Ɨ̀fàʼà 2
2
Àzhwùə̀ Nẅùə̀ a tô njyə̂ Pentekòsə̀
1Nkwùə̀ nɨ njyə̂ Pentekòsə̀ ɨ̀ lə̀ tônə, ɨ̀zùŋə̀ ndzùmə̀ Yěsû ɨ̀tsùmə̀ lə̀ shwatə̀ a taʼà alyiʼə. 2Lenəla nkɨ wùutə̀ àzòrə̀ a furə̀ a nɨ̀pwuurə̀ ndzòrə̀ tsaʼa fèrə̀ ntɨ̀ŋnə̀ à wə̀ ndàŋə̀, nkwuunə̀ ndẅenə̀ ndâ ntsùmə̀ nɨ pobə lə̀ nwuunə̀nə amwuə. 3Pobə lə̀ tyiʼə̀ ndzəənə̀ ɨ̀pwuumə̀ tsaʼa ɨ̀ləəmə̀ ɨ̀mǔ pyə̀ nɨ lə̀ sìimə̀nə, lenəla, nnòntə̀ aŋunə ŋwùə̀ moʼo moʼo. 4Pobə pɨ̀tsùmə̀ lə̀ lẅenə̀ nɨ Àzhwùə̀ Nẅùə̀, lenəla, ndzùŋə̀ mbìʼnə̀ a nɨ shwəŋnə̀ amwuə ɨ̀shwəŋnə̀ pɨ̀nyaanə tsaʼnə Àzhwùə̀ a lə̀ ŋânə a ghobə nɨ ɨ̀shwəŋnə̀.
5Nkwùə̀ ghu, pɨ̀Jew nɨ pɨ lə̀ mənə mbô a Nẅùə̀ lə̀ furə̀ amwuə pɨ̀pàa pɨ mbyə̂ pɨ̀tsùmə̀ mmə nchyə̂ a Yèrusalèmə̀. 6Nkwùə̀ nɨ pobə lə̀ zuʼnə àzòrə̀ zə̀, àpùŋə̀ pə̀ənə̀ a lə̀ tô nshwatə̀, a tyiʼə̀ nkə̀ʼnə̀ a ghobə, ntiinə ŋwùə̀ moʼo moʼo à lə̀ tyiʼnə ndzuʼù pɨ shwəŋnə̀ amwuə àze àshwəŋnə̀ àlaʼà. 7Lenəla, a lə̀ kə̀ʼnə̀ a ghobə, pobə yerə̀, nshwəŋə̀ lo, “Pànə̀ nɨ pɨ pə nshwəŋnə̀ lə ka pobə furə̀ a ghobə la a Galìlyə̂? 8Lə tyiʼə̀ ngɨ̀rə̀ àkə pə̀ənə̀ tyiʼə̀ ndzuʼù pobə tyiʼə̀ mmə nshwəŋnə̀ pə ɨ̀shwəŋnə̀ ɨ̀laʼà ɨ̀pə̀ənə̀? 9Pə̀ənə̀ furə̀ la a Patyâ, nɨ Medyà, nɨ Elàmə̀; nkɨ nfurə̀ a Mesopotamyà, nɨ Judyà, nɨ Kàpàdosyà; nfurə̀ a Pontùsə̀ pobə Asia, 10nfurə̀ farə Frijyà pobə Pàmfilyà, nɨ àlaʼà Egypt farə amwuə pàa Libyà mbaatə̀ Sìrenə̀, pə̀ənə̀ pɨ̀tse furə̀ a Romə̀, 11mbə pɨ̀Jew pobə pànə̀ nɨ ka pobə pə ghobə pɨ̀Jew nɨ pɨ lə̀ tyiʼnə mbyiimə̀ ànwùə̀ Nẅùə̀ pɨ̀Jew, lenəla, pànə̀ pɨ̀tse furə̀ a Kretə̀ pobə Àrabyà ntiinə pə̀ənə̀ pɨ̀tsùmə̀ pə̀ ndzuʼù pobə shwəŋnə̀ amwuə ɨ̀shwəŋnə̀ ɨ̀laʼà ɨ̀pə̀ənə̀ mbə̀ʼə mɨ̀nwùə̀ mɨ̀ẅùunə nɨ Nẅùə̀ à ghɨ̀rə̀ mə!” 12Zèrə zə̀ a kə̀ʼnə̀ a ghobə, ntsànkə̀ ɨ̀zhìʼtə̀ ɨ̀pobə, pobə làŋə̀ a mbyə̀ a nɨ pyiitə̀ amwuə pobə lo, “Zèrə zə̀ a nèrə̀ lə lo àkə?”
