Lukə̀ 12

Àkwàtə̀ mbə̀ʼə àpə̀grə̀

(Mat 10.26-27)

1Tyìʼə̀ nkwùə̀ ghu, àpùŋə̀ pə̀ənə̀ mɨ̀nkaamə̀ a lə̀ tô nshwatə̀, pɨ̀tse tyiʼə̀ mmə ntinə̀ nnyə̀nkə̀ pɨ̀tse ndàŋə̀. Yěsû a pə̀ŋə̀ ndzàamə̀ mbìʼnə̀ a nɨ kwàtə̀ ɨ̀zùŋə̀ ndzùmə̀ ɨ̀pe, nshwəŋə̀ lo, “Nɨ̀ zhìʼtə̀ a wɨghə nɨ mbyə̌ àpaanə̀ pɨ̀Farìsî, zhyə̀ nɨ ɨ̀ pənə àpə̀grə̀ la. 2Ka àzwuumə̀ àtse nɨ a pənə yè kumnə̀nə nɨ ka pɨ̀ pə ghǎ nyaʼkə̀ e, kə̀ zhyə̀ nɨ a pənə yè lə̀əmə̀nə nɨ ka à pə ghǎ furə̀ e a sàŋə̀. 3Lenəla ɨ̀nwùə̀ ɨ̀tsùmə̀ nɨ nɨ̀ wa nshwəŋə̀ nɨ ɨ̀twuʼə̀ pɨ̌ zuʼù nɨ njyə̂, ɨ̀nwùə̀ ɨ̀tsùmə̀ nɨ nɨ̀ kɨnə mmə nchùmpə̀ a nɨ̀lə̀əmə̀ la, pɨ̌ tyiʼə̀ təəmə̀ la a mɨ̀kẅùə̀ mɨ ndâ shwəŋə̀ a pèrə.”

Ŋònə̀ nɨ mbə̀ʼə pɨ pô

(Mat 10.28-31)

4“Pɨ̀swùə ɨ̀pâ, nɨ̀ zhwiʼtə̀! Kò nɨ kɨ mbô a wɨghə pə pànə̀ nɨ mbə̀ʼə pobə zhwuutə̀ pə ndàʼà mbòbə̀ mbɨ̀ŋmə̀ ka pə chi ghɨ̀rə̀ a ghobə a yètse ànwùə̀. 5La mbɨ nèrə̀ a wɨghə nɨ ŋònə̀ nɨ mbə̀ʼə nɨ̀ pô la: Nɨ̀ pô a ŋònə̀ ẅùə̀ nɨ mbə̀ʼə a zhwuutə̀ mbòbə̀ mbɨ̀ŋmə̀ nkɨ mbə nɨ ɨ̀tɨ̀ŋnə̀ a nɨ màʼà a wɨghə amwuə àkɨɨnə̀ ɨ̀mǔ; nshwəŋə̀ ambo pɨghə lo, nɨ̀ pô e. 6Wə̀ zhyə̂ lo pɨ shwùunə̀ ɨ̀kɨ̀zɨnkə ɨtaanə̀ la nɨ pɨ̀kapà pɨpaa? La ka Nẅùə̀ a lə̀ənə̀ e tyìʼə̀ taʼà akɨzɨnkə ẅèrə wə̀ ɨ̀tse. 7Nɨ̀ zəənə̀, Nẅùə̀ à zhyə̂ ndùnə̀ ɨ̀nyùŋə̀ nɨ ɨ̀ pənə àtwuə̀ pɨghə tyìʼə̀ ntsùmə̀. Kò nɨ pô, nɨ̀ tsə̂ ntsàarə̀ ɨ̀kɨ̀zɨnkə pɨ̀noʼnə.”

