Ɨ̀fàʼà 4
4
Pità pobə Jònə a mbyə̀ Kansèrə̀
1Tsaʼnə Pità pobə Jònə lə̀ pirə̀nə mmə nshwəŋnə̀ ambo pànə̀ pɨ̀ghu la, pɨ̀fò màʼà Nẅùə̀ nɨ àtwuə̀ pànə̀ nɨ pobə lə̀ mənə mbyabə̀ Ndâ Mɨ̀shwàʼà Nẅùə̀ pobə pɨ̀Sadducee lə̀ tô ntsirə̀ a ghobə. 2Mɨ̀ntɨŋmə̀ ɨ̀mobə lə̀ zaŋə̀ aŋunə Pità pobə Jònə ntiinə pobə lə̀ mə ngyìinə̀ ntiitə̀ pànə̀ lo Yěsû à lə̀ zhwuumə̀ a nɨ̀wɨghə̀ a nɨ nèrə̀ lo ŋwùə̀ ntsùmə̀ ghǎ zhwuumə̀ a nɨ̀wɨghə̀. 3Lenəla, pobə lə̀ kô a Pità pobə Jònə ngə̀ fɨ̀ŋnə̀ a ghobə a ndâ ɨ̀tsaŋə̀ tə mbyàa a ngẅùʼə ntiinə a lə̀ tyiʼnə nkwùə̀ nkwə̌. 4La pànə̀ pɨ̀noʼnə nɨ pobə lə̀ zuʼnə àshwəŋnə̀ àzobə lə̀ nùŋə̀ ntɨŋmə̀ ghobə aŋunə Yěsû. Pànə̀ nɨ pobə lə̀ nùŋə̀nə ntɨŋmə̀ ɨ̀ghobə aŋunə Yěsû nkwùə̀ ghu lə̀ pə tsaʼa pànə̀ nkaamə̀ ɨtaanə̀.
5Njyə̂ ɨ̀ lə̀ laanə̀, pɨ̀tǎ pɨ àlaʼà pobə pɨ̀nèrə̀ mbòomə shwatə̀ a Yèrusalèmə̀, 6pobə pɨ Anàsə̀ nɨ à lə̀ pənə àtwuə̀ pɨ̀fò màʼà Nẅùə̀, nɨ Kayafàsə̀, nɨ Jònə, nɨ Àlèzandà pobə pɨ pànə̀ pɨ̀tsùmə̀ nɨ pobə lə̀ furə̀nə amwuə ngẅàrə̀ àtwuə̀ pɨ̀fò màʼà Nẅùə̀. 7Nkwùə̀ nɨ pobə lə̀ shwatə̀nə la, pobə lə̀ lòo a Jònə pobə Pità ntə̂ a tɨ̀tɨ̀rə̀ pobə mbyiitə̀ ambo pobə lo, “Nɨ̀ lə̀ ghɨ̀rə̀ ànwùə̀ zə̀ lə nɨ ẅèrə ɨ̀tɨ̀ŋnə̀, kə̀ nɨ nɨ̀linə̀ nɨ ɨ̀wə̌?”
8Pità nɨ à lə̀ lẅenə̀nə nɨ Àzhwùə̀ Nẅùə̀ a kẅùə̀ ambo pobə lo, “Pɨ̀kùmə pɨ àlaʼà pobə pɨ̀lɨ̀ŋmə̂, 9nɨ̀ tɨ pəla mmə mbyiitə̀ a wəə sìnə̀ wə̀ mbə̀ʼə ànwùə̀ ɨ̀shìʼnə̀ nɨ pəə ghɨ̀rə̀nə aŋunə kòŋə̀ ɨ̀shyə̂, kə̀ nɨ ndwuumə̀ nɨ pəə làŋə̀nə mbarə̀ e, 10yi tyiʼə̀ n̂tiitə̀ a wɨghə pɨ̀tsùmə̀ farə ngẅàrə̀ Israel ntsùmə̀ lo, ŋònə̀ wə̀ a təəmə̀ a mbyə̀ pɨghə ntyiʼə̀ ghù mbarə̀nə la ntii nɨ̀linə̀ nɨ Yěsû Kristù ŋwùə̀ Nazarètə̀, ẅùə̀ wa nɨ nɨ̀ lə̀ kẅùumə̀nə aŋunə àtɨ̀ghə pànkə̀nə, Nẅùə̀ a tyiʼə̀ nzhwuumə̀ e aŋunə nɨ̀wɨghə̀ la. 11Yěsû la ŋònə̀ wa nɨ àŋwàʼnə̀ Nẅùə̀ shwəŋə̀nə lo,
‘Nɨ̀ghòorə tsa nɨ pɨghə pɨ̀mboomə̀ mɨ̀ndâ waʼnə la,
nɨ̌ pə̀ŋə̀ ntyiʼə̀ nɨ̀ghòorə nɨ nɨ̀lẅuə̀ nɨ ndâ tsɨ̀ ɨ̀shìʼnə̀.’ 12Ka ŋònə̀ ɨ̀tse a chi mbə e ghu nɨ mbə̀ʼə a chwarə̀ pə̀ənə̀, ndàŋə̀ e ẅùə̀ wa nɨ Nẅùə̀ à lə̀ ŋânə nɨ̀linə̀ ɨ̀tse ambo pə̀ənə̀ lo â chwarə̀ a wəənə̀.”
