Иуан 16

ЯПШӀЫКӀУХЭНЭРЭШЪХЬ

1– А Ӏофхэр зэкӀэ къызыфышъосӀуагъэхэр сэ сигъогу шъутемыкӀыныр ары. 2Синэгогухэм шъуакъычӀафыщт. Ащ имызакъоу, хэт щыщми шъузыукӀырэр Тхьэм фэлажьэкӀэ зыгугъэщт мафэри къэсыщт. 3Ты лъапӀэри сэри тызэрамышӀагъэм пае, а Ӏофхэр ашӀэщт. 4Ау а Ӏофхэр джы къызкӀышъосӀуагъэхэр а мафэр къызыскӀэ, ахэр къызэрэшъосӀуагъэхэр шъугу къэжъугъэкӀыжьынхэу ары. Сышъуигъусагъэти, нахьыпэкӀэ ахэр сэ къышъуасӀощтыгъэхэп.

Тхьэм ы Псэ ЛъапӀэ ыгъэцакӀэрэ Ӏофхэр

5– Джы сыкъэзгъэкӀуагъэм дэжь сыкӀожьыщт. Ау шъуащыщ гори «Тыдэ укӀорэ?» ыӀоу къысэупчӀырэп. 6Ау а Ӏофхэр зэрэшъосӀуагъэхэм пае, шъугу мапэ. 7Ау шъыпкъэр шъосэӀо, сэ сызэрэшъухэкӀырэр шъоркӀэ нахьышӀу; сыда пӀомэ, сышъухэмыкӀымэ, шъуигукъао Шъушъхьэщызыхыжьрэр къышъуфэкӀощтэп. СызыкӀокӀэ, ар къышъуфезгъэхыщт. 8Шъуигукъао Шъушъхьэщызыхыжьрэр къызыкӀокӀэ, псэкӀодшӀэныр зыфэдэри, шъыпкъэр зыфэдэри, Тхьэм мы дунаим ицӀыфхэм хьыкум зэратыришӀыхьащтри зэхаригъэшӀыкӀыщт: 9сэркӀэ шӀошъхъуныгъэ яӀэ зэрэмыхъугъэр зэрэпсэкӀодыр зэхаригъэшӀыкӀыщт. 10Шъыпкъэр зэрэсиӀэри зэхаригъэшӀыкӀыщт, сыда пӀомэ, сэ Ты лъапӀэм дэжь сыдэкӀоежьынышъ, сышъулъэгъужьыщтэп. 11Тхьэм ихьыкум цӀыфхэм атыришӀыхьаныр зыфэдэри зэхаригъэшӀыкӀыщт, сыда пӀомэ, Тхьэм мы дунаим ипщ ыгъэмысэгъах.

12– Джыри къышъосӀонэу щыӀэр бэ, ау джы шъо ар шъущыӀэн шъулъэкӀыщтэп. 13Ау Тхьэм ы Псэ ЛъапӀэу цӀыфхэм шъыпкъэр язгъашӀэрэр къызыкӀокӀэ, шъыпкъэр зэкӀэ зэхышъуигъэшӀыкӀыщт. Ежь-ежьырэу зи къыӀощтэп, Тхьэм къыӀохэу зэхиххэрэр ары къыӀощтхэр, къэхъущт-къэшӀэщтхэри къышъуигъэӀущтых. 14Ащ щытхъушхо къысфишӀыщт, сыда пӀомэ, Ӏофхэу шъуигъэшӀэщтхэр зэкӀэ сэ садэжь къекӀыхэшъ ары. 15Ты лъапӀэм иӀэр зэкӀэ сэсый. Ары зыкӀэсӀуагъэр Тхьэм ы Псэ ЛъапӀэм сигущыӀэхэр зэрэшъуигъэшӀэщтхэр.

Исус игъогу рыкӀохэрэм ягукъао атырихынышъ, гушӀуагъокӀэ зэрэзэблихъущтыр

16– ТӀэкӀу шӀэмэ, сышъулъэгъужьыщтэп, етӀани тӀэкӀу шӀэмэ сышъулъэгъужьыщт; сыда пӀомэ, Ты лъапӀэм дэжь сыдэкӀоежьыщтышъ ары.

17Исус ар зеӀом, игъогу рыкӀохэрэм ащыщхэм зэраӀожьыгъ:

– «ТӀэкӀу шӀэмэ, сышъулъэгъужьыщтэп, етӀани тӀэкӀу шӀэмэ, сышъулъэгъужьыщт», етӀани «Ты лъапӀэм дэжь сыдэкӀоежьыщт» зиӀокӀэ къаригъэкӀырэр сыд шъуӀуа?

