Ɨ̀fàʼà 18

Pàolò pobə Salàsə̀ lèrə̀ a Korìntə̀

1Ànwùə̀ zə̀ a kɨ làŋə̀, Pàolò a furə̀ a Atènsə̀ ndèrə̀ a Korìntə̀, 2ndzəənə̀ a ŋwùə̀ pɨ̀Jew ɨ̀tse nɨ nɨ̀linə̀ ɨ̀tse lə̀ pənə Aquila, ẅùə̀ nɨ pɨ lə̀ pyə̂nə e a Pontùsə̀, a pirə̀ nfurə̀ a Italy pobə ngẅùə e Prìsilà, ntiinə ɨ̀fò Romə̀ Kladyùsə̀ a lə̀ shwəŋə̀ lo pɨ̀Jew pɨ̀tsùmə̀ furə̀ amwuə Romə̀. Pàolò a lèrə̀ lo ghə̀ zəənə̀ a ghobə, 3ntyiʼə̀ nchyə̂ ghu nfàʼà pobə pɨ pobə, ntiinə a lə̀ zhyə̂ a nɨ korə̀ ɨ̀zuŋə̀ tsaʼa pobə. 4A lə̀ chwìitə̀ ntwuumə̀ Nẅùə̀ amwuə ndâ àshwatə̀ pɨ̀Jew amwuə mɨ̀njyə̂ mɨ àlaʼà mɨ̀tsùmə̀ ntàʼà a nɨ ghɨ̀rə̀ lo pɨ̀Jew pobə pɨ̀Greek pyiimə̀ ànwùə̀ nɨ a shwəŋə̀nə. 5Nkwùə̀ nɨ Salàsə̀ pobə Timotì lə̀ furə̀nə a Màsèdonyà ntô, Pàolò a lə̀ ŋâ nkwùə̀ e ntsùmə̀ a nɨ chwìitə̀ ntwuumə̀ Nẅùə̀ ambo pɨ̀Jew, lo pobə zhyə̂ nkǔŋə nkuŋə lo Yěsû la Ghù Ndzoʼnə wa. 6La nkwùə̀ nɨ pobə lə̀ twuunə̀nə a ghobə a ye, pobə lə̀ pìʼnə̀ a nɨ fuŋə̀ e nɨ ŋònə̀ tɨ̀pòŋə̀. Lenəla, Pàolò a kwùtə̀ àpùbə aŋunə ɨtsəʼə ɨ̀pe nshwəŋə̀ ambo pobə lo, “Nɨ̀ tə mbî, àləəmə̀ àzɨghə a ghoŋə̀ àtwuə̀ pɨghə. Ka àpô mə̀ a pə e amwuə. A nɨ furə̀ tɨ̀tsòŋə̀, mbɨ tyiʼə̀ chwìitə̀ ntwuumə̀ wə̀ pə ambo pànə̀ nɨ ka pobə pə ghobə pɨ̀Jew.” 7Lenəla, Pàolò a myàʼtə̀ a ghobə ndèrə̀ a ndâ Titius Justùsə̀ nɨ ɨ lə̀ paatə̀nə ndâ àshwatə̀ pɨ̀Jew. Ka ŋònə̀ ẅèrə wə̀ a lə̀ pə e ŋwùə̀ pɨ̀Jew la mmə nguʼtə̀ a Nẅùə̀.

8Krispùsə̀ nɨ à lə̀ pənə àtwuə̀ ndâ àshwatə̀ pɨ̀Jew, pobə pɨ ngẅàrə̀ e ntsùmə̀ lə̀ nùŋə̀ mɨ̀ntɨŋmə̀ ɨ̀mobə aŋunə Ndòʼnə̀mbyə̂, pànə̀ pɨ Korìntə̀ pɨ̀noʼnə kɨ ndzuʼù ànwùə̀ Nẅùə̀ mbyiimə̀ nkẅiirə̀ nchyə. 9A pə nɨ ɨ̀twuʼə̀ ɨ̀tse, ndzə̀əmə̀ ɨ̀ làŋə̀ a ɨ̀myə̂ Pàolò Ndòʼnə̀mbyə̂ a shwəŋə̀ ambo ze lo, “Kò wə̀ pô, lèrə̀ nɨ mbyə̀ nkɨ nshwəŋə̀ pə ànwùə̀ mə̀, kò wə̀ zhwemnə̀, 10ntiinə ngwə̀ pùu. Ka ŋwùə̀ a pètə̀ e a ghò lo ghɨ̀rə̀ ànwùə̀ tɨ̀pòŋə̀ aŋunə ghò. Pànə̀ pɨ̀noʼnə amwuə mbòmpə àlaʼà zə a ɨ̀pâ. 11Lenəla Pàolò a chyə̂ ghu aŋunə taʼà nguʼu nɨ àtùmə nnèrə̀ ànwùə̀ Nẅùə̀ ambo pobə.”

