Lukə̀ 11

Yěsû a nèrə̀ ɨ̀zùŋə̀ ndzùmə̀ ɨ̀pe nɨ ndwuumə̀ nɨ mbə̀ʼə pobə chàʼtə̀ a Nẅùə̀

(Mat 6.9-13, 7.7-11)

1A lə̀ pə̀ njyə̂ ɨ̀tse, Yěsû a pə nchàʼtə̀ a Nẅùə̀ alyiʼə àtse. Nkwùə̀ nɨ à lə̀ myàanə̀nə, àzùŋə̀ ndzùmə̀ e yètse a shwəŋə̀ ambo ze lo, “Ndòʼnə̀mbyə̂, nèrə̀ a wəə tsaʼnə mbə̀ʼə pəə chàʼtə̀ Nẅùə̀ tyìʼə̀ tsaʼnə Jònə à lə̀ nèrə̀nə ɨ̀zùŋə̀ ndzùmə̀ ɨ̀pe la.”

2Yěsû a shwəŋə̀ ambo pobə lo, “Nɨ̀ pə nchàʼtə̀ a Nẅùə̀ nɨ̀ shwəŋə̀ lo,

‘Tǎ, ghɨ̀rə̀ pànə̀ tə nguʼtə̀ nɨ̀linə̀ ɨ̀tsô;

ànwùə̀ Nɨ̀fò o â tô.

3Ŋâ mɨ̀zɨghə̀ myə̀ nɨ mɨ kùʼnə̀nə ambo pəə sìnə̀ wə̀ nɨ mɨ̀njyə̂ nɨ mɨ̌ tô.

4Nkɨ ndə̀ənə̀ ɨ̀fàntə̀ ɨ̀nwùə̀ ɨ̀pəə,

ntiinə pəə kɨnə mmə ndə̀ənə̀ a pyə̀ nɨ pànə̀ pa nfàntə̀ ambo pəə la.

Kò wə̀ pyiimə̀ pəə wɨ̀ghə̀ àkwàʼnə̀.’”

5A chi nshwəŋə̀ ambo pobə lo, “Mbə̀ʼə ŋwùə̀ wɨghə ɨ̀tse a ghə̀ ambo ɨ̀swùə e a ntɨ̀ŋnə̀ ɨ̀twuʼə̀, nshwəŋə̀ ambo ze lo, ‘Ɨ̀swùə mə̀, tsoʼkə̀ mə̀ nɨ ntsɨŋə̀ àpaanə̀ ɨtarə; 6mbəʼnə ɨ̀swùə mə̀ a furə̀nə a ndyə̌ sàa ntô a ndâ mɨ̀ŋə̀, la ka mbə mə̀ nɨ àzwuumə̀ yè zɨghə̀nə a nɨ ŋâ ambo ze.’

7“Ɨ̀swùə e wə̀ à tə mbəla nkẅùə̀ ambo ze lo, ‘Kò wə̀ kɨ ŋŋâ mə̀ nɨ ngəʼə̀, ǹgwùʼnə̀ mə ntswùə̀ ndâ mə̀, pəə pɨ ɨ̀poonə̀ ɨ̀pâ nwùunə̀ mə; mbə̀ʼə m̀bòŋə̀ lòo mə̀ a ɨ̀shyə̂ a nɨ ŋâ àzwuumə̀ ambo ghò apə̀.’ 8Ǹshwəŋə̀ a wɨghə lo, à tə ka lòo e a nɨ ŋâ àzwuumə̀ ambo ze tsaʼa ɨ̀swùə e, la a làŋə̀ nɨ mbyə̀ nkɨ mbyiitə̀ e pyiitə̀nə, yi à pɨ lòo a ɨ̀shyə̂ ŋâ àzwuumə̀ àtsùmə̀ nɨ à tàʼnə.

