Ɨ̀fàʼà 15
15
Àshwatə̀ ɨ̀poonə̀ pɨ Nẅùə̀ a Yèrusalèmə̀
1Pànə̀ pɨ̀tse lə̀ furə̀ a Judyà nshwuʼə̀ a Antyòkə̀, mbìʼnə̀ a nɨ nèrə̀ mɨ̀nwùə̀ ambo ɨ̀poonə̀ pɨ Kristù lo, “Pɨ tɨ ngoŋə̀ e a ghobə tɨ zə̀ərə̀ a nɨ zùŋə̀ a mbòomə Mǔsî, pobə laʼa nchwarə̀ a ghobə apə̀.” 2Pàolò pobə Barnabas lə̀ tànkə̀ pobə pɨ pobə ka mɨ̀zùŋə. Lenəla, pobə tyiʼə̀ ntyankə̀ lo Pàolò pobə Barnabas nɨ pɨ̀tse ɨ̀poonə̀ pɨ Kristù koʼò ndèrə̀ a Yèrusalèmə̀ ngə̀ ntsirə̀ ngàŋə ntwuumə̀ Kristù pobə ɨ̀twuə̀ Ndâ Nẅùə̀ mbyiitə̀ a ghobə nɨ ànwùə̀ ghu. 3Tsaʼnə Àshwatə̀ ɨ̀poonə̀ pɨ Kristù a lə̀ tsàanə a ghobə lo pobə̂ lèrə̀ la, pobə lə̀ làŋə̀ a Fònisyà pobə Sàmariyà ntyiʼə̀ ngyìinə̀ nchwìitə̀ tsaʼnə pànə̀ pɨ ɨ̀laʼà pɨ̀nyaanə pyiimə̀nə a Nẅùə̀. Ànwùə̀ zèrə zə̀ a lə̀ ghɨ̀rə̀ mɨ̀ntɨŋmə̀ mɨ ɨ̀poonə̀ pɨ Kristù pə nɨ nɨ̀ghaʼà. 4Pobə lə̀ ghə̀ nkwuunə̀ a Yèrusalèmə̀, Àshwatə̀ ɨ̀poonə̀ pɨ Kristù pobə pɨ ngàŋə ntwuumə̀ Kristù nɨ ɨ̀twuə̀ Ndâ Nẅùə̀ kẅiirə̀ a ghobə nɨ nɨ̀ghaʼà, pobə tyiʼə̀ ntiitə̀ mɨ̀nwùə̀ mɨ̀tsùmə̀ nɨ Nẅùə̀ a ghɨ̀rə̀nə ndàŋə̀ a ndzùmə̀ pobə ambo pobə. 5La ngàŋə àpyiimə̀ Yěsû nɨ lə̀ pənə pɨ̀Farìsî lə̀ lòo a ɨ̀shyə̂ nshwəŋə̀ lo, “A chyə̂ lo pə̀ənə̀ zə̀ərə̀ a ghobə, ngɨ̀rə̀ pobə zuʼnə̀ mɨ̀ntə̌ mɨ Mǔsî.”
6Ngàŋə ntwuumə̀ Yěsû pobə ɨ̀twuə̀ Àshwatə̀ ɨ̀poonə̀ pɨ Kristù lə̀ nwuunə̀ a ɨ̀shyə̂ a nɨ naŋə̀ tsaʼnə mbə̀ʼə pɨ ghɨ̀rə̀ aŋunə ànwùə̀ ghu. 7Pobə lə̀ tànkə̀ aŋunə ntyə̌ sàa, Pità a tyiʼə̀ ndòo a ɨ̀shyə̂ nshwəŋə̀ lo, “pɨlyimə ɨ̀pâ, nɨ̀ zhyə̂ lo nkwùə̀ nɨ pə̀ənə̀ lə̀ pirə̀nə mbìʼnə̀, Nẅùə̀ a lə̀ tsoʼò mə̀ amwuə pɨghə lo ntə nchwìitə̀ ntwuumə̀ ghù ɨ̀shìʼnə̀ ambo pànə̀ nɨ ka pɨ pə ghobə pɨ̀Jew lo pobə nùŋə̀ mɨ̀ntɨŋmə̀ ɨ̀mobə aŋunə Yěsû. 8La Nẅùə̀ wa nɨ a zhyə̂nə ànwùə̀ àtsùmə̀ nɨ a pənə a ntɨŋmə̀ ŋwùə̀ la, a tyiʼə̀ ŋŋâ Àzhwùə̀ Nẅùə̀ ambo pànə̀ pa nɨ ka pobə pə ghobə pɨ̀Jew tsaʼnə a lə̀ kɨnə ŋŋâ ambo pə̀ənə̀ la. 9Ka Nẅùə̀ a lə̀ nèrə̀ a tə̀chwìi ɨ̀tse a tɨ̀tɨ̀rə̀ pə̀ənə̀ pɨ pobə, la nsùu mɨ̀ntɨŋmə̀ ɨ̀mobə mɨ laanə̀ ndàŋə̀ a ndzùmə̀ àpyiimə̀ ntɨŋmə̀ àzobə aŋunə Yěsû. 10A tyiʼə̀ ngɨ̀rə̀ àkə lo nɨ̀ tə̂ àpìʼì za zhyə̀ nɨ mbə̀ʼə ka pɨ̀tǎ pɨ̀tǎ ɨ̀pə̀ənə̀ farə a wəənə̀ lə̀ pìʼì e àtwuə̀ ɨ̀zùŋə̀ ndzùmə̀ Kristù? 11Ngaŋə! Pəə pyiimə̀ lo pəə ghǎ chwarə̀ ntii àpòŋə̀ ntɨŋmə̀ Ndòʼnə̀mbyə̂ Yěsû Kristù tyìʼə̀ tsaʼnə pobə ghǎ kɨ chwarə̀ àzobə.”