12La nkwùə̀ nɨ Gallio à lə̀ pənə ɨ̀fò àlaʼà Àkayà, pɨ̀Jew lə̀ pwuutə̀ nkô a Pàolò ndòo e ndèrə̀ a korə̀, 13nshwəŋə̀ lo, “Ŋònə̀ wə̀ à wə̀ nnèrə̀ pànə̀ nɨ ndwuumə̀ nɨ pobə̂ ghuʼtə̀ a Nẅùə̀ nɨ ka mbòomə a tàʼà e a lenə.”

14Lenəla, Pàolò a pə ntàʼà shwəŋnə̀, Gallio a shwəŋə̀ ambo pɨ̀Jew lo, “Nɨ̀ tə mbəla mmə nshwəŋə̀ la lo ŋònə̀ wə̀ a lə̀ ghɨ̀rə̀ ànwùə̀ tɨ̀pòŋə̀ kə̀ ànwùə̀ nɨ a pɨ̂nə tɨsɨŋnə, yi mbɨ zhwiʼtə̀ àshwəŋnə̀ àzɨghə. 15La tsaʼnə nɨ̀ wə̀ nsaʼnə̀ pə mbə̀ʼə ɨ̀shwəŋnə̀ pobə mɨ̀linə̀ mɨ pə̀ənə̀, nɨ pɨ̀mbòomə ɨ̀pɨghə, ǎ naŋə̀ e pɨghə naŋə̀. Ka a pə naŋə̀ e mɨ̀ŋə̀ nnaŋə̀ a za mbuurə̀ mɨ̀nwùə̀.” 16Lenə la nkantə̀ a ghobə amwuə ndâ ɨ̀sàʼa. 17Pobə tyiʼə̀ mbə̀ŋə̀ nkunə̀ aŋunə Sòstinə̀ nɨ à pənə àtwuə̀ ndâ àshwatə̀ pɨ̀Jew, mbuʼù e a mbyə̀ korə̀. La ka Gallio a naŋə̀ e a za tsaʼa ànwùə̀ àtse.

Pàolò a kẅirə̀ nkwə̂ a Antyòkə̀

18Pàolò à lə̀ chyə̂ pobə pɨ ngàŋə àpyiimə̀ a Korìntə̀ aŋunə mɨ̀njyə̂ mɨ̀noʼnə, mmyàʼtə̀ a ghobə nkwuunə̀ amwuə àpaŋə̀ pobə pɨ Prìsilà nɨ Aquila lèrə̀ a Siryà. Pobə lə̀ kɨ pìʼnə̀ a nɨ lèrə̀, Pàolò a tsə̀əmə̀ a mbyə̀ Nẅùə̀, nkoomə̀ àtwuə̀ e a Sènkreyà. 19Pobə lə̀ pyàa a Efesòsə̀, Pàolò a myàʼtə̀ a Prìsilà pobə Aquila a alyiʼə ghu, ndèrə̀ amwuə ndâ àshwatə̀ pɨ̀Jew ntyiʼə̀ nshwəŋə̀ ànwùə̀ Nẅùə̀ pobə pɨ pobə. 20Pobə lə̀ tàʼà lo pobə pɨ pobə chi nchyə̂ aŋunə ndùnə̀ ɨ̀tse la a twuunə̀ e. 21Nkwùə̀ nɨ à lə̀ mənə myàʼtə̀ a ghobə, à lə̀ kàʼà a ghobə lo, “Ngǎ kẅirə̀ tô mbə̀ʼə Nẅùə̀ a pyiimə̀.” A shwəŋə̀ a lenə la, nkwuunə̀ àkànwuʼə, nfurə̀ a Efesòsə̀. 22Nkwùə̀ nɨ à lə̀ twuumə̀nə mbyàa a Kàsaryà, à lə̀ koʼò ndèrə̀ a Yèrusalèmə̀ nchàʼtə̀ a àshwatə̀ ɨ̀poonə̀ pɨ Kristù mbòŋə̀ shwuʼə̀ a Antyòkə̀. 23A lə̀ chyə̂ ghu aŋunə mɨ̀njyə̂ mɨ̀tse nfurə̀ ghu ndèrə̀ a pàa àlaʼà Galatia pobə Frijyà, ngyìinə̀ mbə̀ʼkə̀ mɨ̀ntɨŋmə̀ ɨ̀zùŋə̀ ndzùmə̀ Kristù.

