Jònə 9

Yěsû a nyaʼkə̀ ɨ̀myə̂ mɨ ŋònə̀ nɨ pɨ lə̀ pyə̂nə e a pə ɨ̀fə̀

1Tsaʼnə Yěsû a lə̀ pənə ndàŋə̀, a lə̀ zəənə̀ a ŋònə̀ ɨ̀tse nɨ pɨ lə̀ pyə̂nə e a pə ɨ̀fə̀. 2Ɨ̀zùŋə̀ ndzùmə̀ ɨ̀pe pyiitə̀ e lo, “Masàa, a tɨ̀pòŋə̀ ɨ̀wə̌ nɨ à ghɨ̀rə̀nə lo pɨ̀ pyə̂ a ŋònə̀ wə̀ a pə ɨ̀fə̀? A tɨ̀pòŋə̀ e kə̀ ghu tǎ ɨghobə pobə mǎ e?”

3Yěsû a kẅùə̀ ambo pobə lo, “Ka nɨ̀fə̀ ŋònə̀ wə̀ a pə e nɨ ànwùə̀ àtse a nɨ ghɨ̀rə̀ mbə̀ʼə tɨ̀pòŋə̀ e kə̀ ghu tǎ ɨghobə pobə mǎ e. À lə̀ fə̀ pə lo pɨ̀ ghǎ ndàŋə̀ aŋunə nɨ̀fə̀ e wə̀ ndzəənə̀ mɨ̀tɨ̀ŋnə̀ mɨ Nẅùə̀. 4Tsaʼnə njyə̂ ɨ̀ zə̀ mbirə̀ ndaanə̀, a pòŋə̀ lo pə̀ənə̀ pə nfàʼà àfàʼà ŋònə̀ nɨ à twuumə̀nə mə̀ ntiinə ɨ̀twuʼə̀ wə̀ ntô sinə̀ nɨ mbə̀ʼə ŋwùə̀ a fàʼà e apə̀. 5Tsaʼnə m̀birə̀nə a àtwuə̀ ɨ̀shyə̂ ghə la, mɨ̀ŋə̀ a nkàʼà àtwuə̀ ɨ̀shyə̂.”

6A shwəŋə̀ a lenə la, ntẅùə̀ mɨ̀tẅuə̀ a ɨ̀shyə̂, ntẅapə̀ àtɨ̀tsaʼa ndòo ndzoʼò ɨ̀myə̂ mɨ ŋònə̀ wa ghu, 7nshwəŋə̀ ambo ze lo, “Lèrə̀ ngə̀ nsùu ɨ̀sɨghə̀ o amwuə atəŋə Silòmə̀.” (Ɨ̀sùmə pə lo ŋònə̀ nɨ pɨ twuumə̀nə e.) A ghə̀ nsùu ɨ̀sɨghə̀ e amwuə atəŋə za, nkɨ kẅirə̀ nkwə̂ ntyiʼə̀ mmə ndzəənə̀ ɨlyiʼə.

8Ngàŋə àpàrə̀ nkaʼà ɨ̀ze pobə pɨ pànə̀ nɨ pobə lə̀ zhyə̂nə e tsaʼa ŋònə̀ nɨ à lə̀ mənə nnwuunə̀ ndoonə̀ tyiʼə̀ mbyiitə̀ lo, “Ka lə̀ pə e ŋònə̀ wa nɨ à lə̀ mənə nnwuunə̀ ndoonə̀ ɨ̀pwuumə̀ la?”

9Pɨ̀tse kẅùə̀ lo, “A ze”; pɨ̀tse ghu, “A shwuə̀ e shwuə̀nə.”

La a shwəŋə̀ ambo pobə lo, “A mɨ̀ŋə̀ ze.”

10Pobə pyiitə̀ ambo ze lo, “Ɨ̀myə̂ ɨ̀mô làŋə̀ la ghu nyaʼkə̀?”