9“Nɨ ndwuumə̀ wə̀ ǹshwəŋə̀ a wɨghə lo, nɨ̀ kɨ pyiitə̀ pyiitə̀nə, pɨ ghǎ ŋŋâ nɨ pɨghə; nɨ̀ kɨ tàʼà tàʼnə, nɨ̀ zəənə̀; nɨ̀ kɨ ntsòotə̀ tsòotə̀nə, pɨ̌ ẅùʼə̀ ŋŋâ nɨ pɨghə. 10Ntiinə ŋwùə̀ ntsùmə̀ nɨ à kɨnə mbyiitə̀ pyiitə̀nə, ǎ kẅiirə̀; ŋwùə̀ ntsùmə̀ nɨ à wa ntàʼà, ǎ zəənə̀. Ŋònə̀ nɨ à wa ntsòotə̀, pɨ̌ kɨ ẅùʼə̀ ŋŋâ nɨ ze. 11A ẅèrə tǎ amwuə pɨghə nɨ mbə̀ʼə moonə̀ e a pyiitə̀ e nɨ ɨ̀swuə̀, a ka ŋâ e a ye nɨ ɨ̀swuə̀ ntyiʼə̀ ŋŋâ e pə nɨ ɨ̀nyoorə̀? 12Kə̀ a pyiitə̀ e nɨ nɨpwuumə nɨ ngubə̀ a tyiʼə̀ ŋŋâ e pə nɨ àngaamə ɨ̀shyə̂? 13Mbə̀ʼə pɨghə nɨ nɨ̀ pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀ zhyə̂ a nɨ ŋâ ɨ̀pwuumə̀ pɨ̀shìʼnə̀ ambo ɨ̀poonə̀ pɨghə, tǎ ɨwɨghə a nɨ̀pwuurə̀ a tyiʼə̀ ka ŋâ e Àzhwùə̀ Nẅùə̀ ambo pànə̀ nɨ pɨ pyiitə̀nə e nɨ zèrə.”

Yěsû pobə Beelzebùbə̀ ɨ̀fò ɨ̀zhyə̂

(Mat 12.43-45)

14A lə̀ pə njyə̂ ɨ̀tse, Yěsû a fuukə̀ àzhyə̂ nɨ a lə̀ nàanə̀nə lo kò ŋwùə̀ shwəŋnə̀. Nkwùə̀ nɨ àzhyə̂ zə̀ a lə furə̀nə amwuə ŋònə̀ nɨ ka à lə̀ mə shwəŋə̀nə la, à lə̀ pìʼnə̀ a nɨ shwəŋnə̀. A lə̀ kə̀ʼnə̀ àpùŋə̀ pə̀ənə̀ nɨ pɨ lə̀ zəənə̀. 15La pobə pɨ̀tse shwəŋə̀ lo, “A fuukə̀ ɨ̀zhyə̂ pə̀ lə̀ nɨ ɨ̀tɨ̀ŋnə̀ Beelzebùbə̀ nɨ à pənə ɨ̀fò pɨ ɨ̀zhyə̂.” 16Pànə̀ pɨ̀tse lə̀ kwàʼnə̀ e mbyiitə̀ lo â nèrə̀ a ghobə nɨ àlènə̀ nɨ a furə̀nə a nɨ̀pwuurə̀. 17Yěsû à lə̀ zhyə̂ ɨ̀kwàŋə̀ ɨ̀pobə nshwəŋə̀ ambo pobə lo, “Àlaʼà za nɨ a ghàpə̀nə ndzòŋnə̀ pobə nɨ pobə la, a ghǎ pî. Ngẅàrə̀ za nɨ ɨ̀ kɨnə ka pə e ntswùə̀ moʼo la, ɨ̀ ghǎ pî. 18A tə mbə lo Satàanə̀ à kɨ ngàpə̀ ndzòŋnə̀ ɨ̀pɨ̀ŋmə̀ e, ànwùə̀ Nɨ̀fò e a tyiʼə̀ ntəəmə̀ lə ɨla ghu? Ngwə̀ nshwəŋə̀ lə ntiinə nɨ̀ shwəŋə̀nə lo ǹfuukə̀ ɨ̀zhyə̂ la nɨ ɨ̀tɨ̀ŋnə̀ Beelzebùbə̀. 19Ǹtə mə nfuukə̀ ɨ̀zhyə̂ pə̀ nɨ ɨ̀tɨ̀ŋnə̀ Beelzebùbə̀ yi ngàŋə àkwùə̀ nɨ̀yìinə̀ àzɨghə tyiʼə̀ fuukə̀ lə nɨ ɨ̀tɨ̀ŋnə̀ ɨ̀wə̌? A pə a lenə, yi pobə ghǎ nèrə̀ lo nɨ̀ wɨ̀ghə̀ ɨ̀sàʼa. 20La, ǹtə mə nfuukə̀ ɨ̀zhyə̂ pə̀ lə nɨ ɨ̀tɨ̀ŋnə̀ Nẅùə̀, yi a nèrə̀ lo ànwùə̀ Nɨ̀fò Nẅùə̀ a tô mə ambo pɨghə.

