Ɨ̀fàʼà 26

Pàolò a kẅiirə̀ ntaŋə e a mbyə̀ Agripà

1Agripà a shwəŋə̀ ambo Pàolò lo, “Ɨ̀sàanə̀ ɨ̀ zə ambo ghò a nɨ shwəŋnə̀.” Pàolò à lə̀ shwùumə̀ àpô e mbìʼnə̀ a nɨ kẅiirə̀ ntaŋə e nshwəŋə̀ lo, 2“Ɨ̀fò Agripà, ǹdzəənə̀ lo mɨ̀ŋə̀ a tsoʼò ɨpoʼo àtwuə̀ nɨ̀ghòorə a nɨ təəmə̀ a mbyə̀ ghò sìnə̀ wə̀ kẅiirə̀ ntaŋə mə̀ aŋunə mɨ̀nwùə̀ mɨ̀tsùmə̀ nɨ pɨ̀Jew shwəŋə̀nə aŋunə mɨ̀ŋə̀. 3Ngaʼà tyìʼə̀ tɨsɨŋnə ntiinə wə̀ zhyə̂nə mbòomə pɨ̀Jew farə ɨ̀tànkə̀ mɨ̀nwùə̀ nɨ ɨ pənə a tɨ̀tɨ̀rə̀ pobə. Ntàʼà lo wə̀ ẅìimə̀ ntɨŋmə̀ ndzuʼù ànwùə̀ nɨ mbɨ shwəŋə̀.

4“Pɨ̀Jew pɨ̀tsùmə̀ lə̀ zhyə̂ a nɨ̀chyə̂mbyə̂ mə̀ a nɨ furə̀ tsaʼnə ndə̀ pənə mɨnkɨ̂. Pobə zhyə̂ a nɨ̀chyə̂mbyə̂ mə̀ amwuə àlaʼà pəə farə amwuə Yèrusalèmə̀. 5Pobə zhyə̂ a nɨ̀chyə̂mbyə̂ mə̀ aŋunə ntyə̌ sàa. Pobə lə̀ pəla mmə nkòŋə̀ a nɨ shwəŋnə̀ yi pobə shwəŋə̀ lo mɨ̀ŋə̀ a taʼà ŋwùə̀ amwuə àshwatə̀ tɨ̀ŋnə̀ nɨ a chyə̂nə amwuə mbòomə nɨ̀chàʼtə̀ a Nẅùə̀ ɨwəə, pɨ̀Farìsî. 6Tɨ̀tsòŋə̀ wə̀, ngwə̀ təəmə̀ a mbyə̀ korə̀ ntiinə ngwa nnaŋə̀ pə a mbyə̀ aŋunə mɨ̀nkàʼnə ma nɨ Nẅùə̀ à kàʼà mə ambo pɨ̀tǎ ɨ̀pə̀ənə̀ la. 7Lə̌ mɨ̀nkàʼnə ma nɨ mɨ̀ngẅàrə̀ ɨ̀məənə̀ ntsòbə̀ ɨpaa mə nnaŋə̀ a mbyə̀ a nɨ zəənə̀ tsaʼnə pobə pə nguʼtə̀ a Nẅùə̀ ɨ̀shìʼnə̀ nɨ ɨ̀twuʼə̀ pobə njyə̂. Pɨ̀Jew chyâ ɨ̀sàʼa aŋunə mɨ̀ŋə̀ lə ntii mɨ̀nkàʼnə mə nɨ ngwə̀ nnaŋə̀ lə mbǎ ɨ̀fò. 8A ghɨ̀rə̀ àkə ka ŋwùə̀ ɨwɨghə ntsùmə̀ a pyiimə̀ e lo mbə̀ʼə Nẅùə̀ a zhwuumə̀ ɨ̀kwuə̀ pə̀ənə̀?

9“Mɨ̀ŋə̀ àtwuə̀ ɨ̀pɨ̀ŋmə̀ ndə̀ nkwàŋə̀ a za lo mbə̀ʼə ngɨ̀rə̀ mɨ̀nwùə̀ mɨ̀tse a nɨ nèrə̀ lo ka nkòŋə̀ mə̀ nɨ̀linə̀ Yěsû ŋwùə̀ Nazarètə̀. 10Lə̌ tsaʼnə ndə̀ kɨnə mmə ngɨ̀rə̀ a Yèrusalèmə̀. Ka ndə̀ kɨ mmə nfɨ̀ŋnə̀ mə̀ pànə̀ pɨ Nẅùə̀ a ndâ ɨ̀tsaŋə̀ la nɨ mɨ̀tɨ̀ŋnə̀ mɨ pɨ̀fò màʼà Nẅùə̀, la mbaa pə nkwùə̀ nɨ pɨ lə̀ pənə nzhwuutə̀ a pɨ̀tse, ndə̀ pə mbyiimə̀ lo pɨ ghɨ̀rə̀ a lenə. 11Ndə̀ mə ŋŋâ a ghobə nɨ ngəʼə̀ amwuə mɨ̀ndâ mɨ àshwatə̀ ɨ̀mobə nkwùə̀ noʼnə, mmə ntàʼà lo pobə̂ twuunə̀ a ghobə lo ka pobə̂ zhyə̂ a ghobə a Yěsû. Ndə̀ mə nnyàŋə̀ a ghobə tə mbyàa amwuə mɨ̀mbòmpə mɨ ɨ̀laʼà mɨ̀nyaanə.