13Kansèrə̀ à lə̀ zəənə̀ lo ntɨŋmə̀ Pità pobə Jònə lə̀ tɨ̀ŋnə̀, nkɨ nchi nzhyə̂ lo pobə chyə̂ mbə la ɨ̀fǐfǐ pə̀ənə̀ ka lə̀ ghə̀ ghobə a àŋwàʼnə̀. Pobə lə̀ kɨ nchi nkẅuumə̀ lo pànə̀ pə̀ lə̀ mə ngyìinə̀ pobə pɨ Yěsû. 14Ka pobə lə̀ pə a ghobə nɨ ànwùə̀ àtse a nɨ shwəŋə̀ ntiinə pobə lə̀ zəənə̀nə a kòŋə̀ ɨ̀shyə̂ wa nɨ pɨ lə̀ parə̀nə la a pə mbyə̀ Pità pobə Jònə. 15Lenəla pobə shwəŋə̀ ambo Pità pobə Jònə lo pobə̂ furə̀ amwuə Kansèrə̀ ndèrə̀ a àpyìinə. Tsaʼnə pobə lə̀ furə̀nə a àpyìinə la, Kansèrə̀ a tyiʼə̀ nnwuunə̀ nshwəŋnə̀ pobə nɨ pobə lo, 16“Mbə̀ʼə pə̀ənə̀ ghɨ̀rə̀ lə ɨla aŋunə pànə̀ pə̀? Pànə̀ pɨ̀tsùmə̀ a Yèrusalèmə̀ zəənə̀ ɨ̀lènə̀ ɨ̀nwùə̀ pɨ̀yerə̀nə yerə̀nə nɨ pobə ghɨ̀rə̀nə. Mbə̀ʼə pə̀ənə̀ twuunə̀ wəənə̀ apə̀. 17A nɨ ghɨ̀rə̀ lo kò ànwùə̀ zə̀ a chi nsìimə̀ e amwuə pə̀ənə̀, pə̀ənə̀ kwàtə̀ a ghobə lo kò pobə chi nshwəŋə̀ ànwùə̀ àtse aŋunə nɨ̀linə̀ nɨ Yěsû.” 18Lenəla Kansèrə̀ a fuŋə̀ a Pità pobə Jònə pobə kẅirə̀ nkwuunə̀ a ndâ, pobə tyiʼə̀ nkwàtə̀ a ghobə lo, kò nɨ̀ chi shwəŋə̀ ànwùə̀ àtse kə̀ nnèrə̀ ànwùə̀ àtse mbə̀ʼə nɨ̀linə̀ nɨ Yěsû.
19La Pità pobə Jònə kẅùə̀ ambo pobə lo, “Nɨ̀ naŋə̀ tyìʼə̀ pɨghə lo a kùʼnə̀ a ɨ̀myə̂ pɨghə lo pɨ zuʼnə pə a wɨghə kə̀ a Nẅùə̀ lo? 20La ngə̀ aŋunə pəə, mbə̀ʼə pəə waʼà a wəə tɨ shwəŋə̀ mɨ̀nwùə̀ nɨ pəə lə̀ zəənə̀nə nkɨ ndzuʼù apə̀.”
