Ɨ̀fàʼà 5
5
Ananias pobə ngẅùə e Sàfirà nyìi a chwìrə̀
1La ŋònə̀ ɨ̀tse nɨ nɨ̀linə̀ ɨ̀tse lə̀ pənə Ananias pobə ngẅùə e Sàfirà lə̀ shwùunə̀ àpàbə ɨ̀shyə̂ àzobə. 2Tsaʼnə pobə lə̀ shwùunə̀nə la, Ananias a ləənə̀ nkabə̀ ghu yɨ̀tse ndòʼnə̀ ngẅùə e a kɨ nzhyə̂, a tyiʼə̀ ndòo pə àpwùʼə̀ ngə̀ ŋŋâ ambo ngàŋə ntwuumə̀ Yěsû. 3La Pità a pyiitə̀ a Ananias lo, “À ghɨ̀rə̀ àkə Satàanə̀ a kwuunə̀ a ntɨŋmə̀ ghò wə̀ nyìi a chwìrə̀ ambo Àzhwùə̀ Nẅùə̀, ndə̀əmə̀ àpàa nkabə̀ nɨ wə̀ shwùunə̀nə alyiʼə ɨ̀shyə̂ za ghu? 4Wə̀ lə̀ kɨ shwùunə̀ alyiʼə ɨ̀shyə̂ zə̀ la a pə àzô, la nkwùə̀ nɨ wə̀ lə̀ shwùunə̀nə la nkabə̀ ɨ̀ kɨ mbə tyìʼə̀ ɨ̀zò. A ghò lə à kùmə̀ ntyiʼə̀ ngɨ̀rə̀ àkə wə̀ lòo a zə mbuurə̀ àkwàŋə̀ a ntɨŋmə̀ ghò? Ka wə̀ fɨ̀ghə̀ o la ŋwùə̀, wə̀ fɨ̀ghə̀ la Nẅùə̀.” 5Nkwùə̀ nɨ Ananias à lə̀ zuʼnə àshwəŋnə̀ zə̀ à lə̀ kunə̀ a ɨ̀shyə̂ nkwɨghə̀. Ŋwùə̀ ntsùmə̀ nɨ à lə̀ zuʼnə ànwùə̀ zə̀ à lə̀ pə nɨ àkẅàrə̀ ka mɨ̀zùŋə. 6Ɨ̀pôngwàswùumə̀ lə̀ tô ndyibə̀ àkwuə̀ e mbìʼì e nfurə̀ ngə̀ ntẅəŋə̀. 7Pɨ̀nẅùumə̀ kɨ làŋə̀ tsaʼa pɨtarə ngẅùə e a tô ka zhyə̀ e ànwùə̀ nɨ a lòonə alyiʼə. 8Pità a pyiitə̀ ambo ze lo, “Lanə ntiitə̀ mə̀ lo lə̌ ndùnə̀ nkabə̀ nɨ nɨ̀ lə̀ shwùunə̀nə alyiʼə ɨ̀shyə̂ za ghu?” A kẅùə̀ lo la ndùnə̀ nkabə̀ ghu. 9Pità a pyiitə̀ lo, “A ghɨ̀rə̀ àkə pɨghə ndwuumə̀ o pwuutə̀ mbyiimə̀ a nɨ kwàʼnə̀ a Àzhwùə̀ Ndòʼnə̀mbyə̂? Naŋə̀, mɨ̀kwùə̀ mɨ pànə̀ nɨ pobə tẅəŋə̀nə a ndwuumə̀ o mə a ntswùə̀ ndâ. Pobə̌ kɨ pìʼì o lòo furə̀.” 10Lenəla mə̀ngyə̌ ghu a zùŋə̀ nkunə̀ a ɨ̀shyə̂ tyìʼə̀ nkwùə̀ ghu a mbyə̀ ze nkwɨghə̀. Nkwùə̀ nɨ ɨ̀pôngwàswùumə̀ pa lə̀ kwuunə̀nə a ndâ, pobə lə̀ zəənə̀ lo à kwɨghə̀ mə, mbìʼì e ngə̀ ntẅəŋə̀ a nɨ̀pwùnə ndwuumə̀ e. 11Àkẅàrə̀ yè noʼnə a lə̀ kwuunə̀ amwuə ɨ̀poonə̀ pɨ Kristù pɨ̀tsùmə̀ farə pànə̀ pɨ̀noʼnə nɨ lə̀ zuʼnə ànwùə̀ zèrə zə.
