Ɨ̀fàʼà 8

Pɨ furə̀ aŋunə nɨ̀wɨghə̀ Stifə̀nə̀ ntòmnə̀ ɨ̀poonə̀ pɨ Kristù

1Saul à lə̀ kɨ mbyiimə̀ àze lo pɨ̀ zhwuutə̀ a Stifə̀nə̀. A nɨ pìʼnə̀ njyə̂ ghu pɨ pìʼnə̀ a nɨ tòmnə̀ àshwatə̀ ɨ̀poonə̀ pɨ Kristù. Pobə pɨ̀tsùmə̀ lə̀ sìimə̀ ndèrə̀ amwuə àlaʼà Judyà pobə Sàmariyà ntyiʼə̀ mmyàʼtə̀ tyìʼə̀ ngàŋə ntwuumə̀ Yěsû. 2Pɨ̀tse pànə̀ nɨ pɨ lə̀ pyiimə̀nə a Nẅùə̀ lə̀ tẅəŋə̀ àkwuə̀ Stifə̀nə̀ ntyiʼə̀ ngyìi nɨ̀wɨghə̀ ɨ̀tse ka mɨ̀zùŋə. 3La Saul à lə̀ tàʼà pə lo kɨ pyaatə̀ àshwatə̀ ɨ̀poonə̀ pɨ Kristù tyìʼə̀ pyaatə̀nə. À lə̀ kwuunə̀ amwuə ndâ nfurə̀ nkwuunə̀ a zhyə̀ nfuukə̀ mbyàŋnə̀ pobə pə̀ngyə̌ ndòo ngə̀ nchyâ a ndâ ɨ̀tsaŋə̀.

Tsaʼnə pɨ lə̀ chwìitə̀nə ntwuumə̀ ghù ɨ̀shìʼnə̀ wa a Sàmariyà

4Ɨ̀poonə̀ pɨ Kristù pa nɨ pɨ lə̀ sìimə̀nə la lə̀ tyiʼə̀ nchwìitə̀ ntwuumə̀ ghù ɨ̀shìʼnə̀ wə̀ alyiʼə àtsùmə̀ nɨ pobə lə̀ mənə ndèrə̀. 5Filibə̀ à lə̀ shwuʼə̀ ndèrə̀ a Sàmariyà ntyiʼə̀ nchwìitə̀ ntwuumə̀ ghù ɨ̀shìʼnə̀ mbə̀ʼə Ghù Ndzoʼnə wa. 6Àpùŋə̀ pə̀ənə̀ nɨ a lə̀ pənə alyiʼə ghu a lə̀ zhwiʼtə̀ nkɨ ndzəənə̀ ɨ̀lènə̀ mɨ̀nwùə̀ pɨ̀yerə̀nə yerə̀nə nɨ Filibə̀ à lə̀ ghɨ̀rə̀nə nkɨ mbyiimə̀ ànwùə̀ nɨ à lə̀ shwəŋə̀nə nɨ ntɨŋmə̀ ɨ̀ghobə ɨ̀tsùmə̀ 7Ɨ̀zhwùə̀ tɨ̀pòŋə̀ nɨ lə̀ pənə amwuə mɨ̀pùmə̀ mɨ pə̀ənə̀ lə̀ tyiʼə̀ nkyiinə̀ nfutə̀. Pànə̀ pɨ̀noʼnə nɨ pɨ̀pàa pɨ mbɨ̀ŋmə̀ ɨ̀pobə kwɨkə̀nə nɨ pɨ̀kɨkə̀ghə lə̀ tɨ̀ŋnə̀. 8Lenəla nɨ̀ghaʼà yɨ̀noʼnə à lə̀ pə amwuə àlaʼà Sàmariyà.

