Иуан 17

ЯПШӀЫКӀУБЛЭНЭРЭШЪХЬ

Исус Тхьэм зэрелъэӀугъэр

1А гущыӀэхэр къызеӀохэм, Исус уашъом дэплъыий, къыӀуагъ:

– Сэ ся Т, игъо къэсыгъ. О п Къо ищытхъушхо цӀыфхэм ягъэлъэгъу, о п Къуи уищытхъушхо цӀыфхэм аригъэлъэгъуным пае. 2Сыда пӀомэ, цӀыф пстэуми тетыгъо афыриӀэнэу о п Къо ыӀэ ахэр иплъхьагъэх, о ащ ыӀэ иплъхьэгъэ цӀыф пстэуми мыкӀодыжьын щыӀэныгъэ аритыным пае. 3ЦӀыфхэм мыкӀодыжьын щыӀэныгъэ яӀэ зэрэхъурэ гъогур о Тхьэ шъыпкъэ закъор узэрашӀэщтри, о къэбгъэкӀогъэ Исус Христос зэрашӀэщтри ары. 4Сэ Ӏофэу згъэцэкӀэнэу спшъэ къиплъхьагъэр зэрэзгъэцэкӀагъэмкӀэ дунаим ицӀыфхэм о уищытхъушхо язгъэлъэгъугъ. 5Джы, ся Т, дунаир къэхъуным ыпэкӀэ, уадэжь щысиӀэгъэ щытхъушхом фэдэ щытхъушхо уадэжь щысиӀэ гъэхъу.

6– Дунаим яӀахь хэмылъынэу сӀэ къиплъхьэгъэ цӀыфмэ о уязгъэшӀагъ. Ахэр о уицӀыфыгъэх, сӀэ къиплъхьагъэх, уигущыӀэхэри агъэцэкӀагъэх. 7Сэ сӀэ къиплъхьагъэр зэкӀэ уадэжь къызэрикӀыгъэр ахэмэ джы ашӀэ; 8сыда пӀомэ, о сӀэ къиплъхьэгъэ гущыӀэхэр сэ ахэмэ аӀэ ислъхьажьыгъэх. Ахэмэ а гущыӀэхэр аштагъэх. Сэ о сызэрэпщыщым ишъыпкъагъэ зэрагъэшӀагъ, о сыкъызэрэбгъэкӀуагъэмкӀи шӀошъхъуныгъэ яӀэ хъугъэ. 9Сэ ахэмэ апае сыолъэӀу. Дунаим ицӀыфхэр арэп сыкъызфыолъэӀурэр, о сэ сӀэ къиплъхьэгъэ цӀыфхэр ары нахь, сыда пӀомэ, ахэр оуиех. 10ЦӀыфхэу сӀэ илъхэр зэкӀэри о уиех, уицӀыфхэри зэкӀэ сэ сиех. Ахэми сищытхъушхо агъэнафэ. 11Сэ джы дунаим сытетыжьыщтэп, ау ахэр джыри дунаим тетых. Сэ уадэжь сыкъэкӀожьыщт. Ся Тэ лъапӀ, о пцӀэу сэ къысэптыгъэм ыкӀуачӀэкӀэ ахэр къэухъумэх, оррэ сэррэ зы тызэрэхъурэм фэдэу, ахэри зы хъунхэм пае. 12Сэ ахэмэ сызырягъусэм, о пцӀэу къысэптыгъэм ыкӀуачӀэкӀэ ахэр къэсыухъумэщтыгъэх, сафэсакъыщтыгъ. КӀодын фэе цӀыфым#17:12 кӀодын фэе цӀыфыр – Иудэу Исус тетыгъо зиӀэхэм язгъэубытыгъэр ары. нэмыкӀ ахэмэ ащыщэу зи кӀодыгъэп, Тхьэм игущыӀэ тхыгъэхэр къэшъыпкъэжьынхэм пае.

13– Ау джы уадэжь сыкъэкӀожьыщт. Дунаим сытетыфэ, мы гущыӀэхэр къэсэӀох, сигушӀуагъо ахэмэ агухэм икъугъэу арылъ хъуным пае. 14О уигущыӀэхэр ахэмэ аӀэ ислъхьажьыгъэх. Сэ мы дунаим сызэрэщымыщым фэдэу, ахэри мы дунаим зэрэщымыщхэм пае, мы дунаим ицӀыфхэм ахэр ауджэгъугъэх. 15СыкъызэрэолъэӀурэр ахэр дунаим тепхыжьынхэр арэп, шэйтаным о щыуухъумэнхэр ары нахь. 16Сэ мы дунаим сызэрэщымыщым фэдэу, ахэри мы дунаим щыщхэп. 17Ахэмэ шъыпкъэмкӀэ зыкъыуатыжьынэу гъэхъу. О уигущыӀэхэр ары шъыпкъэхэр. 18О дунаим сыкъызэрэбгъэкӀуагъэм фэдэу, сэри ахэр дунаим згъэкӀуагъэх. 19Сэ ахэмэ яхьатыркӀэ зыкъыосэты, ахэми шъыпкъэу зыкъыуатыгъэ хъуным пае.

20– Ахэмэ язакъоп сэ сыкъызфыолъэӀурэр, ахэмэ ягущыӀэхэмкӀэ сэркӀэ шӀошъхъуныгъэ зиӀэ хъущт цӀыфхэми сакъыфыолъэӀу. 21Ахэри зэкӀэ зы орэхъух. О ся Тэ, сыгу уилъ зэпытэу, сэри о угу сызэрилъ зэпытым фэдэу, тэ ахэми агухэм тарылъ зэпытынэу сыкъыолъэӀу. Ащыгъум о сыкъызэрэбгъэкӀуагъэмкӀэ дунаим ицӀыфмэ шӀошъхъуныгъэ яӀэ хъущт. 22О сэ щытхъушхо сиӀэ зэрэбгъэхъугъэм фэдэу, сэри ахэмэ щытхъушхо яӀэ згъэхъугъэ, тэ тызэрэзым фэдэу, ахэри зы хъунхэм пае: 23сэ ахэмэ агухэм сарылъ зэпытэу, о сэ сыгу уилъ зэпытэу, шъыпкъэмкӀэ зы орэхъух. Ащыгъум о сыкъызэрэбгъэкӀуагъэри, шӀу сызэрэплъэгъугъэм фэдэу, ахэри шӀу зэрэплъэгъугъэхэри дунаим ицӀыфхэм ашӀэщт.

24– Ся Т, цӀыфхэу о сӀэ къиплъхьагъэхэр сыздэщыӀэм сигъусэхэу щыӀэхэ сшӀоигъу, щытхъушхоу сиӀэ бгъэхъугъэр алъэгъуным пае. А щытхъушхор сиӀэ зыкӀэбгъэхъугъэр дунаир къэхъуным ыпэкӀэ шӀу сызэрэплъэгъугъэр ары.

25– Ся Тэ заф, дунаим ицӀыфхэм о уашӀэрэп, ау сэ усэшӀэ. СицӀыфхэм о сыкъызэрэбгъэкӀуагъэр ашӀэ. 26Сэ ахэмэ уязгъэшӀагъ, уязгъэшӀэщт, шӀулъэгъуныгъэу о къысфыуиӀэр ахэми агухэм арылъ зэпытыным паий, сэри ахэмэ агухэм сарылъ зэпытыным паий.

Currently Selected:

Иуан 17: AdgNT14

Highlight

Copy