Pàolò a shwəŋə̀ tsaʼnə à lə̀ pə̀ŋə̀nə nnùŋə̀ ntɨŋmə̀ e aŋunə Yěsû

12“A pə aŋunə taʼà àkwùə̀ nɨ̀yìinə̀ wə̀ yɨ̀tse m̀mə ndèrə̀ a Dàmaskòsə̀ nɨ ɨ̀tɨ̀ŋnə̀ pobə àfàʼà nɨ pɨ̀fò màʼà Nẅùə̀ ŋânə ambo mɨ̀ŋə̀ lo n̂gə̀ fàʼà. 13A pə tsaʼa ntɨ̀ŋnə̀ àzhwùunə, m̀mə ndèrə̀ ndzəənə̀ nkàʼà ɨ̀ furə̀ a nɨ̀pwuurə̀ ntâ ntsàarə̀ a nẅùumə̀, ɨ̀ ŋwàŋə̀ a ɨ̀myə̂ pəə pɨ ngàŋə àkwùə̀ nɨ̀yìinə̀ ɨ̀zâ. 14Pəə pɨ̀tsùmə̀ lə̀ kẅìnə̀ a ɨ̀shyə̂, ǹtyiʼə̀ ndzuʼù ngyə̀ ɨ̀ shwəŋnə̀ ambo mɨ̀ŋə̀ amwuə àshwəŋnə̀ Hibrù lo, ‘Saul, Saul! Wə̀ nyàŋə̀ mə̀ lə ntii àkə? Wə̀ tâ la nɨ̀ghòorə nɨ ǎ zaŋə̀ àkwùə̀ o.’ 15Ǹtyiʼə̀ nshwəŋə̀ lo, ‘A ghò ɨ̀wə̌, masàa?’ Masàa ghu a kẅùə̀ lo, ‘A mɨ̀ŋə̀ Yěsû wa nɨ wə̀ wa nnyàŋə̀ la.’ 16La lòo a ɨ̀shyə̂ ntəəmə̀ aŋunə mɨ̀kwùə̀ ɨ̀mô ntiinə ǹtônə ambo ghò la lo wə̀ pə ngàŋə̀ àfàʼà mə̀. Wə̌ tiitə̀ pɨ̀tse pə̀ənə̀ nɨ mɨ̀nwùə̀ nɨ wə̀ zəənə̀nə sìnə̀ wə̀ farə myə̀ nɨ mbɨ pòŋə̀ nèrə̀ o. 17Mbɨ yèmpə̀ o lo kò pànə̀ pɨ Israel pobə pànə̀ nɨ ka pobə pə ghobə pɨ̀Jew lo kò pobə ghɨ̀rə̀ a ghobə ànwùə̀ tɨ̀pòŋə̀ àtse aŋunə ghò. 18Wə̌ nyaʼkə̀ ɨ̀myə̂ ɨ̀mobə pobə furə̀ a ghobə amwuə ndzùmə ntyiʼə̀ ntô amwuə nkàʼà, fuukə̀ a ghobə amwuə mbô mɨ Satàanə̀ ŋŋâ ambo Nẅùə̀. Lenəla, nkwùə̀ nɨ pobə ghǎ pyiimə̀ mə̀, mbɨ ghǎ lə̀ənə̀ a tɨ̀pòŋə̀ ghobə, pobə tyiʼə̀ mbə nɨ alyiʼə amwuə ɨ̀poonə̀ pɨ Nẅùə̀.

