Lukə̀ 14

Yěsû a parə̀ a ngoonə njyə̂ àlaʼà pɨ̀Jew

1A lə̀ pə njyə̂ àlaʼà pɨ̀Jew ɨ̀tse, Yěsû a ghə̀ mmə ndzɨghə̀ a ndâ àtwuə̀ pɨ̀Farìsî àtse. Tsaʼnə à lə̀ pənə ghu la, pobə lə̀ mə ndyənkə̀ e tyìʼə̀ ɨ̀shìʼnə̀. 2Nkɨ wùutə̀ ŋònə̀ ɨ̀tse nɨ mɨ̀kwùə̀ pobə mbô lə̀ koʼtə̀nə a nwuunə̀ a mbyə̀ Yěsû. 3A pyiitə̀ ambo pɨ̀Farìsî pobə pɨ̀nèrə̀ mbòomə pyə̀nə pɨ lə̀ pənə ghu lo, “mbòomə wəənə̀ a nèrə̀ lo pɨ parə̀ ŋwùə̀ a njyə̂ àlaʼà, kə̀ ngaŋə?” 4La pobə lə̀ zhwemnə̀ ghobə. Yěsû a pètə̀ ŋònə̀ wa mbarə̀ e ngɨ̀rə̀ a lèrə̀ e. 5Yěsû a tyiʼə̀ mbyiitə̀ ambo pobə lo, “A ɨ̀wə̌ ɨwɨghə nɨ mbə̀ʼə moonə̀ e kə̀ ɨ̀fòŋə̀ e tə mbəla nkunə̀ amwuə nɨ̀ntaamə̀ nɨ nchyə njyə̂ àlaʼà a ka zùŋə̀ faʼa fuukə̀ e nɨ mɨ̀tɨ̀ŋnə̀ njyə̂ àlaʼà ghu?” 6Ka pobə lə̀ pə a ghobə nɨ àkẅùə̀ mbə̀ʼə àpyiitə̀ e yèghu.

Ànwùə̀ mbə̀ʼə nɨ̀shwuʼkə̀ mbɨ̀ŋmə̀ a ɨ̀shyə̂ pobə nɨ̀kẅiirə̀ pɨ̀ghɨ̀ɨnə̀

7Nkwùə̀ nɨ Yěsû à lə̀ zəənə̀nə lo pànə̀ nɨ pɨ lə̀ wuunə̀nə a ghobə lə̀ pə ntàʼà pə ɨləŋə pɨ̀shìʼnə̀ a nɨ nwuunə̀ aŋunə, à lə̀ shwəŋə̀ àshwəŋnə̀ nàanə nàanə zə̀ ambo pobə: 8“Ŋwùə̀ à tə wuunə̀ o lo wə̀ tô a nɨ̀ghaʼà nɨ̀zoʼò e; wə̀ tô kò wə̀ nwuunə̀ o alyiʼə ɨ̀shìʼnə̀ mbə̀ʼə nkwùə̀ ɨ̀tse, a lə̀ wuunə̀ a ŋònə̀ nɨ à pənə nɨ àghuʼtə̀ ntsàarə̀ o. 9Mbə̀ʼə a pə a lenə, yi ŋònə̀ nɨ à wuunə̀nə a wɨghə pɨ̀tsùmə̀, ǎ tô shwəŋə̀ ambo ghò lo, ‘Lòo o ŋŋâ alyiʼə ambo ŋònə̀ wə̀.’ Lenəla wə̀ tyiʼə̀ ndòo a ɨ̀shyə̂ nɨ ɨ̀sɨŋnə̀ ngə̀ nnwuunə̀ aŋunə aləŋə a ndzùmə̀. 10La pɨ pəla ngwuunə̀ o, wə̀ nkɨ ntô wə̀ nwuunə̀ aŋunə aləŋə ndzùmə̀ mbə̀ʼə ŋònə̀ nɨ à fuŋə̀nə o a tô, a shwəŋə̀ ambo ghò lo, ‘Ɨ̀swùə mə̀, tô nwuunə̀ aŋunə alyiʼə ɨ̀shìʼnə̀ zə̀.’ Lenəla, àghuʼtə̀ noʼnə a pə ambo ghò a ɨ̀myə̂ pànə̀ nɨ pɨghə pobə nwuunə̀ la. 11Ntiinə ŋònə̀ nɨ à ŋaŋə̀nə mbɨ̀ŋmə̀ e àtɨ̀ghə, pɨ ghǎ shwuʼkə̀ e a ɨ̀shyə̂, ŋònə̀ nɨ à shwuʼkə̀nə mbɨ̀ŋmə̀ e a ɨ̀shyə̂, pɨ ghǎ ŋaŋə̀ e àtɨ̀ghə.”