12Pànə̀ pɨ̀tsùmə̀ lə̀ zhwemnə̀ nɨ tuʼu ntyiʼə̀ mmə nzhwiʼtə̀ ànwùə̀ nɨ Barnabas pobə Pàolò lə̀ mənə ntiitə̀ a ghobə mbə̀ʼə ɨ̀lènə̀ ɨ̀nwùə̀ pɨ̀yerə̀nə yerə̀nə pobə mɨ̀nwùə̀ mɨ kə̀ʼnə̀nə nɨ Nẅùə̀ a lə̀ ghɨ̀rə̀nə ambo Pànə̀ nɨ ka pobə pə ghobə pɨ̀Jew ndàŋə̀ a ndzùmə̀ pobə. 13Tsaʼnə pobə lə̀ myàanə̀nə a nɨ shwəŋnə̀ la, Jemə̀ a ŋaŋə̀ ngyə̀ e a àtɨ̀ghə nshwəŋə̀ lo, “Pɨlyimə ɨ̀pâ, nɨ zhwiʼtə̀ ndzuʼù ànwùə̀ nɨ mbɨ nshwəŋə̀. 14Simyònə̀ a tiitə̀nə mə tsaʼnə Nẅùə̀ a lə̀ zàamə̀nə nnèrə̀ ɨ̀kòŋnə̀ e aŋunə pànə̀ pyə̀ nɨ ka pobə pə ghobə pɨ̀Jew, ntsoʼò a pɨ̀tse amwuə ngɨ̀rə̀ pə̀ənə̀ ɨ̀pe ghu. 15Zèrə zə̀ ànwùə̀ a lə̀ pwùumə̀ pobə pɨ zhyə̀ nɨ ngàŋə ntwuumə̀ Nẅùə̀ lə̀ ŋwàʼnə̀nə amwuə àŋwàʼnə̀ Nẅùə̀ lo,
16‘Tsaʼnə zèrə zə̀ ànwùə̀ a pɨ làŋə̀,
mbɨ kẅirə̀ tô korə̀ ndâ Dàfirə̀ nɨ ɨ̀ lə̀ shàʼtə̀nə nkẅìnə̀.
Lenəla kẅirə̀ korə̀ a zèrə
zèrə̀ kẅirə̀ ntɨ̀ŋnə̀.
17Lenəla, àpwùʼə̀ pə̀ənə̌ tàʼà Ndòʼnə̀mbyə̂,
farə pànə̀ pyə̀ nɨ ka pobə pə ghobə pɨ̀Jew la mbə pə̀ənə̀ ɨ̀pâ.
18Lə̌ tsaʼnə Ndòʼnə̀mbyə̂ nɨ à lə̀ ghɨ̀rə̀nə mɨ̀nwùə̀ nkwùə̀ ntsàambyə̀ à shwəŋə̀nə.’”
