Ɨ̀fàʼà 16

Timotì a lèrə̀ pobə Pàolò nɨ Salàsə̀

1Pàolò à lə̀ pyàa a Derbe pobə Lystra ntsirə̀ a àzùŋə̀ ndzùmə̀ Kristù nɨ pɨ lə̀ mənə nfuŋə̀ e nɨ Timotì. Mǎ e à lə̀ pə ŋwùə̀ pɨ̀Jew nɨ à lə̀ nùŋə̀nə ntɨŋmə̀ e aŋunə Yěsû, la tǎ ɨghobə a pə ŋwùə̀ pɨ̀Greek. 2Pɨlyimə pɨ̀tsùmə̀ a ndzùmə̀ Yěsû Kristù lə̀ mə nshwəŋnə̀ ɨ̀shìʼnə̀ mbə̀ʼə mbòomə Timotì. 3Pàolò à lə̀ mə ntàʼà a nɨ lòo a Timotì pobə pɨ pobə lèrə̀, lenəla ndzàamə̀ ndzə̀ərə̀ e zaʼà. À lə̀ ghɨ̀rə̀ a lenə la ntiinə pɨ̀Jew nɨ pɨ lə̀ mənə nchyə̂ alyiʼə ghu lə̀ zhyə̂ lo tǎ pɨ Timotì a ŋwùə̀ pɨ̀Greek. 4Tsaʼnə pobə lə̀ yìinə̀nə ndàŋə̀ amwuə mɨ̀mbòmpə mɨ ɨ̀laʼà, pobə lə̀ mə ngyìinə̀ ntiitə̀ mɨ̀nwùə̀ nɨ ngàŋə ntwuumə̀ Yěsû pobə pɨ̀lɨ̀ŋmə̂ a Yèrusalèmə̀ lə̀ nwuunə̀nə mbyiimə̀ lo pɨ̀ tyiʼə̀ ngɨ̀rə̀. 5Lenəla ɨ̀shwatə̀ ɨ̀poonə̀ pɨ Kristù lə̀ làŋə̀ nɨ mbyə̀ ntyiʼə̀ nnùŋə̀ mɨ̀ntɨŋmə̀ ɨ̀mobə aŋunə Yěsû. Pànə̀ pɨ̀noʼnə tyiʼə̀ nkẅìʼnə̀ amwuə ɨ̀shwatə̀ ɨ̀poonə̀ pɨ Kristù, ɨ̀shwatə̀ pɨ̀ghu tyiʼə̀ nkẅùə̀ njyə̂ ɨ̀tsùmə̀.

Pàolò a lyə̂ ndzə̀əmə̀ mbə̀ʼə ŋwùə̀ Màsèdonyà

6Pobə lə̀ làŋə̀ alyiʼə àtsùmə̀ a Frijyà pobə Galatia, ka shwəŋə̀ a ghobə ànwùə̀ àtse ntiinə Àzhwùə̀ Nẅùə̀ a lə̀ nàanə̀ lo kò pobə shwəŋə̀ a ghobə ànwùə̀ àtse amwuə àlaʼà Asia. 7Nkwùə̀ nɨ pobə lə̀ làŋə̀nə a Mysia, pobə lə̀ tàʼà a nɨ kwuunə̀ a Bithynia, la Àzhwùə̀ a Yěsû ka a pyiimə̀ e. 8Lenəla, pobə tyiʼə̀ ndàŋə̀ a nɨ̀pwùnə Mysia nshwuʼə̀ ndèrə̀ a Troas. 9A pə amwuə ɨ̀twuʼə̀ ghu, ndzə̀əmə̀ ɨ̀ làŋə̀ a ɨ̀myə̂ Pàolò a zəənə̀ a ŋwùə̀ Màsèdonyà a təəmə̀ mmə ndoonə̀ e nshwəŋə̀ ambo ze lo, “Twuumə̀ ntô a Màsèdonyà ngyèmpə̀ a wəə.” 10Tsaʼnə ndzə̀əmə̀ zə̀ ɨ̀ lə̀ làŋə̀nə a ɨ̀myə̂ Pàolò la, pəə lə̀ zùŋə̀ nchwuʼtə̀ mbɨ̀ŋmə̀ ɨ̀zəə a nɨ lèrə̀ a Màsèdonyà ntiinə pəə lə̀ zəənə̀ lo Nẅùə̀ à fuŋə̀ a wəə lo pəə tô nchwìitə̀ ntwuumə̀ ghù ɨ̀shìʼnə̀ ambo pànə̀ nɨ pɨ pənə ghu. 11Pəə lə̀ furə̀ a Troas nkwuunə̀ àpaŋə̀ ndèrə̀ a Samotrèsə̀. Njyə̂ ɨ̀ tyiʼə̀ ndaanə̀ pəə lèrə̀ a Napolìsə̀, 12nfurə̀ alyiʼə ghu ndèrə̀ a Filipì nɨ à lə̀ pənə ntsàambyə̀ mbòmpə àlaʼà ngẅùunə amwuə Màsèdonyà. Pɨ̀Roman lə̀ mə mbuʼtə̀ mbòmpə àlaʼà zə̀. Pəə lə̀ chyə̂ amwuə mbòmpə àlaʼà ngẅùunə zə̀ aŋunə mɨ̀njyə̂ mɨ̀tse.

