Lukə̀ 15

Àshwəŋnə̀ nàanə̀ nàanə mbə̀ʼə mbyə̂ ndzìrə̀ nɨ ɨ̀ pînə

(Mat 18.12-14)

1A lə̀ pə njyə̂ ɨ̀tse pɨ̀nkẅiirə̀ pɨ̀taghə̀ pobə pɨ̀tse ngàŋə ngɨ̀rə̀ ɨ̀nwùə̀ tɨ̀pòŋə̀ tô nnwuunə̀ a nɨ̀pwùnə Yěsû a nɨ zhwiʼtə̀ mɨ̀nwùə̀ nɨ à wə̀ nshwəŋə̀. 2Pɨ̀Farìsî pobə pɨ̀nèrə̀ mbòomə tyiʼə̀ mmə ndẅùmpə̀ nshwəŋə̀ lo “Ŋònə̀ wə̀ à kẅiirə̀ ngàŋə ɨ̀nwùə̀ tɨ̀pòŋə̀ ntyiʼə̀ mmə ndzɨghə̀ pobə pɨ pobə!” 3Lenəla, Yěsû a tyiʼə̀ nshwəŋə̀ àshwəŋnə̀ nàanə nàanə zə̀ ambo pobə: 4“A ɨ̀wə̌ amwuə pɨghə nɨ mbə̀ʼə a twuʼtə̀ mbyə̂ ndzìrə̀ ɨ̀ze nkɨrə, taʼà a pî, a ka myàʼtə̀ e yɨ̀ mɨ̀ghumə̀ nɨ̀pwùʼə ntsòbə̀ nɨ̀pwùʼə a kòŋə̀ ngə̀ a nɨ tàʼà a taʼà wa nɨ à pînə la, tə pyàa nkwùə̀ nɨ à zəənə̀nə a zèrə̀? 5Nkwùə̀ nɨ à zəənə̀nə, a kèrə̀ nnùŋə̀ a nɨ̀ghə̂ ze ntyiʼə̀ ngaʼà, 6nkwə̂ a ɨmwuə alyiʼə nɨ zèrə, nfuŋə̀ pɨ̀swùə ɨ̀pe, nɨ ngàŋə àpàrə̀ nkaʼà ɨ̀ze nshwəŋə̀ ambo pobə lo, ‘Pə̀ənə̀ ghaʼà ntiinə ǹdzəənə̀nə mbyə̂ za nɨ ɨ̀ lə̀ pînə la.’ 7Ǹshwəŋə̀ a wɨghə lo, a ndəŋə ndəŋə, nɨ̀ghaʼà ghù noʼnə ǎ pə a nɨ̀pwuurə̀ mbə̀ʼə taʼà ngàŋə̀ ngɨ̀rə̀ ànwùə̀ tɨ̀pòŋə̀ wa nɨ à pə̀ŋə̀nə ntɨŋmə̀ e ntsàarə̀ a nɨ̀ghaʼà wa nɨ à pənə mbə̀ʼə pànə̀ mɨ̀ghumə̀ nɨ̀pwùʼə ntsòbə̀ nɨ̀pwùʼə pa nɨ mɨ̀nwùə̀ ɨ̀mobə laanə̀nə ka pobə chi mbə ghobə a nɨ pə̀ŋə̀ mɨ̀ntɨŋmə̀ ɨ̀mobə.”

Àshwəŋnə̀ nàanə nàanə mbə̀ʼə nkabə̀ nɨ ɨ̀ lə̀ pînə

8Yěsû a chi nshwəŋə̀ lo, “A ɨ̀wə̌ mə̀ngyə̌ nɨ à twuʼtə̀nə pɨ̀kapà nɨ̀ghumə̀ taʼà moʼo a pî, a ka tswuʼə̀ e a làamə̀ zə̀ə ndâ e mbə̀ʼə tsùŋə̀ shàrə̀ tə pyàa nkwùə̀ nɨ a zəənə̀nə a zèrə? 9A zəənə̀ a zèrə, a fuŋə̀ pɨ̀swùə ɨ̀pe pobə ngàŋə àpàrə̀ nkaʼà ɨ̀ze nshwəŋə̀ ambo pobə lo, ‘Pə̀ənə̀ ghaʼà ntiinə ǹdzəənə̀nə nkabə̀ za nɨ ɨ̀ lə̀ pînə la.’ 10Ǹshwəŋə̀ ambo pɨghə lo, a kɨ mbə tyìʼə̀ ndəŋə ndəŋə, nɨ̀ghaʼà à chyə̂ a nɨ̀pwuurə̀ ambo pəngèrə̀ pɨ Nẅùə̀ mbə̀ʼə taʼà ngàŋə̀ ngɨ̀rə̀ ɨ̀nwùə̀ tɨ̀pòŋə̀ wa nɨ à pə̀ŋə̀nə ntɨŋmə̀ e.”