13La pobə pɨ̀tse lə̀ mə ngẅìi ɨ̀zùŋə̀ ndzùmə̀ Yěsû nshwəŋə̀ lo, “Pànə̀ pə̀ nô mə mɨ̀lùʼù mɨ̀tɨ̀ŋnə̀.”
Pità a shwəŋnə̀ ambo àpùŋə̀ pə̀ənə̀
14La Pità à lə̀ lòo ntəəmə̀ àtɨ̀ghə pobə zhyə̀ ngàŋə ntwuumə̀ Kristù ntsòbə̀ moʼo, nshwəŋə̀ nɨ ngyə̀ ntɨ̀ŋnə̀ ambo pobə lo, “Pànə̀ pɨ Judyà pyə̀ nɨ pobə chyə̂nə amwuə Yèrusalèmə̀, nɨ̀ zhyə̂ a zə ɨ̀shìʼnə̀ ndzuʼù mɨ̀nwùə̀ nɨ mbɨ shwəŋə̀. 15Ka pànə̀ pə̀ paarə̀ a ghobə, tsaʼnə nɨ̀ kwàŋə̀nə. À wə̀ mbirə̀ lə pɨ̀nẅùumə̀ nɨ̀pwùʼə a ngẅùʼə! 16La, à lə̀ pə ànwùə̀ nɨ ngàŋə̀ ntwuumə̀ Nẅùə̀ Joel à lə̀ shwəŋə̀nə lo,
17‘Nẅùə̀ à shwəŋə̀ lo, lə̌ ànwùə̀ nɨ ngǎ ghɨ̀rə̀ amwuə mɨ̀njyə̂ mɨ ndzùmə̀:
Ngǎ kẅìrə̀ Àzhwùə̀ mə̀ aŋunə ŋwùə̀ ntsùmə̀.
Ɨ̀poonə̀ ɨ̀pɨghə pɨ mbyàŋnə̀ pobə pɨ pə̀ngyə̌ ghǎ chwìitə̀ ntwuumə̀ Nẅùə̀;
ngwàswùumə̀ ɨ̀zɨghə ghǎ zəənə̀ mɨ̀nwùə̀ nɨ Nẅùə̀ à wə̀ nnèrə̀,
pɨ̀lɨ̀ŋmə̂ ɨ̀pɨghə kɨ ndyə̂ mɨ̀ndzə̀əmə̀ aŋunə ànwùə̀ nɨ Nẅùə̀ à wə̀ nnèrə̀.
18Mbaa pə aŋunə ngàŋə̀ àfàʼà ɨ̀zâ yɨ̀ mbyàŋnə̀ pobə yɨ̀ pə̀ngyə̌,
ngǎ kẅìrə̀ Àzhwùə̀ mə̀ amwuə mɨ̀njyə̂ mɨ̀ghu, pobə̂ tyiʼə̀ nshwəŋə̀ mɨ̀nwùə̀ nɨ mɨ ghǎ tô.
19Ngǎ nèrə̀ mɨ̀nwùə̀ mɨ yerə̀nə yerə̀nə a nɨ̀pwuurə̀ àtɨ̀ghə
farə ɨ̀lènə̀ ɨ̀nwùə̀ àtwuə̀ ɨ̀shyə̂ a ɨ̀sùmə ɨ̀shyə̂,
àləəmə̀ ghobə ɨ̀mǔ nɨ ndyə̂ ɨ̀mǔ ghǎ pə ghu.
20Nẅùumə̀ à ghǎ pə̀ŋə̀ tyiʼə̀ ndzùmə,
lenəla məŋwɨgrə̀ a pə̀ŋə̀ mbàŋə̀ tsaʼa àləəmə̀
zaʼà maa njyə̂ nɨ̀ghaʼà ngẅùunə Ndòʼnə̀mbyə̂ â pòŋə̀ tô.
21Lenəla, ŋwùə̀ wa ntsùmə̀ nɨ à wa nfuŋə̀ nɨ̀linə̀ nɨ Ndòʼnə̀mbyə̂ la
à ghǎ chwarə̀.’
