Ɨ̀fàʼà 25

Pàolò a shwəŋə̀ lo à tàʼà lo ɨ̀fò Romə̀ a naŋə̀ ɨ̀sàʼa e

1Nkwùə̀ nɨ Festùsə̀ à lə̀ kwuunə̀nə a pàa àlaʼà ze, njyə̂ ɨtarə lə̀ làŋə̀ a furə̀ a Kàsaryà nkoʼò ndèrə̀ a Yèrusalèmə̀. 2Pɨ̀fò màʼà Nẅùə̀ pobə pɨ̀lɨ̀ŋmə̂ pɨ̀Jew tiitə̀ e nɨ mɨ̀nwùə̀ mɨ tɨ̀pòŋə̀ nɨ Pàolò à ghɨ̀rə̀nə ntyiʼə̀ mbuʼù mbô ambo ze lo 3â yèmpə̀ a ghobə nfuukə̀ a Pàolò ntsàa a Yèrusalèmə̀ ntiinə pobə lə̀ chwuʼtə̀nə mbɨ̀ŋmə̀ ɨ̀zobə lo panə̀ a àlàŋə zhwuutə̀ e. 4Festùsə̀ a kẅùə̀ ambo pobə lo, “Pɨ fɨ̀ŋnə̀ a Pàolò a ɨ̀tsaŋə̀ pə a Kàsaryà, la nkwùə̀ ɨpaa ǹdèrə̀ ghu. 5Nɨ̂ ghɨ̀rə̀ ɨ̀twuə̀ ɨ̀pɨghə shwuʼə̀ ndèrə̀ ghu pəə pɨ pobə. Nɨ̌ shwəŋə̀ la alyiʼə ghu lo ŋònə̀ wə̀ à ghɨ̀rə̀ ànwùə̀ tɨ̀pòŋə̀ kə̀ ngaŋə.”

6Festùsə̀ à lə̀ chyə̂ pobə pɨ pobə tsaʼa njyə̂ nɨ̀fàamə̂ kə̀ nɨ̀ghumə̀, ntyiʼə̀ nfurə̀ ghu ndèrə̀ a Kàsaryà. Njyə̂ ɨ̀ laanə̀ a nwuunə̀ aŋunə aləŋə ɨ̀fò korə̀ e nshwəŋə̀ lo pɨ̀ lòo Pàolò ntô nɨ ẅèrə. 7Nkwùə̀ nɨ Pàolò à lə̀ tônə, pɨ̀Jew nɨ pɨ lə̀ furə̀nə a Yèrusalèmə̀ nshwuʼə̀ ntô lə̀ təəmə̀ nkamnə̀ e ntyiʼə̀ nshwəŋə̀ mɨ̀nwùə̀ mɨ tɨ̀pòŋə̀ aŋunə ze myə̀ nɨ mbə̀ʼə ka pobə nèrə̀ a ghobə lo mèrə chyə̂ mbə nkǔŋə nkuŋə. 8La Pàolò à lə̀ tyiʼə̀ nkẅiirə̀ ntàŋə e ambo pobə nshwəŋə̀ lo, “Ka ǹfànə̀ mə̀ ànwùə̀ mbə̀ʼə mbòomə pɨ̀Jew; ka fànə̀ mə̀ ànwùə̀ mbə̀ʼə Ndâ Mɨ̀shwàʼà Nẅùə̀; nkɨ ka fànə̀ mə̀ ambo Kaasà.”

9Festùsə̀ à lə̀ tàʼà a nɨ ghɨ̀rə̀ ànwùə̀ nɨ a pòŋə̀nə pɨ̀Jew ntyiʼə̀ nshwəŋə̀ ambo Pàolò lo, “Wə̀ kòŋə̀ lo lèrə̀ a Yèrusalèmə̀ pɨ̀ saʼà ɨ̀sàʼa o ghu?”