12Yěsû a chi nshwəŋə̀ ambo ngàŋə̀ ndâ wa lo, “Wə̀ mə ngɨ̀rə̀ a nɨ̀ghaʼà, kò wə̀ wuunə̀ pə ndàʼà pɨ̀swùə ɨ̀pô, nɨ pɨlyimə ɨ̀pô, nɨ ngẅàrə̀ o, kə̀ ngàŋə̀ àpàrə̀ nkaʼà ɨ̀zô nɨ pənə pɨ̀ghàŋə pɨ nkabə̀ ntiinə pobə ghǎ kɨ chwìitə̀ o nɨ ɨghobə nɨ̀ghaʼà. Lenəla, kẅuə̀ ànwùə̀ nɨ wə̀ lə̀ ghɨ̀rə̀nə aŋunə pobə. 13La wə̀ pə ghɨ̀rə̀ a nɨ̀ghaʼà, wə̀ chwìitə̀ ngàŋə àfumə̀, pɨ̀koŋə̀ ɨ̀shyə̂, nɨ pɨ̀kɨkə̀ghə pobə pɨ̀fə̀. 14Lenəla, mborə̀ ɨ pə ambo ghò ntiinə mbə̀ʼə pobə ghǎ nkẅuə̀ a ghobə apə̀. Nẅùə̀ a ghǎ tsoʼò àfàʼà o njyə̂ nɨ pànə̀ nɨ mɨ̀nwùə̀ ɨ̀mobə təəmə̀nə ghǎ zhwuumə̀ a nɨ̀wɨghə̀.”

Àshwəŋnə̀ nàanə nàanə mbə̀ʼə nɨ̀ghaʼà ngẅùunə

(Mat 22.1-10)

15Nkwùə̀ nɨ taʼà ŋwùə̀ ɨghobə ɨ̀tse nɨ à lə̀ nwuunə̀nə aŋunə tepèrə̀ pobə pɨ pobə à lə̀ zuʼnə ànwùə̀ nɨ Yěsû à lə̀ shwəŋə̀nə la, à lə̀ shwəŋə̀ ambo ze lo, “Mborə̀ ɨ̀ chyə̂ ambo ŋònə̀ nɨ à ghǎ nwuunə̀ alyiʼə nɨ̀ghaʼà amwuə ànwùə̀ Nɨ̀fò Nẅùə̀.” 16La Yěsû a shwəŋə̀ ambo ze lo, “Ŋònə̀ ɨ̀tse à lə̀ pə ghu mmə ngɨ̀rə̀ a nɨ̀ghaʼà ghù ngẅùunə, ngwuunə̀ pànə̀ pɨ̀noʼnə. 17Nkwùə̀ nɨ̀zɨghə̀ a nɨ̀ghaʼà ɨ̀ lə̀ kùʼù a twuumə̀ a ngàŋə̀ àfàʼà e lo â ghə̀ nfuŋə̀ a ŋwùə̀ ntsùmə̀ nɨ pɨ lə̀ chwìitə̀nə e lo, ‘Àzwuumə̀ àtsùmə̀ a tyiʼə̀ a ɨ̀shyə̂.’ 18La pànə̀ nɨ pɨ lə̀ chwìitə̀nə a ghobə la pìʼnə̀ a nɨ tiitə̀ mɨ̀nwùə̀ nɨ mɨ nàanə̀nə lo kò pobə tô, ghù ntsàambyə̀ a shwəŋə̀ ambo ze lo, ‘Ǹdzwuunə̀ alyiʼə ɨ̀shyə̂ mə̀, ǹtàʼà ghə̀ naŋə̀ a zèrə, njiilo, kẅiirə̀ àpuʼù mbô mə̀.’ 19Àpaatə̀ a shwəŋə̀ lo, ‘Ǹdzwuunə̀ mɨ̀fòŋə̀ nɨ̀ghumə̀, ngwə̀ a àlàŋə mmə ngə̀ a nɨ zəənə̀ tsaʼnə mèrə ma nfàʼà; njiilo kẅiirə̀ àpuʼù mbô mə̀.’ 20Ghùtse a shwəŋə̀ àze lo, ‘M̀birə̀ ndzoʼò a ngẅùə mə̀, ka mbə tô mə̀.’