22“Pànə̀ pɨ Israel, nɨ̀ zhwiʼtə̀ mɨ̀nwùə̀ nɨ mbɨ shwəŋə̀: Yěsû ŋwùə̀ Nazarètə̀ à lə̀ pə ŋònə̀ nɨ Nẅùə̀ à lə̀ tsoʼnə ambo pɨghə, nɨ̀ zhyə̂ e ndàŋə̀ a ndzùmə̀ mɨ̀nwùə̀ mɨ kə̀ʼnə̀nə pobə ɨ̀lènə̀ ɨ̀nwùə̀ pɨ̀yerə̀nə yerə̀nə pyə̀ nɨ Nẅùə̀ à lə̀ làŋə̀nə a ndzùmə̀ ze ngɨ̀rə̀ nkwùə̀ nɨ à lə̀ pənə a tɨ̀tɨ̀rə̀ pɨghə tsaʼnə nɨ̀ zhyə̂nə la. 23Nẅùə̀ amwuə ɨye pàa à lə̀ pyə̀ nshankə̀ lo pɨ ghǎ ŋâ a Yěsû ambo pɨghə; nɨ̀ ŋâ e ambo ngàŋə ngɨ̀rə̀ ɨ̀nwùə̀ tɨ̀pòŋə̀, pobə kẅùumə̀ e aŋunə àtɨ̀ghə pànkə̀nə nzhwuutə̀. 24La Nẅùə̀ a zhwuumə̀ e aŋunə nɨ̀wɨghə̀, nfuukə̀ e amwuə mɨ̀tɨ̀ŋnə̀ mɨ nɨ̀wɨghə̀ ntiinə mbə̀ʼə ka nɨ̀wɨghə̀ a lə̀ pə e nɨ ɨ̀tɨ̀ŋnə̀ a nɨ ẅìimə̀ e nnùŋə̀ a ndâ ɨ̀tsaŋə̀. 25Mbə̀ʼnə Dàfirə̀ à lə̀ shwəŋnə̀ mbə̀ʼə e lo,
‘Ndə̀ mə ndzəənə̀ a Ndòʼnə̀mbyə̂ a mbyə̀ mɨ̀ŋə̀ nkwùə̀ ɨ̀tsùmə̀,
ntiinə à wə̀ mbaatə̀ mə̀, lenəla ka àzwuumə̀ àtse a pə nə̀ʼə̀ e a gha.
26Ǹzhyə̂ lo ntɨŋmə̀ mə̀ pobə àləəmə̀ mə̀ pə ndẅenə̀ nɨ nɨ̀ghaʼà;
lenəla mbɨ̀ŋmə̀ ɨ̂ tyiʼə̀ nchyə̂ amwuə àkwàŋə̀.
27Ntiinə ka wə̀ pə waʼà o a gha amwuə àlaʼà pɨ̀kwuə̀;
kɨ myàʼtə̀ o a ngàŋə̀ àfàʼà o ghù ɨ̀shìʼnə̀ â lə̂ amwuə nɨ̀shyə̀ apə̀.
28Wə̀ ghɨ̀rə̀ mə ǹzhyə̂ àlàŋə nɨ̀chyə̂mbyə̂,
lenəla, wə̀ ghǎ lẅenə̀ mə̀ nɨ nɨ̀ghaʼà alyiʼə nɨ wə̀ pənə.’
