Jònə 11
11
Ànwùə̀ mbə̀ʼə nɨ̀wɨghə̀ Lazarùsə̀
1Ŋònə̀ ɨ̀tse nɨ nɨ̀linə̀ ɨ̀tse lə̀ pənə Lazarùsə̀ à lə̀ pə ngòonə̀. À lə̀ pə ŋwùə̀ Betanì nɨ à lə̀ pənə àlaʼà pɨ Màriyà pobə momaa e Marətà. 2Màriyà wə̀ à lə̀ pə ẅùə̀ wa nɨ à lə̀ zoʼnə mɨ̀kwùə̀ mɨ Yěsû nɨ mɨ̀ghurə̀ mɨ tsə̂nə ntyiʼə̀ ndòo ɨ̀nyùŋə̀ àtwuə̀ e ndzə̀ə ghu. Lazarùsə̀ wə̀ nɨ à lə̀ pənə momaa e ghu mbyàŋnə̀ à lə̀ pə ngòonə̀. 3Pɨlyimə ɨ̀pe pɨ pə̀ngyə̌ lə̀ tsàa ntwuumə̀ ambo Yěsû nshwəŋə̀ lo, “Ndòʼnə̀mbyə̂, ɨ̀swùə o wa nɨ wə̀ kòŋə̀nə e la à wə̀ ngòonə̀.”
4Nkwùə̀ nɨ Yěsû à lə̀ zuʼnə a nɨ̀ghòonə̀ wə̀ la, à lə̀ shwəŋə̀ lo, “Ka nɨ̀ghòonə̀ wə̀ a pə ghɨ̀rə̀ e lo â kwɨghə̀. Nɨ̀ghòonə̀ wə̀ à chyə̂ pə lo pɨ̀ furə̀ aŋunə nguʼtə̀ a Nẅùə̀ nkɨ nguʼtə̀ a Moonə̀ Nẅùə̀.”
5Yěsû à lə̀ kòŋə̀ a Marətà nɨ Màriyà momaa e ghu mə̀ngyə̌ pobə Lazarùsə̀. 6Nkwùə̀ nɨ à lə̀ zuʼnə lo Lazarùsə̀ a wə̀ ngòonə̀, a lə̀ chi ndyə̂ alyiʼə ghu njyə̂ ɨpaa. 7Tsaʼnə njyə̂ zə̀ ɨpaa lə̀ làŋə̀nə, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Pə̀ənə̀ kẅirə̀ ndèrə̀ a Judyà.”
8La ɨ̀zùŋə̀ ndzùmə̀ ɨ̀pe shwəŋə̀ ambo ze lo, “Ɨ̀nèrə̀, ka ntyə̌ ɨ̀ sàa e nɨ pɨ̀Jew lə̀ tàʼnə lo tumpə̀ o nɨ mɨ̀ghòorə, wə̀ kùmə̀ nchi ntàʼà lo ghə̀ ghu?”
9Yěsû a kẅùə̀ ambo pobə lo, “Yi nɨ̀pìʼnə̀ a ngẅùʼə ngə̀ mbyàa a ngẅènə̀ nẅùumə̀ la pɨ̀nẅùumə̀ ntsòbə̀ ɨpaa? Ŋwùə̀ à tə mmə ngyìinə̀ nɨ njyə̂ a kòntə̀ nkunə̀ e apə̀ ntiinə à wə̀ ndzəənə̀ nkàʼà àtwuə̀ ɨ̀shyə̂ wə̀. 10La ŋònə̀ ɨ̀tse à tə mmə ngyìinə̀ nɨ ɨ̀twuʼə̀, yi à pɨ kòntə̀ kunə̀ ntiinə ka nkàʼà ɨ pə e amwuə ze.” 11Yěsû a shwəŋə̀ a lenəla, nchi nshwəŋə̀ ambo pobə lo “Ɨ̀swùə ɨ̀wə̀ənə̀ Lazarùsə̀ à wə̀ ndyə̂ lyə̂nə. La mbɨ zhwemnə̀ e â lòo a ɨ̀shyə̂ aŋunə pɨlô ghu.”
12Ɨ̀zùŋə̀ ndzùmə̀ ɨ̀pe shwəŋə̀ ambo ze lo, “À tə pə ndyə̂ lyə̂nə yi à pɨ fiitə̀.”
