Lukə̀ 13
13
Nɨ̀ pə̀ŋə̀ aŋunə a tɨ̀pòŋə̀ ɨwɨghə kə̀ nɨ̀ kwɨghə̀
1A lə̀ pə nkwùə̀ ghu nɨ Yěsû à lə̀ mənə nshwəŋnə̀ la, pànə̀ pɨ̀tse lə̀ shwəŋə̀ ambo ze tsaʼnə Palètə̀ à lə̀ shwəŋə̀nə pɨ zhwuutə̀ pànə̀ pɨ Galìlyə̂ pɨ̀tse ngẅìrə̀kə̀ àləəmə̀ àzobə ghobə yè mɨ̀nyàamə̀ nɨ pɨ lə̀ mənə mmàʼà Nẅùə̀ ghu. 2Yěsû a pyiitə̀ ambo pobə lo, “Nɨ̀ kwàŋə̀ lo pèrə pə pànə̀ pɨ Galìlyə̂ lə̀ kwɨghə̀ la ntiinə pobə pənə ngàŋə ngɨ̀rə̀ ɨ̀nwùə̀ tɨ̀pòŋə̀ ntsàarə̀ a pɨ̀tse pànə̀ pɨ Galìlyə̂? 3Ǹshwəŋə̀ ambo pɨghə lo ka a pə e a lenə. Nɨ̀ tə ngoŋə̀ a wɨghə mɨ̀ntɨŋmə̀ ɨ̀mɨghə tɨ pə̀ŋə̀ aŋunə tɨ̀pòŋə̀ ɨwɨghə, yi nɨ̀ ghǎ kɨ kwɨghə̀ tsaʼa pobə. 4Kə̀ nɨ̀ kɨ nchi nkwàŋə̀ lo pànə̀ pa nɨ̀ghumə̀ ntsòbə̀ nɨ̀fàamə̂, pyə̀ nɨ mɨlyiʼə tə̀sàa ndâ nɨkaŋə nɨ pɨ lə̀ poomə̀nə ɨ̀ koʼò ndèrə̀ a nɨ̀pwuurə̀ ɨ̀ lə̀ kunə̀ nzhwuutə̀ a ghobə a nɨ̀kwurə̀ Silòmə̀ la lə̀ ghɨ̀rə̀ ànwùə̀ tɨ̀pòŋə̀ zhyə̀ nɨ a tsàarə̀nə pànə̀ pɨ̀tsùmə̀ pyə̀ nɨ pɨ pənə a Yèrusalèmə̀? 5Ngaŋə! Ka pə e a lenə. Nɨ̀ tɨ ngoŋə̀ a wɨghə mɨ̀ntɨŋmə̀ ɨ̀mɨghə tɨ pə̀ŋə̀ yi nɨ ghǎ kwɨghə̀ la amwuə ndwuumə̀ ẅèrə wə̀.”
Àshwəŋnə̀ nàanə̀ nàanə mbə̀ʼə àtɨ̀ghə figə̀
6Yěsû a chi nshwəŋə̀ ambo pobə amwuə àshwəŋnə̀ nàanə nàanə lo, “Ŋònə̀ ɨ̀tse à lə̀ pyə̀ àtɨ̀ghə figə̀ e amwuə mbyiinə̀ mɨ̀tɨ̀ghə e, nga ntô a nɨ naŋə̀, ndzəənə̀ lo ka à zumə̀ e mɨ̀ntàamə. 7A shwəŋə̀ ambo mbyabə̀ nkaʼà lo, ‘Naŋə̀! Lə̌ nguʼu ɨtarə nɨ ǹtô mə a nɨ naŋə̀ àtɨ̀ghə zə la ka zəənə̀ mə̀ mɨ̀ntàamə àtwuə̀. Wàrə̀ mmàʼà a ɨ̀shyə̂; a nàanə̀ àpàbə ɨ̀shyə̂ zə̀ aŋunə àkə?’ 8Mbyabə̀ nkaʼà wa a kẅùə̀ ambo ze lo, ‘Tǎ, myàʼtə̀ nguʼu wə̀ ɨ̂ chi ndàŋə̀, mbɨ tuŋə̀ ɨ̀sùmə e kamnə̀ chyâ mànyunə̀, 9mbə̀ʼə a ghǎ mbə amwuə ẅùə̀ nguʼu ndzumə̀, a pòŋə̀, a ka zumə̀ e wə̀ wàrə̀ mmàʼà a ɨ̀shyə̂.’”