29“Pɨlyimə ɨ̀pâ, mbɨ shwəŋə̀ ambo pɨghə a sàŋə̀ mbə̀ʼə tǎ pɨ̀tǎ ɨ̀pə̀ənə̀ Dàfirə̀ lo, à lə̀ kwɨghə̀ pɨ tẅəŋə̀ e, lenəla, nɨ̀shyə̀ ɨ̀tse tsə̀ a nɨ̀ghə̂ pə̀ənə̀ pɨ pobə mbyàa sìnə̀ wə̀. 30La à lə̀ pə ngàŋə̀ ntwuumə̀, lenəla, à lə̀ zhyə̂ ànwùə̀ nɨ Nẅùə̀ à lə̀ kàʼnə e nɨ zèrə; Nẅùə̀ à lə̀ tsə̀əmə̀ lo, à ghǎ ghɨ̀rə̀ a taʼà ŋwùə̀ ngẅàrə̀ Dàfirə̀ aŋunə ɨ̀fò tsaʼa Dàfirə̀. 31Dàfirə̀ à lə̀ zəənə̀ ànwùə̀ nɨ Nẅùə̀ à lə̀ pənə ghǎ ghɨ̀rə̀, lenəla nshwəŋə̀ mbə̀ʼə Ghù Ndzoʼnə wa lo, ‘Ka pɨ lə̀ waʼà e a ye amwuə àlaʼà pɨ̀kwuə̀; ka mbɨ̀ŋmə̀ e ɨ̀ lə̀ lə̂ e amwuə nɨ̀shyə̀.’ 32Nẅùə̀ à zhwuumə̀ mə a Yěsû ẅèrə wə̀ aŋunə nɨ̀wɨghə̀, pə̀ənə̀ pɨ̀tsùmə̀ tyiʼə̀ mbə pɨ̀ndzəənə̀ zəənə̀nə aŋunə ànwùə̀ zèrə zə̀. 33Tɨ̀tsòŋə̀ Nẅùə̀ à ŋaŋə̀ e a àtɨ̀ghə a alyiʼə nɨ̀fò ze, ntə̂ e a pàa àpô ze yè zɨghə̀nə, ŋŋâ Àzhwùə̀ e za nɨ à lə̀ kàʼnə lo à ghǎ ŋâ ambo ze la. Àzwuumə̀ nɨ nɨ̀ zəənə̀nə nkɨ ndzuʼù a Àzhwùə̀ Nẅùə̀ ghu nɨ Kristù à kẅìrə̀nə aŋunə pə̀ənə̀. 34Mbə̀ʼnə ka Dàfirə̀ àtwuə̀ ɨ̀pɨ̀ŋmə̀ e a lə̀ koʼò ndèrə̀ e a nɨ̀pwuurə̀. La nshwəŋə̀ àze pə lo,
‘Ndòʼnə̀mbyə̂ à shwəŋə̀ ambo Ndòʼnə̀mbyə̂ mə̀ lo,
Nwuunə̀ a pàa àpô mɨ̀ŋə̀ yè zɨghə̀nə
35tə mbyàa nkwùə̀ nɨ ǹgǎ nùŋə̀ ngàŋə kɨpaanə ɨ̀zô a ɨ̀shyə̂ wə̀ tə̂ mɨ̀kwùə̀ ɨ̀mô aŋunə pobə.’
36“Lenəla, a pòŋə̀ lo ngẅàrə̀ Israel ntsùmə̀ ɨ̂ tsùŋə̀ nzhyə̂ lo Nẅùə̀ à tə̂ a Yěsû ẅèrə wə̀ nɨ nɨ̀ lə̀ kẅùumə̀nə aŋunə àtɨ̀ghə pànkə̀nə aŋunə Ndòʼnə̀mbyə̂ pobə Ghù Ndzoʼnə wa.”
37Nkwùə̀ nɨ pobə lə̀ zuʼnə àshwəŋnə̀ zə̀ la, a lə̀ sòbə̀ mɨ̀ntɨŋmə̀ ɨ̀mobə, mèrə lẅenə̀ nɨ àsòmnə̀, pobə tyiʼə̀ mbyiitə̀ ambo Pità pobə zhyə̀ ngàŋə ntwuumə̀ Yěsû lo, “Pɨlyimə, mbə̀ʼə pəə tyiʼə̀ ngɨ̀rə̀ lə ɨla?”
38Pità a kẅùə̀ ambo pobə lo, “Nɨ̀ pə̀ŋə̀ mɨ̀ntɨŋmə̀ ɨ̀mɨghə nfurə̀ amwuə tɨ̀pòŋə̀ ɨwɨghə pɨghə pɨ̀tsùmə̀ nkẅiirə̀ nchyə aŋunə nɨ̀linə̀ Yěsû, mbə̀ʼə Nẅùə̀ â lə̀ənə̀ a tɨ̀pòŋə̀ ɨwɨghə nkɨ ntyaŋə̀ a wɨghə nɨ Àzhwùə̀ e. 39Zèrə zə ànwùə̀ la ànwùə̀ nɨ Nẅùə̀ à lə̀ kàʼnə ambo pɨghə pobə ɨ̀poonə̀ ɨ̀pɨghə farə ambo pànə̀ pɨ̀tsùmə̀ nɨ pobə pənə a ndyə̌ sàa pobə ŋwùə̀ ntsùmə̀ nɨ Nẅùə̀ à fuŋə̀nə lo â tô a nɨ̀pwùnə ze.”