11A kẅùə̀ ambo pobə lo, “Ŋònə̀ wa nɨ pɨ pa nfuŋə̀ nɨ Yěsû la à tə ntẅapə̀ àtɨ̀tsaʼa ndòo ndzoʼò ɨ̀myə̂ ɨ̀mâ ghu, nshwəŋə̀ lo ‘N̂gə̀ nsùu ɨ̀myə̂ ɨ̀mâ amwuə atəŋə Silòmə̀.’ Lenəla ndə̀ ghə̀ nsùu ntyiʼə̀ ndzəənə̀ ɨlyiʼə.”

12Pobə pyiitə̀ ambo ze lo, “Yěsû ghu à ɨghə?” A kẅùə̀ lo, “Ka ǹzhyə̂ mə̀.”

Pɨ̀Farìsî tàʼà a nɨ zhyə̂ ànwùə̀ mbə̀ʼə nɨ̀parə̀ ɨ̀fə̀ wa

13Pobə lə̀ lòo a ŋònə̀ wa nɨ à lə̀ pyə̀nə mbə ɨ̀fə̀ la ndòo ndèrə̀ a mbyə̀ pɨ̀Farìsî. 14Njyə̂ nɨ Yěsû à lə̀ tẅapə̀nə àtɨ̀tsaʼa ndòo nyaʼkə̀ ɨ̀myə̂ mɨ ŋònə̀ wa ghu ɨ̀ lə̀ pə njyə̂ àlaʼà pɨ̀Jew. 15Pɨ̀Farìsî lə̀ chi mbyiitə̀ e nɨ ndwuumə̀ nɨ à làŋə̀nə mbòŋə̀ zəənə̀ ɨlyiʼə.

A kẅùə̀ ambo pobə lo, “À tə ndzoʼò ɨ̀myə̂ ɨ̀mâ nɨ àtɨ̀tsaʼa, ǹgə̀ nsùu ndzùŋə̀ mbìʼnə̀ a nɨ zəənə̀ ɨlyiʼə.”

16Pɨ̀Farìsî pɨ̀tse shwəŋə̀ lo, “Ka ŋònə̀ wə̀ furə̀ e pə ambo Nẅùə̀ ntiinə ka a nùŋə̀ e njyə̂ àlaʼà.”

La pɨ̀tse pyiitə̀ lo, “Mbə̀ʼə ŋònə̀ nɨ à wa ngɨ̀rə̀ ɨ̀nwùə̀ tɨ̀pòŋə̀ a ghɨ̀rə̀ a zə mbuurə̀ ɨ̀lènə̀ ɨ̀nwùə̀ pɨ̀yerə̀nə yerə̀nə lə ɨla ghu?” Lenəla, ɨ̀shwəŋnə̀ pə ghɨ̀rə̀ pobə tyiʼə̀ mɨ̀ntswùə̀ mɨ̀ntswùə̀.

17Pɨ̀Farìsî lə̀ chi mbyiitə̀ ambo ŋònə̀ wa lo, “Wə̀ shwəŋə̀ àzô lo àkə mbə̀ʼə ŋònə̀ wə̀ nɨ a ghɨ̀rə̀nə wə̀ zəənə̀ ɨlyiʼə lə.”

A kẅùə̀ lo, “A ngàŋə̀ ntwuumə̀ Nẅùə̀.”

18Ka pɨ̀Jew lə̀ pyiimə̀ a ghobə lo ŋònə̀ wə̀ à lə̀ pyə̀ mbə ɨ̀fə̀ tə mbyàa nkwùə̀ nɨ pobə lə̀ fuŋə̀nə a tǎ ɨghobə pobə mǎ e. 19Pobə pyiitə̀ lo, “Lə̌ moonə̀ ɨwɨghə, nɨ̀ shwəŋə̀ lo pɨ lə̀ kɨ pyə̂ e a pə ɨ̀fə̀? A kùmə̀ ndàŋə̀ ɨla ntyiʼə̀ ndzəənə̀ ɨlyiʼə tɨ̀tsòŋə̀?”