19Jemə̀ a làŋə̀ nɨ mbyə̀ nshwəŋə̀ lo, “Nkwàŋə̀ àzâ pə lo, kò pə̀ənə̀ tə ŋŋâ ngəʼə̀ ambo pànə̀ nɨ ka pobə pə ghobə pɨ̀Jew, pyə̀ nɨ pobə pə mbə̀ŋə̀ ntô ambo Nẅùə̀. 20A pə a lenə, pə̀ənə̀ ŋwàʼnə̀ pə àŋwàʼnə̀ ŋŋâ ambo pobə nkwàtə̀ a ghobə lo kò pobə zɨghə̀ a ghobə mɨ̀zɨghə̀ nɨ pɨ zàamə̀nə ŋŋâ ambo pɨ̀tɨtoo, kò pobə tə ndzɨghə̀ àpyìinə, kò pobə tə nkwurə̀ mbòbə̀ nɨ ka pɨ kyiimə̀ e, kə̀ àləəmə̀ àtse. 21A lə̀ pə a lenə lə ntiinə pɨ lə̀ kwaa mbìʼnə̀ a nɨ nèrə̀ a mbòomə Mǔsî amwuə mɨ̀mbòmpə mɨ àlaʼà mɨ̀tsùmə̀, ŋŋwàʼnə̀ a pèrə aŋunə mɨ̀njyə̂ mɨ àlaʼà pɨ̀Jew ŋŋâ pɨ mə nfuŋə̀ amwuə mɨ̀ndâ mɨ ɨ̀shwatə̀ pɨ̀Jew.”
Àŋwàʼnə̀ nɨ pɨ lə̀ ŋwàʼnə̀nə ambo pànə̀ nɨ ka pobə pə ghobə pɨ̀Jew
22Lenəla, ngàŋə ntwuumə̀ Yěsû, pobə pɨ ɨ̀twuə̀ Àshwatə̀ ɨ̀poonə̀ pɨ Kristù, farə Àshwatə̀ ɨ̀poonə̀ pɨ Kristù àtsùmə̀ zəənə̀ lo pɨ tsoʼò pànə̀ pɨ̀tse amwuə pobə lo pobə lèrə̀ pobə pɨ Pàolò nɨ Barnabas a Antyòkə̀. Pɨ lə̀ tsoʼò a Yudà nɨ pɨ lə̀ mənə nfuŋə̀ e nɨ Barsabbas pobə Salàsə̀ nɨ pobə lə̀ pənə pɨ̀lùŋə̀ pɨ mbyə̀ amwuə pɨlyimə ɨ̀pobə. 23Lə̌ àŋwàʼnə̀ nɨ pobə lə̀ lòonə ndèrə̀, “A pəə ngàŋə ntwuumə̀ Yěsû nɨ pɨlyimə ɨ̀pɨghə ɨ̀twuə̀ Àshwatə̀ ɨ̀poonə̀ pɨ Kristù nɨ pəə pɨ̀tsùmə̀ pənə pɨlyimə ɨ̀pɨghə, ntsàa a àchàʼtə̀ ambo pɨghə, pɨlyimə ɨ̀pəə, pànə̀ nɨ ka pobə pə ghobə pɨ̀Jew nɨ nɨ̀ pənə a Antyòkə̀, mbə a Siryà, nkɨ mbə Sìlisyà. 24Pəə zuʼù lo pànə̀ pɨ̀tse amwuə pəə furə̀ ntô ntə nshwəŋə̀ mbuurə̀ mɨ̀nwùə̀ mɨ̀tse nzhwàʼà ɨ̀twuə̀ ɨ̀pɨghə, mbaa pə tsaʼnə ka pəə kɨ ntwuumə̀ a wəə a ghobə lo pobə̂ tô nshwəŋə̀ ànwùə̀ àtse ambo pɨghə, 25Lenəla, pəə pɨ pobə pɨ̀tsùmə̀ lə̀ nwuunə̀ a ɨ̀shyə̂ mbyiimə̀ lo, a pòŋə̀ lo pə̀ənə̀ tsoʼò pànə̀ pɨ̀tse lo pobə lèrə̀ pobə pɨ Barnabas nɨ Pàolò. 26Pànə̀ pə̀ pɨpaa lə̀ pyiimə̀ lo kwɨghə̀ ntii Ndòʼnə̀mbyə̂ Yěsû Kristù. 27Pəə tyiʼə̀ ntsàa a Yudà pobə Salàsə̀ nɨ pobə tô shwəŋə̀ ànwùə̀ a ghu ambo pɨghə nɨ ntswùə̀ ɨ̀ghobə. 28Pəə pɨ Àzhwùə̀ Nẅùə̀ naŋə̀ ndzəənə̀ lo ka a pòŋə̀ e lo pɨ tə̂ àpìʼì yè lìrə̀nə àtwuə̀ pɨghə ndàŋə̀ e mɨ̀nwùə̀ mɨ ɨ̀shìʼnə̀ mə lo, 29nɨ tsoʼò mbô ɨ̀mɨghə aŋunə ɨ̀pwuumə̀ nɨ pɨ ŋânə ambo pɨ̀titoo, kò nɨ̀ zɨghə̀ àləəmə̀, kò nɨ̀ kɨ ndzɨghə̀ àpyìinə. Nɨ̀ lə waʼà wɨghə tɨ mə ngɨ̀rə̀ mɨ̀nwùə̀ mə nɨ̀ chyə̂ ɨ̀shìʼnə̀.