Lydia a pə̀ŋə̀ ntɨŋmə̀ e ndzùŋə̀ a Kristù

13A pə njyə̂ àlaʼà, pəə furə̀ a ntswùə̀ àpùʼù mbòmpə àlaʼà ngẅùunə za ndèrə̀ a ntswùə̀ nchyə, alyiʼə nɨ pəə lə̀ mənə nzhyə̂ lo pəə pɨ zəənə̀ alyiʼə yè chàʼtə̀nə a Nẅùə̀. Lenəla pəə nwuunə̀ a ɨ̀shyə̂ mbìʼnə̀ a nɨ shwəŋnə̀ ambo pə̀ngyə̌ pɨ̀tse nɨ lə̀ shwatə̀nə alyiʼə ghu. 14Taʼà mə̀ngyə̌ ɨ̀tse nɨ a lə̀ pənə nzhwiʼtə̀ ànwùə̀ nɨ pəə lə̀ mənə nshwəŋə̀ a lə̀ pə Lydia, nfurə̀ a Tyatirà, mmə shwùunə̀ ɨtsəʼə pɨ̀pùgrə̀nə, nkɨ mmə nsəəkə̀ a Nẅùə̀. 15Nkwùə̀ nɨ pobə pɨ ngẅàrə̀ ndâ e lə̀ kẅiirə̀nə nchyə, à lə̀ fuŋə̀ a wəə a ndâ ze nshwəŋə̀ lo, “Nɨ̀ tô nchyə̂ a ndâ mɨ̀ŋə̀ mbə̀ʼə nɨ pəla ndzəənə̀ lo ǹnùŋə̀ ntɨŋmə̀ mə̀ aŋunə Ndòʼnə̀mbyə̂.” Lenəla, mbuʼù mbô lo pəə tô.

Pɨ chyâ a Pàolò pobə Salàsə̀ a ndâ ɨ̀tsaŋə̀ a Filipì

16A lə̀ pə njyə̂ ɨ̀tse pəə mə ndèrə̀ alyiʼə yè chàʼtə̀nə a Nẅùə̀, ntsirə̀ a mômə̀ngyə̌ ɨ̀tse nɨ à lə̀ pənə àpùʼù, mmə nkwabə̀ àngaamə nkɨ mmə ntiitə̀ mɨ̀nwùə̀ nɨ mɨ tô ghɨ̀rə̀. À lə̀ fùʼù nkabə̀ yɨ̀noʼnə ambo pànə̀ nɨ pɨ lə̀ twuʼtə̀nə e. 17Mômə̀ngyə̌ wə̀ à lə̀ zùŋə̀ a wəə pɨ Pàolò nkyiinə̀ nshwəŋə̀ lo, “Pànə̀ pə a ngàŋə àfàʼà Nẅùə̀ Àkoʼntsirə̀ nɨ pobə tiitə̀ a wɨghə nɨ àlàŋə nɨ mbə̀ʼə nɨ̀ làŋə̀ ghu nchwarə̀.” 18A lə̀ ghɨ̀rə̀ ànwùə̀ zə aŋunə mɨ̀njyə̂ mɨ̀noʼnə tə ntɨŋmə̀ Pàolò ɨ zaŋə̀, a pə̀ŋə̀ nshwəŋə̀ ambo Àzhwùə̀ za lo, “nshwəŋə̀ ambo ghò lo wə̀ furə̀ amwuə mômə̀ngyə̌ wə̀ aŋunə nɨ̀linə̀ nɨ Yěsû Kristù!” Tyiʼə̀ nkwùə̀ ghu, Àzhwùə̀ za a zùŋə̀ nfurə̀.