20Tǎ ɨghobə pobə mǎ e kẅùə̀ ambo pobə lo, “Pəə zhyə̂ lo lə̌ moonə̀ ɨwəə nɨ pɨ lə̀ pyə̂nə e a pə ɨ̀fə̀. 21La ka pəə zhyə̂ a wəə tsaʼnə à làŋə̀nə tɨ̀tsòŋə̀ ntyiʼə̀ mmə ndzəənə̀, ka kɨ zhyə̂ a wəə ŋònə̀ nɨ à nyaʼkə̀nə ɨ̀myə̂ ɨ̀me. À tyiʼə̀ ŋwùə̀, nɨ̀ pyiitə̀ e ǎ shwəŋə̀ ze àtwuə̀ ɨ̀pɨ̀ŋmə̀ e.” 22Tǎ ɨghobə pobə mǎ e lə̀ shwəŋə̀ a lenə la ntiinə pobə lə̀ pənə mbô pɨ̀Jew, ntiinə a lə̀ kɨnə pə la nɨ pɨ pyantə̀ mə lo ŋwùə̀ à tə mbyiimə̀ lo a Ghù Ndzoʼnə wa, yi pɨ kantə̀ e amwuə ndâ àshwatə̀ pɨ̀Jew. 23La ɨ̀sùmə nɨ tǎ ɨ̀ghobə pobə mǎ e lə̀ shwəŋə̀nə lo, “À tyiʼə̀ ŋwùə̀; nɨ̀ pyiitə̀ pə a ye.”

24Pobə kẅirə̀ nfuŋə̀ ŋònə̀ wa nɨ à lə̀ pənə ɨ̀fə̀ la, nshwəŋə̀ ambo ze lo, “Ŋâ àghuʼtə̀ ambo Nẅùə̀ nshwəŋə̀ a nkǔŋə nkuŋə o, pəə zhyə̂ lo ŋònə̀ wə̀ a lə ngàŋə̀ a ghɨ̀rə̀ ɨ̀nwùə̀ tɨ̀pòŋə̀.”

25A kẅùə̀ ambo pobə lo, “Kə̀ a pə ngɨ̀rə̀ ɨ̀nwùə̀ tɨ̀pòŋə̀, yi ka ǹzhyə̂ mə̀. Taʼà ànwùə̀ nɨ ǹzhyə̂nə a chyə̂ pə lo: Ǹtə ɨ̀fə̀ ǹkùmə̀ mmə ndzəənə̀ tɨ̀tsòŋə̀.”

26Pobə pyiitə̀ ambo ze lo, “À tô ngɨ̀rə̀ la ɨla nyaʼkə̀ ɨ̀myə̂ ɨ̀mô?”

27A kẅùə̀ lo, “Ǹtô mə nshwəŋə̀ a wɨghə ka nɨ̀ kòŋə̀ a wɨghə lo zuʼù. Ɨ̀sùmə nɨ nɨ̀ tàʼnə chi zuʼù tɨ̀tsòŋə̀ ɨ̀ chyə̂ lə lo àkə? Nɨ̀ tàʼà pə àzɨghə ɨ̀zùŋə̀ ndzùmə̀ ɨ̀pe?”

28Nkwùə̀ nɨ à lə̀ kẅùə̀nə a lenə la, pobə lə̀ zòomə̀ e nshwəŋə̀ lo, “Ghǒ àzùŋə̀ ndzùmə̀ ŋònə̀ wə̀, la pəə pə ɨ̀zùŋə̀ ndzùmə̀ Mǔsî! 29Pəə zhyə̂ lo Nẅùə̀ a lə pə nshwəŋnə̀ ambo Mǔsî, la ngə̀ aŋunə ŋònə̀ wə̀ ka pəə zhyə̂ a wəə alyiʼə nɨ à furə̀nə.”