Àshwəŋnə̀ nàanə nàanə mbə̀ʼə môngwàswùumə̀ nɨ à lə̀ pînə

11Yěsû a chi ndàŋə̀ nɨ mbyə̀ nshwəŋə̀ lo, “Ŋònə̀ ɨ̀tse à lə̀ pə ghu, mbə nɨ ɨ̀pômbyàŋnə̀ ɨ̀pe ɨpaa. 12Yɨ̀ nkɨ̂ a shwəŋə̀ ambo ze lo, ‘Tǎ, ghàbə̀ ɨ̀pwuumə̀ ŋâ ɨ̀pâ nɨ wə̀ pyə̀nə mbə ghǎ ŋâ ambo mɨ̀ŋə̀ la tɨ̀tsòŋə̀.’ Tǎ wa a tyiʼə̀ ngàbə̀ ɨ̀pwuumə̀ pa ambo pobə.

13“Mɨ̀njyə̂ mɨ̀tse kɨ làŋə̀, ghu nkɨ̂ wa a shwatə̀ ɨ̀pwuumə̀ ɨ̀pe nshwùunə̀, ndòo nkabə̀ ndèrə̀ e a àtwuumə̀ a ndyə̌ sàa, ntsə̀ŋə̀ ɨze nkabə̀ za ndzɨghə̀ mbyə̂ e nɨ zèrə. 14Nkwùə̀ nɨ nkabə̀ e za ɨ̀ lə̀ myə̀nə ntsùmə̀, ndzàŋə̀ ɨ̀ lə̀ kwuunə̀ amwuə àlaʼà gha nɨ à lə̀ pənə ghu la, a tyiʼə̀ nkarə̀ ntàʼà àzwuumə̀ nɨ ǎ zɨghə̀ kɨkaŋə, 15ngə̀ ntsirə̀ a taʼà ŋwùə̀ àlaʼà wa ghu ɨ̀tse nkwuunə̀ àfàʼà ambo ze. Ŋònə̀ wa a lòo e, ntsàa e amwuə nkaʼà pə̀kuŋə e lo â tə ndzə̂ pə̀kuŋə ɨ̀pe. 16À lə̀ pə̀ nkòŋə̀ a nɨ zɨghə̀ ɨ̀kòbə̀ àkuŋə pa, la ka ŋwùə̀ a ŋâ e ambo ze.

17“A gha mbə njyə̂ ɨ̀tse àtwuə̀ e a zhwuumə̀, àzhìʼtə̀ e a kẅirə̀ nkwə̂ a shwəŋə̀ lo, ‘Ngàŋə àfàʼà tǎ ɨwəə yɨ̀noʼnə tyìʼə̀ ɨ̀tsùmə̀ chyə̂ nɨ mɨ̀zɨghə̀ mèrə pə ntsàarə̀ a ghobə, ngwə̀ a nɨ̀ghə̂ nkwɨghə̀ njyə̀! 18Mbɨ lòo ɨ̀shyə̂ kwə̂ ghə̀ tsirə̀ a tǎ ɨwəə, shwəŋə̀ ambo ze lo: Tǎ, ǹgɨ̀rə̀ a tɨ̀pòŋə̀ a mbyə̀ Nẅùə̀ nkɨ ngɨ̀rə̀ ambo ghò. 19Ka ǹchi nkùʼnə̀ mə̀ lo mbə̀ʼə wə̀ fuŋə̀ mə̀ nɨ moonə̀ o ghu mbyàŋnə̀; tyiʼə̀ ndòo mə̀ tsaʼa ngàŋə̀ àfàʼà o ghùtse.’ 20Lenəla à lə̀ tyiʼə̀ ndòo a ɨ̀shyə̂ a nɨ ghə̀ ntsirə̀ a tǎ ɨghobə.

“La nkwùə̀ nɨ à lə̀ pirə̀nə a ndyə̌ sàa, tǎ ɨghobə a zəənə̀ e ntyiʼə̀ mbə nɨ àsòmnə̀ aŋunə ze, nkɨ̀ɨrə̀ ngə̀ nkô e nkampə̀.

