Ɨ̀fàʼà 6

Ndwuumə̀ nɨ pɨ lə̀ tsoʼnə ngàŋə àyèmpə̀ sàmbaa

1A lə̀ pə amwuə àtùmə nkwùə̀ za nɨ ɨ̀zùŋə̀ ndzùmə̀ Yěsû lə̀ pənə nkẅuə̀ ndèrə̀ nɨ mbyə̀, pɨ̀Jew nɨ pɨ lə̀ mənə nshwəŋnə̀ àshwəŋnə̀ Greek lə̀ tyiʼə̀ mmə ndẅùmpə̀ ngotə pɨ̀Jew pɨ àlaʼà, ntiinə pobə lə̀ mənə ngàbə̀ mɨ̀zɨghə̀ ntô nzhaʼnə̀ pɨ̀kwùə ɨ̀pobə. 2Lenəla, ngàŋə ntwuumə̀ Yěsû za ntsòbə̀ ɨpaa shwatə̀ ɨ̀zùŋə̀ ndzùmə̀ Yěsû ɨ̀tsùmə̀ ɨ̀shwəŋnə̀ ambo pobə lo, “Ka a pòŋə̀ e lo pə̀ənə̀ myàʼtə̀ a nɨ chwìitə̀ ntwuumə̀ Nẅùə̀ ntyiʼə̀ ngàbə̀ pə mɨ̀zɨghə̀. 3Njiilo nɨ pɨlyimə pəə, nɨ̀ ghə̀ amwuə pɨghə ntsoʼò mbyàŋnə̀ sàmbaa pyə̀ nɨ pobə pənə nɨ àghuʼtə̀, ndẅenə̀ nɨ Àzhwùə̀ nkɨ mbə nɨ àzhìʼtə̀, pəə tyiʼə̀ ngɨ̀rə̀ pobə pìʼnə̀ a nɨ fàʼà àfàʼà ghu. 4Pəə tyiʼə̀ ŋŋâ nkwùə̀ ɨzəə ntsùmə̀ a nɨ chàʼtə̀ a Nẅùə̀ nsìimə̀ ntwuumə̀ e.” 5Ànwùə̀ nɨ pobə lə̀ shwəŋə̀nə la a lə̀ pòŋə̀ a ŋwùə̀ ntsùmə̀. Lenəla pobə tsoʼò a Stifə̀nə̀ nɨ à pənə ŋònə̀ nɨ à nùŋə̀nə ntɨŋmə̀ e aŋunə Kristù tɨsɨŋnə nkɨ ndẅenə̀ nɨ Àzhwùə̀ Nẅùə̀; pobə tsoʼò a Filibə̀ pobə Prokorùsə̀, nɨ Nikolòsə̀ ŋwùə̀ Antyòkə̀ nɨ à lə̀ pə̀ŋə̀nə ntyiʼə̀ ŋwùə̀ Yěsû. 6Pobə lòo a ghobə ntô a mbyə̀ ngàŋə ntwuumə̀ Yěsû pobə nùŋə̀ mbô ɨ̀mobə àtwuə̀ pobə nchàʼtə̀ a Nẅùə̀.

7Lenəla àshwəŋnə̀ Nẅùə̀ a pìʼnə̀ a nɨ sìimə̀ ndèrə̀ nɨ mbyə̀. Ɨ̀zùŋə̀ ndzùmə̀ Yěsû lə̀ tyiʼə̀ nnoʼò amwuə Yèrusalèmə̀, ngàŋə màʼà Nẅùə̀ yɨ̀noʼnə pyiimə̀ a Yěsû.

Tsaʼnə pɨ lə̀ kônə Stifə̀nə̀

8Stifə̀nə̀ a lə̀ pə ŋònə̀ wa nɨ Nẅùə̀ a lə̀ chyânə mborə̀ aŋunə ze nkɨ ŋŋâ e nɨ ɨ̀tɨ̀ŋnə̀. À lə̀ ghɨ̀rə̀ mɨ̀nwùə̀ mɨ kə̀ʼnə̀nə ghobə ɨ̀lènə̀ ɨ̀nwùə̀ pɨ̀yerə̀nə yerə̀nə amwuə pə̀ənə̀. 9Pànə̀ pɨ̀tse nɨ pobə lə̀ furə̀nə amwuə ndâ àshwatə̀ pɨ̀Jew ɨ̀tse nɨ pɨ lə̀ mənə nfuŋə̀ nɨ “Ndâ àshwatə̀ pànə̀ nɨ ka pobə pirə̀ a ghobə ɨ̀pùʼù,” nɨ pɨ̀Jew nɨ pɨ lə̀ furə̀nə a Sìrenə̀ pobə Àlèzandryà lə̀ mənə ntô nshwatə̀ ghu pobə pɨ̀tse pànə̀ nɨ pɨ lə̀ kɨnə mmə nfurə̀ a Sìlisyà pobə Asia. Pobə lə̀ tyiʼə̀ mbìʼnə̀ àshwəŋnə̀ àtse a nɨ pyiitə̀ a Stifə̀nə̀. 10La Àzhwùə̀ Nẅùə̀ a ŋâ Stifə̀nə̀ nɨ mbuurə̀ àzhìʼtə̀ àtse nɨ mbə̀ʼə a shwəŋə̀ ànwùə̀ àtse, ŋònə̀ ɨ̀tse a təəmə̀ e a nɨ kẅùə̀ e apə̀. 11Lenəla, pànə̀ pə lə̀ pə̀ŋə̀ ɨ̀twuə̀ pànə̀ pɨ̀tse a ndzùmə̀ ndzùmə̀ lo pobə nyìi a chwìrə̀ lo pobə lə̀ zuʼù mə tsaʼnə Stifə̀nə̀ à lə̀ zòomə̀nə a Mǔsî pobə Nẅùə̀. 12Pobə shwəŋə̀ a lenə la mbə̀ʼkə̀ mɨ̀ntɨŋmə̀ pànə̀ pobə pɨ̀lɨ̀ŋmə̂ nɨ pɨ̀nèrə̀ mbòomə pobə kô a Stifə̀nə̀ ndòo ndèrə̀ a mbyə̀ Kansèrə̀. 13Lenəla ndòo pànə̀ pɨ̀tse lo pobə̂ tô ntəəmə̀ tsaʼa pɨ̀ndzəənə̀ zəənə̀nə pɨ pɨ̀chwìrə̀ nshwəŋə̀ lo “Ka ŋònə̀ wə̀ a waʼà e tɨ shwəŋnə̀ a tɨ̀pòŋə̀ mbə̀ʼə Ndâ Mɨ̀shwàʼà Nẅùə̀ pobə mbòomə Mǔsî aŋunə taʼà njyə̂ 14Pəə lə̀ zuʼù tsaʼnə à lə shwəŋə̀nə lo Yěsû Kristù ŋwùə̀ Nazarètə̀ ǎ tsə̀ŋə̀ Ndâ Mɨ̀shwàʼà Nẅùə̀ kɨ kẅebə̀ pɨ̀mbòomə nɨ Mǔsî à lə̀ ŋâ mə.”

15Ŋwùə̀ wa ntsùmə̀ nɨ à lə̀ pənə amwuə Kansèrə̀ à lə̀ naŋə̀ ɨ̀sɨghə̀ Stifə̀nə̀ ndzəənə̀ a ẅèrə ɨ pə tsaʼa ɨ̀sɨghə̀ angèrə̀.

Currently Selected:

Ɨ̀fàʼà 6: pny

Highlight

Copy