10Pàolò a shwəŋə̀ ambo ze lo, “Ǹtəəmə̀ lə amwuə korə̀ Kaasà nɨ à pənə alyiʼə nɨ mbə̀ʼə pɨ saʼà ɨ̀sàʼa mə̀. Ka ngɨ̀rə̀ mə̀ ànwùə̀ tɨ̀pòŋə̀ àtse ambo pɨ̀Jew zhyə̀ nɨ wə̀ kɨnə nzhyə̂ tyìʼə̀ ɨ̀shìʼnə̀. 11Ǹtə mbəla ngɨ̀rə̀ ànwùə̀ tɨ̀pòŋə̀ àtse nɨ a kùʼnə̀nə lo pɨ̀ zhwuutə̀ mə̀, yi ka ǹtwuunə̀ mə̀ a nɨ kwɨghə̀. La mɨ̀nwùə̀ nɨ pobə pə nshwəŋə̀ lo ǹgɨ̀rə̀ lə ghoŋə̀ e tɨ pə nkǔŋə nkuŋə, yi mbə̀ʼə ka ŋònə̀ ɨ̀tse a ŋâ e a gha ambo pobə. Kaasà ǎ naŋə̀ ɨ̀sàʼa mə̀.”

12Nkwùə̀ nɨ Festùsə̀ pobə pɨ̀kùmə ɨ̀pe lə̀ tsənkə̀nə ɨ̀twuə̀ ɨ̀pobə nshwəŋnə̀, à lə̀ kẅùə̀ ambo Pàolò lo, “Tsaʼnə wə̀ shwəŋə̀nə lo Kaasà ǎ naŋə̀ ɨ̀sàʼa o la, wə̌ kɨ lèrə̀ pə ambo ze.”

Pàolò a shwəŋnə̀ a mbyə̀ Agripà pobə Bernice

13Mɨ̀njyə̂ mɨ̀tse lə̀ làŋə̀, ɨ̀fò Agripà pobə Bernice tô a Kàsaryà lo kẅiirə̀ a Festùsə̀. 14Pobə kɨ pə ghu aŋunə mɨ̀njyə̂ mɨ̀tse, Festùsə̀ a tiitə̀ ɨ̀sàʼa Pàolò ambo ɨ̀fò nshwəŋə̀ lo, “Ŋònə̀ ɨ̀tse a wə̀ a ndâ ɨ̀tsaŋə̀ a nɨ̀ghə̂ nɨ Felix a chyânə. 15Nkwùə̀ nɨ ndə̀ koʼnə ndèrə̀ a Yèrusalèmə̀, pɨ̀fò màʼà Nẅùə̀ pobə pɨ̀lɨ̀ŋmə̂ pɨ̀Jew tô shwəŋə̀ mɨ̀nwùə̀ mɨ tɨ̀pòŋə̀ nɨ Pàolò à ghɨ̀rə̀nə ambo mɨ̀ŋə̀, nshwəŋə̀ lo ŋ̂ŋâ e pɨ̀ zhwuutə̀. 16La ǹkẅùə̀ ambo pobə lo, mbə̀ʼə ka pànə̀ pɨ Romə̀ zùŋə̀ shwəŋə̀ e lo pɨ zhwuutə̀ a ŋònə̀ ɨ̀tse tɨghu pɨ ŋâ e nɨ ɨ̀sàanə̀ lo â təəmə̀ a mbyə̀ pànə̀ pɨ̀ghu nɨ pɨ ẅìimə̀nə e nɨ mɨ̀nwùə̀ nkẅiirə̀ ntaŋə e. 17Ka ndə̀ tsə̀ŋə̀ mə̀ nkwùə̀, nkwùə̀ nɨ pobə lə̀ tônə a nɨ̀ghə̂. Njyə̂ lə̀ laanə̀, nnwuunə̀ aŋunə aləŋə ɨ̀fò korə̀ mə̀ nshwəŋə̀ lo pɨ lòo a ŋònə̀ ghu ntô. 18Pànə̀ nɨ pɨ lə̀ mənə nshwəŋə̀ mɨ̀nwùə̀ mɨ tɨ̀pòŋə̀ mbə̀ʼə ze lə̀ lòo a ɨ̀shyə̂ ntəəmə̀ la ka shwəŋə̀ a ghobə a taʼà ànwùə̀ tɨ̀pòŋə̀ àtse nɨ ndə̀ kwàŋə̀nə lo à ghɨ̀rə̀. 19Ndàʼà mɨ̀nwùə̀ nɨ pobə lə̀ mənə nshwəŋə̀ à lə̀ pə ɨ̀tànkə̀ mɨ̀nwùə̀ mbə̀ʼə ànwùə̀ Nẅùə̀ àzobə farə mbə̀ʼə ŋònə̀ ɨ̀tse nɨ pɨ lə̀ mənə nfuŋə̀ nɨ Yěsû nɨ à lə̀ kwɨghə̀ mə, la Pàolò a mə nshwəŋə̀ lo à zhwuumə̀ a nɨ̀wɨghə̀. 20Ka ndə̀ zhyə̂ mə̀ ndwuumə̀ nɨ mbə̀ʼə ǹnaŋə̀ mɨ̀nwùə̀ mə. Lenəla, mbyiitə̀ a Pàolò lo tə mbə̀ʼə a kòŋə̀ a nɨ koʼò ndèrə̀ a Yèrusalèmə̀ lo pɨ naŋə̀ ɨ̀sàʼa wə̀ ghu lo. 21La Pàolò a shwəŋə̀ lo n̂tsàa ɨ̀sàʼa e pə ambo Kaasà. Lenəla ǹfɨ̀ŋnə̀ e tə mbyàa nkwùə̀ nɨ mbə̀ʼə ǹtsàa e ambo Kaasà.”

