŋə̀nə. 7Tɨ̀tsòŋə̀, wə̀ tə ŋuʼnə̀ a ɨ̀shyə̂ nsəəkə̀ mə̀ yi mbɨ ŋâ ɨ̀pwuumə̀ pèrə pə ɨ̀tsùmə̀ ambo ghò lo wə̀ puʼtə̀ a pèrə.”
8Yěsû a kẅùə̀ ambo ze lo, “Pɨ ŋwàʼnə̀ amwuə àŋwàʼnə̀ Nẅùə̀ lo, ‘Wə̀ chyə̂ a nɨ səəkə̀ pə a Ndòʼnə̀mbyə̂ Nẅùə̀ o, nkɨ nchyə̂ a nɨ fàʼà tyìʼə̀ ambo ze ndàʼà.”
9Satàanə̀ a chi ndòo a Yěsû nkoʼò ndèrə̀ a Yèrusalèmə̀ ntə̂ e a ngotə àtwuə̀ Ndâ mɨ̀shwàʼà Nẅùə̀ yɨ̀ ngẅùunə, nshwəŋə̀ ambo ze lo, “Wə̀ tə mbə Moonə̀ Nẅùə̀, wə̀ furə̀ a nɨ̀ghə̂ ntsoʼnə̀ nkànə̀ a ɨ̀shyə̂. 10Ntiinə pɨ ŋwàʼnə̀nə amwuə àŋwàʼnə̀ Nẅùə̀ lo, ‘Nẅùə̀ à ghǎ tsàa pəngèrə̀ ɨ̀pe lo pèrə lerəkə̀ o nkɨ mbyabə̀ o.’ 11A za nkɨ nchi nshwəŋə̀ lo, ‘pobə ghǎ tyiʼə̀ kô o twuʼtə̀ amwuə mbô ɨ̀mobə mbə̀ʼə wə̀ tsòo àkwùə̀ o aŋunə nɨ̀ghòorə.’” 12Yěsû a kẅùə̀ ambo ze lo, “Pɨ kɨ nshwəŋə̀ amwuə àŋwàʼnə̀ Nẅùə̀ lo, ‘Kò wə̀ kwàʼnə̀ o a Ndòʼnə̀mbyə̂ Nẅùə̀ o.’”
13Nkwùə̀ nɨ Satàanə̀ à lə̀ myàanə̀nə a nɨ kwàʼnə̀ Yěsû amwuə ɨ̀làŋə ɨ̀tsùmə̀, à lə̀ myàʼtə̀ e lo â lèrə̀ tə mbyàa nkwùə̀ nɨ ǎ chi pə nɨ ɨ̀sàanə̀ yɨ̀ nyàanə.
Yěsû a pìʼnə̀ àfàʼà e a Galìlyə̂
(Mat 4.12-17; Mrk 1.14-15)
14Yěsû à lə̀ kẅirə̀ nkwə̂ a Galìlyə̂ ndẅenə̀ nɨ ɨ̀tɨ̀ŋnə̀ Àzhwùə̀ Nẅùə̀. Ntwuumə̀ mbə̀ʼə e ɨ lə̀ sìimə̀ amwuə Galìlyə̂ ntsùmə̀. 15Yěsû à lə̀ lèrə̀ nɨ mbyə̀ ntyiʼə̀ mmə nnèrə̀ ànwùə̀ Nẅùə̀ amwuə mɨ̀ndâ mɨ àshwatə̀ pɨ̀Jew, pànə̀ pɨ̀tsùmə̀ tyiʼə̀ mmə ngyetə̀ e.
