Jònə 10

Àshwəŋnə̀ nàanə nàanə mbə̀ʼə ɨ̀ndzə̂ mɨ̀mbyə̂

1Yěsû a shwəŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ ka a làŋə̀ e a ntswùə̀ nkaʼà nkwuunə̀ amwuə nkaʼà mɨ mbyə̂ ndzìrə̀, nkoʼò pə a mbɨ̀ŋmə̀ nkaʼà nkwuunə̀, ŋònə̀ ghu la ɨ̀ndzə̀ərə̀ nkɨ mbə ɨ̀ntuŋə̀ ɨ̀shyə̂. 2La ŋònə̀ nɨ a làŋə̀nə pə a ntswùə̀ nkaʼà nkwuunə̀ la ɨ̀ndzə̂ mɨ̀mbyə̂ ghu. 3Ɨ̀mbyabə̀ ntswùə̀ nkaʼà à ẅùʼə̀ a ntswùə̀ nkaʼà ŋŋâ ambo ze, mbyə̂ za zuʼù ngyə̀ e, a fuŋə̀ a zèrə a nɨ̀linə̀ nɨ̀linə̀ ntyiʼə̀ ngɨ̀rə̀ zèrə làŋə̀ nfutə̀. 4Nkwùə̀ nɨ à lòonə a zèrə nfurə̀ la, a pə a mbyə̀ zèrə tyiʼə̀ mmə ndzùŋə̀ e ntiinə zèrə zhyə̂nə ngyə̀ e. 5Mbə̀ʼə zèrə zùŋə̀ a ghobə a ŋònə̀ nyàanə apə̀, la mbə kɨ̀ɨrə̀ e kɨ̀ɨrə̀nə ntiinə ka zèrə̀ zhyə̂ e a ye, ka kɨ zhyə̂ a ghobə ngyə̀ e.”

6Yěsû à lə̀ shwəŋnə̀ àshwəŋnə̀ nàanə nàanə zə la, ka pobə zhyə̂ a ghobə ɨ̀sùmə ànwùə̀ nɨ à lə̀ mənə nshwəŋə̀.

Yěsû a ɨ̀ndzə̂ mɨ̀mbyə̂ ghù ɨ̀shìʼnə̀

7Yěsû a chi nshwəŋə̀ ambo pobə lo, “A tyìʼə̀ nkǔŋə nkuŋə lo ǹchyə̂ mbə ntswùə̀ nkaʼà ambo mbyə̂ ndzìrə̀. 8Pànə̀ pɨ̀tsùmə̀ nɨ pobə lə̀ tônə a mbyə̀ mɨ̀ŋə̀ la à lə̀ pə pɨ̀zə̀ərə̀ nkɨ mbə pɨ̀ntuŋə̀ ɨ̀shyə̂, la ka mbyə̂ ndzìrə̀ lə̀ zuʼù a ghobə mɨ̀ngyə̀ ɨ̀mobə 9Mɨ̀ŋə̌ ntswùə̀ nkaʼà. Ŋwùə̀ wa ntsùmə̀ nɨ à làŋə̀nə a ndzùmə̀ mɨ̀ŋə̀ nkwuunə̀, ǎ chwarə̀. Ǎ kwuunə̀ kɨ furə̀, tyiʼə̀ zəənə̀ alyiʼə nɨ mbə̀ʼə a zɨghə̀. 10Ɨ̀ndzə̀ərə̀ à kɨ ntô e àze pə a nɨ zə̀ərə̀, zhwuutə̀ kɨ tsə̀ŋə̀. La ǹtô àzâ pə lo pànə̀ pə nɨ nɨ̀chyə̂mbyə̂; nɨ̀chyə̂mbyə̂ nɨ à koʼnə nkùʼù.

