Ɨ̀fàʼà 17

Pàolò pobə Salàsə̀ lèrə̀ a Tèsàlonikà

1Pàolò pobə Salàsə̀ lə̀ làŋə̀ amwuə àlaʼà Àmfipolìsə̀ farə Àpolonyà nkwuunə̀ amwuə àlaʼà Tèsàlonikà, alyiʼə nɨ ndâ àshwatə̀ pɨ̀Jew ɨ lə̀ pənə ghu. 2Pàolò a kwuunə̀ tsaʼnə a lə̀ pyə̀nə nkwuunə̀, nshwəŋnə̀ pobə pɨ pobə mbə̀ʼə mɨ̀nwùə̀ mɨ àŋwàʼnə̀ Nẅùə̀ aŋunə ngàbə̀ ɨtarə, 3ntyiʼə̀ ntiitə̀ ɨ̀sùmə ànwùə̀ Nẅùə̀, nkɨ mmə nnèrə̀ ambo pobə lo Ghù Ndzoʼnə wa a lə̀ pə a nɨ zəənə̀ ngəʼə̀, ɨ zhwuumə̀ a nɨ̀wɨghə̀. Pàolò a lə̀ shwəŋə̀ ambo pobə lo, “Yěsû wə̀ nɨ nshwəŋə̀nə ambo pɨghə la, a Ghù Ndzoʼnə wa.” 4Pobə pɨ̀tse lə̀ pyiimə̀ ànwùə̀ nɨ Pàolò a lə̀ mənə nshwəŋə̀ ntyiʼə̀ ntsirə̀ a Pàolò pobə Salàsə̀. Pɨ̀Greek pɨ̀tse pɨ̀noʼnə nɨ pɨ lə̀ pônə a Nẅùə̀ pobə pə̀ngyə̌ pɨ̀ẅùunə lə̀ kɨ ntsirə̀ a ghobə. 5La pɨ̀Jew lə̀ pə nɨ àghə̀ʼnə̀ aŋunə pobə, ntyiʼə̀ nfurə̀ a àlàŋə nshwatə̀ pànə̀ nɨ pɨ mənə nzhwàʼà ɨlyiʼə, pobə tô mbwuutə̀ a ghobə mbìʼnə̀ a nɨ kùmə̀ ɨ̀sàʼa amwuə mbòmpə àlaʼà. Pobə lə̀ kwuunə̀ a ndâ Jasònə̀ lo tàʼà a Pàolò pobə Salàsə̀ kootə̀ a ghobə lòo tô a mbyə̀ àpùŋə̀ pə̀ənə̀. 6La tsaʼnə ka pobə lə̀ zəənə̀ a ghobə a Pàolò pobə Salàsə̀ a ndâ gha la, pobə lə̀ kô a Jasònə̀ pobə pɨ ngàŋə àpyiimə̀ yètse, nsùŋə̀ a ghobə ndèrə̀ a mbyə̀ ɨ̀twuə̀ àlaʼà a mbòmpə àlaʼà nkyiinə̀ nshwəŋə̀ lo, “Pànə̀ pə nɨ pobə tsànkə̀nə ɨ̀twuə̀ pə̀ənə̀ a àtwuə̀ ɨ̀shyə̂ ghə̀, kɨ ntô mbyàa a nɨ̀ghə̂, 7la Jasònə̀ a nùŋə̀ a ghobə a ndâ ze. Pobə tyiʼə̀ mbəʼə̀ mɨ̀ntə̌ mɨ ɨ̀fò pɨ̀Roman nshwəŋə̀ lo yɨ̀tse ɨ̀fò à wa ghu nɨ pɨ pa nfuŋə̀ e nɨ Yěsû.” 8Nkwùə̀ nɨ pànə̀ pɨ ghu lə̀ zuʼnə ànwùə̀ ghu, a lə̀ tsàarə̀ a ghobə pobə ɨ̀twuə̀ mbòmpə àlaʼà. 9Lenəla pobə kẅiirə̀ àtsobə̀ ambo Jasònə̀ pobə àkwùə̀ e, ntyiʼə̀ mmyàʼtə̀ a ghobə lo pobə lèrə̀.

