Ɨ̀fàʼà 3

Pità pobə Jònə parə̀ a kòŋə̀ ɨ̀shyə̂

1A lə̀ pə njyə̂ ɨ̀tse Pità pobə Jònə mə nkoʼò ndèrə̀ amwuə Ndâ Mɨ̀shwàʼà Nẅùə̀ nkwùə̀ nchàʼtə Nẅùə̀, aŋunə pɨ̀nẅùumə̀ pɨtarə a ndzə̀ŋə̀ nẅùumə̀. 2Ŋònə̀ ɨ̀tse à lə̀ pə ghu mbə e kòŋə̀ ɨ̀shyə̂ tsaʼnə pɨ lə̀ pyə̂nə e. À lə̀ pə a ntswùə̀ àpùʼù nɨ pɨ lə̀ mənə nfuŋə̀ nɨ ntswùə̀ àpùʼù yɨ̀ pòŋə̀nə. Pɨ lə̀ mə mbìʼì e njyə̂ ɨ̀tsùmə̀ ntô nnùŋə̀ alyiʼə ghu lo â tə ndoonə̀ ɨ̀pwuumə̀ ambo pànə̀ nɨ pɨ lə̀ mənə ndàŋə̀ nkwuunə̀ amwuə Ndâ Mɨ̀shwàʼà Nẅùə̀. 3Ŋònə̀ ghu à lə̀ zəənə̀ tsaʼnə Pità pobə Jònə mənə ndàŋə̀ nkwuunə̀ amwuə ndâ Nẅùə̀, ntyiʼə̀ ndoonə̀ ambo pobə lo pobə̂ ŋâ e nɨ àzwuumə̀ àtse. 4Pità pobə Jònə tə̂ ɨ̀myə̂ ɨ̀mobə aŋunə ze, Pità a tyiʼə̀ nshwəŋə̀ lo, “Pə̀ŋə̀ nnaŋə̀ a wəə.”

5Ŋònə̀ ghu a tə̂ ɨ̀myə̂ ɨ̀me aŋunə pobə, mmə nkwàŋə̀ lo pobə̌ ŋâ e nɨ àzwuumə̀ àtse. 6La Pità a kẅùə̀ lo, “Ka mbə mə̀ nɨ nkabə̀, la mbə ŋâ o nɨ àzwuumə̀ nɨ m̀bənə nɨ zèrə. Aŋunə nɨ̀linə̀ nɨ Yěsû Kristù ŋwùə̀ Nazarètə̀, ǹshwəŋə̀ lo wə̀ lòo ngyìinə̀!”

7A shwəŋə̀ a lenə la, ngẅìimə̀ àpô e yè zɨghə̀nə mbə̀ʼkə̀ e a lòo ɨ̀shyə̂. Mɨ̀kwùə̀ ɨ̀me pobə mɨfaŋə mɨ̀kwùə̀ ɨ̀me zùŋə̀ ntɨ̀ŋnə̀ a taʼà nkwùə̀. 8À lə̀ zùŋə̀ nkànə̀ ntəəmə̀, ntyiʼə̀ ngyìinə̀ nkàntə̀ pobə pɨ pobə nguʼtə̀ a Nẅùə̀ nkwuunə̀ amwuə Ndâ Mɨ̀shwàʼà Nẅùə̀. 9Ŋwùə̀ ntsùmə̀ nɨ à lə̀ pənə amwuə Ndâ Mɨ̀shwàʼà Nẅùə̀ à lə̀ zəənə̀ e tsaʼnə à lə̀ mənə ngyìinə̀ nguʼtə̀ a Nẅùə̀. 10Pobə lə̀ zhyə̂ lo la ŋònə̀ wa nɨ à lə̀ mənə nnwuunə̀ a ntswùə̀ nkaʼà wa nɨ pɨ lə̀ mənə nfuŋə̀ nɨ ntswùə̀ àpùʼù yɨ̀ pòŋə̀nə ndoonə̀ ɨ̀pwuumə̀ la. A lə̀ kə̀ʼnə̀ a ghobə, pobə tyiʼə̀ ngyerə̀ nkwàŋə̀ àzwuumə̀ nɨ a ghɨ̀rə̀nə a yìinə̀.