11“Mɨ̀ŋə̌ ɨ̀ndzə̂ mbyə̂ ghù ɨ̀shìʼnə̀. Mbə̀ʼə ɨ̀ndzə̂ mbyə̂ ghù ɨ̀shìʼnə̀ a kwɨghə̀ àtwuə̀ nɨ mbyə̂ ɨ̀ze. 12Ngàŋə̀ àfàʼà nɨ pɨ twuə̀nə e twuə̀nə, nɨ ka à pə e ngotə ɨ̀ndzə̂ mɨ̀mbyə̂, ka kɨ pə e ngàŋə̀ mɨ̀mbyə̂, nkwùə̀ nɨ à zəənə̀nə afuunə a mə ntô kô mbyə̂, a kɨ̀ɨrə̀ e, lenəla afuunə za a tô nkô yɨ̀tse mbyə̂, zhyə̀ tyiʼə̀ nsapə̀. 13Ŋònə̀ ghu a kɨ̀ɨrə̀ la ntiinə à wa nfàʼà pə àfàʼà nkabə̀ e, ka ntɨŋmə̀ e ɨ̂ pə e aŋunə mbyə̂ ghu. 14Ǹchyə̂ mbə ɨ̀ndzə̂ mbyə̂ ghù ɨ̀shìʼnə̀, nzhyə̂ mbyə̂ ɨ̀zâ, mbyə̂ ɨ̀zâ kɨ nzhyə̂ mə̀. 15Nɨ ndwuumə̀ wə̀, Tǎ ɨwəə a zhyə̂nə mə̀, ǹkɨ nzhyə̂ e. Ngwa nkwɨghə̀ àtwuə̀ nɨ mbyə̂ ɨ̀zâ. 16Ǹchyə̂ nɨ mbyə̂ yɨ̀tse zhyə̀ nɨ ka pə e amwuə àpùŋə̀ zə̀. Ǹchyə̂ a nɨ kɨ ndòo a zèrə ntô; zèrə zuʼù ngyə̀ mə̀. Lenəla zèrə tyiʼə̀ mbə taʼà àpùŋə̀ mbyə̂ ambo taʼà ɨ̀ndzə̂ mɨ̀mbyə̂.

17“Lə̌ ɨ̀sùmə nɨ Tǎ ɨwəə à kòŋə̀nə mə̀ ntiinə m̀byiimə̀nə lo ŋâ a nɨ̀chyə̂mbyə̂ mə̀, mbə̀ʼə ghǎ kẅirə̀ kẅiirə̀ a ẅèrə. 18Ka ŋònə̀ ɨ̀tse a pə e ghu nɨ mbə̀ʼə a kẅiirə̀ nɨ̀chyə̂mbyə̂ mə̀ ambo mɨ̀ŋə̀. A kòŋə̀ mɨ̀ŋə̀ nkòŋə̀ a nɨ ŋâ ẅèrə ntiinə ǹchyə̂nə nɨ mɨ̀tɨ̀ŋnə̀ a nɨ ŋâ ẅèrə, nchi mbə nɨ mɨ̀tɨ̀ŋnə̀ a nɨ kẅirə̀ mbə nɨ ẅèrə. Lə ànwùə̀ zhyə̀ nɨ Tǎ ɨwəə a shwəŋnə̀ ambo mɨ̀ŋə̀ lo n̂gɨ̀rə̀.”

19Ntii àshwəŋnə̀ zə̀, pɨ̀Jew laʼa nkɨ chi mbə a mɨ̀ntswùə̀ mɨ̀ntswùə̀. 20Pɨ̀Jew pɨ̀noʼnə lə̀ shwəŋə̀ lo, “Àzhyə̂ a zə a nɨ̀pùmə̀ ze! À paarə̀! Nɨ̀ zhwiʼtə̀ ànwùə̀ nɨ à wə̀ nshwəŋə̀ lə ntii àkə?”

21Pànə̀ pɨ̀tse amwuə pobə shwəŋə̀ lo, “Ka lə pə e àshwəŋnə̀ ŋònə̀ nɨ àzhyə̂ a pənə a nɨ̀pùmə̀ ze. Mbə̀ʼə ŋwùə̀ nɨ a pənə nɨ àzhyə̂ a nyaʼkə̀ ɨ̀myə̂ mə ɨ̀fə̀?”