Shimùnə̀ ngàŋə̀ nɨ̀kàŋə̀

9Ŋònə̀ ɨ̀tse à lə̀ pə ghu nɨ à lə̀ pyə̀nə mmə nkwabə̀ àngaamə ngɨ̀rə̀ mɨ̀nwùə̀ mɨ kə̀ʼnə̀nə, mbə̀ŋə̀ ɨ̀twuə̀ pànə̀ pɨ̀tsùmə̀ a àlaʼà Sàmariyà nshwəŋə̀ lo, ze la ŋònə̀ ntɨ̀ŋnə̀. 10Pànə̀ pɨ̀tsùmə̀ amwuə mbòmpə àlaʼà zə̀ a nɨ pìʼnə̀ aŋunə pànə̀ pɨ̀kɨ̂ tə ngə̀ mbyàa aŋunə pànə̀ pɨ̀ẅùunə lə̀ pyiimə̀ ànwùə̀ e nshwəŋə̀ lo, “Ŋònə̀ wə̀ a mɨ̀tɨ̀ŋnə̀ mɨ Nẅùə̀ nɨ pɨ pa nfuŋə̀ nɨ ‘Mɨ̀tɨ̀ŋnə̀ Mɨ̀ẅùunə.’” 11Pobə lə̀ pyiimə̀ ànwùə̀ nɨ à lə̀ mənə nshwəŋə̀ ntiinə à lə̀ pə̀ŋə̀nə ɨ̀twuə̀ ɨ̀pobə aŋunə ntyə̌ sàa nɨ ɨ̀nwùə̀ nɨ̀kàŋə̀ ɨ̀pe. 12La nkwùə̀ nɨ pobə lə̀ zuʼnə nkɨ mbyiimə̀ ntwuumə̀ ghù ɨ̀shìʼnə̀ nɨ Filibə̀ a lə̀ pənə nchwìitə̀ mbə̀ʼə ànwùə̀ Nɨ̀fò Nẅùə̀ nɨ nɨ̀linə̀ nɨ Yěsû, pobə pɨ̀tsùmə̀ lə̀ kẅiirə̀ nchyə, mbyàŋnə̀ pobə pə̀ngyə̌. 13Shimùnə̀ àtwuə̀ ɨ̀pɨ̀ŋmə̀ e à lə̀ pyiimə̀ ntwuumə̀ ghù ɨ̀shìʼnə̀ wə̀ nkɨ nkẅiirə̀ nchyə. À lə̀ mə ndzùŋə̀ a Filibə̀ alyiʼə àtsùmə̀ nɨ à lə̀ mənə ndèrə̀ ndzəənə̀ ɨ̀lènə̀ ɨ̀nwùə̀ nɨ mɨ̀nwùə̀ mɨ yerə̀nə yerə̀nə nɨ à lə̀ mənə ngɨ̀rə̀ mɨ tyiʼə̀ nkə̀ʼnə̀ e. 14Nkwùə̀ nɨ ngàŋə ntwuumə̀ Yěsû Kristù a Yèrusalèmə̀ lə̀ zuʼnə lo pànə̀ pɨ Sàmariyà pyiimə̀ àshwəŋnə̀ Nẅùə̀, pobə lə̀ tsàa a Pità pobə Jònə ambo pobə. 15Tsaʼnə pobə Jònə lə̀ shwuʼnə ghu la, pobə lə̀ chàʼtə̀ a Nẅùə̀ mbə̀ʼə pobə̂ kẅiirə̀ Àzhwùə̀ Nẅùə̀, 16ntiinə Àzhwùə̀ Nẅùə̀ a lə̀ pirə̀nə e tɨ tô aŋunə pobə, pɨ lə̀ ŋâ a ghobə pə nɨ ndàʼà àkẅiirə̀ nchyə aŋunə nɨ̀linə̀ nɨ Ndòʼnə̀mbyə̂ Yěsû. 17Pità pobə Jònə lə̀ nùŋə̀ mbô ɨ̀mobə àtwuə̀ pobə, pobə kẅiirə̀ Àzhwùə̀ Nẅùə̀.

18Shimùnə̀ à lə̀ zəənə̀ lo Àzhwùə̀ Nẅùə̀ a lə̀ tô aŋunə pobə la tsaʼa ngàŋə ntwuumə̀ Yěsû lə̀ nùŋə̀nə mbô ɨ̀mobə aŋunə pobə, ŋŋâ nkabə̀ ambo Pità pobə Jònə, 19nshwəŋə̀ lo, “Nɨ̀ kɨ ŋŋâ mə̀ nɨ ɨ̀tɨ̀ŋnə̀ wə̀ njiilo ŋònə̀ nɨ ǹnùŋə̀nə mbô ɨ̀mâ àtwuə̀ ze ǎ kẅiirə̀ Àzhwùə̀ Nẅùə̀ zə̀.”