21“Moonə̀ wa a shwəŋə̀ ambo ze lo, ‘Tǎ ǹgɨ̀rə̀ mə̀ ànwùə̀ tɨ̀pòŋə̀ a mbyə̀ Nẅùə̀ a nɨ̀pwuurə̀ nkɨ ngɨ̀rə̀ ambo ghò. Ka ǹkùʼnə̀ mə̀ lo pɨ̀ chi nfuŋə̀ mə̀ nɨ moonə̀ o’ 22La tǎ ɨghobə a shwəŋə̀ ambo ngàŋə àfàʼà ɨ̀ze lo, ‘Nɨ̀ faʼa ntô nɨ atsəʼə ɨ̀shìʼnə̀ ngẅî aŋunə ze, nkɨ ngẅî àkɨ̂ a àpô ze nɨ ɨtabə a mɨ̀kwùə̀ ze. 23Nnaŋə̀ a moonə̀ nyàamə̀ nɨ à zwurə̀nə mbòbə̀ ɨ̀shìʼnə̀ ndòo ntô ngwàrə̀ pə̀ənə̀ ghɨ̀rə̀ a nɨ̀ghaʼà ghu; 24mbəʼnə moonə̀ mə̀ wə̀ à lə̀ kwɨghə̀, a kùmə̀ nchi mbə ghù ntɨ̀ŋnə̀, mbî e, pɨ kùmə̀ nchi ndzəənə̀ e.’ Pobə pìʼnə̀ a nɨ zɨghə̀ nkɨ ngaʼà.

25“A lə̀ kɨ pə nkwùə̀ ghu moonə̀ e ghu ndɨ̀ŋmə̂ a pə a atwurə. Nkwùə̀ nɨ à lə̀ mənə nkwə̂ mbaatə̀ ɨmwuə alyiʼə, à lə̀ zuʼù àzòrə̀ nɨ̀ghaʼà pobə mɨnchyə mɨ nɨ̀ghaʼà. 26A tyiʼə̀ nfuŋə̀ a taʼà ngàŋə̀ àfàʼà ɨ̀tse mbyiitə̀ lo, ‘A ànwùə̀ àkə a ɨmwuə alyiʼə ghə?’ 27A kẅùə̀ lo, ‘Momaa o wa à kwə̂, tǎ ɨwɨghə a tyiʼə̀ ngwàrə̀ a moonə̀ nyàamə̀ nɨ à zwurə̀nə mbòbə̀ ɨ̀shìʼnə̀ ntiinə à kẅirə̀nə nkwə̂ nkɨ mbə ɨ̀shìʼnə̀.’

28“La ntɨŋmə̀ ntsàambyə̀ e ɨ lə̀ zaŋə̀ a twuunə̀ e a nɨ kwuunə̀ a ɨmwuə alyiʼə. Tǎ ɨghobə a tyiʼə̀ nfurə̀ ntsirə̀ e àlàŋə ndəpə̀ e lo â kwuunə̀. 29La à lə̀ kẅùə̀ ambo tǎ ɨghobə lo, ‘Naŋə̀! Ǹtsòo mə mbɨ̀ŋmə̀, nfàʼà ambo ghò tsaʼa àpùʼù aŋunə mɨnguʼu ndùnə̀, ka tɨ̀ŋnə̀ mə̀ àtwuə̀ ambo ghò, la wə̀ laʼa mə ŋŋâ o tyìʼə̀ moonə̀ mbyə̂ lo n̂gwàrə̀ pəə pɨ̀swùə ɨ̀pâ kwurə̀ ngɨ̀rə̀ a nɨ̀ghaʼà ghu apə̀. 30La moonə̀ o wə̀ nɨ à lə̀ lòonə ɨ̀pwuumə̀ ɨ̀pô ngə̀ tsə̀ŋə̀ pobə pɨ ɨ̀kwàrə̀, à kùmə̀ nkwə̂ wə̀ wàrə̀ a moonə̀ nyàamə̀ nɨ à zwurə̀nə mbòbə̀ ɨ̀shìʼnə̀.’

31“Tǎ ɨghobə a shwəŋə̀ ambo ze lo, ‘Moonə̀ mə̀, wə̀ wa mbə pùu tyìʼə̀ nkwùə̀ ɨ̀tsùmə̀, ɨ̀pwuumə̀ ɨ̀pâ ɨ̀tsùmə̀ nkɨ mbə ɨ̀pô. 32A pòŋə̀ lo pànə̀ zɨghə̀ nkɨ ngaʼà ntiinə momaa o wə̀ à lə̀ kwɨghə̀, à kùmə̀ nchi mbə ghù ntɨ̀ŋnə̀; à lə̀ pî, pɨ kùmə̀ nchi ndzəənə̀ e.’”

Currently Selected:

Lukə̀ 15: pny

Highlight

Copy