Pàolò a shwəŋə̀ tsaʼnə à lə̀ fàʼnə

19“Lenəla nɨ Ɨ̀fò Agripà, ka ndə̀ twuunə̀ mə̀ ànwùə̀ nɨ Nẅùə̀ à lə̀ shwəŋə̀nə lo n̂gɨ̀rə̀. 20Ndə̀ zàamə̀ nshwəŋnə̀ ambo pànə̀ pɨ Dàmaskòsə̀, nshwəŋnə̀ amwuə àlaʼà Yèrusalèmə̀, nshwəŋnə̀ amwuə ɨ̀laʼà Judà ɨ̀tsùmə̀, nkɨ nshwəŋnə̀ ambo pànə̀ nɨ ka pobə pə ghobə pɨ̀Jew lo pobə̂ pə̀ŋə̀ mɨ̀ntɨŋmə̀ ɨ̀mobə nfurə̀ amwuə tɨ̀pòŋə̀ ɨghobə ntô ambo Nẅùə̀, ntyiʼə̀ mbìʼnə̀ a nɨ ghɨ̀rə̀ mɨ̀nwùə̀ nɨ mɨ nèrə̀nə lo pobə kẅebə̀. 21Lə̌ ɨ̀sùmə ànwùə̀ nɨ pɨ̀Jew lə̀ kônə mə̀ amwuə Ndâ Mɨ̀shwàʼà Nẅùə̀, ntàʼà a nɨ zhwuutə̀ mə̀. 22La ngwə̀ mbirə̀ ntɨ̀ŋnə̀ tə mbyàa sìnə̀ wə̀, ntiinə Nẅùə̀ à yèmpə̀nə mə̀. Lenəla, ǹtəəmə̀ a ɨ̀shyə̂ nɨ̀ghə̂ nshwəŋnə̀ a sàŋə̀ sàŋə̀ ambo pànə̀ pɨ̀kɨ̂ ghobə pɨ̀ẅùunə lo ànwùə̀ nɨ ngwə̀ nshwəŋə̀ lə a tyìʼə̀ ànwùə̀ nɨ ngàŋə ntwuumə̀ Nẅùə̀ pobə pɨ Mǔsî lə̀ shwəŋə̀nə lo a ghǎ ghɨ̀rə̀ lo: 23Ghù ndzoʼnə wa à chyə̂ a nɨ zəənə̀ ngəʼə̀, kɨ pə ntsàambyə̀ a nɨ zhwuumə̀ a nɨ̀wɨghə̀. Lenəla, ǎ shwəŋnə̀ tsaʼnə nkàʼà ɨ wə̀ ntô ambo pànə̀ pɨ Israel farə ambo pànə̀ nɨ ka pobə pə ghobə pɨ̀Jew.”

24Tsaʼnə Pàolò à lə̀ mənə nshwəŋnə̀ a lenə a nɨ nèrə̀ lo ka a ghɨ̀rə̀ e ànwùə̀ tɨ̀pòŋə̀ la, Festùsə̀ a shwəŋə̀ ambo ze lo, “Pàolò, wə̀ paarə̀! Wə̀ lanə̀ àŋwàʼnə̀ tɨsɨŋnə a tyiʼə̀ ngɨ̀rə̀ wə̀ paarə̀.”

25Pàolò a kẅùə̀ e lo, “Ka m̀baarə̀ mə̀ mbǎ àtsàarə̀ pɨ̀fò. Ngwə̀ nshwəŋə̀ pə a nkǔŋə nkuŋə mə̀. 26Ɨ̀fò a zhyə̂ mɨ̀nwùə̀ mə mɨ̀tsùmə̀. Ǹkɨ mmə nshwəŋnə̀ ambo ze tɨghu mbə nɨ àkẅàrə̀, ntiinə ǹzhyə̂nə lo ka ànwùə̀ àtse a pə e amwuə mɨ̀nwùə̀ mə nɨ ka à zhyə̂ e, ntiinə ka pɨ lə̀ ghɨ̀rə̀ e la a nɨ̀lə̀əmə̀ àtse. 27Ɨ̀fò Agripà, wə̀ pyiimə̀ ànwùə̀ nɨ àŋwàʼnə̀ ngàŋə ntwuumə̀ Nẅùə̀ a shwəŋə̀nə la? Ǹzhyə̂ lo wə̀ pyiimə̀.”

28Agripà a shwəŋə̀ ambo Pàolò lo, “Wə̀ kwàŋə̀ lo wə̌ lòo a mətùmə nkwùə̀ pə̀ŋə̀ mə̀ ntyiʼə̀ ŋwùə̀ Kristù?”

29Pàolò a tyiʼə̀ nshwəŋə̀ lo, “Kə̀ aŋunə mətùmə nkwùə̀ kə̀ aŋunə tə̀sàa nkwùə̀, ngwə̀ nchàʼtə̀ a Nẅùə̀ lo kò a pə e pə ndàʼà ghò, la a pə ŋwùə̀ ntsùmə̀ nɨ a wə̀ ndzuʼù ànwùə̀ nɨ ngwə̀ nshwəŋə̀ sìnə̀ wə̀, a pə àzwuumə̀ nɨ m̀bənə zèrə, ndàŋə̀ ndàʼà mɨ̀tsaŋə̀ mə nɨ ka nɨ̀ pə wɨghə nɨ mèrə.”

30Lenəla, ɨ̀fò pobə govɨnò nɨ Bernice farə ŋwùə̀ ntsùmə̀ nɨ a lə̀ pənə a alyiʼə ghu a lə̀ lòo a ɨ̀shyə̂. 31Nkwùə̀ nɨ pobə lə̀ furə̀nə mmə ndèrə̀, pobə lə̀ tyiʼə̀ nshwəŋə̀ pobə nɨ pobə lo, “Ka ŋònə̀ wə̀ a ghɨ̀rə̀ e ànwùə̀ àtse nɨ a kùʼnə̀ lo pɨ zhwuutə̀ e kə̀ nchyâ e a ndâ ɨ̀tsaŋə̀.” 32Agripà a shwəŋə̀ ambo Festùsə̀ lo, “Ŋònə̀ wə̀ a tɨ mbəla ngoŋə̀ e tɨ shwəŋə̀ lo pɨ tsàa ɨ̀sàʼa e ambo Kaasà, yi pɨ myàʼtə̀ e.”

Currently Selected:

Ɨ̀fàʼà 26: pny

Highlight

Copy