13Yěsû à lə̀ shwəŋə̀ la lo, Lazarùsə̀ a kwɨghə̀. La ɨ̀zùŋə̀ ndzùmə̀ ɨ̀pe zuʼù àzobə nkwàŋə̀ pə lo à wə̀ ndyə̂ lyə̂nə. 14Lenəla, Yěsû a shwəŋə̀ ambo pobə a sàŋə̀ sàŋə̀ lo, “Lazarùsə̀ à kwɨghə̀. 15Ǹgaʼà lo ka ndə̀ pə mə̀ alyiʼə ghu ntii wɨghə, njiilo nɨ̀ nùŋə̀ ntɨŋmə̀ ɨ̀wɨghə aŋunə mɨ̀ŋə̀. La pə̀ənə̀ lèrə̀ ngə̀ ndzəənə̀ e.”
16Thomas (nɨ pɨ lə̀ mənə nfuŋə̀ e nɨ moonə̀ nɨ̀fâ) à lə̀ shwəŋə̀ ambo pyə̀ ɨ̀zùŋə̀ ndzùmə̀ Yěsû lo, “Nɨ̀ ghɨ̀rə̀ pə̀ənə̀ lèrə̀ pə̀ənə̀ pɨ pobə, njiilo pə̀ənə̀ chyə̂ kwɨghə̀ pə̀ənə̀ pɨ pobə.”
Yěsû nɨ à wa nzhwuumə̀ pə̀ənə̀ aŋunə nɨ̀wɨghə̀
17Nkwùə̀ nɨ Yěsû à lə̀ tônə mbyàa alyiʼə ghu, à lə̀ zəənə̀ lo Lazarùsə̀ à lyə̂ mə amwuə nɨ̀shyə̀ mbyàa njyə̂ nɨ̀kwàa. 18Ka nɨ̀furə̀ a Betanì ndèrə̀ a Yèrusalèmə̀ a lə̀ sàa e; ntyə̌ lə̀ pə tsaʼa pɨ̀marə̀ pɨpaa, 19pɨ̀Jew pɨ̀noʼnə lə̀ tô a nɨ chàʼtə̀ Marətà pobə Màriyà aŋunə nɨ̀wɨghə̀ nɨ momaa ɨghobə. 20Nkwùə̀ nɨ Marətà à lə̀ zuʼnə lo Yěsû à wə̀ ntô, à lə̀ furə̀ ndèrə̀ a nɨ ghə̀ mbwùumə̀ e, la Màriyà a nwuunə̀ e amwuə ndâ. 21Tsaʼnə Marətà à lə̀ zəənə̀nə a Yěsû la, à lə̀ shwəŋə̀ ambo Yěsû lo, “Ndòʼnə̀mbyə̂, wə̀ tə mbəla mbə a nɨ̀ghə̂, yi ka momaa mə̀ wə̀ a kwɨghə̀ e. 22La tɨ̀tsòŋə̀ wə̀ ǹzhyə̂ lo, wə̀ tə mbyiitə̀ ànwùə̀ àtsùmə̀ ambo Nẅùə̀ yi ǎ ŋâ ambo ghò.”
23Lenəla, Yěsû a shwəŋə̀ ambo ze lo, “Momaa o à pɨ zhwuumə̀ a nɨ̀wɨghə̀.”
24Marətà a shwəŋə̀ ambo ze lo, “Ǹzhyə̂ lo à ghǎ zhwuumə̀ a nɨ̀wɨghə̀ aŋunə ndẅùutə njyə̂ nɨ pɨ̀kwuə̀ ghǎ zhwuumə̀ a nɨ̀wɨghə̀.”
25Yěsû a shwəŋə̀ ambo ze lo, “Ǹchyə̂ mbə ŋònə̀ nɨ ngwa nzhwuumə̀ pə̀ənə̀ aŋunə nɨ̀wɨghə̀, nkɨ mmə ŋŋâ a nɨ̀chyə̂mbyə̂ ambo pobə. Ŋònə̀ nɨ à nùŋə̀nə ntɨŋmə̀ e aŋunə mɨ̀ŋə̀ mbaa pə tsaʼnə à ghǎ kwɨghə̀, à ghǎ zhwuumə̀ a nɨ̀wɨghə̀. 26Ŋònə̀ ntsùmə̀ nɨ à pənə ghù ntɨ̀ŋnə̀ nkɨ nnùŋə̀ ntɨŋmə̀ e aŋunə mɨ̀ŋə̀ mbə̀ʼə a laʼa nkwɨghə̀ e apə̀. Wə̀ pyiimə̀ a lenə?”