Nɨ̀pyiimə̀ kə̀ nɨ̀twuunə̀ a Kristù

(Mat 10.32-33, 12.32)

8“Ǹshwəŋə̀ ambo pɨghə lo, Ŋònə̀ nɨ ǎ pyiimə̀ mə̀ a sàŋə̀ sàŋə̀ la, Moonə̀ Ŋwùə̀ à ghǎ kɨ pyiimə̀ e a mbyə̀ pəngèrə̀ pɨ Nẅùə̀. 9La ŋònə̀ nɨ a twuunə̀nə mə̀ a sàŋə̀ sàŋə̀ la, Moonə̀ Ŋwùə̀ à ghǎ kɨ twuunə̀ e a mbyə̀ pəngèrə̀ pɨ Nẅùə̀.

10“Ŋwùə̀ ntsùmə̀ wa nɨ à shwəŋə̀nə ànwùə̀ tɨ̀pòŋə̀ mbə̀ʼə Moonə̀ Ŋwùə̀ la, pɨ ghǎ lə̀ənə̀ ɨ̀fàntə̀ ɨ̀nwùə̀ ɨ̀pe; la ŋònə̀ wa nɨ à wa nshwəŋə̀ a tɨ̀pòŋə̀ mbə̀ʼə Àzhwùə̀ Nẅùə̀ la ka pɨ̀ pə ghǎ lə̀ənə̀ e ɨ̀fàntə̀ ɨ̀nwùə̀ ɨ̀pe.

11“Nkwùə̀ nɨ pɨ̌ lòo a wɨghə tô a ndâ àshwatə̀ pɨ̀Jew a mbyə̂ pɨ̀saʼà pɨ àlaʼà pobə pɨ̀tǎ pɨ àlaʼà, kò nɨ̀ kɨ nkwàŋə̀ a wɨghə ànwùə̀ nɨ nɨ̌ shwəŋə̀ kə̀ ndwuumə̀ nɨ nɨ̌ kẅùə̀ a nɨ fuukə̀ mbɨ̀ŋmə̀ ɨ̀zɨghə amwuə ɨ̀sàʼa; 12ntiinə Àzhwùə̀ Nẅùə̀ ǎ nèrə̀ a wɨghə nɨ ànwùə̀ nɨ nɨ̌ shwəŋə̀ nkwùə̀ ghu.”

Àshwəŋnə̀ nàanə nàanə mbə̀ʼə ngàŋə̀ nkabə̀ nɨ à lə̀ pənə àkɨ̀ghə̀

13Yɨ̀tse ŋwùə̀ amwuə àpùŋə̀ pə̀ənə̀ za a shwəŋə̀ ambo Yěsû lo, “Ɨ̀nèrə̀ ɨ̀nwùə̀, shwəŋə̀ ambo momaa mə̀ lo â ghàbə̀ ɨ̀pwuumə̀ pa nɨ tǎ à lə̀ myàʼtə̀nə la ŋŋâ ɨ̀pâ.”