40Pità à lə̀ chi nshwəŋə̀ mɨ̀nwùə̀ mɨ̀noʼnə ambo pobə tsaʼnə pobə lə̀ zəənə̀nə nkɨ ndzuʼù, nkwàtə̀ a ghobə nshwəŋə̀ lo, “Nɨ̀ kẅiirə̀ ɨ̀twuə̀ ɨ̀pɨghə ambo ɨ̀waanə̀ pànə̀ pɨ tɨ̀tsòŋə̀ nɨ pobə pənə pànə̀ pɨ tɨ̀pòŋə̀!” 41Pànə̀ pɨ̀noʼnə nɨ pɨ lə̀ zuʼnə ànwùə̀ nɨ Pità à lə̀ shwəŋə̀nə nkɨ mbyiimə̀ la lə̀ kẅiirə̀ nchyə. Ndùnə̀ ɨ̀ghobə nɨ lə̀ kẅiirə̀nə nchyə njyə̂ ghu lə̀ pə pànə̀ nkaamə̀ ɨtarə nɨ lə̀ kẅìʼnə̀nə ɨ̀poonə̀ pɨ Kristù. 42A nɨ furə̀ njyə̂ ghu pobə lə̀ tə̂ àtwuə̀ aŋunə mɨ̀nwùə̀ ma nɨ ngàŋə ntwuumə̀ Kristù za lə̀ mənə nnèrə̀ la, mmə mbwuutə̀ pobə pɨ pobə ngɨ̀rə̀ mɨ̀nwùə̀ a àpô moʼo amwuə ɨ̀shwatə̀, mmə mbiʼtə̀ àpaanə̀ nkwurə̀ nkɨ nchàʼtə̀ a Nẅùə̀ a taʼà alyiʼə.
Ndwuumə̀ nɨ ɨ̀poonə̀ pɨ Kristù lə̀ mənə nchyə̂
43Ngàŋə ntwuumə̀ Kristù lə̀ mə ngɨ̀rə̀ mɨ̀nwùə̀ mɨ̀kə̀ʼnə̀nə pobə ɨ̀lènə̀ ɨ̀nwùə̀ pɨ̀yerə̀nə yerə̀nə nɨ lə̀ ghɨ̀rə̀nə àkẅàrə̀ a ẅìimə̀ a ŋwùə̀ ntsùmə̀. 44Pànə̀ pɨ̀tsùmə̀ nɨ pɨ lə̀ nùŋə̀nə ntɨŋmə̀ aŋunə Yěsû lə̀ mə mbwuutə̀ a taʼà alyiʼə nkɨ mmə mbwuutə̀ ɨ̀pwuumə̀ pobə, àzwuumə̀ àzobə àtsùmə̀ a pə a moʼo. 45Pobə lə̀ shwùunə̀ ɨ̀pàbə ɨ̀shyə̂, pobə ɨ̀pwuumə̀ ɨ̀pobə ndòo nkabə̀ ghu ntô pɨ tyiʼə̀ ngàpə̀ amwuə pobə a nɨ zùŋə̀ ɨ̀pwuumə̀ pyə̀ nɨ ŋwùə̀ à puŋə̀nə. 46Pobə pɨ̀tsùmə̀ lə̀ pə ndèrə̀ a Ndâ Mɨ̀shwàʼà Nẅùə̀ njyə̂ ɨ̀tsùmə̀, mbwuutə̀ mbiʼtə̀ àpaanə̀ amwuə mɨ̀ndâ ɨ̀mobə ngàbə̀ mɨ̀zɨghə̀ ndzɨghə̀ nɨ nɨ̀ghaʼà pobə ntɨŋmə̀ ghù laanə̀nə. 47Pobə lə̀ mə nguʼtə̀ a Nẅùə̀, mmə nkòŋə̀ mbɨ̀ŋmə̀ ɨ̀zobə. Ndòʼnə̀mbyə̂ a tyiʼə̀ mmə nchwarə̀ a ghobə nkẅìʼnə̀ ndùnə̀ ɨ̀ghobə njyə̂ ɨ̀tsùmə̀.
Currently Selected:
Ɨ̀fàʼà 2: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