27A kẅùə̀ ambo ze lo, “Ee Ndòʼnə̀mbyə̂, m̀byiimə̀ lo ghǒ Ghù Ndzoʼnə wa, nkɨ mbə Moonə̀ Nẅùə̀ nɨ à lə̀ pənə tô a àtwuə̀ ɨ̀shyə̂.”
Yěsû a yìi
28Nkwùə̀ nɨ Marətà à lə̀ shwəŋə̀nə a lenə la, à lèrə̀ ngə̀ nchwùmpə̀ ambo ndyimə e Màriyà lo, “Ɨ̀nèrə̀ à tô mə, mmə ntàʼà a nɨ zəənə̀ o.”
29Màriyà à lə̀ zuʼù a lenə la, ndòo ɨ̀shyə̂ nɨ mɨ̀tɨ̀ŋnə̀ a nɨ ghə̀ ntsirə̀ a Yěsû. 30A lə̀ kɨ pə nkwùə̀ ghu, Yěsû a pirə̀ e pə alyiʼə nɨ Marətà à lə̀ tônə ntsirə̀ e ghu la, mbirə̀ e tə tô mbyàa amwuə àlaʼà. 31Nkwùə̀ nɨ pɨ̀Jew nɨ pobə lə̀ pənə amwuə ndâ mmə ndəpə̀ a Màriyà lə̀ zəənə̀nə tsaʼnə à lòonə a ɨ̀shyə̂ nfurə̀ a àpyìinə nɨ mɨ̀tɨ̀ŋnə̀, pobə lə̀ zùŋə̀ e a àpyìinə mmə nkwàŋə̀ lo à lèrə̀ pə àtwuə̀ nɨ̀shyə̀ ghə̀ nwuunə̀ ghu tə yìi. 32La tsaʼnə à lə̀ tônə ndzəənə̀ a Yěsû la, à lə̀ kunə̀ a mɨ̀kwùə̀ ze nshwəŋə̀ lo, “Ndòʼnə̀mbyə̂, wə̀ lə pəla mbə a nɨ̀ghə̂, yi ka ndyimə mə̀ a lə̀ kwɨghə̀ e.”
33Nkwùə̀ nɨ Yěsû à lə̀ zəənə̀nə tsaʼnə Màriyà à lə̀ pənə ngyìi pobə pɨ̀Jew nɨ pobə lə̀ zùŋə̀nə e, ànwùə̀ ghu a lə̀ pètə̀ ntɨŋmə̀ e; 34a tyiʼə̀ mbyiitə̀ a ghobə lo, “Nɨ̀ lòʼnə̀ e alyiʼə àkə?”
Pobə shwəŋə̀ ambo ze lo, “Ndòʼnə̀mbyə̂ tô ndzəənə̀.”
35Yěsû à lə̀ yìi.
36Lenəla, pɨ̀Jew pɨ̀ghu tyiʼə̀ nshwəŋə̀ lo, “Nɨ̀ zəənə̀ tsaʼnə à lə̀ kòŋə̀nə e!”
37La pobə pɨ̀tse shwəŋə̀ àzobə lo, “Lə̌ ŋònə̀ nɨ à lə̀ ghɨ̀rə̀nə ɨ̀fə̀ a zəənə̀ ɨlyiʼə. Mbə̀ʼə ka a lə̀ kɨ ngɨ̀rə̀ e lo kò ŋònə̀ wə̀ a kwɨghə̀?”
Yěsû a zhwuumə̀ a Lazarùsə̀ aŋunə nɨ̀wɨghə̀
38Ànwùə̀ ghu a lə̀ chi mbètə̀ ntɨŋmə̀ Yěsû; a lèrə̀ a àtwuə̀ nɨ̀shyə̀ Lazarùsə̀. Nɨ̀shyə̀ tsɨ̀ghu lə̀ pə mbwùʼə̀ nɨ pɨ lə̀ nàanə̀nə ntswùə̀ e nɨ nɨ̀ghòorə. 39Yěsû a shwəŋə̀ ambo pobə lo, “Nɨ̀ tsoʼò nɨ̀ghòorə tsə̀ a ntswùə̀ nɨ̀shyə̀ ghə.”