14Yěsû a kẅùə̀ ambo ze lo, “Ngɨ̀ɨnə̀ mə̀, a gha tsaʼa ɨ̀sàʼa mɨ̀sàʼa kə̀ ɨ̀ngàbə̀ ɨ̀pwuumə̀ a tɨ̀tɨ̀rə̀ pɨghə la à tsoʼò ɨ̀wə̌?” 15Yěsû a làŋə̀ nɨ mbyə̀ nshwəŋə̀ ambo pobə lo, “Nɨ̀ zhìʼtə̀ a wɨghə a nɨ pə nɨ ntoŋə aŋunə àzwuumə̀ àtse; ntiinə nɨ̀chyə̂mbyə̂ ŋwùə̀ ka a pə e la ɨ̀pwuumə̀ pɨ noʼnə nɨ à pənə pèrə.” 16A chi ndàŋə̀ nɨ mbyə̀ nshwəŋə̀ àshwəŋnə̀ nàanə nàanə ambo pobə lo, “Ɨ̀swùumə ngàŋə̀ nkabə̀ ɨ̀tse ɨ lə̀ mə ŋŋâ mɨ̀zɨghə̀ tyìʼə̀ mɨ̀noʼnə. 17À lə̀ lòo àkwàŋə̀, mbyiitə̀ ambo mbɨ̀ŋmə̀ e lo, ‘Mbɨ ghɨ̀rə̀ lə ɨla tsaʼnə ka mbə mə̀ nɨ alyiʼə nɨ mbə̀ʼə ǹfùʼù mɨ̀zɨghə̀ ɨ̀mâ nnùŋə̀ ghu lə?’ 18À lə̀ tyiʼə̀ nshwəŋə̀ ambo mbɨ̀ŋmə̀ e lo, ‘Ǹzhyə̀ ànwùə̀ nɨ mbɨ ghɨ̀rə̀; mbɨ shàʼtə̀ mɨntaŋə ɨ̀mâ tyìʼə̀ mɨ̀tsùmə̀ kẅirə̀ korə̀ a mɨ̀ẅùunə, myə̀ nɨ mbə̀ʼə mɨ lòo mɨ̀zɨghə̀ pobə ɨ̀pwuumə̀ ɨ̀pâ ɨ̀tsùmə̀. 19Lenəla, mbɨ tyiʼə̀ shwəŋə̀ ambo mbɨ̀ŋmə̀ mə̀ lo, “Wə̀ nùŋə̀ ɨ̀pwuumə̀ pɨ̀shìʼnə̀ ɨ̀tsùmə̀ pyə̀ nɨ mbə̀ʼə wə̀ zɨghə̀ aŋunə mɨnguʼu mɨ̀noʼnə. Kò wə̀ chi ntsòo o mbɨ̀ŋmə̀ o, nwuunə̀ o ntə ndzɨghə̀, nnô, nkɨ ntèrə̀ o.”’”

20“La Nẅùə̀ a shwəŋə̀ ambo ze lo, ‘Àpuukə̀ ŋònə̀ wə̀! Mbɨ fuŋə̀ ntɨŋmə̀ o nɨ ɨ̀twuʼə̀ sìnə̀ wə̀, zəənə̀ lo ɨ̀pwuumə̀ pa nɨ wə̀ fùʼnə nshwatə̀ la tyiʼə̀ pə pɨ ɨ̀wə̌ lo?’”

21Yěsû a tyiʼə̀ ndẅùutə̀ nshwəŋə̀ lo, “Lə̌ tsaʼnə a ghǎ pə ambo ŋònə̀ nɨ à wa nshwatə̀ ɨ̀pwuumə̀ nnùŋə̀ ambo mbɨ̀ŋmə̀ e ndàʼà, la ka pə e nɨ ɨ̀pwuumə̀ amwuə ndwuumə̀ nɨ Nẅùə̀ à tàʼnə.”

Nɨ̀nùŋə̀ ntɨŋmə̀ aŋunə Nẅùə̀

(Mat 6.25-34)

22Yěsû a tyiʼə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ ndwuumə̀ wə̀ ǹshwəŋə̀ ambo pɨghə lo, kò nɨ kɨ nkwàŋə̀ mbə̀ʼə nɨ̀chyə̂mbyə̂ ɨwɨghə lo nɨ̌ zɨghə̀ àkə? Kə̀ lo nɨ̌ ẅî àkə? 23Nɨ̀chyə̂mbyə̂ à tsàarə̀ mɨ̀zɨghə̀, mbɨ̀ŋmə̀ o ɨ̀ kɨ ntsàarə̀ ɨtsəʼə. 24Nɨ̀ naŋə̀! Ka pɨ̀məsaŋə pyə̀ a ghobə ka kɨ mə fùʼù a ghobə mɨ̀zɨghə̀, ka kɨ pə ghobə nɨ mɨntaŋə, kə̀ mɨkaŋə, la Nẅùə̀ a mə ndzə̂ a ghobə. Ka nɨ̀ tsàarə̀ a wɨghə pɨ̀məsaŋə panə? 25Mbə̀ʼə ŋwùə̀ wɨghə ɨ̀tse a kẅìʼnə̀ a mətùmə nkwùə̀ aŋunə nɨ̀chyə̂mbyə̂ e ntiinə à wə̀ nkwàŋə̀ mbə̀ʼə ẅèrə? 26Nɨ ndwuumə̀ wə̀, nɨ̀ tɨ ka zhyə̂ a wɨghə a nɨ kẅìʼnə̀ tyìʼə̀ a mɨlyiʼə àzwuumə̀ tsaʼa zèrə̀ zə̀, nɨ̀ tyiʼə̀ ntòmnə̀ mbɨ̀ŋmə̀ ɨ̀zɨghə mbə̀ʼə pɨ̀tse ɨ̀pwuumə̀ la ntii àkə?