Àpolòsə̀ amwuə Efesòsə̀ ghobə Korìntə̀

24Ŋwùə̀ pɨ̀Jew ɨ̀tse a lə̀ pə ghu, nɨ̀linə̀ ɨ̀tse pə Àpolòsə̀, nɨ pɨ lə̀ pyə̂nə e a Àlèzandryà, a tô a Efesòsə̀. A lə̀ mə nshwəŋnə̀ ɨ̀shìʼnə̀ nkɨ nzhyə̂ a àŋwàʼnə̀ Nẅùə̀ tyiʼə̀ ɨ̀shìʼnə̀. 25Pɨ lə̀ nèrə̀ mə e nɨ àlàŋə a nɨ zùŋə̀ a Ndòʼnə̀mbyə̂, a kɨ mə ndzùŋə̀ a zèrə. A lə̀ shwəŋnə̀ nkɨ nnèrə̀ mɨ̀nwùə̀ mbə̀ʼə Yěsû. La nzhyə̂ e pə ànwùə̀ mbə̀ʼə àkẅiirə̀ nchyə Jònə. 26A lə̀ pìʼnə̀ a nɨ shwəŋnə̀ nɨ mɨ̀tɨ̀ŋnə̀ amwuə ndâ àshwatə̀ pɨ̀Jew. Nkwùə̀ nɨ Aquila ghobə Prìsilà lə̀ zuʼnə e, pobə lə̀ lòo e ndèrə̀ a ndâ pobə, nchi ntiitə̀ e nɨ ndwuumə̀ nɨ mbə̀ʼə a chi shwəŋnə̀ mbə̀ʼə Nẅùə̀. 27Nkwùə̀ nɨ Àpolòsə̀ à lə̀ tàʼnə lo lèrə̀ e a Àkayà, ɨ̀zùŋə̀ ndzùmə̀ Kristù lə̀ ŋwàʼnə̀ ambo pyə̀ ɨ̀zùŋə̀ ndzùmə̀ Kristù a Àkayà, ntompə̀ lo pɨ̀ kẅiirə̀ e ɨ̀shìʼnə̀. Nkwùə̀ nɨ à lə̀ kwuunə̀nə ghu, à lə̀ tyiʼə̀ mbə ngàŋə̀ àyèmpə̀ ghù ntɨ̀ŋnə̀ ambo pànə̀ nɨ pɨ lə̀ nùŋə̀nə ntɨŋmə̀ ɨ̀ghobə aŋunə Kristù ndàŋə̀ a ndzùmə̀ àpòŋə̀ ntɨŋmə̀ Nẅùə̀. 28Ntiinə à lə̀ shwəŋə̀nə a sàŋə̀ sàŋə̀ nɨ ɨ̀tɨ̀ŋnə̀ a nɨ nèrə̀ a nkǔŋə nkuŋə ambo pɨ̀Jew amwuə àŋwàʼnə̀ Nẅùə̀ lo Yěsû la Ghù Ndzoʼnə wa.

Currently Selected:

Ɨ̀fàʼà 18: pny

Highlight

Copy