21Kansèrə̀ à lə̀ chi ntsùŋə̀ nkwàtə̀ a ghobə, mmyàʼtə̀ pobə lèrə̀ ntiinə ka pobə lə̀ zəənə̀ a ghobə àlàŋə a nɨ chyâ ɨ̀sàʼa aŋunə pobə. Pobə lə̀ chi mmə mbô pə̀ənə̀ nɨ pɨ pənə alyiʼə ghu ntiinə pobə pɨ̀tsùmə̀ alyiʼə ghu lə̀ ghuʼtə̀ a Nẅùə̀ mbə̀ʼə ànwùə̀ nɨ a lə̀ furə̀nə. 22Nguʼu kòŋə̀ ɨ̀shyə̂ wə̀ nɨ pɨ lə̀ ghɨ̀rə̀nə ànwùə̀ yerə̀nə yerə̀nə zə aŋunə ze lə̀ làŋə̀ mɨ̀ghumə̀ nɨ̀kwàa.
Pànə̀ nɨ pobə nùŋə̀nə ntɨŋmə̀ ɨ̀ghobə aŋunə Yěsû chàʼtə̀ a Nẅùə̀ lo â ŋâ a ghobə nɨ ntɨŋmə̀ ghù tɨ̀ŋnə̀
23Tsaʼnə pɨ lə̀ myàʼtə̀nə a Pità pobə Jònə la, pobə lə̀ lèrə̀ ngə̀ nshwəŋə̀ pə̀ənə̀ ɨ̀pobə nɨ ànwùə̀ nɨ pɨ̀fò màʼà Nẅùə̀ pobə pɨ̀lɨ̀ŋmə̂ pɨ àlaʼà lə̀ shwəŋə̀nə ambo pobə. 24Nkwùə̀ nɨ pobə lə̀ zuʼnə ànwùə̀ nɨ Pità pobə Jònə lə̀ shwəŋə̀nə, pobə lə̀ chàʼtə̀ Nẅùə̀ nɨ ntswùə̀ moʼo nshwəŋə̀ lo, “Ndòʼnə̀mbyə̂ wə̀ lə̀ tsùŋə̀ nɨ̀pwuurə̀ pobə ɨ̀shyə̂, nɨ nchyə ghu nɨŋnə̀nə pobə ɨ̀pwuumə̀ ɨ̀tsùmə̀ nɨ pənə amwuə. 25Wə̀ lə̀ ghɨ̀rə̀ tǎ ɨwəə Dàfirə̀ ngàŋə̀ àfàʼà o a shwəŋnə̀ ndàŋə̀ a ndzùmə̀ Àzhwùə̀ Nẅùə̀ lo,
‘A ghɨ̀rə̀ àkə pànə̀ nɨ ka pobə pə ghobə pɨ̀Jew zaŋə̀ a loŋə,
pobə ghǎ zəənə̀ ngəʼə̀ aŋunə àkə?’
26‘Pɨ̀fò pɨ àtwuə̀ ɨ̀shyə̂ pə̀ nchwuʼtə̀ mbɨ̀ŋmə̀ pobə pɨ̀lɨ̀ŋmə̂ pɨ àlaʼà lo ghɨ̀rə̀ ànwùə̀ tɨ̀pòŋə̀ aŋunə Ndòʼnə̀mbyə̂ pobə Ghù Ndzoʼnə e.’
27“A tyìʼə̀ nkǔŋə nkuŋə lo Heròdə̀ pobə pɨ Pontyòsə̀ Palètə̀, nɨ pànə̀ nɨ ka pobə pə ghobə pɨ̀Jew nɨ pànə̀ pɨ Israel lə̀ shwatə̀ amwuə àlaʼà ghə, ndaamə̀ a mɨnaŋə àtwuə̀ Yěsû ngàŋə̀ àfàʼà o ghù ndaanə̀nə wa nɨ wə̀ lə̀ zoʼnə la. 28Pobə lə̀ pwuutə̀ lo ghɨ̀rə̀ ànwùə̀ nɨ wə̀ lə̀ kàʼnə lo pobə ghǎ ghɨ̀rə̀ ntiinə wə̀ pənə nɨ mɨ̀tɨ̀ŋnə̀ nkɨ ntàʼà lo â pə a lenə. 29Tɨ̀tsòŋə̀ wə̀ nɨ Ndòʼnə̀mbyə̂, wə̀ zəənə̀ ànwùə̀ nɨ pobə pə ntàʼà ghɨ̀rə̀ aŋunə pəə. Ghɨ̀rə̀ pəə pə nɨ ntɨŋmə̀ a nɨ chwìitə̀ ntwuumə̀ ambo pə̀ənə̀. 30Tyiʼə̀ ntsàa àpô o mbètə̀ pɨghoonə pobə̂ fiitə̀, ngɨ̀rə̀ ɨ̀lènə̀ ɨ̀nwùə̀ pɨ̀yerə̀nə yerə̀nə ɨ̂ furə̀nə aŋunə nɨ̀linə̀ nɨ ngàŋə̀ àfàʼà o Yěsû wa nɨ à pòŋə̀nə mmyàanə̀ la.”