Yěsû a parə̀ mə̀ngyə̌ amwuə njyə̂ àlaʼà
10A lə̀ pə̀ njyə̂ àlaʼà ɨ̀tse Yěsû pə̀ amwuə ndâ àshwatə̀ pɨ̀Jew mmə nèrə̀ mɨ̀nwùə̀ ghu. 11Mə̀ngyə̌ ɨ̀tse à lə̀ pə ghu nɨ àzhwùə̀ tɨ̀pòŋə̀ a lə̀ pənə amwuə ze ngɨ̀rə̀ a ghòonə̀ aŋunə nguʼu ntsòbə̀ nɨ̀fàamə̂; ŋŋuʼtə̀ ngyìinə̀, ka pə zhyə̂ pə̀ʼkə̀ təəmə̀ e. 12Nkwùə̀ nɨ Yěsû à lə̀ zəənə̀nə e, à lə̀ fuŋə̀ e a mbyə̀, nshwəŋə̀ ambo ze lo, “Mə̀ngyə̌, wə̀ fiitə̀ aŋunə nɨ̀ghòonə̀ o wa.” 13Yěsû à lə̀ tsàa àpô e nnùŋə̀ aŋunə ze, a zùŋə̀ nshyə̀ mbɨ̀ŋmə̀ e mbə̀ʼkə̀ ntəəmə̀ ntyiʼə̀ nguʼtə̀ a Nẅùə̀. 14Àtwuə̀ ndâ àshwatə̀ pɨ̀Jew a lə̀ zaŋə̀ a loŋə ntiinə Yěsû à lə̀ parə̀nə a mə̀ngyə̌ wa amwuə njyə̂ àlaʼà ntyiʼə̀ nshwəŋə̀ ambo pànə̀ nɨ pɨ lə̀ pənə ghu lo, “Mɨ̀njyə̂ mɨ àfàʼà chyə̂ la ntuurə̀; nɨ̀ mə ntô amwuə mɨ̀njyə̂ mèrə mə njiilo pɨ parə̀ a wɨghə, ka pə e njyə̂ àlaʼà.”
15Ndòʼnə̀mbyə̂ à lə̀ kẅùə̀ ambo ze lo, “Ghǒ ngàŋə̀ àpə̀grə̀! Ŋwùə̀ wɨghə ɨ̀tse à wa ghu nɨ ka a fuukə̀ e ɨ̀fòŋə̀ e kə̀ ndzàkɨshyə̀ njyə̂ àlaʼà ndèrə̀ nɨ zèrə lo ɨ̂ nô nchyə? 16La, nɨ̀ zəənə̀, lə̌ moonə̀ Abràhamə̀ ghùtse nɨ Satàanə̀ à lə̀ korə̀nə e aŋunə nguʼu ntsòbə̀ nɨ̀fàamə̂; ka a kùʼnə̀ e lo mbə̀ʼə pɨ kyàa e njyə̂ àlaʼà aŋunə àzwuumə̀ zhyə̀ nɨ a lə̀ korə̀nə e?”
17Àkẅùə̀ àshwəŋnə̀ e a lə̀ ghɨ̀rə̀ ɨ̀sɨŋnə̀ koorə̀ ngàŋə̀ kɨpaanə ɨ̀ze za; pànə̀ pɨ̀tsùmə̀ lə̀ tyiʼə̀ ngaʼà ntii mɨ̀nwùə̀ mɨ yerə̀nə yerə̀nə nɨ à lə̀ ghɨ̀rə̀nə.