Àshwəŋnə̀ Pità a Ndâ Mɨ̀shwàʼà Nẅùə̀

11Ŋònə̀ wa nɨ pɨ lə̀ parə̀nə e la à lə̀ kɨ mbə e pə a nɨ̀pwùnə Pità pobə Jònə. Ntswùə̀ ŋwùə̀ ntsùmə̀ ɨ lə̀ kaʼà, lenəla, pobə tyiʼə̀ nfurə̀ nkɨ̀ɨrə̀ mmə ndèrə̀ a nɨ ghə̀ ntsirə̀ a ghobə amwuə àpùŋə àtse nɨ pɨ lə̀ mənə nfuŋə̀ nɨ àpùŋə Solomònə̀. 12Nkwùə̀ nɨ Pità à lə̀ zəənə̀nə a lenə la, à lə̀ tyiʼə̀ nshwəŋə̀ ambo pobə lo, “Pànə̀ pɨ Israel, ànwùə̀ zə̀ a kə̀ʼnə̀ a wɨghə lə ntii àkə? A ghɨ̀rə̀ àkə nɨ̀ tyiʼə̀ nnaŋə̀ a wəə pə tsaʼa lo à ghɨ̀rə̀ pəə ngɨ̀rə̀ nɨ ɨ̀tɨ̀ŋnə̀ wəə lo ŋònə̀ wə̀ â yìinə̀? 13Nẅùə̀ Abràhamə̀ nɨ Isàkə̀, nɨ Yàkobə̀ pobə Nẅùə̀ pɨ̀tǎ pɨ̀tǎ ɨ̀pə̀ənə̀, a ze nɨ à nèrə̀nə ɨ̀pɨ̀ŋmə̀ e amwuə moonə̀ e Yěsû. Yěsû la ŋònə̀ wa nɨ nɨ̀ lə̀ ŋânə lo pɨ̀ zhwuutə̀ e, nkɨ ntwuunə̀ e a mbyə̀ Palètə̀ tə mbyàa nkwùə̀ nɨ Palètə̀ à lə̀ tàʼnə lo myàʼtə̀ e lo â lèrə̀. 14Nɨ̀ lə̀ twuunə̀ a wɨghə a ŋònə̀ nɨ à laanə̀nə, mɨ̀nwùə̀ ɨ̀me kɨ ntəəmə̀, ntàʼà a wɨghə pə lo pɨ̀ fuukə̀ pə a ŋònə̀ nɨ à zhwuutə̀ mə a ŋwùə̀ ŋŋâ ambo pɨghə, 15nzhwuutə̀ a ŋònə̀ nɨ à wa ŋŋâ a nɨ̀chyə̂mbyə̂, la Nẅùə̀ zhwuumə̀ e aŋunə nɨ̀wɨghə̀, pəə zəənə̀ nɨ ɨ̀myə̂ ɨ̀məə.

16“Ŋònə̀ wə̀ nɨ nɨ̀ zəənə̀nə e nkɨ nzhyə̂ e lə à tɨ̀ŋnə̀ la ntii àpyiimə̀ ntɨŋmə̀ e aŋunə nɨ̀linə̀ nɨ Yěsû. Àpyiimə̀ ntɨŋmə̀ e aŋunə nɨ̀linə̀ nɨ Yěsû a parə̀ e a tɨ̀ŋnə̀ tsaʼnə nɨ̀ wə̀ ndzəənə̀ lə.