22Agripà a shwəŋə̀ ambo Festùsə̀ lo, “Mbɨ kòŋə̀ a nɨ zuʼù a ŋònə̀ wə̀ àtwuə̀ ɨ̀pɨ̀ŋmə̀ e â shwəŋnə̀.”

Festùsə̀ a kẅùə̀ e lo, “Wə̀ ghǎ zuʼù e a ngẅùʼə.”

Pàolò a mbyə̀ Agripà

23Njyə̂ lə̀ laanə̀, Agripà pobə Bernice furə̀ amwuə ɨtsəʼə nɨ̀fò nɨ pə̀ənə̀ a ndzùmə̀ pobə, nkwuunə̀ amwuə ndâ saʼà mɨ̀sàʼa pobə ɨ̀twuə̀ pɨ̀soyì nɨ pànə̀ pɨ̀ẅùunə amwuə mbòmpə àlaʼà ghu. Festùsə̀ a tyiʼə̀ nshwəŋə̀ lo pɨ̀ lòo a Pàolò ntô. 24Festùsə̀ a làŋə̀ nɨ mbyə̀ nshwəŋə̀ lo, “Ɨ̀fò Agripà nɨ ŋwùə̀ ntsùmə̀ nɨ à wə̀ a nɨ̀ghə̂ pə̀ənə̀ pɨ pobə, nɨ zəənə̀ a ŋònə̀ wə̀. La ze nɨ pɨ̀Jew pɨ̀tsùmə̀ a nɨ̀ghə̂ farə a Yèrusalèmə̀ pə shwəŋnə̀ tɨ̀pòŋə̀ mbə̀ʼə e, nkyiinə̀ nshwəŋə̀ lo mbə̀ʼə ka pobə myàʼtə̀ a ghobə a ye tɨghu pobə zhwuutə̀. 25Ka ǹdzəənə̀ mə̀ ànwùə̀ àtse nɨ a ghɨ̀rə̀nə nɨ a kùʼnə̀nə lo pɨ zhwuutə̀ e zhwuutə̀nə. Tsaʼnə a kùmə̀ shwəŋə̀ lo pɨ tsàa ɨ̀sàʼa pə ambo ɨ̀fò Romə̀ la, ndzəənə̀ lo mbɨ tsàa e ambo ze. 26La ka ǹdzəənə̀ mə̀ a ngotə ànwùə̀ àtse nɨ mbə̀ʼə ŋ̀ŋwàʼnə̀ ambo àtsàarə̀ pɨ̀fò, la ndòo e ntô a mbyə̀ pɨghə pɨ̀tsùmə̀, tɨsɨŋnə a mbyə̀ ghò ɨ̀fò Agripà. Njiilo ndàŋə̀ a ndzùmə̀ nɨ̀nyoorə̀ wə̀ ǹdzəənə̀ ànwùə̀ nɨ mbə̀ʼə ŋ̀ŋwàʼnə̀. 27Ntiinə ǹkwàŋə̀nə lo a ànwùə̀ tɨ àtwuə̀ a nɨ tsàa a ngàŋə̀ ɨ̀tsaŋə̀ ambo ghò tɨ tiitə̀ ànwùə̀ nɨ à wɨ̀ghə̀nə.”

Currently Selected:

Ɨ̀fàʼà 25: pny

Highlight

Copy