Ànwùə̀ nɨ a lə̀ lòonə alyiʼə a Berea

10A lə̀ pə nɨ ɨ̀twuʼə̀, ngàŋə àpyiimə̀ ghu tsàa a Pàolò pobə Salàsə̀ lo pobə lèrə̀ a Berea. Nkwùə̀ nɨ pobə lə̀ pyàanə ghu, pobə lə̀ kwuunə̀ amwuə ndâ àshwatə̀ pɨ̀Jew. 11Pɨ̀Jew nɨ pɨ lə̀ pənə a Berea lə̀ pòŋə̀ ntsàarə̀ a pyə̀ a Tèsàlonikà. Pobə lə̀ kẅiirə̀ ntwuumə̀ Nẅùə̀ nɨ ntɨŋmə̀ ɨ̀ghobə ɨ̀tsùmə̀, nkɨ mmə nfuŋə̀ àŋwàʼnə̀ Nẅùə̀ njyə̂ ɨ̀tsùmə̀ a nɨ zəənə̀ lo kə̀ nɨ ànwùə̀ nɨ Pàolò a lə̀ shwəŋə̀nə la a nkǔŋə nkuŋə lo. 12Pobə pɨ̀noʼnə lə̀ nùŋə̀ ntɨŋmə̀ ɨ̀ghobə aŋunə Yěsû farə pə̀ngyə̌ pɨ Greek pɨ̀ẅùunə pobə mbyàŋnə̀. 13La nkwùə̀ nɨ pɨ̀Jew a Tèsàlonikà lə̀ zuʼnə lo Pàolò a ẅùə̀ nkɨ nchwìitə̀ ntwuumə̀ Nẅùə̀ a Berea, pobə lə̀ kɨ ntô ghu mbèrə̀kə̀ mɨ̀ntɨŋmə̀ mɨ pə̀ənə̀ lo pobə ŋŋâ ngəʼə̀ ambo pɨ Pàolò. 14Lenəla, la ngàŋə àpyiimə̀ ghu lə̀ zùŋə̀ ntsàa a Pàolò lo â lèrə̀ amwuə nchyə ghu nɨŋnə̀nə; la Salàsə̀ pobə Timotì ghoŋə̀ a ghobə a Berea. 15Pànə̀ nɨ pɨ lə̀ ghə̀nə a nɨ chàanə̀ a Pàolò lə̀ lèrə̀ tə mbyàa a Atènsə̀. Nkwùə̀ nɨ pobə lə̀ mənə nkwə̂, Pàolò à lə̀ shwəŋə̀ ambo pobə lo pobə̂ shwəŋə̀ ambo Salàsə̀ pobə Timotì lo pobə faʼa ntô ntsirə̀ e.

Ànwùə̀ nɨ a lə̀ lòonə alyiʼə a Atènsə̀

16Tsaʼnə Pàolò a lə̀ mənə mbyabə̀ a Salàsə̀ pobə Timotì la, a lə̀ pə nɨ àsòmnə̀ yè noʼnə a ntɨŋmə̀ ze, ntiinə a lə̀ zəənə̀nə lo pànə̀ pɨ àlaʼà ghu chyə̂ nɨ pɨ̀tɨtoo pɨ̀noʼnə. 17Lenəla, a lə̀ chwìitə̀ ntwuumə̀ Nẅùə̀ ambo pɨ̀Jew farə ambo pànə̀ nɨ ka pobə pə ghobə pɨ̀Jew nɨ pobə nùŋə̀nə ntɨŋmə̀ ɨ̀ghobə aŋunə Nẅùə̀ amwuə ndâ àshwatə̀ pɨ̀Jew; nkɨ mmə nchwìitə̀ alyiʼə mɨ̀tàanə njyə̂ ɨ̀tsùmə̀ ambo pànə̀ nɨ pɨ tônə ghu. 18Pànə̀ pɨ̀tse nɨ pɨ lə̀ mənə ndzùŋə̀ ànwùə̀ nɨ pɨ̀Epicurean nɨ pɨ̀Stoic, lə̀ mənə nnèrə̀ lə̀ ka mə pyiimə̀ a ghobə ànwùə̀ nɨ a lə̀ mənə nshwəŋə̀. Pobə pɨ̀tse lə̀ shwəŋə̀ lo, “Ngàŋə ntswùə̀ wə̀ a tàʼà shwəŋə̀ lə lo àkə?”