Ka pɨ̀Jew nùŋə̀ a ghobə ntɨŋmə̀ ɨ̀ghobə aŋunə Yěsû

22A lə̀ pə nkwùə̀ ghu, mbə nkwùə̀ ghɨɨmə, nkɨ mbə nkwùə̀ nɨ pɨ lə̀ mənə ngaʼà a nɨ kẅempə̀ tsaʼnə pɨ lə̀ ŋânə Ndâ Mɨ̀shwàʼà Nẅùə̀ ngẅùunə a Yèrusalèmə̀ ambo Nẅùə̀. 23Yěsû à lə̀ pə ngyèntə̀ nkoʼò, ngyèntə̀ nshwuʼə̀ amwuə Ndâ Mɨ̀shwàʼà Nẅùə̀ ngẅùunə a Yèrusalèmə̀, alyiʼə nɨ pɨ lə̀ mənə nfuŋə̀ nɨ àpùŋə Solomònə̀, 24pɨ̀Jew tô nshwatə̀ nkamnə̀ e mbyiitə̀ ambo ze lo, “A njyə̂ ɨshyiʼə nɨ wə̀ pɨ ghɨ̀rə̀ pəə tə mɨnkə̀ o tɨ zhyə̂ a nkǔŋə nkuŋə? Wə̀ tə mbəla mbə Ghù Ndzoʼnə wa, wə̀ tiitə̀ a wəə nɨ nkǔŋə nkuŋə.”

25Yěsû a kẅùə̀ ambo pobə lo, “Mbyə̀ mə nshwəŋə̀ a wɨghə, ka nɨ̀ pyiimə̀ wɨghə. Mɨ̀nwùə̀ nɨ ngwa ngɨ̀rə̀ aŋunə nɨ̀linə̀ nɨ Tǎ ɨwəə mɨ ma nnèrə̀ a ŋwùə̀ nɨ m̀bənə ẅèrə. 26La ka nɨ̀ pyiimə̀ a wɨghə ntiinə ka nɨ̀ pə wɨghə mbyə̂ ndzìrə̀ ɨ̀zâ. 27Mbyə̂ ndzìrə̀ ɨ̀zâ za ndzuʼù ngyə̀ mə̀ ǹkɨ nzhyə̂ a ghobə, pobə kɨ mə ndzùŋə̀ a mə̀. 28Ngwa ŋŋâ a zèrə nɨ nɨ̀chyə̂mbyə̂ nɨ à ghoŋə̀ nɨ nkuŋə̀. Ka zèrə kɨ mbə kwɨghə̀ e, ŋònə̀ ɨ̀tse à kɨ nkẅiirə̀ e a zèrə ambo mɨ̀ŋə̀ apə̀. 29Tǎ ɨwəə nɨ à lə̀ ŋânə a zèrə ambo mɨ̀ŋə̀ à tsàarə̀ a ŋwùə̀ ntsùmə̀, ka ŋònə̀ ɨ̀tse a kɨ mbə e ghu nɨ mbə̀ʼə a kẅiirə̀ a zèrə ambo Tǎ ɨwəə. 30Pəə Tǎ ɨwəə la taʼà ŋwùə̀.”

31Pɨ̀Jew lə̀ zuʼù a lenə la nkɨ nchi ndyàa mɨ̀ghòorə a nɨ tumpə̀ e ghu. 32Yěsû a shwəŋə̀ ambo pobə lo, “Ǹgɨ̀rə̀ mə mɨ̀nwùə̀ mɨ̀shìʼnə̀ mɨ̀noʼnə a ɨ̀myə̂ pɨghə nɨ Tǎ ɨwəə à shwəŋə̀nə lo n̂gɨ̀rə̀. Nɨ̀ kùmə̀ tàʼà tumpə̀ a mə̀ nɨ mɨ̀ghòorə lə aŋunə zèrə ànwùə̀?”