21“Nkwùə̀ nɨ ngàŋə̀ mɨ̀tɨ̀ŋnə̀ à twuʼtə̀nə ɨ̀pwuumə̀ ntsòo ɨ̀pe mə mbyabə̀ ɨmwuə alyiʼə e, ɨ̀pwuumə̀ ɨ̀pe pə ɨ̀shìʼnə̀. 22La ŋònə̀ nɨ à tɨ̀ŋnə̀nə ntsàarə̀ e à tə tô yi ǎ zòŋnə̀ tsàarə̀ e kẅiirə̀ ɨ̀pwuumə̀ ntsòo pa ɨ̀tsùmə̀ nɨ à lə̀ mənə ndòo mbyabə̀ mbɨ̀ŋmə̀ e ghu la, nkẅiirə̀ ɨ̀pwuumə̀ ŋònə̀ ntɨ̀ŋnə̀ wa ɨ̀tsùmə̀ ngàpə̀.

23“Ŋònə̀ nɨ ka à zùŋə̀ e ndzùmə̀ mə̀, à zùŋə̀ la ndzùmə̀ ngàŋə̀ kɨpaanə mə̀. Ŋònə̀ nɨ ka à kɨ ngyèmpə̀ e a gha a nɨ shwatə̀, à shàʼtə̀ la shàʼtə̀nə.

Ndwuumə̀ nɨ ɨ̀zhyə̂ pa nfurə̀ nkɨ nkẅirə̀ nkwuunə̀

24“Nkwùə̀ nɨ àzhwùə̀ tɨ̀pòŋə̀ a furə̀nə amwuə ŋònə̀ la, a za nkarə̀ ɨlyiʼə pɨ zopə̀ ntàʼà alyiʼə nɨ mbə̀ʼə a zhwùutə̀ ghu. A ka zəənə̀ e a shwəŋə̀ ambo àtwuə̀ ɨ̀pɨ̀ŋmə̀ e lo, ‘Mbɨ kẅirə̀ lèrə̀ amwuə ndâ gha nɨ ǹtənə nfurə̀ amwuə la.’ 25Lenəla a kwə̂ ndzəənə̀ lo pɨ zə̀ə mə ndâ za ɨ̀ laanə̀ nkùʼnə̀. 26Tsaʼnə a zəənə̀nə a lenə la, a lèrə̀ tyìʼə̀ nkwùə̀ nkẅirə̀ ntô nɨ ɨ̀zhyə̂ sàmbaa nɨ pɨ̂nə ntsàarə̀ e, nkẅìʼnə̀ e ghu, pobə pɨ pobə kwuunə̀ ntyiʼə̀ mmə nchyə̂ amwuə ŋònə̀ ghu. Lenəla, ŋònə̀ ẅèrə wə̀ ǎ lẅùutə̀ pɨ̂ tsàarə̀ tsaʼnə à lə̀ pyə̀nə mbə.”

Nɨ̀ghaʼà nɨ à pənə nkǔŋə nkuŋə

27Tsaʼnə Yěsû à lə̀ myàanə̀nə a nɨ shwəŋə̀ mɨ̀nwùə̀ mə la, mə̀ngyə̌ ɨ̀tse amwuə àpùŋə̀ pə̀ənə̀ za a shwəŋə̀ lo, “Mborə̀ ɨ̀ chyə̂ ambo mə̀ngyə̌ wa nɨ à lə̀ pyə̂nə nkɨ nnyoŋə̀ o la.”

28La Yěsû a kẅùə̀ lo, “Mborə̀ ɨ̀ chyə̂ pə ambo pànə̀ pa nɨ pɨ zuʼnə àshwəŋnə̀ Nẅùə̀ kɨ nnùŋə̀!”