Ngàŋə ntwuumə̀ Yěsû parə̀ pànə̀ pɨ̀noʼnə
12Ngàŋə ntwuumə̀ Yěsû Kristù lə̀ pə ngɨ̀rə̀ ɨ̀lènə̀ ɨ̀nwùə̀ pɨ̀yerə̀nə yerə̀nə pɨ̀noʼnə pobə mɨ̀nwùə̀ mɨ kə̀ʼnə̀nə a mbyə̀ pə̀ənə̀. Pànə̀ pɨ̀tsùmə̀ nɨ pobə lə̀ nùŋə̀nə ntɨŋmə̀ ɨ̀ghobə aŋunə Yěsû lə̀ shwatə̀ amwuə àpùŋə Solomònə̀. 13Ka taʼà ŋònə̀ ɨ̀tse nɨ ka à lə̀ pə e ŋwùə̀ àkwùə̀ aghobə a lə̀ pə e nɨ ntɨŋmə̀ a nɨ ghə̀ mbwuutə̀ a ghobə, mbaa pə tsaʼnə pànə̀ lə̀ pə nguʼtə̀ a ghobə tsaʼa pànə̀ pɨ̀ẅùunə. 14La pànə̀ pɨ̀noʼnə pɨ̀noʼnə, mbyàŋnə̀ pobə pə̀ngyə̌ lə̀ nùŋə̀ mɨ̀ntɨŋmə̀ ɨ̀mobə aŋunə Ndòʼnə̀mbyə̂ Yěsû nkẅìʼnə̀ ndùnə̀ ɨ̀ghobə ndèrə̀ nɨ mbyə̀. 15Mɨ̀nwùə̀ mèrə mə nɨ ngàŋə ntwuumə̀ Kristù lə̀ ghɨ̀rə̀nə la, mɨ lə̀ ghɨ̀rə̀ lo pànə̀ pìʼì pɨghoonə ɨ̀pobə nfurə̀ nnùŋə̀ àlàŋə ndwuumə̀ aŋunə mɨ̀kwùunə pobə pɨ̀matàa mbə̀ʼə Pità a mə ndàŋə̀ ləgrə e a làŋə̀ aŋunə pobə pɨ̀tse. 16Lenəla ɨ̀pùŋə̀ pànə̀ pɨ̀noʼnə lə̀ tyiʼə̀ nfurə̀ amwuə ɨ̀laʼà nɨ pənə a nɨ̀pwùnə Yèrusalèmə̀ lə̀ tyiʼə̀ ndòo pɨghoonə pobə pɨ pànə̀ nɨ pɨ pə nɨ ɨ̀zhwùə̀ tɨ̀pòŋə̀ ndòo ntô lo pɨ parə̀. Ngàŋə ntwuumə̀ Yěsû lə̀ parə̀ a ghobə pɨ̀tsùmə̀.
Pɨ nyàŋə̀ ngàŋə ntwuumə̀ Yěsû
17Àtwuə̀ Pɨ̀fò màʼà Nẅùə̀ pobə pə̀ənə̀ ɨ̀pe nɨ pɨ lə̀ mənə nfuŋə̀ a ghobə nɨ pɨ̀Sadducee lə̀ tyiʼə̀ mbə nɨ àghə̀ʼnə̀ aŋunə ngàŋə ntwuumə̀ Yěsû. 18Nfurə̀ aŋunə la nkootə̀ ngàŋə ntwuumə̀ Kristù ntsàa amwuə ndâ ɨ̀tsaŋə̀ àlàʼà. 19La angèrə̀ Ndòʼnə̀mbyə̂ à lə̀ tô nɨ ɨ̀twuʼə̀ ngẅùʼə ndâ ɨ̀tsaŋə̀ nfuukə̀ a ghobə nshwəŋə̀ ambo pobə lo, 20“Nɨ̀ lèrə̀ a Ndâ Mɨ̀shwàʼà Nẅùə̀ ntyiʼə̀ nchwìitə̀ ànwùə̀ àtsùmə̀ mbə̀ʼə nɨ̀chyə̂mbyə̂ tɨ̀tsòŋə̀.”
21Tsaʼnə pobə lə̀ zuʼnə ànwùə̀ zə̀, pobə lə̀ lèrə̀ a Ndâ Mɨ̀shwàʼà Nẅùə̀ a ngẅùʼə ngẅùʼə mbìʼnə̀ a nɨ nèrə̀ ànwùə̀ Nẅùə̀ ambo pə̀ənə̀.