Pɨ̀tse shwəŋə̀ lo, “A zə mbə tsaʼa a wə̀ nshwəŋə̀ ànwùə̀ pɨ̀nẅùə̀ pɨ àtwuumə̀ pɨ̀tse.” Pobə lə̀ shwəŋə̀ a lenə la ntiinə Pàolò a lə̀ mə nshwəŋə̀ tsaʼnə Yěsû a lə̀ zhwuumə̀nə a nɨ̀wɨghə̀. 19Lenəla pobə lə lòo e ndèrə̀ amwuə Kansèrə̀ mbòmpə àlaʼà Areopagus, nshwəŋə̀ ambo ze lo, “Wə̀ tiitə̀ a wəə nɨ ɨ̀sùmə ànwùə̀ yè shwuə̀ zə̀ nɨ wə̀ nèrə̀nə lə? 20Wə̀ wə̀ nshwəŋə̀ lə mɨ̀nwùə̀ nɨ pəə laʼa mə ndzuʼù a wəə apə̀, lenəla, pəə tàʼà a nɨ zhyə̂ a mèrə.” 21[A lə̀ pə a lenə la ntiinə ŋwùə̀ ntsùmə̀ a Atènsə̀ farə pànə̀ pɨ̀nyaanə nɨ lə̀ pənə a àlaʼà ghu lə̀ ka mə ghɨ̀rə̀ a ghobə ànwùə̀ àtse ndàŋə̀ e a nɨ mə nzhwiʼtə̀ nkɨ mmə nshwəŋə̀ mɨ̀nwùə̀ mɨ̀shwuə̀]. 22Tsaʼnə Pàolò à lə̀ təəmə̀nə a tɨ̀tɨ̀rə̀ Areopagus, à lə̀ shwəŋə̀ lo, “Pànə̀ Pɨ Atènsə̀, ǹdzəənə̀ lo nɨ̀ pa nchàʼtə̀ a Nẅùə̀ amwuə ɨ̀làŋə pɨ̀noʼnə. 23Ǹshwəŋə̀ a lenə la ntiinə ndə̀ mə ngyìinə̀ nkarə̀ amwuə àlaʼà àzɨghə mmə nnaŋə̀ ɨlyiʼə nɨ nɨ̀ wa nchàʼtə̀ a Nẅùə̀ ghu, ndzəənə̀ a yètse alyiʼə nɨ̀shwàʼà pɨ ŋwàʼnə̀ aŋunə lo ‘Zə a chyə̂ ambo nẅùə̀ wa nɨ ka pəə zhyə̂ a wəə.’ Lenəla ntô a nɨ tiitə̀ a wɨghə la nɨ zhyə̀ za nɨ nɨ̀ wa nguʼtə̀ ka zhyə̂ a wɨghə la.