Pànə̀ pa tàʼà lo Yěsû â ghɨ̀rə̀ ànwùə̀ yerə̀nə yerə̀nə

(Mat 12.38-42)

29Nkwùə̀ nɨ ɨ̀pùŋə̀ pə̀ənə̀ pa lə̀ pìʼnə̀nə a nɨ noʼò la, Yěsû a shwəŋə̀ lo, “Ɨ̀waanə̀ pànə̀ pɨ tɨ̀tsòŋə̀ a ɨ̀waanə̀ tɨ̀pòŋə̀, pobə tàʼà a nɨ zəənə̀ àlènə̀, la ka mbə nèrə̀ mə̀ àlènə̀ àtse ambo pobə ndàŋə̀ e àlènə̀ Jonà; 30ntiinə ndwuumə̀ nɨ Jonà à lə̀ pənə àlènə̀ ambo pànə̀ pɨ Ninivè la, a ndəŋə ndəŋə amwuə ndwuumə̀ nɨ Moonə̀ Ŋwùə̀ ǎ pə àlènə̀ ambo ɨ̀waanə̀ pànə̀ pɨ tɨ̀tsòŋə̀ wə̀. 31A ghǎ pə njyə̂ ntsoʼtə̀ ɨ̀sàʼa Nẅùə̀ la, mǎ ɨ̀fò nɨ à furə̀nə a mɨ̀tùŋə, â pə̀ʼkə̀ pobə pɨ ɨ̀waanə̀ pànə̀ pɨ tɨ̀tsòŋə̀ chyâ ɨ̀sàʼa aŋunə pobə. Ntiinə à lə̀ furə̀ a ndẅùutə àtwuə̀ ɨ̀shyə̂ ntô a nɨ zhwiʼtə̀ àshwəŋnə̀ àzhìʼtə̀ ɨ̀fò Solomònə̀; Nɨ̀ naŋə̀! Ŋònə̀ nɨ à tsàarə̀nə a ɨ̀fò Solomònə̀ à wə̀ a nɨ̀ghə̂ a tɨ̀tɨ̀rə̀ pɨghə. 32Pànə̀ pɨ Ninivè ghǎ pə̀ʼkə̀ njyə̂ ntsoʼtə̀ ɨ̀sàʼa chyâ ɨ̀sàʼa aŋunə pobə; ntiinə pànə̀ pɨ Ninivè lə̀ pə̀ŋə̀ mɨ̀ntɨŋmə̀ ɨ̀mobə nkwùə̀ nɨ Jonà à lə̀ chwìitə̀nə ntwuumə̀ Nẅùə̀ ambo pobə la. La nɨ̀ zəənə̀! Ŋònə̀ nɨ à tsàarə̀nə a Jonà à wə̀ a ɨ̀shyə̂ nɨ̀ghə̂. La ka nɨ̀ mə mbə̀ŋə̀ a wɨghə mɨ̀ntɨŋmə̀ ɨ̀mɨghə.”

Ɨ̀myə̂ tsaʼa nkàʼà ambo mbɨ̀ŋmə̀

(Mat 6.22-23)

33Yěsû à lə̀ chi nshwəŋə̀ lo, “Ka ŋònə̀ nɨ mbə̀ʼə a tswuʼə̀ nkàʼà ndòo nɨ̀kwùʼə̀ nkumnə̀ ghu, kə̀ ntsàa a nkɨ̀kwùunə. Ŋwùə̀ à wa ntswuʼə̀ nkàʼà ntə̂ pə alyiʼə ŋaŋnə̀nə mbə̀ʼə ŋwùə̀ a kwuunə̀ a ndâ a zəənə̀ ẅèrə. 34Ɨ̀myə̂ ɨ̀mô chyə̂ mbə la tsaʼa nkàʼà ambo mbɨ̀ŋmə̀ o. Ɨ̀myə̂ ɨ̀mô tə mbə ɨ̀shìʼnə̀ yi mbɨ̀ŋmə̀ o ɨ̀ chyə̂ nɨ nkàʼà. La mɨ tə ka pə e ɨ̀shìʼnə̀ yi mbɨ̀ŋmə̀ o ntsùmə̀ ɨ̀ chyə̂ amwuə ndzùmə. 35Njiilo, nɨ̀ zhìʼtə̀ mbə̀ʼə nkàʼà nɨ ɨ̀ pənə amwuə pɨghə ɨ̀ tyiʼə̀ ndzùmə. 36Mbɨ̀ŋmə̀ o ntsùmə̀ ɨ̀ tə ndẅenə̀ nɨ nkàʼà ka pə e nɨ àpàbə ndzùmə, yi ɨ̌ tsùŋə̀ kyàʼà tsaʼa nkàʼà ɨ wa ntsìinə̀ nkyàʼà a wɨghə la.”