Àtwuə̀ pɨ̀fò màʼà Nẅùə̀ pobə pə̀ənə̀ ɨ̀pe lə̀ tô nfuŋə̀ àshwatə̀ Kansèrə̀ pobə pɨ̀lɨ̀ŋmə̂ pɨ àlaʼà Israel, ntwuumə̀ pànə̀ lo pɨ ghə̀ ndâ ɨ̀tsaŋə̀ ndòo ngàŋə ntwuumə̀ Yěsû za ndòo ntô amwuə Kansèrə̀. 22Ngàŋə àfàʼà àtwuə̀ pɨ̀fò màʼà Nẅùə̀ lə̀ ghə̀ ka zəənə̀ a ghobə ngàŋə ntwuumə̀ Yěsû za a ndâ ɨ̀tsaŋə̀ nkẅirə̀ ntô nshwəŋə̀ ambo pobə lo, 23“Pəə ghə̀ a ntswùə̀ ɨ̀tsaŋə̀ gha pɨ fɨ̀ŋnə̀ a ẅèrə tyìʼə̀ ɨ̀shìʼnə̀, pɨ mbyabə̀ ɨlyiʼə təəmə̀ a ntswùə̀ ndâ, la pəə kòo ndâ ka zəənə̀ a wəə a ŋwùə̀ amwuə.” 24Àtwuə̀ pɨ mbyabə̀ ɨlyiʼə pobə pɨ̀fò màʼà Nẅùə̀ lə̀ zuʼù ànwùə̀ ghu, a kə̀ʼnə̀ a ghobə tsaʼnə zèrə a tônə mbə. 25Ŋònə̀ ɨ̀tse à lə̀ tô nshwəŋə̀ ambo pobə lo pànə̀ nɨ pobə chyânə a ndâ ɨ̀tsaŋə̀ la pyə̀ a ndâ Nẅùə̀ nnèrə̀ mɨ̀nwùə̀ ambo pə̀ənə̀. 26Àtwuə̀ pɨ̀mbyabə̀ Ndâ Mɨ̀shwàʼà Nẅùə̀ a lə̀ lèrə̀ pobə ngàŋə àfàʼà za ngə̀ ndòo ngàŋə ntwuumə̀ Yěsû za ntô nɨ zèrə; la ka lòo e a ghobə pə nɨ ɨ̀tɨ̀ŋnə̀ ntiinə pobə lə̀ pənə mbô lo pànə̌ ntumpə̀ a ghobə nɨ mɨ̀ghòorə.
27Tsaʼnə pɨ lə̀ loonə̀ a ghobə ndòo ntô la, pɨ lə̀ tə̂ a ghobə a mbyə̂ Kansèrə̀. Àtwuə̀ pɨ̀fò màʼà Nẅùə̀ a pyiitə̀ ambo pobə lo, 28“Yi pəə lə̀ kẅirə̀ ndàʼnə̀ ambo pɨghə lo kò nɨ̀ chi nnèrə̀ ànwùə̀ aŋunə nɨ̀linə̀ tsə̀? La nɨ̀ kùmə̀ nnèrə̀ ànwùə̀ mbə̀ʼə nɨ̀linə̀ tsə̀ a sìimə̀ amwuə àlaʼà Yèrusalèmə̀ àtsùmə̀. Nɨ̀ wə̀ ntàʼà ghɨ̀rə̀ lo àləəmə̀ ŋònə̀ wə̀ â pə àtwuə̀ pəə.”
29La Pità pobə ngàŋə ntwuumə̀ Yěsû kẅùə̀ lo, “A pòŋə̀ a nɨ zuʼnə̀ a Nẅùə̀ ntsàarə̀ a nɨ zuʼnə̀ pə̀ənə̀. 30Nẅùə̀ pɨ̀tǎ ɨ̀pə̀ənə̀ à lə̀ zhwuumə̀ a Yěsû aŋunə nɨ̀wɨghə̀, ŋònə̀ nɨ nɨ̀ lə̀ kẅùumə̀nə aŋunə àtɨ̀ghə pànkə̀nə nzhwùutə̀. 31Nẅùə̀ à lə̀ ŋaŋə̀ e ntə̂ a pàa àpô ze yè zɨghə̀nə lo â tyiʼə̀ mbə ŋònə̀ nɨ ǎ naŋə̀ a wəə fuukə̀ a wəə amwuə ngəʼə̀, kɨ ngɨ̀rə̀ lo pànə̀ pɨ Israel pə̀ŋə̀ mɨ̀ntɨŋmə̀ ɨ̀mobə waʼà mɨ̀nwùə̀ mɨ tɨ̀pòŋə̀ ɨ̀mobə mbə̀ʼə Nẅùə̀ â lə̀ənə̀ a ghobə. 