21“Ngàŋə̀ àfàʼà wa a kwə̂, nkẅirə̀ shwəŋə̀ ɨ̀nwùə̀ pə̀ ɨ̀tsùmə̀ ambo masàa e. Ntɨŋmə̀ masàa e zaŋə̀ a shwəŋə̀ ambo ze lo, ‘Faʼa nfurə̀ ndèrə̀ amwuə ɨ̀twuə̀ ndwuumə̀ ɨ̀tsùmə̀ pobə mɨ̀ntsùrə mɨ̀tsùmə̀ amwuə ghə, nfuŋə̀ ngàŋə àfumə̀, nɨ pɨ̀koŋə̀ ɨ̀shyə̂, nɨ pɨ̀kɨkə̀ghə pobə pɨ̀fə̀.’ 22Ngàŋə̀ àfàʼà wa a ghə̀ nkẅirə̀ nkwə̂, nshwəŋə̀ lo, ‘Tǎ, ànwùə̀ nɨ wə̀ shwəŋnə̀ lo n̂gɨ̀rə̀ la, ǹgɨ̀rə̀ mə. La ɨ̀sàanə̀ ɨ̀ pirə̀ ambo pə̀ənə̀.’

23“Masàa wa a làŋə̀ nɨ mbyə̀ nshwəŋə̀ ambo ngàŋə̀ àfàʼà e wa lo, ‘Kẅirə̀ ngə̀ amwuə mɨ̀ntsùrə pobə mɨ̀fəərə̀ mɨ̀tsùmə̀ nshwatə̀ pànə̀ pɨ̀tsùmə̀ nɨ wə̀ zəənə̀nə mbə̀ʼə ndâ mə̀ zə ɨ̂ lẅenə̀. 24Ǹshwəŋə̀ ambo ghò lo, mbə̀ʼə taʼà ŋwùə̀ wa ɨ̀tse nɨ ndə̀ pyə̀nə nchwìitə̀ e la a zhwiʼì e àzwuumə̀ àtse amwuə nɨ̀ghaʼà wə̀ apə̀.’”

A tɨ̀ŋnə̀ a nɨ pə àzùŋə̀ ndzùmə̀ Yěsû

(Mat 5.13; Mrk 9.50)

25Ɨ̀pùŋə̀ pə̀ənə̀ lə̀ mə ndzùŋə̀ a Yěsû, a pə̀ŋə̀ nshwəŋə̀ ambo pobə lo, 26“Ŋònə̀ nɨ à wə̀ ndzùŋə̀ mə̀ ka twuunə̀ e a tǎ ɨghobə pobə mǎ e, nɨ ngẅùə e ghobə ɨ̀poonə̀ ɨ̀pe, nɨ pɨlyimə ɨ̀pe pɨ̀mbyàŋnə̀ pobə pɨ pə̀ngyə̌ tə farə àtwuə̀ ɨ̀pɨ̀ŋmə̀ e, mbə̀ʼə ka à pə e àzùŋə̀ ndzùmə̀ mə̀. 27Ŋònə̀ nɨ mbə̀ʼə ka à pìʼì e a àtɨ̀ghə pànkə̀nə e ndzùŋə̀ mə̀, mbə̀ʼə ka à pə e àzùŋə̀ ndzùmə̀ mə̀.