Yěsû a fèrə̀ pɨ̀Farìsî pobə pɨ̀nèrə̀ mbòomə

37Tsaʼnə Yěsû a lə̀ mənə shwəŋnə̀ la, taʼà ŋwùə̀ Farìsî fuŋə̀ e lo â tô pobə ze ndzɨghə̀ a ndâ ze. Lenəla a kwuunə̀ a ndâ nwuunə̀ a nɨ zɨghə̀. 38A lə̀ tsàarə̀ ŋwùə̀ Farìsî wə̀ amwuə ndwuumə̀ nɨ a lə̀ zəənə̀ Yěsû a zɨghə̀ tə sùu mbô. 39Ndòʼnə̀mbyə̂ a shwəŋə̀ ambo ze lo, “Pɨghə pɨ̀Farìsî, nɨ sùu mɨ̀ndoŋə̀ pobə ɨ̀kaŋə̀ tyìʼə̀ a ndzùmə̀ ɨsɨghə la mɨmwuə ɨ̀mɨghə lẅenə̀ nɨ àghə̀ʼnə̀ pobə ntɨŋmə̀ ghù shyə. 40Ɨ̀puukə̀ pə̀ənə̀! Ka nɨ̀ zhyə̂ wɨghə lo ŋònə̀ nɨ à lə̀ tsùŋə̀nə ndzùmə̀ ɨsɨghə la ŋònə̀ nɨ à lə̀ kɨnə ntsùŋə̀ ɨmwuə ɨmwuə? 41La tyiʼə̀ ŋŋâ ɨ̀pwuumə̀ nɨ pənə amwuə ɨmwuə pɨ̀tɨtoʼo pobə ɨ̀kaŋə̀ ɨ̀pɨghə ambo ngàŋə àfumə̀. Zəənə̀, nɨ̀ tə ghɨ̀rə̀ a lenə, mbə̀ʼə ɨ̀pwuumə̀ ɨ̀tsùmə̀ laanə̀ ambo pɨghə.

42“La ngəʼə̀ noʼnə aŋunə pɨghə mbǎ pɨ̀Farìsî! Ntiinə nɨ̀ lòonə ɨ̀pwuumə̀ àzhyǎ nɨ furə̀nə amwuə mɨ̀swùumə ɨ̀mɨghə ngàbə̀ ɨlyiʼə nɨ̀ghumə̀ ŋŋâ taʼà pàa ambo Nẅùə̀, la ka pə ghɨ̀rə̀ a wɨghə ànwùə̀ nɨ a təəmə̀nə, ka kɨ pə kòŋə̀ a wɨghə Nẅùə̀. A pòŋə̀ lo nɨ̀ ghɨ̀rə̀ ɨ̀nwùə̀ pèrə pə ɨ̀tsùmə̀ tɨ waʼà yètse.

43“Ngəʼə̀ noʼnə ɨ̀ chyə̂ aŋunə pɨghə mbǎ pɨ̀Farìsî! Ntiinə nɨ̀ kòŋə̀nə a nɨ nwuunə̀ aŋunə ɨləŋə pɨ̀shìʼnə̀ amwuə mɨ̀ndâ mɨ àshwatə̀ ɨ̀mɨghə, mmə nkòŋə̀ lo pànə̀ tô nchàʼtə̀ a wɨghə amwuə pɨ mɨ̀tàanə.

44“Ngəʼə̀ noʼnə ɨ̀ chyə̂ aŋunə pɨghə! Ntiinə mɨ̀ntɨŋmə̀ ɨ̀mɨghə mə tsaʼa mɨ̀shyə̀ nɨ ka ɨ̀lènə̀ pə e aŋunə, pànə̀ tyiʼə̀ mə ngyìinə̀ aŋunə ka mə zhyə̂ ghobə.”

45Taʼà ŋwùə̀ a tɨ̀tɨ̀rə̀ pɨ̀nèrə̀ mbòomə pa a kẅùə̀ ambo Yěsû lo, “Ɨ̀nèrə̀ ɨ̀nwùə̀, wə̀ shwəŋə̀ lə la nkɨ ndzòomə̀ a wəə la zòomə̀nə.”