Pɨ twuunə̀ Yěsû a Nazarètə̀
(Mat 13.53-58; Mrk 6.1-6)
16Yěsû à lə̀ lèrə̀ a Nazarètə̀ alyiʼə nɨ à lə̀ kẅuə̀nə ghu, ngə̀ nkwuunə̀ amwuə ndâ àshwatə̀ pɨ̀Jew njyə̂ àlaʼà pɨ̀Jew a nɨ zùŋə̀ tsaʼnə à lə̀ pyə̀nə mmə ngɨ̀rə̀, ndòo a ɨ̀shyə̂ ntəəmə̀ a nɨ fuŋə̀ àŋwàʼnə̀ Nẅùə̀. 17Pɨ lə̀ ŋâ e nɨ àŋwàʼnə̀ ngàŋə̀ ntwuumə̀ Nẅùə̀ Ìsayà a nyaʼkə̀ ndzəənə̀ alyiʼə nɨ pɨ ŋwàʼnə̀nə amwuə lo, 18“Àzhwùə̀ Ndòʼnə̀mbyə̂ a zə aŋunə mɨ̀ŋə̀ ntiinə à tsoʼò mə mə̀ lo n̂tə nchwìitə̀ ntwuumə̀ ghù ɨ̀shìʼnə̀ ambo ngàŋə̀ àfumə̀. À twuumə̀ mə̀ lo n̂chwìitə̀ ambo ɨ̀pùʼù ntsòo lo pɨ̌ fuukə̀ a ghobə, nshwəŋə̀ ambo pɨ̀fə̀ lo pobə ghǎ zəənə̀ ɨlyiʼə, mmyàʼtə̀ pànə̀ pa nɨ pobə pa ndzəənə̀ ngəʼə̀ la, 19nkɨ nchwìitə̀ lo nkwùə̀ ɨ̀ kùʼù nɨ Ndòʼnə̀mbyə̂ à ghǎ chwarə̀ pə̀ənə̀ ɨ̀pe.”
20Tsaʼnə Yěsû à lə̀ myàanə̀nə a nɨ fuŋə̀ àŋwàʼnə̀ za, à lə̀ kẅupə̀ a zèrə ŋŋâ ambo ngàŋə̀ àfàʼà ndâ àshwatə̀ wa ntyiʼə̀ nnwuunə̀ a ɨ̀shyə̂. Ŋwùə̀ ntsùmə̀ amwuə ndâ gha à lə̀ tyiʼə̀ ntə̂ ɨ̀myə̂ ɨ̀me aŋunə ze. 21A pìʼnə̀ ntyiʼə̀ nshwəŋə̀ ambo pobə lo, “Ànwùə̀ nɨ pɨ ŋwàʼnə̀nə amwuə alyiʼə àŋwàʼnə̀ zə la a furə̀ ndaanə̀ sìnə̀ wə̀, tsaʼnə nɨ̀ zuʼnə ǹfuŋə̀ a zèrə.”
22Pànə̀ pɨ̀tsùmə̀ lə̀ tyiʼə̀ mmə nshwəŋə̀ mɨ̀nwùə̀ mɨ̀shìʼnə̀ mbə̀ʼə e, nkɨ ngyerə̀ àshwəŋnə̀ ɨ̀shìʼnə̀ nɨ a furə̀nə a ntswùə̀ ze, ntyiʼə̀ mbyiitə̀ lo “Ka ŋònə̀ wə̀ a pə e lə tyìʼə̀ moonə̀ Jòsebə̀?”
23Yěsû a shwəŋə̀ ambo pobə lo, “Ǹzhyə̂ lo nɨ̌ kẅirə̀ shwəŋə̀ ɨ̀shwəŋnə̀ pɨ màʼnə pə ambo mɨ̀ŋə̀ lo, ‘Mbarə̀ pànə̀, tsuʼù mbɨ̀ŋmə̀ o.’ Nɨ̌ kɨ chi shwəŋə̀ ambo mɨ̀ŋə̀ lo, ‘Ghɨ̀rə̀ mɨ̀nwùə̀ ma nɨ pəə pə ndzuʼù lo wə̀ lə̀ ghɨ̀rə̀ a Kàpenòmə̀ la a nɨ̀kwurə̀ ghò ghə.’”
24Yěsû a làŋə̀ nɨ mbyə̀, nshwəŋə̀ ambo pobə lo, “Ngwə̀ nshwəŋə̀ a nkǔŋə nkuŋə ambo pɨghə lo, ‘Mbə̀ʼə ka pɨ pyiimə̀ e a ngàŋə̀ ntwuumə̀ Nẅùə̀ a àlaʼà pobə.”