28“Ntiinə, a ɨ̀wə̌ amwuə pɨghə nɨ à tə mbəla mbə korə̀ a mɨlyiʼə ndâ nɨkaŋə e, a ka nwuunə̀ e a ɨ̀shyə̂ nshankə̀ ndùnə̀ ɨ̀pwuumə̀ nɨ ǎ myàanə̀ ndâ ghu pòŋə̀ pìʼnə̀ àfàʼà? 29À tə mbəla mbyə̀ ka shankə̀ ndùnə̀ ɨ̀pwuumə̀ a nɨ poomə̀ ndâ zə̀ ntyiʼə̀ nkorə̀ àtsirə̀ ka myàanə̀ e ndâ aŋunə, yi ŋònə̀ nɨ ǎ làŋə̀ zəənə̀ ǎ tyiʼə̀ ẅìi, 30shwəŋə̀ lo, ‘Zəənə̀ a ŋònə̀ ɨ̀tse nɨ à pìʼnə̀nə a nɨ̀ghùrə̀ la a tsàarə̀ e a nɨ myàanə̀.’

31“Kə̀ ɨ̀fò ɨ̀tse à wa ghu nɨ mbə̀ʼə a mə ngə̀ màʼà ntsòo pobə ẅùə̀, a ka nwuunə̀ e a ɨ̀shyə̂ kwànkə̀ lo tə mbə̀ʼə a lòo ngàŋə màʼà ntsòo ɨ̀ze nkaamə̀ nɨ̀ghumə̀ ngə̀ ndzòŋnə̀ a ẅùə̀ ɨ̀fò nɨ à pənə nɨ ngàŋə màʼà ntsòo ɨ̀ze nkaamə̀ mɨ̀ghumə̀ mɨmbaa? 32A pəla ndzəənə̀ lo mbə̀ʼə ka à tsàarə̀ e a ẅùə̀, a pòŋə̀ lo a zùŋə̀ ntsàa pə̀ənə̀ nɨ ntwuumə̀ ambo ɨ̀fò wa nɨ à pirə̀nə a ndyə̌ sàa, mbuʼù mbô ndàʼnə̀ ntsòo wa mbə̀ʼə pobə ze nwuunə̀ nɨ àporə̀porə̀. 33A ndəŋə ndəŋə, ǹkùmə̀ nshwəŋə̀ a wɨghə lo, mbə̀ʼə ŋònə̀ wa ntsùmə̀ nɨ ka à twuunə̀ e ɨ̀pwuumə̀ ɨ̀pe ɨ̀tsùmə̀ a pə e àzùŋə̀ ndzùmə̀ mə̀ apə̀.

Ngwaŋə̀ mɨ tɨlɨ̀ŋmə̀

(Mat 5.13; Mrk 9.50)

34“Ngwaŋə̀ pòŋə̀, la ngwaŋə̀ tɨ ka pə chi lɨ̀ŋmə̀ e, pɨ tyiʼə̀ ngɨ̀rə̀ lə ɨla nɨ mèrə lo mɨ pòŋə̀ lɨ̀ŋmə̀? 35Mɨ tɨ pəla ka chi lɨ̀ŋmə̀ e, yi ka àfàʼà e a pə e ghu. Ka mèrə kɨ nchi nkùʼnə̀ e a nɨ chyâ a ɨ̀shyə̂; mèrə tyiʼə̀ mbə lo pɨ̀ waʼà.

“Ŋònə̀ wa nɨ à pənə nɨ mɨtugrə, â zuʼù.”

Currently Selected:

Lukə̀ 14: pny

Highlight

Copy