46Yěsû chi shwəŋə̀ lo, “Ngəʼə̀ noʼnə ambo pɨghə mbǎ pɨ̀nèrə̀ mbòomə! Ntiinə nɨ ŋânə ɨ̀pìʼì ambo pə̀ənə̀ nɨ tsàarə̀nə a ghobə la, mbə pyə̀nə mbə̀ʼə nɨ laʼa ngyèmpə̀ wɨghə a ghobə lo pobə pìʼì apə̀. 47Ngəʼə̀ noʼnə ɨ̀ chyə̂ àtwuə̀ pɨghə! Ntiinə nɨ̀ poomə̀ mɨ̀shyə̀ mɨ ngàŋə ntwuumə̀ Nẅùə̀ pyə̀ nɨ pɨ̀tǎ ɨ̀pɨghə lə̀ zhwuutə̀nə. 48Lenəla nɨ̀ lə̀ pyiimə̀ nkɨ tompə̀ ngɨ̀rə̀ mɨ̀nwùə̀ pɨ̀tǎ pɨ̀tǎ ɨ̀pɨghə, ntiinə pobə lə̀ zhwuutə̀nə a ghobə, nɨ̀ kɨ mboomə̀ mɨ̀shyə̀ ɨ̀mobə. 49Tsaʼnə a pənə lə la, Àzhìʼtə̀ Nẅùə̀ a lə̀ shwəŋə̀ lo, ‘Mbɨ tsàa ngàŋə ntwuumə̀ ɨ̀zâ pobə ngàŋə ntwuumə̀ Yěsû pyə̀ nɨ pobə pɨ zhwuutə̀ a pɨ̀tse nkɨ nnyàŋə̀ a pɨ̀tse.’ 50Mbə̀ʼə àləəmə̀ ngàŋə ntwuumə̀ Nẅùə̀ zə̀ nɨ pɨ lə̀ kẅìrə̀nə a nɨ̀pìʼnə̀nə tsaʼnə pɨ lə̀ tsùŋə̀nə àtwuə̀ ɨ̀shyə̂ a lèrə̀ àtwuə̀ ɨ̀waanə̀ pànə̀ pɨ tɨ̀tsòŋə̀ wə̀, 51a nɨ pìʼnə̀ aŋunə àləəmə̀ Abèlə̀ ngə̀ mbyàa aŋunə àləəmə̀ Tsàkàriyà ẅùə̀ nɨ pɨ lə̀ zhwuutə̀nə a tɨ̀tɨ̀rə̀ alyiʼə mɨ̀shwàʼà Nẅùə̀ pobə alyiʼə yè laanə̀nə amwuə Ndâ Mɨ̀shwàʼà Nẅùə̀. Ngwə̀ nshwəŋə̀ a wɨghə lo pɨ ghǎ pyiitə̀ àləəmə̀ àzobə la ambo ɨ̀waanə̀ pànə̀ pɨ tɨ̀tsòŋə̀.

52“Ngəʼə̀ noʼnə ɨ̀ chyə̂ aŋunə pɨghə mbǎ pɨ̀nèrə̀ mbòomə, ntiinə nɨ̀ kẅiirə̀nə àkòo ndâ àzhyə̂ ànwùə̀, ntwuunə̀ a wɨghə a nɨ kwuunə̀ amwuə, nkɨ mə nàanə̀ pànə̀ nɨ pɨ tàʼnə a nɨ kwuunə̀ lo kò pobə kwuunə̀.”

53Nkwùə̀ nɨ Yěsû à lə̀ mənə mmyàʼtə̀ a ghobə la, pɨ̀nèrə̀ mbòomə pobə pɨ̀Farìsî lə̀ pìʼnə̀ a nɨ twuunə̀ ɨ̀nwùə̀ nɨ Yěsû à lə̀ shwəŋə̀nə la tyìʼə̀ nɨ ɨ̀tɨ̀ŋnə̀ nkɨ mbyiitə̀ ɨ̀pyiitə̀ pɨ tobə̀nə e pɨ̀noʼnə, 54mbə̀ʼə a shwəŋə̀ ànwùə̀ tɨ̀pòŋə̀ pɨ kô e.

Currently Selected:

Lukə̀ 11: pny

Highlight

Copy