30Ŋònə̀ wa a kẅùə̀ ambo pobə lo, “Lə̌ ànwùə̀ nɨ a kə̀ʼnə̀nə ntsàarə̀ mə̀. Ka nɨ̀ zhyə̂ a wɨghə alyiʼə nɨ à furə̀nə ghu, la à kùmə̀ nnyaʼkə̀ ɨ̀myə̂ ɨ̀mâ. 31Pə̀ənə̀ zhyə̂ tyìʼə̀ nkǔŋə nkuŋə lo, Nẅùə̀ à wa ka zuʼù e ànwùə̀ nɨ ngàŋə̀ ngɨ̀rə̀ ànwùə̀ tɨ̀pòŋə̀ à wa nshwəŋə̀ la; la ŋònə̀ nɨ à wa mbô Nẅùə̀ nkɨ ngɨ̀rə̀ ɨ̀nwùə̀ pyə̀ nɨ à tàʼnə la, Nẅùə̀ à wa ndzuʼù ànwùə̀ e. 32Tsaʼnə àtwuə̀ ɨ̀shyə̂ a lə̀ pìʼnə̀nə, pɨ pirə̀ mə e tɨ zuʼù lo pɨ nyaʼkə̀ ɨ̀myə̂ mɨ ŋwùə̀ nɨ pɨ lə̀ pyə̂nə e a pə ɨ̀fə̀. 33Ŋònə̀ wə̀ à lə̀ pə la ka furə̀ e ambo Nẅùə̀, yi mbə̀ʼə ka a ghɨ̀rə̀ e ànwùə̀ àtse tsaʼa zə̀.”

34Pobə kẅùə̀ ambo ze lo, “Pɨ lə̀ pyə̂ o la amwuə ngotə tɨ̀pòŋə̀ la wə̀ kùmə̀ tàʼà tyiʼə̀ pə ɨ̀nèrə̀ ambo pəə?” Nshwəŋə̀ a lenə la, nkantə̀ e amwuə ndâ àshwatə̀ ɨzobə ntsàa a àpyìinə.

Nɨ̀pə ɨ̀fə̀ amwuə mɨ̀nwùə̀ mɨ Àzhwùə̀

35Yěsû à lə̀ zuʼù lo pɨ kantə̀ a ŋònə̀ wa ntsàa a àpyìinə, ntàʼà e tə ndzəənə̀ mbyiitə̀ ambo ze lo, “Wə̀ nùŋə̀ ntɨŋmə̀ o aŋunə Moonə̀ Ŋwùə̀?”

36A kẅùə̀ ambo ze lo “Masàa, tiitə̀ mə̀ nɨ ŋònə̀ nɨ Moonə̀ Ŋwùə̀ à pənə ẅèrə mbə̀ʼə n̂nùŋə̀ ntɨŋmə̀ aŋunə ze.”

37Yěsû a shwəŋə̀ ambo ŋònə̀ wa lo, “Wə̀ zəənə̀ mə e; lə shwəŋnə̀ ze ambo ghò.”

38A kẅùə̀ ambo ze lo, “Masàa, nnùŋə̀ ntɨŋmə̀ mə̀ aŋunə ghò.” Lenəla, nkẅiʼtə̀ a mbyə̀ Yěsû, nguʼtə̀ e.

39Yěsû a shwəŋə̀ ambo ze lo, “Ndə̀ tô a nɨ tsoʼtə̀ pə̀ənə̀ àtwuə̀ ɨ̀shyə̂ ghə, njiilo pɨ̀fə̀ zəənə̀, pànə̀ nɨ pobə lə̀ pənə ndzəənə̀ ɨlyiʼə pobə̂ fə̀.”

40Pɨ̀Farìsî pɨ̀tse lə̀ pə alyiʼə ghu ndzuʼù ànwùə̀ nɨ à shwəŋə̀nə, mbyiitə̀ ambo ze lo, “Pəə kɨ mbə àzəə pɨ̀fə̀?”

41Yěsû a shwəŋə̀ ambo pobə lo, “Nɨ̀ tə mbəla mbə pɨ̀fə̀, yi ka tɨ̀pòŋə̀ a pə e aŋunə pɨghə. La tsaʼnə nɨ̀ wə̀ ntəəmə̀ ntɨ̀ŋnə̀ a wɨghə lo nɨ wə̀ ndzəənə̀ ɨlyiʼə la, tɨ̀pòŋə̀ ɨwɨghə a ghoŋə̀ e aŋunə pɨghə.”

Currently Selected:

Jònə 9: pny

Highlight

Copy