“Nɨ̀ tyiʼə̀ nnwuunə̀ ɨ̀shìʼnə̀.”
30Nkwùə̀ nɨ pɨ lə̀ tsàanə a ghobə la, pobə lə̀ shwuʼə̀ ndèrə̀ a Antyòkə̀, nshwatə̀ ɨ̀poonə̀ pɨ Nẅùə̀ a taʼà alyiʼə ŋŋâ a ghobə nɨ àŋwàʼnə̀ ghu. 31Nkwùə̀ nɨ pobə lə̀ fuŋə̀nə àŋwàʼnə̀ zə, mɨ̀ntɨŋmə̀ ɨ̀mobə lə̀ lẅenə̀ nɨ nɨ̀ghaʼà, ntiinə ànwùə̀ nɨ a lə̀ furə̀nə amwuə àŋwàʼnə̀ ghu a lə̀ pə̀ʼkə̀ mɨ̀ntɨŋmə̀ ɨ̀mobə. 32Yudà pobə Salàsə̀ nɨ pobə lə̀ kɨnə mbə ngàŋə ntwuumə̀ Nẅùə̀ lə̀ pə̀ʼkə̀ mɨ̀ntɨŋmə̀ mɨ pɨlyimə nɨ ɨ̀shwəŋnə̀ pɨ̀noʼnə nkɨ ŋŋâ a ghobə nɨ ɨ̀tɨ̀ŋnə̀. 33Tsaʼnə pobə lə̀ chyə̂nə ghu aŋunə nkwùə̀ ɨ̀tse, ɨ̀poonə̀ pɨ Kristù lə̀ ghə̀ nchàanə̀ a ghobə nɨ àporə̀porə̀ lo pobə̂ kẅirə̀ ndèrə̀ ngə̀ ntsirə̀ a pyə̀ ɨ̀poonə̀ pɨ Kristù nɨ pɨ lə̀ twuumə̀nə a ghobə. 34[La Salàsə̀ à lə̀ ghoŋə̀ e ghu] 35La Pàolò pobə Barnabas lə̀ ghoŋə̀ a Antyòkə̀ pobə pɨ̀tse ɨ̀poonə̀ pɨ Nẅùə̀ pɨ̀noʼnə mmə nchwìitə̀ nkɨ mmə nnèrə̀ ntwuumə̀ Ndòʼnə̀mbyə̂.
Pàolò pobə Barnabas sìimə̀
36Mɨ̀njyə̂ mɨ̀tse lə̀ làŋə̀, Pàolò a shwəŋə̀ ambo Barnabas lo, “Ghɨ̀rə̀ pùu kẅirə̀ ngə̀ ngaanə̀ ɨ̀poonə̀ pɨ Nẅùə̀ amwuə mɨ̀mbòmpə mɨ ɨ̀laʼà mɨ̀tsùmə̀ nɨ pùu lə̀ chwìitə̀nə ntwuumə̀ Ndòʼnə̀mbyə̂, ndzəənə̀ tsaʼnə pobə pənə.” 37Barnabas a lə̀ tàʼà lo Jònə Mark pobə pɨ pobə lèrə̀. 38La Pàolò a shwəŋə̀ a ze pə lo, ka a kùʼnə̀ e ntiinə Jònə Mark a lə̀ twuunə̀nə e a nɨ lèrə̀ pobə pɨ pobə a Pàmfilyà nkẅirə̀ e nɨ ndzùmə̀. 39Pobə lə̀ tànkə̀ ka mɨ̀zùŋə mbə a mɨ̀ntswùə̀ mɨ̀ntswùə̀, ka pə chi yìinə̀ a ghobə a taʼà àkwùə̀. Barnabas a tyiʼə̀ ndòo Jònə Mark pobə ze twuumə̀ amwuə àpaŋə̀ ndèrə̀ a Cyprùsə̀. 40La Pàolò a tyiʼə̀ ndòo àze pə a Salàsə̀. Ɨ̀poonə̀ pɨ Kristù chàʼtə̀ Nẅùə̀ àtwuə̀ pobə lo Ndòʼnə̀mbyə̂ â tə mbyabə̀ a ghobə. 41À lə̀ tyiʼə̀ ndàŋə̀ a Siryà pobə Sìlisyà ndə̀ʼtə̀ ɨ̀shwatə̀ ɨ̀poonə̀ pɨ Kristù alyiʼə a ghu ŋŋâ a ghobə nɨ mɨ̀tɨ̀ŋnə̀.
Currently Selected:
Ɨ̀fàʼà 15: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