18Аущтэу ахэмэ аӀо зэпытыщтыгъ:

– «ТӀэкӀу шӀэмэ» зыфиӀорэм къыригъэкӀырэр тшӀэрэп.

19Исус ахэр къеупчӀыхэмэ зэрашӀоигъор къышӀи, ариӀуагъ:

– «ТӀэкӀу шӀэмэ, сышъулъэгъужьыщтэп, етӀани тӀэкӀу шӀэмэ, сышъулъэгъужьыщт» зыфэсӀуагъэмкӀэ шъузэупчӀыжьа? 20Шъыпкъэ дэдэр шъосэӀо, шъо шъугъыщт, шъупыхьащт, ау дунаим ицӀыфхэр гушӀощтых. Шъо шъугу къеощт, ау шъуигукъао текӀынышъ, гушӀуагъокӀэ зэблэхъугъэ хъущт. 21Бзылъфыгъэр хъушъэн ихьэмэ#16:21 Бзылъфыгъэр хъушъэн ихьэмэ – сабый къэхъуным икъинхэм ахэтыныр ары., къин ещэчы, сыда пӀомэ, къин зыщищэчын фэе уахътэр къэсыгъэшъ ары. Ау сабыир къызыфэхъукӀэ, гушӀозэ къинэу ыщэчыгъэр щэгъупшэжьы, сыда пӀомэ, дунаим зы цӀыф къытехъуагъэшъ ары. 22Ащ фэдэу шъори джы гукъао шъуиӀ, ау сэ шъуслъэгъужьыщт. Джащыгъум шъори шъугушӀожьыщт, а гушӀуагъори зыми шъутырихыщтэп. 23А мафэм зыкӀи шъукъысэупчӀыщтэп. Шъыпкъэ дэдэр шъосэӀо, сэ сцӀэкӀэ Ты лъапӀэм сыд щыщкӀи шъуелъэӀумэ, къышъуфишӀэщт. 24Джы нэс сэ сцӀэкӀэ ся Тэ зыкӀи шъуелъэӀугъэп. ШъуелъэӀуи, шъузэрелъэӀурэри шъуиӀэ ыгъэхъущт, шъуигушӀуагъо икъугъэ хъуным пае.

25– А Ӏофхэр гъэсэпэтхыдэхэмкӀэ шъосӀуагъэх. Ау гъэсэпэтхыдэхэмкӀэ сыкъызыжъудэмыгущыӀэжьын мафэр къэсыщт. А мафэр къызыскӀэ, Ты лъапӀэм ехьылӀагъэу нафэу шъосӀощт. 26А мафэм сэ сцӀэкӀэ Ты лъапӀэм шъуелъэӀущт. Шъо къышъохьылӀагъэу Ты лъапӀэм селъэӀунэу шъуасӀорэп; 27сыда пӀомэ, шъо шӀу сышъулъэгъугъэу, Тхьэм сызэрэщыщымкӀэ шӀошъхъуныгъэ шъуиӀэ зэрэхъугъэм пае, ежь Ты лъапӀэми шъо шӀу шъуелъэгъу. 28Ты лъапӀэм сыщыщэу дунаим сыкъытехьагъ. Джыри зэ дунаим сытекӀыжьынышъ, Ты лъапӀэм дэжь сыдэкӀоежьыщт.

29– Джы гъэсэпэтхыдэ хэмытэу, нафэу укъэгущыӀэ, – къаӀуагъ Исус игъогу рыкӀохэрэм. 30– О зэкӀэри зэрэпшӀэрэри, цӀыф горэм ыгу илъыр пшӀэным пае, а цӀыфыр къыоупчӀыжьынэу щыкӀагъэ зэрэуимыӀэри джы зэдгъэшӀагъ. Ащ пае Тхьэм о узэрэщыщымкӀэ шӀошъхъуныгъэ тиӀ.

31– Джы шӀошъхъуныгъэ шъуиӀэ хъугъа? – ариӀуагъ Исус ахэмэ. 32– Мары, шъо шъузэбгырыкӀыжьэу, шъуащыщэу хэти иунэ зигъэзэжьыщт игъор къэсы пэт ыкӀи къэсыгъах. Сэ сизакъоу утыгум сыкъишъунэщт, ау сизакъоп, сыда пӀомэ, Ты лъапӀэр сигъусэшъ ары.

33– А Ӏофхэр сэ къызфышъосӀуагъэхэр сэ шъугухэм сызэрарылъым пае, гупсэф шъуиӀэ хъуныр ары. Дунаим къин щышъущэчыщт, ау шъугу шъумыгъэкӀоды: сэ дунаим сытекӀуагъ.

Currently Selected:

Иуан 16: AdgNT14

Highlight

Copy