32Pəə̌ pɨ ndzəənə̀ zəənə̀nə pɨ Àzhwùə̀ Nẅùə̀ aŋunə ɨ̀nwùə̀ pə̀ nɨ lə̀ loonə̀ alyiʼə ambo pànə̀ pyə̀ nɨ lə̀ mənə ndzuʼnə e.” 33Pobə lə̀ zuʼù a lenə la mɨ̀ntɨŋmə̀ ɨ̀mobə zaŋə̀ pobə tàʼà a nɨ zhwuutə̀ ngàŋə ntwuumə̀ Yěsû za. 34La ŋwùə̀ Farìsî ɨ̀tse nɨ pɨ lə̀ mənə nfuŋə̀ nɨ Gamaliel, mbə ɨ̀nèrə̀ mbòomə nɨ pànə̀ pɨ̀tsùmə̀ lə̀ mənə nguʼtə̀ e a lòo a ɨ̀shyə̂ amwuə ndâ nɨ̀ pɨ lə̀ mənə nsaʼà mɨ̀sàʼa amwuə, nshwəŋə̀ pɨ fuukə̀ pànə̀ pɨ̀ghu a àpyìinə aŋunə mətùmə nkwùə̀, 35a tyiʼə̀ mbòŋə̀ nshwəŋə̀ ambo pobə lo, “Pɨghə pànə̀ pɨ Israel nɨ̀ zhìʼtə̀ aŋunə ànwùə̀ nɨ nɨ̀ tàʼnə ghɨ̀rə̀ aŋunə pànə̀ pə. 36A lə̀ pə nkwùə̀ ɨ̀tse ŋònə̀ ɨ̀tse nɨ pɨ lə̀ mənə nfuŋə̀ e nɨ Theudas à lə̀ kɨ ntô àze mmə nshwəŋə̀ tsaʼnə à pənə ŋònə̀ ngẅùunə; pànə̀ nkɨrə nɨ̀kwàa lə̀ zùŋə̀ e. La pɨ lə̀ zhwuutə̀ e, pə̀ənə̀ ɨ̀pe pa sìimə̀. Lenəla ànwùə̀ àtsùmə̀ nɨ a lə̀ pənə ngɨ̀rə̀ a lə̀ myə̀. 37Tsaʼnə zə̀ a lə̀ làŋə̀nə, Yudà ŋwùə̀ Galìlyə̂ a kɨ ngɨ̀rə̀ àze pànə̀ kɨ ndzùŋə̀ e amwuə nkwùə̀ nɨ pɨ lə̀ pənə ŋŋwàʼnə̀ mɨ̀linə̀ mɨ pə̀ənə̀ amwuə àŋwàʼnə̀ lo shaŋə̀ a ghobə. Pɨ lə̀ kɨ nzhwuutə̀ e, pànə̀ nɨ pɨ lə̀ pənə ndzùŋə̀ e kɨ nsìimə̀. 38Nɨ ndwuumə̀ wanə, ngwə̀ nshwəŋə̀ a wɨghə lo nɨ̀ tsoʼò àpô àzɨghə amwuə ànwùə̀ pànə̀ pə̀. A tɨ mbəla mbə lo ànwùə̀ nɨ pobə pə̀ ngɨ̀rə̀ lə a furə̀ ambo ŋwùə̀ mɨsoŋə yi a pɨ làŋə̀ àfǐfǐ. 39La a mbə lo a furə̀ ambo Nẅùə̀, yi mbə̀ʼə nɨ̀ ghɨ̀rə̀ a wɨghə ànwùə̀ aŋunə apə̀ ndàŋə̀ lo nɨ̀ tyiʼə̀ ndzòŋnə̀ pə Nẅùə̀.”
Pobə lə̀ pyiimə̀ ànwùə̀ nɨ Gamaliel à lə̀ shwəŋə̀nə. 40Kansèrə̀ à lə̀ kẅirə̀ nfuŋə̀ ngàŋə ntwuumə̀ Kristù pobə kwuunə̀ a ndâ pɨ kəʼə̀ a ghobə, nkwàtə̀ a ghobə lo kò pobə chi nshwəŋə̀ ànwùə̀ àtse aŋunə nɨ̀linə̀ nɨ Yěsû; mmyàʼtə̀ a ghobə pobə lèrə̀.
41Ngàŋə ntwuumə̀ Yěsû lə̀ furə̀ amwuə Kansèrə̀ nɨ nɨ̀ghaʼà ntiinə Nẅùə̀ à lə̀ zəənə̀ lo pobə kùʼnə̀ a nɨ zəənə̀ ngəʼə̀ aŋunə nɨ̀linə̀ ɨ̀tse. 42Pobə lə̀ tyiʼə̀ mmə nnèrə̀ ànwùə̀ Nẅùə̀ amwuə Ndâ Mɨ̀shwàʼà Nẅùə̀ farə amwuə mɨ̀ndâ mɨ pə̀ənə̀ nkwùə̀ ɨ̀tsùmə̀.
Currently Selected:
Ɨ̀fàʼà 5: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