20La Pità a shwəŋə̀ ambo ze lo, “Lèrə̀ ngə̀ nkwɨghə̀ pɨghə pɨ nkabə̀ o! Wə̀ kwàŋə̀ lo mbə̀ʼə wə̀ zwuunə̀ àzwuumə̀ nɨ Nẅùə̀ a ŋânə nɨ nkabə̀? 21Ka wə̀ pə o nɨ ànwùə̀ àtse a nɨ ghɨ̀rə̀ amwuə àfàʼà zèrə zə ntiinə ka ntɨŋmə̀ o ɨ laanə̀ e a ɨ̀myə̂ Nẅùə̀. 22Lenəla, pə̀ŋə̀ ntɨŋmə̀ o ngwaʼà a tɨ̀pòŋə̀ o wə̀, nchàʼtə̀ a Nẅùə̀ ndoonə̀ ambo Ndòʼnə̀mbyə̂ lo mbə̀ʼə â lə̀ənə̀ o aŋunə ànwùə̀ tsaʼa zə̀ nɨ wə̀ kwàŋə̀nə la, 23ntiinə ǹdzəənə̀nə lo ntɨŋmə̀ o ɨ wə̀ ndẅenə̀ nɨ àghə̀ʼnə̀, ɨ̀nwùə̀ tɨ̀pòŋə̀ ɨ̀pô tyiʼə̀ nkorə̀ o tsaʼa ngàŋə̀ ɨ̀tsaŋə̀.”

24Shimùnə̀ a kẅùə̀ ambo pobə lo, “A pòŋə̀ lo a chàʼtə̀ pɨghə nchàʼtə̀ a Nẅùə̀ àtwuə̀ mɨ̀ŋə̀ lo kò taʼà ànwùə̀ wə̀ ghùtse moʼo nɨ nɨ̀ tənə nshwəŋə̀ la a ẅìimə̀ mə̀.”

25Nkwùə̀ nɨ pobə lə̀ shwəŋə̀nə mɨ̀nwùə̀ mɨ Ndòʼnə̀mbyə̂ nkɨ nchwìitə̀ ntwuumə̀ e, pobə lə̀ kẅirə̀ ndèrə̀ a Yèrusalèmə̀, mmə ngyìinə̀ nchwìitə̀ ntwuumə̀ ghù ɨ̀shìʼnə̀ wə̀ amwuə ɨ̀laʼà Sàmariyà pɨ̀noʼnə.

Filibə̀ a chwìitə̀ ntwuumə̀ ghù ɨ̀shìʼnə̀ ambo ŋwùə̀ Ètopyà

26Nkwùə̀ nɨ Pità pobə Jònə lə̀ pənə nchwìitə̀ ntwuumə̀ Ndòʼnə̀mbyə̂ amwuə ɨ̀laʼà Sàmariyà la, angèrə̀ Ndòʼnə̀mbyə̂ a lə̀ shwəŋə̀ ambo Filibə̀ lo, “Lòo a ɨ̀shyə̂ nshwuʼə̀ ndèrə̀ amwuə àlàŋə za nɨ a furə̀nə Yèrusalèmə̀ mmə ndèrə̀ a Gaza.” (Àlàŋə zə lə̀ pə àlàŋə nɨ ka pɨ̀ lə̀ pirə̀ mmə ndàŋə̀ e amwuə.) 27Filibə̀ à lə̀ lòo a ɨ̀shyə̂ mmə ndèrə̀, ndzəənə̀ a ŋwùə̀ Ètopyà ɨ̀tse nɨ à lə̀ pənə ntsɨ̀ntoʼò ghù ngẅùunə nkɨ mmə ndòʼnə̀ nkabə̀ ambo ɨ̀fò Ètopyà ghu mə̀ngyə̌ nɨ nɨ̀linə̀ ɨ̀tse lə̀ pənə Kandàsə̀. Ŋònə̀ wə̀ à lə̀ lèrə̀ a Yèrusalèmə̀ a nɨ ghuʼtə̀ a Nẅùə̀, 28ntyiʼə̀ nkẅirə̀ mmə nkwə̂ e, nnwuunə̀ amwuə kalɨgə̀ e mmə nfuŋə̀ àŋwàʼnə̀ ngàŋə̀ ntwuumə̀ Nẅùə̀ Ìsayà. 29Àzhwùə̀ Nẅùə̀ a shwəŋə̀ ambo Filibə̀ lo, “Koʼò ngə̀ mbaatə̀ a kalɨgə̀ wa.” 30Lenəla, Filibə̀ a kɨ̀ɨrə̀ ngə̀ mbaatə̀ ndzuʼù tsaʼnə à mənə nfuŋə̀ àŋwàʼnə̀ ngàŋə̀ ntwuumə̀ Nẅùə̀, mbyiitə̀ e lo, “Wə̀ fuŋə̀ lə mmə nzhyə̂ ànwùə̀ nɨ wə̀ wə̀ nfuŋə̀?”