Marətà nɨ à lə̀ pənə momaa nkwùə wa a shwəŋə̀ ambo Yěsû lo, “Ndòʼnə̀mbyə̂, à pìʼnə̀ mə a nɨ nẅuʼù, ntiinə à lyə̂ mə amwuə nɨ̀shyə̀ njyə̂ nɨ̀kwàa.”
40Yěsû a tyiʼə̀ nshwəŋə̀ ambo Marətà lo, “Yi ndə̀ shwəŋə̀ ambo ghò lo wə̀ tə mbəla nnùŋə̀ ntɨŋmə̀ o aŋunə mɨ̀ŋə̀, yi wə̀ ghǎ zəənə̀ mɨ̀nwùə̀ mɨ̀tɨ̀ŋnə̀ nɨ Nẅùə̀koʼò ǎ ghɨ̀rə̀.” 41Lenəla, pɨ tsoʼò nɨ̀ghòorə tsa, Yěsû a pə̀ʼkə̀ ɨ̀myə̂ ɨ̀me nnaŋə̀ àtɨ̀ghə nshwəŋə̀ lo “Tǎ, mɨyàa ambo ghò ntiinə wə̀ wa ndzuʼù ànwùə̀ nɨ ngwa nshwəŋə̀. 42Ngə̀ aŋunə mɨ̀ŋə̀, ǹzhyə̂ lo wə̀ wa mbyə̀ ndzuʼù ànwùə̀ nɨ ngwa nshwəŋə̀ ambo ghò, la ǹkùmə̀ ntyiʼə̀ nshwəŋə̀ zə̀ pə mbə̀ʼə pànə̀ pə̀ nɨ pɨ təəmə̀nə a nɨ̀ghə̂, mbə̀ʼə pobə̂ pyiimə̀ lo wə̀ tsàanə mə̀.” 43Tsaʼnə à lə̀ myàanə̀nə a nɨ shwəŋnə̀ la, à lə̀ kyiinə̀ nɨ ɨ̀tɨ̀ŋnə̀ nshwəŋə̀ lo, “Lazarùsə̀ furə̀ ntô.” 44Tsaʼnə Yěsû à lə̀ shwəŋə̀nə la, àkwuə̀ ŋwùə̀ ghu a lə̀ zùŋə̀ nfurə̀, mɨ̀kwùə̀ ɨ̀me ghobə mbô ɨ̀me pə mɨ korə̀nə nɨ ɨ̀pàa ɨtsəʼə, atsəʼə a kɨ nkorə̀ farə ɨ̀sɨghə̀ e.
Yěsû a shwəŋə̀ ambo pobə lo, “Nɨ̀ kyàatə̀ e mmyàʼtə̀ â lèrə̀.”
Pɨ tyiʼə̀ ntàʼà àlàŋə a nɨ zhwuutə̀ a Yěsû
45Lenəla, pɨ̀Jew pɨ̀noʼnə nɨ pɨ lə̀ tônə a nɨ chàʼtə̀ a Màriyà lə̀ zəənə̀ ànwùə̀ nɨ Yěsû à ghɨ̀rə̀nə ntyiʼə̀ nnùŋə̀ ntɨŋmə̀ aŋunə ze. 46La pɨ̀tse pə̀ənə̀ amwuə pobə lə̀ lèrə̀ ngə̀ ntsirə̀ pɨ̀Farìsî ntiitə̀ a ghobə nɨ ànwùə̀ nɨ Yěsû à ghɨ̀rə̀nə. 47Lenəla, pɨ̀fò màʼà Nẅùə̀ pobə pɨ̀Farìsî lə̀ shwatə̀ amwuə Kansèrə̀ nshwəŋə̀ lo, “Pə̀ənə̀ ghɨ̀rə̀ lə ɨla? Nɨ̀ zəənə̀ mbuurə̀ ɨ̀lènə̀ ɨ̀nwùə̀ pɨ̀yerə̀nə yerə̀nə nɨ ŋònə̀ wə̀ à wə̀ ngɨ̀rə̀? 48Pə̀ənə̀ tə mmyàʼtə̀ lo â lèrə̀ nɨ mbyə̀ yi pànə̀ pɨ̀tsùmə̀ pyiimə̀ e, lenəla ɨ̀twuə̀ àlaʼà Romə̀ tô nshàʼtə̀ Ndâ Mɨ̀shwàʼà Nẅùə̀ pobə àlaʼà àzəənə̀.”