27“Nɨ̀ naŋə̀ pɨ̀tǒŋtǒŋə a mɨpaʼa ndzəənə̀ ndwuumə̀ nɨ pèrə pa nkẅuə̀. Ka pèrə mə nfàʼà a ghobə ka kɨ mə tsùŋə̀ a ghobə ɨtsəʼə. La ǹshwəŋə̀ a wɨghə lo, tyìʼə̀ ɨ̀fò Solomònə̀ nɨ ɨ̀pwuumə̀ ɨ̀pe ɨ̀tsùmə̀ ka a lə̀ ẅî e atsəʼə yè ɨ̀shìʼnə̀ tsaʼa pɨ̀tǒŋtǒŋə pèrə pə. 28La Nẅùə̀ à tə mbəla mmə ngẅî ɨtsəʼə aŋunə nɨ̀yìinə nɨ à wa nkoʼò aŋunə pɨ̀kòŋə̀ sìnə̀, nɨ à ghǎ kɨ pə a ngẅùʼə pɨ̀ tòonə̀ amwuə ɨ̀mǔ, ka nɨ̀ kwàŋə̀ a wɨghə lo, mbə̀ʼə a ẅî ɨtsəʼə aŋunə pɨghə ntsàarə̀? Àpyiimə̀ ntɨŋmə̀ àzɨghə a kɨ̂ mbǎ.

29“Tsaʼnə a pənə lə, kò nɨ̀ kɨ ntòmnə̀ mɨ̀ntɨŋmə̀ ɨ̀mɨghə lo nɨ̌ zɨghə̀ àkə, kɨ nô àkə. Kò mɨ̀ntɨŋmə̀ ɨ̀mɨghə kɨ ntòmnə̀ aŋunə mbuurə̀ mɨ̀nwùə̀ zə̀. 30Mbəʼnə pɨ̀tɨ̀zhyə̂ a Nẅùə̀ amwuə àtwuə̀ ɨ̀shyə̂ ghə̀ tàʼà la mbuurə̀ ànwùə̀ zèrə̀ zə̀, la Tǎ ɨwɨghə a nɨ̀pwuurə̀ a zhyə̂ mə lo nɨ wa ntàʼà ɨ̀pwuumə̀ pèrə pə̀. 31La nɨ̀ tyiʼə̀ ntàʼà pə ànwùə̀ Nɨ̀fò Nẅùə̀ â tyiʼə̀ ŋŋâ ɨ̀pwuumə̀ pèrə pə ambo pɨghə.

Nkabə̀ a nɨ̀pwuurə̀

(Mat 6.19-21)

32“Kò nɨ kɨ mbô mbǎ ɨ̀poonə̀ ɨ̀pâ. Ntiinə, Tǎ ɨwɨghə à wə̀ nɨ nɨ̀ghaʼà a nɨ ŋâ ànwùə̀ Nɨ̀fò nɨ̀pwuurə̀ ambo pɨghə. 33Nɨ̀ tyiʼə̀ nshwùunə̀ ɨ̀pwuumə̀ ɨ̀pɨghə ŋŋâ nkabə̀ ambo ngàŋə àfumə̀, mbə nɨ pɨ̀məpàamə̀ pɨ nkabə̀ nɨ ka pɨ sìitə̀ e, nnùŋə̀ nkabə̀ a nɨ̀pwuurə̀ alyiʼə nɨ ka nkabə̀ ɨ̀ mə mmyə̀ e, ka ɨ̀ndzə̀ərə̀ a kɨ mmə mbyàa e ghu, ka nkɨ̀pyìinə ɨ kɨ mmə ntsə̀ŋə̀ e a zèrə. 34Mbə̀ʼnə alyiʼə nɨ nkabə̀ o ɨ̀ pənə ghu, la alyiʼə nɨ ntɨŋmə̀ o ɨ kɨnə mbə ghu.