17“Tɨ̀tsòŋə̀ wə̀ nɨ pɨlyimə ɨ̀pâ, ǹzhyə̂ lo ànwùə̀ nɨ pɨghə pɨ ɨ̀twuə̀ àlaʼà lə̀ ghɨ̀rə̀nə aŋunə Yěsû, nɨ̀ lə̀ ghɨ̀rə̀ la nɨ ɨ̀pùʼu. 18La Nẅùə̀ à lə̀ tsàa ngàŋə ntwuumə̀ ɨ̀ze nkwùə̀ ntsàambyə̀ lo pobə̂ shwəŋə̀ lo Ghù Ndzoʼnə wa à ghǎ tô zəənə̀ ngəʼə̀. Ànwùə̀ ghu a koʼò mbwùumə̀ tsaʼnə à lə̀ shwəŋnə̀. 19Njiilo, nɨ̀ pə̀ŋə̀ mɨ̀ntɨŋmə̀ ɨ̀mɨghə nkẅirə̀ nkwə̂ ambo Nẅùə̀ mbə̀ʼə â sùu a tɨ̀pòŋə̀ ɨwɨghə â laanə̀. 20À ghǎ ghɨ̀rə̀ mɨ̀ntɨŋmə̀ ɨ̀mɨghə tɨ̀ŋnə̀ kɨ tsàa Ghù Ndzoʼnə wa nɨ à lə̀ tsoʼò mə ambo pɨghə la, nɨ̀ à pənə Yěsû. 21À chyə̂ a nɨ ghoŋə̀ a nɨ̀pwuurə̀ tə mbyàa nkwùə̀ nɨ Nẅùə̀ à ghǎ kẅirə̀ tsùŋə̀ ɨ̀pwuumə̀ ɨ̀tsùmə̀ àtwuə̀ ɨ̀shyə̂ pèrə pə pɨ̀shwuə̀ tsaʼnə à lə̀ pyə̀nə nkaʼà, ndàŋə̀ a ndzùmə̀ ngàŋə ntwuumə̀ ze yɨ̀ laanə̀nə. 22Mǔsî à lə̀ shwəŋə̀ lo, ‘Ndòʼnə̀mbyə̂ Nẅùə̀ à ghǎ ghɨ̀rə̀ ŋònə̀ ɨ̀tse amwuə pɨlyimə ɨ̀pɨghə a pə ngàŋə̀ ntwuumə̀ Nẅùə̀ tsaʼnə m̀bənə lə. Nɨ̀ ghǎ zhwiʼtə̀ ambo ze a nɨ zuʼù ànwùə̀ nɨ à wa nshwəŋə̀. 23Nẅùə̀ à ghǎ zhwuutə̀ a ŋwùə̀ wa ntsùmə̀ nɨ ka à pə ghǎ zuʼnə̀ e a ngàŋə̀ ntwuumə̀ wa fuukə̀ e a tɨ̀tɨ̀rə̀ pə̀ənə̀ pɨ Nẅùə̀.’ 24Ngàŋə̀ ntwuumə̀ Nẅùə̀ a nɨ pìʼnə̀ aŋunə Samuel tə mbyàa aŋunə pyə̀ nɨ lə̀ tônə a ndzùmə̀ ze lə̀ shwəŋə̀ mɨ̀nwùə̀ mbə̀ʼə mɨ̀njyə̂ mèrə mə a sàŋə̀ sàŋə̀. 25Pɨghə̌ ɨ̀poonə̀ pɨ ngàŋə ntwuumə̀ Nẅùə̀, nɨ̀ kɨ mbə la ɨ̀poonə̀ pɨ ɨ̀kàanə̀ wa nɨ Nẅùə̀ à lə̀ wàrə̀nə pobə pɨ̀tǎ pɨ̀tǎ ɨ̀pɨghə, tsaʼnə à lə̀ shwəŋə̀nə ambo Abràhamə̀ lo, ‘Ngǎ chyâ mborə̀ aŋunə ngẅàrə̀ mɨŋwùə̀ ntsùmə̀ àtwuə̀ ɨ̀shyə̂ ghə làŋə̀ aŋunə ngẅàrə̀ o.’ 26Nẅùə̀ à lə̀ tsoʼò a ngàŋə̀ àfàʼà e tsaʼnə à lə̀ shwəŋə̀nə, ndzàamə̀ ntsàa e ambo pɨghə, a chyâ mborə̀ aŋunə pɨghə, ngɨ̀rə̀ lo ŋwùə̀ ntsùmə̀ â pə̀ŋə̀ ntɨŋmə̀ e, mmyàʼtə̀ a tɨ̀pòŋə̀ e nɨ à lə̀ mənə ngɨ̀rə̀ la.”

Currently Selected:

Ɨ̀fàʼà 3: pny

Highlight

Copy