25Ǹkùmə̀ nshwəŋə̀ tyìʼə̀ nkǔŋə nkuŋə ambo pɨghə lo, “Pɨ̀kwùə pɨ̀noʼnə lə̀ pə a Israel nkwùə̀ Elijah, nkwùə̀ nɨ nɨ̀pwuurə̀ lə̀ nàanə̀nə aŋunə nguʼu ɨtarə nɨ àtùmə ka mbə̀ŋə̀ ɨ̀ lô e, ndzàŋə̀ ɨ̀ kwuunə̀ a àlaʼà gha. 26La Nẅùə̀ à lə̀ tsàa Elijah tyìʼə̀ ambo taʼà nkwùə mə̀ngyə̌ a nɨ̀kwurə̀ nɨ Zarefàtə̀ nɨ nɨ lə̀ pənə amwuə àlaʼà Sidònə̀. 27A lə̀ pə amwuə nkwùə̀ ngàŋə̀ ntwuumə̀ Nẅùə̀ Elisha, pànə̀ pɨ̀noʼnə amwuə àlaʼà Israel lə̀ pə nɨ àkɨ̀kẅinə, la ka Elisha a lə̀ parə̀ a ghùtse ndàŋə̀ e ndàʼà Namànə̀ ŋwùə̀ Siryà.”
28Nkwùə̀ nɨ Pànə̀ nɨ pɨ lə̀ pənə amwuə ndâ àshwatə̀ gha lə̀ zuʼnə ànwùə̀ nɨ Yěsû à lə̀ shwəŋə̀nə, mɨ̀ntɨŋmə̀ ɨ̀mobə lə̀ zaŋə̀. 29Pobə tyiʼə̀ ndòo a ɨ̀shyə̂ nsùŋə̀ a Yěsû nfurə̀ nɨ ẅèrə amwuə mbòmpə àlàʼà gha, ndòo e nkoʼò ndèrə̀ àtwuə̀ kòŋə̀ gha nɨ pɨ lə̀ poomə̀nə mbòmpə àlaʼà yɨ̀ghu aŋunə lo pɨgrə̀ e alyiʼə ghu. 30La Yěsû a tomnə̀ a tɨ̀tɨ̀rə̀ pobə ndèrə̀ e.
Yěsû a tsirə̀ a ŋònə̀ ɨ̀tse nɨ à lə̀ pənə nɨ àzhwùə̀ tɨ̀pòŋə̀
(Mrk 1.21-28)
31Yěsû à lə̀ shwuʼə̀ ndèrə̀ a Kàpenòmə̀ ẅùə̀ nɨ à lə̀ pənə mbòmpə àlaʼà ghùtse amwuə àlaʼà Galìlyə̂. A pə njyə̂ àlaʼà pɨ̀Jew a mə nnèrə̀ ànwùə̀ Nẅùə̀ ambo pə̀ənə̀. 32Pànə̀ lə̀ yerə̀ ndwuumə̀ nɨ à lə̀ mənə nnèrə̀, ntiinə àshwəŋnə̀ e a lə̀ pə nɨ ɨ̀tɨ̀ŋnə̀. 33Ŋònə̀ ɨ̀tse à lə̀ pə a ndâ àshwatə̀ gha mbə nɨ àzhyə̂. Nkwùə̀ nɨ à lə̀ zəənə̀nə Yěsû, à lə̀ kyiinə̀ nɨ ngyə̀ ntɨ̀ŋnə̀ nshwəŋə̀ lo, 34“Yee! Wə̀ tàʼà ghɨ̀rə̀ àkə ambo pəə, Yěsû ŋwùə̀ Nazarètə̀? Wə̀ tô lə a nɨ zhwuutə̀ a wəə? Ǹzhyə̂ ŋònə̀ nɨ wə̀ pənə ẅèrə, ghǒ ŋònə̀ wa nɨ wə̀ laanə̀nə la, nfurə̀ ambo Nẅùə̀.”
35La Yěsû à lə̀ saʼà e nshwəŋə̀ ambo ze lo, “Zhwemnə̀, nfurə̀ amwuə ze!” Lenəla, àzhyə̂ za a màʼà a ŋònə̀ wa a ɨ̀shyə̂ a tɨ̀tɨ̀rə̀ pobə nfurə̀ amwuə ze la ka chyâ e àlǎ aŋunə ze.