Ngàŋə àfàʼà za nɨ pobə pa ndyə̂ a nɨ̀lyìinə̀

35“Nɨ̀ korə̀ mɨ̀kòbə̀ ɨ̀mɨghə ntswuʼə̀ pɨ̀làamə̀ ɨ̀pɨghə a nɨ fàʼà, 36mbə tsaʼa ngàŋə àfàʼà zhyə̀ nɨ zə mbyabə̀ a masàa ɨghobə nɨ à wə̀ nkwə̂ a alyiʼə nɨ̀zoʼò. Nkwùə̀ nɨ à kwə̂nə mbuʼtə̀ ntswùə̀ ndâ, pobə̌ faʼa ẅùʼə̀ â kwuunə̀. 37Mborə̀ ɨ̀ chyə̂ ambo ngàŋə àfàʼà za zhyə̀ nɨ masàa ɨghobə à kwə̂nə ntsirə̀ a ghobə pobə pirə̀ a nɨ̀lyìinə̀; ǹshwəŋə̀ tyìʼə̀ nkǔŋə nkuŋə ambo pɨghə lo masàa ɨghobə wa à pɨ kẅebə̀ atsəʼə e ẅî a zhyə̀ nɨ mbə̀ʼə a ŋâ mɨ̀zɨghə̀ ambo pə̀ənə̀ ghɨ̀rə̀ pobə nwuunə̀ àtwuə̀ tepèrə̀ â tô ŋŋâ mɨ̀zɨghə̀ ambo pobə. 38Ǎ pə ànwùə̀ nɨ̀ghaʼà ambo ngàŋə àfàʼà za, mbə̀ʼə a mə nkwə̂ a ntɨ̀ŋnə̀ ɨ̀twuʼə̀ kə̀ a nkòʼò njyə̂ ntsirə̀ a ghobə a nɨ̀lyìinə̀. 39La, nɨ̀ zhyə̂ lo, ngàŋə̀ ndâ a tə mbəla nzhyə̂ nkwùə̀ nɨ ɨ̀ndzə̀ərə̀ ǎ tô yi mbə̀ʼə a myàʼtə̀ e lo pɨ pəʼə̀ ndâ e apə̀. 40Nɨ̀ kɨ mmə ndyə̂ a nɨ̀lyìinə̀, ntiinə Moonə̀ Ŋwùə̀ à ghǎ tô la amwuə nkwùə̀ nɨ ka nɨ̀ kwàŋə̀ a wɨghə lo ǎ tô.”

Ngàŋə àfàʼà za nɨ pobə pa nfàʼà nɨ ntɨŋmə̀ ɨ̀ghobə ɨ̀tsùmə̀ la

(Mat 24.45-51)

41Pità a pyiitə̀ ambo Yěsû lo, “Ndòʼnə̀mbyə̂ wə̀ shwəŋə̀ àshwəŋnə̀ nàanə nàanə zə̀ ambo pəə kə̀ ambo pànə̀ pɨ̀tsùmə̀?”