19Nkwùə̀ nɨ pànə̀ nɨ mômə̀ngyə̌ wə̀ a lə̀ fàʼnə àpùʼù ambo pobə lə̀ zəənə̀nə lo ka mômə̀ngyə̌ wə̀ a pirə̀ mmə nfùʼù e nkabə̀ ŋŋâ ambo pobə, pobə lə̀ kô Pàolò pobə Salàsə̀ nsùŋə̀ a ghobə ndèrə̀ a mbyə̀ pɨ̀tǎ pɨ àlaʼà alyiʼə mɨ̀tàanə. 20Nkwùə̀ nɨ pɨ lòonə a ghobə ntô a mbyə̀ pɨ̀saʼà mɨ̀sàʼa, pobə lə̀ shwəŋə̀ lo, “Pànə̀ pə̀ a pɨ̀Jew. Pobə pə mmàʼà àzhwàʼà amwuə mbòmpə àlaʼà yɨ̀ ngẅùunə zə. 21Pobə pə ntàʼà lo pəə ghɨ̀rə̀ mɨ̀nwùə̀ nɨ ka pəə pànə̀ pɨ Romə̀ ghɨ̀rə̀ a wəə.”

22Àpùŋə̀ pə̀ənə̀ a lə̀ pwuutə̀ a ghobə a nɨ puʼù a Pàolò pobə Salàsə̀. Lenəla, pɨ̀saʼà mɨ̀sàʼa sìitə̀ ɨtsəʼə Pàolò pobə Salàsə̀ nshwəŋə̀ ambo pobə lo pobə kəʼə̀ a Pàolò pobə Salàsə̀ nɨ mɨ̀ngwàanə̀. 23Nkwùə̀ nɨ pɨ lə̀ kəʼnə a ghobə ɨ̀shìʼnə̀, pɨ lə̀ chyâ a ghobə a ndâ ɨ̀tsaŋə̀, ntyiʼə̀ nshwəŋə̀ ambo mbyabə̀ ɨ̀tsaŋə̀ lo a fɨ̀ŋnə̀ a ghobə ɨ̀shìʼnə̀. 24Tsaʼnə à lə̀ kẅiirə̀nə ntwuumə̀ wə̀, a lə̀ chyâ a ghobə amwuə ɨ̀tsaŋə̀ nɨ ɨ mìnə̀nə, nchyâ pɨ̀kɨ̀pùʼù a mɨ̀kwùə̀ pobə.

25A lə̀ kɨ pə a ntɨ̀ŋnə̀ ɨ̀twuʼə̀, Pàolò pobə Salàsə̀ mmə nchàʼtə̀ a Nẅùə̀ ndzòbə̀ mɨnchyə, zhyə̀ ngàŋə ɨ̀tsaŋə̀ tyiʼə̀ mmə nzhwiʼtə̀. 26Nkɨ wùutə̀ ɨ̀shyə̂ pìʼnə̀ a nɨ nə̀ʼnə̀, lenəla àtsirə̀ ndâ a kɨ nnə̀ʼnə̀. Mɨ̀ntswùə̀ mɨ ndâ zùŋə̀ ngẅùʼnə̀. Mɨ̀tsaŋə̀ mɨ ŋwùə̀ ntsùmə̀ zùŋə̀ nkyàatə̀. 27Nkwùə̀ nɨ mbyabə̀ ɨ̀tsaŋə̀ a lə̀ lòonə a ɨ̀shyə̂ ndzəənə̀ lo mɨ̀ntswùə̀ mɨ̀ndâ mɨ ɨ̀tsaŋə̀ mɨ̀tsùmə̀ mə mɨ ẅùʼnə, a lə̀ tsoʼò a mɨnẅuə e ntàʼà lo zhwuutə̀ mbɨ̀ŋmə̀ e, mmə nkwàŋə̀ lo ngàŋə ɨ̀tsaŋə̀ ɨ̀tsùmə̀ kɨ̀ɨrə̀. 28La Pàolò a kyiinə̀ nɨ ngyə̀ ntɨ̀ŋnə̀ nshwəŋə̀ lo, “Kò wə̀ zhwuutə̀ mbɨ̀ŋmə̀ o ntiinə pəə pə a nɨ̀ghə̂.”

29Mbyabə̀ ɨ̀tsaŋə̀ wa à lə̀ fuŋə̀ lo pɨ̀ lòo nkàʼà ntô nɨ ẅèrə. Lenəla, a tyiʼə̀ ndòo ẅèrə ngyìinə̀ nkɨ̀ɨrə̀ ngwùrə̀, nkwuunə̀ nkunə̀ a mɨ̀kwùə̀ Pàolò pobə Salàsə̀, 30ndòo a ghobə nfurə̀ a àpyìinə, mbyiitə̀ ambo pobə lo, “Masàa, mbə̀ʼə ngɨ̀rə̀ la ɨla mbòŋə̀ chwarə̀?”