31A kẅùə̀ ambo ze lo, “Ŋònə̀ ɨ̀tse à tə ngoŋə̀ e tɨ tiitə̀ mə̀, ǹtyiʼə̀ nzhyə̂ àzâ la ɨghə?” A shwəŋə̀ a lenə la nfuŋə̀ a Filibə̀ lo â koʼò nnwuunə̀ pobə ze amwuə kalɨgə̀. 32Alyiʼə àŋwàʼnə̀ Nẅùə̀ nɨ à lə̀ mənə nfuŋə̀ la a lə̀ pə nshwəŋə̀ lo,

“À lə̀ pə tsaʼa mbyə̂ ndzìrə̀ nɨ pɨ lòonə ngə̀ nzhwuutə̀,

kə̀ tsaʼa mômbyə̂ ndzìrə̀ nɨ pɨ pənə nkoomə̀ mɨ̀nyùŋə̀ ɨ̀me ka à ŋaʼà e ntswùə̀ e mbû.

Ka a lə̀ shwəŋə̀ e ànwùə̀ àtse.

33Pɨ lə̀ lòo e aŋunə àzwuumə̀ àfǐ,

ka kɨ pyiimə̀ e a nɨ naŋə̀ ɨ̀sàʼa e ɨ̀shìʼnə̀.

Ka ŋònə̀ nɨ mbə̀ʼə a lə̀ shwəŋnə̀ mbə̀ʼə ngẅàrə̀ e, ntiinə nɨ̀chyə̂mbyə̂ e àtwuə̀ ɨ̀shyə̂ ghə̀ à lẅùutə̀ mə.”

34Ntsɨ̀ntoʼò wa pyiitə̀ ambo Filibə̀ lo, “Tiitə̀ mə̀ nɨ ŋònə̀ nɨ ngàŋə̀ ntwuumə̀ Nẅùə̀ à wə̀ nshwəŋnə̀ mbə̀ʼə e. À wə̀ nshwəŋnə̀ lə mbə̀ʼə àtwuə̀ ɨ̀pɨ̀ŋmə̀ e kə̀ mbə̀ʼə ŋònə̀ ɨ̀tse ghù nyàanə?” 35Lenəla Filibə̀ à lə̀ pìʼnə̀ a nɨ shwəŋnə̀, mbìʼnə̀ aŋunə alyiʼə àŋwàʼnə̀ zə̀ a nɨ shwəŋə̀ ntwuumə̀ ghù ɨ̀shìʼnə̀ mbə̀ʼə Yěsû. 36Tsaʼnə pobə lə̀ pənə ngyìinə̀ nshwuʼə̀ àlàŋə gha la, pobə lə̀ ghə̀ mbyàa a ntwuumə̀ nchyə. Ntsɨ̀ntoʼò wa a shwəŋə̀ ambo Filibə̀ lo, “Nchyə ɨ wə̀. Ǎ ghɨ̀rə̀ àkə lo kò wə̀ ŋâ o a gha nɨ àkẅiirə̀ nchyə?”

37[Filibə̀ a kẅùə̀ ambo ze lo, “Mbə̀ʼə ŋ̀ŋâ o nɨ àkẅiirə̀ nchyə mbə̀ʼə wə̀ nùŋə̀ ntɨŋmə̀ o aŋunə Kristù.”

A kẅùə̀ lo, “M̀byiimə̀ lo Yěsû Kristù a Moonə̀ Nẅùə̀.”]

38Ntsɨ̀ntoʼò wa a shwəŋə̀ a lenə la ngɨ̀rə̀ kalɨgə̀ wa a təəmə̀. Pobə Filibə̀ shwuʼə̀ nkwuunə̀ amwuə nchyə, Filibə̀ a tyiʼə̀ ŋŋâ e nɨ àkẅiirə̀ nchyə. 39Nkwùə̀ nɨ pobə lə̀ furə̀nə amwuə nchyə ghu, Àzhwùə̀ Nẅùə̀ lə̀ lòo a Filibə̀ ndèrə̀ nɨ ẅèrə, ka ntsɨ̀ntoʼò wa a chi ndzəənə̀ e a ye, lenəla, ntyiʼə̀ ngyìinə̀ ngaʼà ndèrə̀ e. 40Filibə̀ à lə̀ tyiʼə̀ ngwùutə̀ ndzəənə̀ ɨ̀pɨ̀ŋmə̀ e a Àzotùsə̀, ntyiʼə̀ ngyìinə̀ nchwìitə̀ ntwuumə̀ ghù ɨ̀shìʼnə̀ amwuə ɨ̀laʼà ɨ̀tsùmə̀ tə ngə̀ mbyàa a Kàsaryà.

Currently Selected:

Ɨ̀fàʼà 8: pny

Highlight

Copy