42Ndòʼnə̀mbyə̂ a kẅùə̀ ambo ze lo, “A ɨ̀wə̌ nɨ à pənə ngàŋə̀ àfàʼà wa nɨ à wa ndzuʼnə̀ nkɨ mbə nɨ àzhìʼtə̀? A ẅùə̀ wa nɨ masàa e à ŋânə pə̀ənə̀ ɨ̀pe lo â twuʼtə̀, a twuʼtə̀ nkɨ ŋŋâ a ghobə nɨ mɨ̀zɨghə̀ amwuə ngotə nkwùə̀ mɨ̀zɨghə̀? 43Ǎ pòŋə̀ ambo ngàŋə̀ àfàʼà ẅèrə wə̀ mbə̀ʼə masàa e a kwə̂ ntsirə̀ e, ndzəənə̀ lo à wə̀ nfàʼà àfàʼà zèrə zə̀. 44Ǹshwəŋə̀ tyìʼə̀ nkǔŋə nkuŋə ambo pɨghə lo, à ghǎ nùŋə̀ a ngàŋə̀ àfàʼà ẅèrə wa lo â tyiʼə̀ mmə nnaŋə̀ ɨ̀pwuumə̀ ɨ̀pe ɨ̀tsùmə̀. 45La mbə̀ʼə ngàŋə̀ àfàʼà wa à tə nshwəŋə̀ ambo mbɨ̀ŋmə̀ e lo, ‘Masàa ɨwəə à wə̀ ndyàrə̀ a nɨ kwə̂,’ ntyiʼə̀ mmə nkəʼə̀ a zhyə̀ ngàŋə àfàʼà yɨ̀ mbyàŋnə̀ pobə pə̀ngyə̌ ntyiʼə̀ mmə ndzɨghə̀, nnô nkɨ mbaarə̀ e, 46yi masàa ɨghobə wa ǎ kwə̂ amwuə nkwùə̀ za nɨ ka à pyə̀ mmə nkwàŋə̀ e lo mbə̀ʼə a kwə̂. A pə la ntô yi à pɨ tsɨ̀nkə̀ ngəʼə̀ àtwuə̀ ze ghɨ̀rə̀ a kɨ ndzuʼù ngəʼə̀ nɨ ngàŋə àtɨ̀ŋnə̀ àtwuə̀ za ndzuʼù a zèrə.

47“Ngàŋə̀ àfàʼà wa ẅùə̀ nɨ à zhyə̂nə ànwùə̀ nɨ masàa e à tàʼnə lo â ghɨ̀rə̀ la ka mə ghɨ̀rə̀ e a zèrə, pɨ ghǎ kəʼə̀ e tyìʼə̀ ɨ̀shìʼnə̀. 48La ngàŋə̀ fàʼà ẅùə̀ nɨ ka à zhyə̂ e ànwùə̀ nɨ masàa e à tàʼnə lo â ghɨ̀rə̀ la ngɨ̀rə̀ a zhyə̀ nɨ mbə̀ʼə pɨ kəʼə̀ e, pɨ ghǎ kəʼə̀ e pɨ mɨlyiʼə. Ŋònə̀ wa nɨ pɨ ŋânə ɨ̀pwuumə̀ pɨ̀noʼnə ambo ze la pɨ ghǎ kɨ kẅiirə̀ a pɨ̀noʼnə ambo ze. Lenəla ŋònə̀ nɨ pɨ ŋânə a pyə̀ nɨ noʼnə ntsàarə̀, pɨ ghǎ kɨ pyiitə̀ a pyə̀ nɨ noʼnə ntsàarə̀.

Nɨ̀ghàpə̀ nɨ à kwuunə̀nə a tɨ̀tɨ̀rə̀ pə̀ənə̀ ntii Yěsû

(Mat 10.34-36)