36A lə̀ kə̀ʼnə̀ pànə̀ pɨ̀tsùmə̀ nɨ pɨ lə̀ pənə a ndâ gha, pobə tyiʼə̀ nshwəŋə̀ pobə nɨ pobə lo, “Lə̌ zèrə mbuurə̀ àshwəŋnə̀? Ŋònə̀ wə̀ à wə̀ nɨ mɨ̀tɨ̀ŋnə̀ ghobə ɨ̀tɨ̀ŋnə̀ a nɨ saʼà ɨ̀zhwùə̀ tɨ̀pòŋə̀ pèrə̂ futə̀ amwuə pə̀ənə̀!” 37Àzòrə̀ mbə̀ʼə Yěsû a lə̀ sìimə̀ amwuə ɨlyiʼə ɨ̀tsùmə̀ amwuə pàa àlaʼà ghu.
Yěsû a parə̀ pànə̀ pɨ̀noʼnə
(Mat 9.1-8; Mrk 2.16-20)
38Nkwùə̀ nɨ Yěsû à lə̀ myàʼtə̀nə ndâ àshwatə̀ pɨ̀Jew za à lə̀ kwuunə̀ a ndâ Shimùnə̀. Ngùmə Shimùnə̀ a pə nɨ fibà ghù ntɨ̀ŋnə̀, pɨ fuŋə̀ e lo â tô ngyèmpə̀ e. 39Yěsû à lə̀ tô ntəəmə̀ a nɨ̀pwùnə ɨ̀kwùunə mə̀ngyə̌ wa, nsaʼà a fibà wa lo â myàʼtə̀ a mə̀ngyə̌ wa. Nkwùə̀ nɨ à lə̀ shwəŋə̀nə mmyàanə̀, fibà wa à lə̀ zùŋə̀ mmyàʼtə̀ e, a lòo a ɨ̀shyə̂ ntyiʼə̀ ntsùŋə̀ mɨ̀zɨghə̀ lo ŋâ nɨ pobə. 40A pə a ndzə̀ŋə̀ nẅùumə̀ pànə̀ pɨ̀tsùmə̀ nɨ pobə lə̀ pənə nɨ pɨghoonə nɨ pənə nɨ mbuurə̀ ɨghoonə yɨ̀noʼnə lə̀ lòo a ghobə ntô ambo Yěsû. A nùŋə̀ mbô ɨ̀me àtwuə̀ pobə tyìʼə̀ moʼo moʼo mbarə̀ a ghobə 41Ɨ̀zhyə̂ lə̀ kɨ nfurə̀ a nɨ̀pùmə̀ pànə̀ pɨ̀noʼnə ntyiʼə̀ mmə nkyiinə̀ lo, “Ghǒ Moonə̀ Nẅùə̀!” La Yěsû saʼà a ghobə ka ŋâ e a ghobə nɨ ɨ̀sàanə̀ lo pobə̂ shwəŋnə̀ ntiinə ɨ̀zhyə̂ lə̀ zhyə̂ lo Yěsû la Ghù Ndzoʼnə wa.
Yěsû a nèrə̀ mɨ̀nwùə̀ a ndâ àshwatə̀ pɨ̀Jew
(Mrk 1.35-39)
42Njyə̂ ɨ̀ lə̀ laanə̀, Yěsû a furə̀ amwuə àlaʼà za ndèrə̀ alyiʼə nɨ ka pànə̀ lə̀ pə e ghu. Pànə̀ tyiʼə̀ ntô mmə ntàʼà e, la nkwùə̀ nɨ pobə lə̀ zəənə̀nə e, ka pobə lə̀ chi mmə mbyiimə̀ a ghobə lo â myàʼtə̀ a ghobə. 43La Yěsû a shwəŋə̀ ambo pobə lo, “Nchyə̂ la a nɨ chwìitə̀ ntwuumə̀ ghù ɨ̀shìʼnə̀ mbə̀ʼə ànwùə̀ Nɨ̀fò Nẅùə̀ amwuə mɨ̀tse mɨ̀mbòmpə mɨ ɨ̀laʼà ntiinə lə̌ ɨ̀sùmə ànwùə̀ nɨ pɨ lə̀ tsàanə mə̀ aŋunə la.” 44Nɨ ndwuumə̀ wə̀, à lə̀ tyiʼə̀ ndèrə̀ mmə nshwəŋə̀ ànwùə̀ Nẅùə̀ amwuə mɨ̀ndâ mɨ ɨ̀shwatə̀ mɨ pɨ̀Jew nɨ mɨ lə̀ pənə a Judyà la.
Currently Selected:
Lukə̀ 4: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