Àshwəŋnə̀ nàanə nàanə mbə̀ʼə ànwùə̀ Nɨ̀fò Nẅùə̀
(Mat 13.31-32; Mrk 4.30-32)
18Yěsû a tyiʼə̀ nshwəŋə̀ lo, “Ànwùə̀ nɨ̀fò nɨ̀pwuurə̀ a chyə̂ la tsaʼa àkə? Kə̀ mbə̀ʼə m̀mɨ̀nkə̀ lə nɨ àkə? 19A chyə̂ la tsaʼa mbyə àloonə̀ zhyə̀ nɨ ŋònə̀ ɨ̀tse à lə̀ lòonə ngə̀ mbyə̀ amwuə nkaʼà e; ɨ̀ koʼò ntyiʼə̀ mbə àtɨ̀ghə, pɨ̀sɨ̀ŋə tyiʼə̀ ntô nkorə̀ mɨ̀nkàanə̀ ɨ̀mobə aŋunə mɨ̀fàa ɨ̀me.”
Àshwəŋnə̀ nàanə nàanə mbə̀ʼə mbyə̌ àpaanə̀
20Yěsû a chi nshwəŋə̀ lo, “Mbə̀ʼə m̀mɨ̀nkə̀ ànwùə̀ Nɨ̀fò Nẅùə̀ lə nɨ àkə?” 21A chyə̂ la tsaʼa mbyə̌ àpaanə̀ nɨ mə̀ngyə̌ a chyânə amwuə àpaanə̀ nɨ a noʼnə, ngɨ̀rə̀ àpaanə̀ yèghu a tyiʼə̀ nkoʼò ka mɨ̀zùŋə.
Ntswùə̀ ndâ yɨ̀ kɨ̂ wa
(Mat 7.13-14, 7.21-23)
22Yěsû à lə̀ chi ngə̀ ndàŋə̀ amwuə mɨ̀mbòmpə mɨ ɨ̀laʼà pobə ɨ̀laʼà ngyìinə̀ nchwìitə̀ ntwuumə̀ Nẅùə̀ nkoʼò ndèrə̀ a Yèrusalèmə̀. 23Ŋònə̀ ɨ̀tse a pyiitə̀ ambo ze lo, “Tǎ la ghǎ chwarə̀ tyìʼə̀ ndùnə̀ pànə̀ yɨ̀ kɨ̂?”
Yěsû kẅùə̀ lo, 24“Nɨ̀ kyiitə̀ a nɨ kwuunə̀ amwuə ntswùə̀ ndâ yɨ̀ kɨ̂ wa; ntiinə pànə̀ pɨ̀noʼnə ghǎ pə kyiitə̀ a nɨ kwuunə̀ amwuə, la pə kwuunə̀ a ghobə apə̀. 25Ngàŋə̀ ndâ à ghǎ lòo a ɨ̀shyə̂ a taʼà nkwùə̀ wùʼnə̀ ndâ, nɨ̀ ghoŋə̀ a àpyìinə ntyiʼə̀ ntə ntsòotə̀ ntswùə̀ ndâ nshwəŋə̀ lo, ‘Tǎ ẅùʼə̀ pəə kwuunə̀!’ Tǎ à ghǎ kẅùə̀ ambo pobə lo, ‘Ka nzhyə̂ mə̀ a wɨghə ka kɨ zhyə̂ mə̀ alyiʼə nɨ nɨ̀ furə̀nə.’ 26Nɨ̀ tyiʼə̀ mbìʼnə̀ a nɨ shwəŋə̀ lo, ‘Pəə lə̀ pə ndzɨghə̀ nkɨ mmə nnô pə̀ənə̀, wə̀ kɨ mmə nnèrə̀ ànwùə̀ Nẅùə̀ amwuə àlaʼà àzəə.’ 27La tǎ à ghǎ shwəŋə̀ ambo pɨghə lo, ‘Ka ǹzhyə̂ mə̀ a wɨghə ka kɨ zhyə̂ mə̀ alyiʼə nɨ nɨ̀ furə̀nə. Nɨ̀ mìntə̀ a wɨghə a nɨ̀pwùnə mɨ̀ŋə̀ ndèrə̀ mbǎ ngàŋə̀ ngɨ̀rə̀ ɨ̀nwùə̀ tɨ̀pòŋə̀.’ 28Nɨ̀ ghǎ tyiʼə̀ yìi kwurə̀ mɨsoŋə ɨ̀mɨghə nkwùə̀ nɨ nɨ̀ ghǎ zəənə̀ Abràhamə̀ pobə Isàkə̀ nɨ Yàkobə̀, nɨ ngàŋə̀ ntwuumə̀ Nẅùə̀ ntsùmə̀ ɨ pə̀ amwuə ànwùə̀ Nɨ̀fò Nẅùə̀. La pɨ̀ tinə̀ a wɨghə ntsàa a àpyìinə. 29Pànə̀ ghǎ furə̀ a pàa saʼà nẅùumə̀ nɨ pàa ngẅènə̀ nẅùumə̀, pàa mɨ̀kòʼnə nɨ pàa mɨ̀tùŋə, tô nwuunə̀ alyiʼə nɨ̀ghaʼà amwuə ànwùə̀ Nɨ̀fò Nẅùə̀. 30Nɨ̀ zəənə̀, pànə̀ pɨ̀tse pyə̀nə pɨ pənə pɨ̀lẅùə̀ pɨ̀ndzùmə̀ tɨ̀tsòŋə̀, pɨ ghǎ pə̀ pɨ̀tsàa pɨ̀mbyə̀, ɨ pɨ̀tse nɨ pɨ pənə pɨ̀tsàa pɨ̀mbyə̀ tɨ̀tsòŋə̀ la, ntyiʼə̀ mbə pɨ̀lẅùə̀ pɨ̀ndzùmə̀.”