24“Nẅùə̀ wa nɨ à tsùŋə̀nə àtwuə̀ ɨ̀shyə̂ pobə ɨ̀pwuumə̀ ɨ̀tsùmə̀ nɨ pənə amwuə, la ze mbə Ndòʼnə̀mbyə̂ a nɨ̀pwuurə̀ ghobə ɨ̀shyə̂, mbə kɨ chyə̂ e amwuə ndâ nɨ a korə̀nə ŋwùə̀ mɨsoŋə nɨ mbô ɨ̀me apə̀. 25Ka à kɨ ntàʼà lo pànə̀ fàʼà ambo ze, ntiinə à ŋânə ze ŋŋâ a nɨ̀chyə̂mbyə̂ farə Àzhwùə̀ ambo àzwuumə̀ àtsùmə̀. 26À lə̀ ntsùŋə̀ a taʼà ŋwùə̀, ntyiʼə̀ ndàŋə̀ aŋunə ze ntsùŋə̀ a ŋwùə̀ ntsùmə̀ a àtwuə̀ ɨ̀shyə̂, ntsùŋə̀ nkwùə̀ nɨ pobə̌ chyə̂ àtwuə̀ ɨ̀shyə̂ farə alyiʼə nɨ pobə̌ chyə̂ ghu. 27Nẅùə̀ a lə̀ ghɨ̀rə̀ a zə la mbə̀ʼə ghɨ̀rə̀ pànə̀ tə ntàʼà a nɨ zəənə̀ lo mbə̀ʼə pobə zəənə̀ e lo. La ka Nẅùə̀ àtwuə̀ ɨ̀pɨ̀ŋmə̀ e a pə e a ndyə̌ sàa aŋunə ŋònə̀ ɨ̀tse. 28Tsaʼnə ŋònə̀ ɨ̀tse a lə̀ shwəŋə̀ mə lo, ‘pə̀ənə̀ pa nwuunə̀, ngyìinə̀, nkɨ mmə nchyə̂ la amwuə ze.’ A chyə̂ tsaʼa lo pə̀ənə̀ ɨ̀pɨghə pɨ̀tse lə̀ zòbə̀ lo, ‘Pəə kɨ mbə àzəə la ɨ̀poonə̀ ɨ̀pe.’ 29Tsaʼnə pə̀ənə̀ pənə ɨ̀poonə̀ pɨ Nẅùə̀ la, kò pə̀ənə̀ kwàŋə̀ lo Nẅùə̀ a chyə̂ mbə tsaʼa tɨtoo nɨ ŋwùə̀ mɨsoŋə a lòonə mbô ɨ̀me ghobə àzhìʼtə̀ e ntsùŋə̀ nɨ goldə̀, kə̀ silbà, kə̀ nɨ nɨ̀ghòorə. 30Nẅùə̀ à lə̀ wâ mɨ̀nwùə̀ nɨ pànə̀ lə̀ ghɨ̀rə̀nə nɨ ɨ̀pùʼu nkwùə̀ ntsàambyə̀, la tɨ̀tsòŋə̀ wə̀, a wə̀ nshwəŋə̀ ambo pə̀ənə̀ ɨlyiʼə ɨ̀tsùmə̀ lo pobə pə̀ŋə̀ mɨ̀ntɨŋmə̀ ɨ̀mobə nfurə̀ amwuə tɨ̀pòŋə̀, 31ntiinə a tsoʼnə a ŋwùə̀ nnùŋə̀ njyə̂ nɨ a ghǎ saʼà mɨ̀sàʼa mɨ pə̀ənə̀ a àtwuə̀ ɨ̀shyə̂ ghə ɨ̀shìʼnə̀. A nèrə̀ a zèrə pànə̀ zhyə̂ lo a nkǔŋə nkuŋə, tsaʼnə a lə̀ zhwuumə̀nə a ngàŋə̀ aŋunə nɨ̀wɨghə̀ la.”

32Nkwùə̀ nɨ pobə lə̀ zuʼnə tsaʼnə Pàolò a lə̀ shwəŋə̀nə ànwùə̀ mbə̀ʼə nɨ̀zhwuumə̀ a wɨghə, pobə pɨ̀tse lə̀ pìʼnə̀ a nɨ ẅìi e. La pɨ̀tse shwəŋə̀ lo “Pəə tàʼà a nɨ zuʼù wə̀ kẅirə̀ nshwəŋə̀ ànwùə̀ zə.” 33Lenəla, Pàolò a myàʼtə̀ ghobə ndèrə̀ e. 34Pànə̀ pɨ̀tse lə̀ zùŋə̀ a Pàolò mbyiimə̀ a Yěsû. Amwuə pànə̀ pə̀ a lə̀ pə Dionysius nɨ a lə̀ pənə ŋwùə̀ Areopagus, farə a mə̀ngyə̌ nɨ pɨ lə̀ mənə nfuŋə̀ e nɨ Damaris, pobə pɨ̀tse pə̀ənə̀.

Currently Selected:

Ɨ̀fàʼà 17: pny

Highlight

Copy