49“Ǹtô la a nɨ tswuʼə̀ ɨ̀mǔ amwuə àtwuə̀ ɨ̀shyə̂ lo ɨ̂ kɨrə̀, ntyiʼə̀ nkòŋə̀ lo ɨ pyə̀ mə mbə mə kɨrə̀. 50Ngwə̀ nɨ àkẅiirə̀ nchyə ngəʼə̀ nɨ mbɨ kẅiirə̀. Mbə̀ʼə m̀bə mə̀ nɨ àpotə̀ ntɨŋmə̀ apə̀, tə mbyàa nkwùə̀ nɨ ngǎ myàanə̀ 51Nɨ̀ lanə nkwàŋə̀ lo ǹdaʼa nshwuʼə̀ ntô a àtwuə̀ ɨ̀shyə̂ ghə la a nɨ ŋâ àporə̀porə̀? Ngaŋə, nshwəŋə̀ ambo pɨghə lo, ntô pə a nɨ ghàbə̀. 52Ntiinə a nɨ pìʼnə̀ tɨ̀tsòŋə̀ ndâ nɨ pànə̀ pənə amwuə pɨtaanə̀, pɨ̌ ghàbə̀ a zèrə, pànə̀ pɨpaa mə mbàanə̀ pɨ pɨtarə, pɨ pɨtarə mə mbàanə̀ pɨ pɨpaa. 53Pànə̀ ghǎ ghàpə̀, tǎ ghobə moonə̀ e tyiʼə̀ ndzòŋnə̀, mǎ ghobə moonə̀ e yɨ̀ mə̀ngyə̌ mə ndzòŋnə̀; mǎ ndâ ghobə ngẅùə moonə̀ e mə ndzòŋnə̀.”

Nɨ̀zhyə̂ nkwùə̀

(Mat 16.2-3)

54Yěsû làŋə̀ nɨ mbyə̀ nshwəŋə̀ ambo àpùŋə̀ pànə̀ wa lo, “Nɨ̀ tə ndzəənə̀ mbàʼà ɨ̀ koʼò a pàa ngẅènə̀ nẅùumə̀ nɨ̀ zùŋə̀ nshwəŋə̀ lo mbə̀ŋə̀ pɨ lô, ɨ̀ kɨ ndô. 55Nɨ̀ zəənə̀ a fèrə̀ a furə̀ a mɨ̀tùŋə nɨ shwəŋə̀ lo, ‘ɨlyiʼə pə ndwuumə̀; a kɨ mbə lenə. 56Ngàŋə àpə̀grə̀! Nɨ̀ zhyə̂ la a nɨ tiitə̀ mɨ̀nwùə̀ nɨ mɨ furə̀nə amwuə àtwuə̀ ɨ̀shyə̂ ghə̀ pobə nɨ̀pwuurə̀. A ghɨ̀rə̀ àkə lo kò nɨ̀ tiitə̀ mɨ̀nwùə̀ nɨ mɨ furə̀nə amwuə mɨnguʼu mə?”

Nɨ̀myàanə̀ ɨ̀sàʼa pɨghə pɨ pànə̀ nɨ pɨghə pɨ pobə mənə nsaʼnə̀

(Mat 5.25-26)

57“A ghɨ̀rə̀ àkə ka nɨ̀ zhyə̂ a wɨghə ànwùə̀ nɨ a təəmə̀nə? 58Pɨghə ŋònə̀ nɨ à chyânə ɨ̀sàʼa aŋunə ghò tə mə ndèrə̀ a mbyə̀ ngàŋə̀ ɨ̀sàʼa mɨ̀sàʼa, wə̀ kyiitə̀ lo pɨghə ze shwàatə̀ a ẅèrə àlàŋə ndwuumə̀ mbə̀ʼə a kaŋə ghə̀ ŋâ o ambo ngàŋə̀ ɨ̀sàʼa mɨ̀sàʼa, ngàŋə̀ ɨ̀sàʼa mɨ̀sàʼa â ŋâ o ambo pɨ̀pwùrəshyə̀, pɨ̀pwùrəshyə̀ chyâ o a nkaʼà ɨ̀tsaŋə̀. 59Ǹshwəŋə̀ tyìʼə̀ nkǔŋə nkuŋə ambo ghò lo, wə̀ tə kwuunə̀ a ɨ̀tsaŋə̀ ghə, wə̀ nwuunə̀ ghu tə mbyàa nkwùə̀ nɨ wə̀ ghǎ myàanə̀ twuə̀ àzwuumə̀ za nɨ wə̀ ẅìimə̀nə la tyìʼə̀ àtsùmə̀ tə shwuʼə̀ pyàa aŋunə ànini yè lẅùutə̀nə za.”

Currently Selected:

Lukə̀ 12: pny

Highlight

Copy