Yěsû a sòmnə̀ mbə̀ʼə pànə̀ pɨ Yèrusalèmə̀
(Mat 23.7-39)
31Tyìʼə̀ nkwùə̀ ghu, pɨ̀Farìsî pɨ̀tse lə̀ tô a nɨ̀pwùnə Yěsû nshwəŋə̀ ambo ze lo, “Furə̀ a nɨ̀ghə̂ ndèrə̀ alyiʼə nyaanə ntiinə Heròdə̀ à wə̀ ntàʼà zhwuutə̀ o.”
32Yěsû a kẅùə̀ ambo pobə lo, “Twùə̀ ngə̀ nshwəŋə̀ ambo antsobə wa lo, ‘Mbɨ fuukə̀ ɨ̀zhyə̂ a mɨ̀pùmə̀ pə̀ənə̀, kɨ parə̀ mɨghoonə ɨ̀mobə sìnə̀ ghobə ngẅùʼə, a kɨ pə njyə̂ ɨtarə m̂myàanə̀ àfàʼà mə̀.’ 33La ǹchyə̂ a nɨ lèrə̀ nɨ mbyə̀ sìnə̀ ghobə ngẅùʼə nɨ njyə̂ nɨ ɨ̀ paatə̀nə la; ka a kùʼnə̀ e lo pɨ̀ zhwuutə̀ a ngàŋə̀ ntwuumə̀ Nẅùə̀ alyiʼə nyaanə ndàŋə̀ e a Yèrusalèmə̀.
34“Pànə̀ pɨ Yèrusalèmə̀, pànə̀ pɨ Yèrusalèmə̀! Nɨ̀ zhwuutə̀ ngàŋə ntwuumə̀ Nẅùə̀, ntumpə̀ pànə̀ nɨ pɨ twuumə̀nə ambo pɨghə nɨ mɨ̀ghòorə nzhwuutə̀. A nkwùə̀ noʼnə nɨ ǹtàʼà mə lo shwatə̀ ɨ̀poonə̀ ɨ̀pɨghə tsaʼa mǎ ngubə̀ à wa nkumnə̀ ɨ̀poonə̀ ɨ̀pe a ɨ̀sùmə mɨ̀pàrə̀ ɨ̀me, la ka nɨ̀ pyiimə̀ a wɨghə. 35Nɨ̀ naŋə̀! Nẅùə̀ à ghǎ waʼà a wɨghə nɨ̀ pə àtwuə̀ nɨ pɨghə. Ǹshwəŋə̀ ambo pɨghə lo ka nɨ̀ pə chi zəənə̀ wɨghə a gha tə pyàa nkwùə̀ nɨ nɨ̀ ghǎ tyiʼə̀ shwəŋə̀ lo, ‘Mborə̀ ɨ̀ chyə̂ ambo ẅùə̀ wa nɨ à tônə aŋunə nɨ̀linə̀ nɨ Ndòʼnə̀mbyə̂ la.’”
Currently Selected:
Lukə̀ 13: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