49La taʼà ŋwùə̀ ɨghobə ghùtse nɨ pɨ lə̀ mənə nfuŋə̀ nɨ Kayafàsə̀, nɨ à lə̀ pənə àtwuə̀ pɨ̀fò màʼà Nẅùə̀ amwuə nguʼu ghu, a shwəŋə̀ ambo pobə lo, “Ka nɨ̀ zhyə̂ a wɨghə ànwùə̀ àtse; 50ka nɨ̀ zhyə̂ a wɨghə lo a pòŋə̀ ambo pɨghə pə lo taʼà ŋwùə̀ â kwɨghə̀ àtwuə̀ nɨ pə̀ənə̀, ntsàarə̀ lo àlaʼà àtsùmə̀ â kwɨghə̀?” 51Ka à lə̀ shwəŋə̀ e a lenə la àtwuə̀ nɨ ze, tsaʼnə à lə̀ pənə Àtwuə̀ pɨ̀fò màʼà Nẅùə̀ amwuə nguʼu ghu la, à lə̀ tyiʼə̀ nshwəŋnə̀ la tsaʼa ngàŋə̀ ntwuumə̀ Nẅùə̀ lo Yěsû à ghǎ kwɨghə̀ àtwuə̀ nɨ pɨ̀Jew. 52Ka à lə̀ pə kwɨghə̀ e la pə ndàʼà àtwuə̀ nɨ pɨ̀Jew. À lə̀ kwɨghə̀ pə a nɨ shwatə̀ ɨ̀poonə̀ pɨ Nẅùə̀ nɨ pɨ lə̀ sapə̀nə alyiʼə alyiʼə lo pobə̂ tô mbə alyiʼə moʼo. 53A nɨ pìʼnə̀ njyə̂ ghu, ɨ̀twuə̀ pɨ̀Jew tyiʼə̀ ntàʼà a nɨ zhwuutə̀ a Yěsû. 54Lenəla ka Yěsû à chi ngyìinə̀ e sàa sàa amwuə pɨ̀Jew. À lə̀ furə̀ alyiʼə ghu ndèrə̀ amwuə pàa àlaʼà ɨ̀tse a nɨ paatə̀ alyiʼə waakə nɨ pɨ lə̀ mənə nfuŋə̀ nɨ Efrèmə̀ ntyiʼə̀ nchyə̂ alyiʼə ghu pobə ɨ̀zùŋə̀ ndzùmə̀ ɨ̀pe.
55Njyə̂ Nɨ̀ghaʼà Àlàŋə̀ Mmyàʼtə̀ ɨ̀ lə̀ paatə̀. Pànə̀ pɨ̀noʼnə furə̀ amwuə àlaʼà nkoʼò ndèrə̀ a Yèrusalèmə̀ a nɨ sùu mbɨ̀ŋmə̀ ɨ̀zobə laanə̀ a nɨ zùŋə̀ a mbòomə ɨghobə zaʼà nkwùə̀ Nɨ̀ghaʼà Àlàŋə̀ Mmyàʼtə̀ ɨ̂ pòŋə̀ tô.
56Tsaʼnə pobə lə̀ mənə ntàʼà a Yěsû mmə ntô nshwatə̀ àtɨ̀taa Ndâ Mɨ̀shwàʼà Nẅùə̀ a Yèrusalèmə̀ la, pobə lə̀ tyiʼə̀ mbyiitə̀ pobə nɨ pobə lo, “Nɨ̀ kwàŋə̀ àzɨghə lo àkə, tə ǎ tô amwuə nɨ̀ghaʼà wanə?” 57A lə̀ kɨ pə la nɨ pɨ̀fò màʼà Nẅùə̀ pobə pɨ̀Farìsî shwəŋə̀ mə lo, ŋwùə̀ à tə mbəla nzhyə̂ alyiʼə nɨ Yěsû à pənə ghu a tô nshwəŋə̀ ambo pobə mbə̀ʼə pɨ ghə̀ nkô e.
Currently Selected:
Jònə 11: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