31Nkwùə̀ nɨ pobə lə̀ myàanə̀nə a nɨ chàʼtə̀ a Nẅùə̀, alyiʼə nɨ pobə lə̀ nwuunə̀nə ghu a lə̀ nə̀ʼnə̀, Àzhwùə̀ Nẅùə̀ a kwuunə̀ amwuə mɨ̀ntɨŋmə̀ ɨ̀mobə pɨ̀tsùmə̀, pobə tyiʼə̀ mbə nɨ àkwùukə̀ ntɨŋmə̀ nkẅirə̀ nchwìitə̀ ntwuumə̀ Nẅùə̀.
Pànə̀ nɨ pobə lə̀ nùŋə̀nə ntɨŋmə̀ ɨ̀ghobə aŋunə Yěsû tyiʼə̀ mmə mbwuutə̀ ɨ̀pwuumə̀ ɨ̀pobə ngàbə̀
32Pànə̀ nɨ pobə lə̀ nùŋə̀nə ntɨŋmə̀ ɨ̀ghobə aŋunə Yěsû lə̀ pə tsaʼa taʼà ŋwùə̀ nɨ taʼà àkwàŋə̀, nɨ taʼà àshwəŋnə̀; àzwuumə̀ àzobə a pə moʼo. 33Ngàŋə ntwuumə̀ Yěsû zə lə̀ làŋə̀ nɨ mbyə̀ a nɨ chwìitə̀ ntwuumə̀ e a sàŋə̀ sàŋə̀ lo Ndòʼnə̀mbyə̂ Yěsû à lə̀ zhwuumə̀ a nɨ̀wɨghə̀. Lenəla Nẅùə̀ a chyâ mborə̀ aŋunə pobə. 34Ka ɨ̀mbuŋə̀ a lə̀ chi mbə e amwuə pobə ntiinə ŋònə̀ nɨ à lə̀ pənə nɨ alyiʼə ɨ̀shyə̂, à lə̀ shwùunə̀ ndòo nkabə̀ ndòo ntô; kə̀ àzwuumə̀ àtsùmə̀ nɨ ŋwùə̀ à lə̀ pənə nɨ zèrə à lə̀ lòo ntô pɨ shwùunə̀, 35ntyiʼə̀ ntô nnùŋə̀ nkabə̀ ghu a mbyə̀ ngàŋə ntwuumə̀ Kristù, pobə ghàpə̀ ambo pə̀ənə̀ amwuə ndwuumə̀ nɨ ŋwùə̀ à tàʼnə.
36Ŋònə̀ ɨ̀tse à lə̀ pə pobə pɨ pobə pɨ mə nfuŋə̀ e nɨ Jòsebə̀, la ngàŋə ntwuumə̀ Yěsû mə nfuŋə̀ àzobə nɨ Barnabas (nɨ ɨ̀sùmə pənə lo, “Ŋònə̀ nɨ à zhyə̂nə ghɨ̀rə̀ lo pànə̀ ẅìimə̀ ntɨŋmə̀”). À lə̀ pə ŋwùə̀ ngẅàrə̀ Levì nɨ à lə̀ mənə nchyə̂ a Cyprùsə̀. 37Ŋònə̀ ẅèrə wə̀ à lə̀ kɨ nshwùunə̀ àze alyiʼə ɨ̀shyə̂ ndòo nkabə̀ ntô nnùŋə̀ a mbyə̀ ngàŋə ntwuumə̀ Yěsû.
Currently Selected:
Ɨ̀fàʼà 4: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