31Pobə kẅùə̀ ambo ze lo, “Nùŋə̀ ntɨŋmə̀ o aŋunə Ndòʼnə̀mbyə̂ Yěsû mbə̀ʼə Nẅùə̀ a chwarə̀ o pɨghə pɨ ngẅàrə̀ o.” 32Pobə tyiʼə̀ nchwìitə̀ ntwuumə̀ Ndòʼnə̀mbyə̂ ambo ze pobə pɨ ngẅàrə̀ e a ndâ ze. 33Tyìʼə̀ nkwùə̀ ghu, amwuə ɨ̀twuʼə̀ ghu, ɨ̀mbyabə̀ ɨ̀tsaŋə̀ wa a lòo a ghobə nsùu ɨ̀lǎ ɨ̀pobə, ndzùŋə̀ nkẅiirə̀ nchyə pobə pɨ ngẅàrə̀ e. 34À lə̀ lòo a Pàolò pobə Salàsə̀ nkoʼò ndèrə̀ a ndâ ze, ŋŋâ mɨ̀zɨghə̀ ambo pobə lo pobə̂ zɨghə̀. À lə̀ pə nɨ nɨ̀ghaʼà pobə pɨ ngẅàrə̀ e ntiinə pobə lə̀ nùŋə̀nə mɨ̀ntɨŋmə̀ ɨ̀mobə aŋunə Nẅùə̀. 35Njyə̂ ɨ̀ lə̀ laanə̀, pɨ̀fò pɨ korə̀ tsàa pɨ̀pwùrəshyə̀ nɨ ntwuumə̀ ambo mbyabə̀ ɨ̀tsaŋə̀ wa lo a myàʼtə̀ pànə̀ pa pobə lèrə̀. 36Tsaʼnə pobə lə̀ shwəŋə̀nə la, mbyabə̀ ɨ̀tsaŋə̀ wa a shwəŋə̀ ambo Pàolò lo pɨ̀fò pɨ korə̀ shwəŋə̀ lo pɨ myàʼtə̀ a wɨghə nɨ̀ lèrə̀. Njiilo nɨ̀ furə̀ ndèrə̀ àporə̀porə̀. 37La Pàolò a shwəŋə̀ ambo pɨ̀pwùrəshyə̀ pa lo, “Pɨ lə̀ puʼù a wəə a ɨ̀myə̂ pə̀ənə̀ la ka pəə zhyə̂ a wəə ànwùə̀ nɨ pəə wɨ̀ghə̀nə. Mbaa pə tsaʼnə pəə kɨnə mbə àzəə pànə̀ pɨ Romə̀, pɨ chyâ a wəə a ndâ ɨ̀tsaŋə̀. Tɨ̀tsòŋə̀ wə̀ pobə tyiʼə̀ ntàʼà fuukə̀ a wəə pə tɨ ghu pànə̀ zhyə̂? Ngaŋə! Pobə tô pobə nfuukə̀ a wəə.”

38Pɨ̀pwùrəshyə̀ lə̀ ghə̀ nshwəŋə̀ ànwùə̀ zèrə zə ambo pɨ̀fò pɨ korə̀. Lenəla, pobə pô nkwùə̀ nɨ pobə lə̀ zuʼnə lo Pàolò pobə Salàsə̀ kɨ mbəla pànə̀ pɨ Romə̀. 39Pobə lə̀ puʼù mbô ambo Pàolò pobə Salàsə̀ nfuukə̀ a ghobə a ndâ ɨ̀tsaŋə̀ gha, ntyiʼə̀ nshwəŋə̀ lo pobə̂ furə̀ amwuə mbòmpə àlaʼà ngẅùunə za ndèrə̀ a ghobə. 40Nkwùə̀ nɨ Pàolò pobə Salàsə̀ lə̀ furə̀nə a ndâ ɨ̀tsaŋə̀, pobə lə̀ lèrə̀ a ndâ Lydia, alyiʼə nɨ pobə lə̀ tsirə̀nə pɨlyimə ɨ̀pobə mborəkə̀ mɨ̀ntɨŋmə̀ ɨ̀mobə ndzùŋə̀ myàʼtə̀ a ghobə ndèrə̀.

Currently Selected:

Ɨ̀fàʼà 16: pny

Highlight

Copy