33Pobə kẅùə̀ ambo ze lo, “Ka pəə mə ntàʼà tumpə̀ a wəə a ghò pə ntii ànwùə̀ ɨ̀shìʼnə̀ zə̀ yètse; pəə tàʼà tumpə̀ o pə ntiinə wə̀ zòomə̀nə a Nẅùə̀. Ghǒ ŋwùə̀ mɨsoŋə ntyiʼə̀ ndòo mbɨ̀ŋmə̀ o aŋunə Nẅùə̀.”

34Yěsû a shwəŋə̀ ambo pobə lo, “Ka pɨ ŋwàʼnə̀ e amwuə àŋwàʼnə̀ pɨ̀mbòomə ɨ̀pɨghə lo, ‘Nɨ̀ chyə̂ mbə la pɨ̀nẅùə̀?’ 35Pə̀ənə̀ zhyə̂ lo mbə̀ʼə ka pə̀ənə̀ kẅebə̀ wəənə̀ ànwùə̀ nɨ a pənə amwuə àŋwàʼnə̀ Nẅùə̀. Nẅùə̀ à tə mbəla nfuŋə̀ pànə̀ pa nɨ à lə̀ ŋânə ntwuumə̀ ambo pobə nɨ pɨ̀nẅùə̀, 36a tyiʼə̀ ndàŋə̀ ɨla ghu lo nɨ̀ shwəŋə̀ ambo ẅùə̀ wa nɨ Tǎ à lə̀ tsoʼnə tsaʼa àzwuumə̀ àfàʼà, ntsàa àtwuə̀ ɨ̀shyə̂ ghə lo à zòomə̀ a Nẅùə̀ ntiinə à shwəŋə̀nə lo, ‘Mɨ̀ŋə̌ Moonə̀ Nẅùə̀?’ 37M̀bəla ngoŋə̀ mə̀ àfàʼà Tǎ ɨwəə tɨ fàʼà, kò nɨ̀ nùŋə̀ a wɨghə mɨ̀ntɨŋmə̀ ɨ̀mɨghə aŋunə mɨ̀ŋə̀. 38La ǹtə pəla mmə ngɨ̀rə̀ mɨ̀nwùə̀ mɨ̀ghu, nɨ̀ kɨ mbirə̀ a wɨghə a gha tɨ pyiimə̀, nɨ̀ pyiimə̀ mɨ̀nwùə̀ mɨ̀ghu nɨ ǹgɨ̀rə̀nə. Lenəla nɨ̀ tyiʼə̀ nzhyə̂ nkǔŋə nkuŋə lo pəə Tǎ la taʼà ŋwùə̀.” 39Tsaʼnə Yěsû à lə̀ shwəŋə̀nə a lenə la, pobə lə̀ chi ntàʼà a nɨ kô e la a tyiʼə̀ ntsurə̀ nfurə̀ ndèrə̀ e. 40Yěsû à lə̀ kẅirə̀ ntwuumə̀ nchyə Jodànə̀ ndèrə̀ amwuə zhyə̀ ndzìnə alyiʼə nɨ Jònə à lə̀ pənə ŋŋâ àkẅiirə̀ nchyə ntyiʼə̀ ngoŋə̀ alyiʼə ghu. 41Pànə̀ pɨ̀noʼnə lə̀ tô ntsirə̀ e, nshwəŋə̀ lo, “Ka Jònə à lə̀ ghɨ̀rə̀ e ɨ̀lènə̀ ɨ̀nwùə̀ pɨ̀yerə̀nə yerə̀nə, la ɨ̀nwùə̀ ɨ̀tsùmə̀ nɨ Jònə à lə̀ shwəŋə̀nə mbə̀ʼə ŋònə̀ wə̀ a nkǔŋə nkuŋə.” 42Lenəla pànə̀ pɨ̀noʼnə lə̀ tyiʼə̀ nnùŋə̀ ntɨŋmə̀ ɨ̀ghobə aŋunə Yěsû alyiʼə ghu.

Currently Selected:

Jònə 10: pny

Highlight

Copy