Апостол Якъубэ тхылъэу ытхыгъэр 3

ЯЩЭНЭРЭШЪХЬ

Бзэгур уубытыныр

1Сшыхэр, шъуащыщэу нэбгырабэ гъэсакӀо орэмыхъу, сыда пӀомэ, Тхьэм тэ, гъэсакӀохэм, хьыкумэу къыттыришӀыхьащтыр нахь хьыкумышхо зэрэхъущтыр шъошӀэ. 2Тэ зэкӀэми псэкӀодыбэ тэгъахъэ. ЦӀыф горэм игущыӀэхэмкӀэ псэкӀод ымышӀэмэ, зишъыпкъагъэ щыкӀагъэ зимыӀэ цӀыф икъугъэ хъущт, ыпкъ зэкӀэ ыгъэӀорышӀэн ылъэкӀыщт.

3Шыхэм шхоӀур ажэмэ адэтэлъхьэ, дгъэӀорышӀэнхэм пае. АщкӀэ зэкӀэ апкъ зетэщэ. 4Къухьэхэми шъуяплъ. Ахэр иных, жьыбгъэшхохэми афых. Ау щытми, къухьэр зезыфэрэм къухьэм ыкӀэ пыт хьанцэ цӀыкӀумкӀэ зыфэе лъэныкъомкӀэ егъазэ. 5Ащ фэдэу бзэгури пкъым щыщэу зы пкъыгъо цӀыкӀу, ау бэ егъахъэ. Шъуеплъ мэшӀо цӀыкӀум мэзышхор зэрэзэкӀигъанэрэм. 6Бзэгури машӀоу зэкӀэ зыгъэкӀодырэм фэд. Мы дунаим ибзэджагъэ ащ тиз. Пкъым щыщхэм ащыщэу бзэгур ары пкъыр зэкӀэ мыкъабзэ зышӀырэр, щыӀэныгъэм ищэрэхъи 3:6 щыӀэныгъэм ищэрэхъ – цӀыф горэм зэкӀэ ищыӀэныгъ ары#3:6 щыӀэныгъэм ищэрэхъ – цӀыф горэм зэкӀэ ищыӀэныгъ ары машӀо хэзгъанэрэр. Джэхьнэмым имашӀу ары ежь бзэгум машӀо къыкӀэзыдзагъэр.

7Сыдрэ хьэкӀэ-къуакӀи, бзыуи, ныбэкӀэ цуахъорэ псэушъхьи, псым хэс псэушъхьи цӀыфхэм агъэӀэсэн алъэкӀы ыкӀи агъэӀэсагъэх, 8ау бзэгур зыми ыгъэӀэсэн ылъэкӀырэп. Ар къэбгъэуцун умылъэкӀыщт бзаджэ гор, лӀэныгъэ къызхэкӀырэ щынаутри хиз.

9БзэгумкӀэ Тхьэу Ты лъапӀэм щытхъу фэтэшӀы, ежь фэдэнхэу Тхьэм къыгъэхъугъэ цӀыфхэм бзэгумкӀи тяхъоны. 10А жэ дэдэм щытхъури хъоныри къыдэкӀых. Аущтэу щытмэ хъущтэп, сшыхэр. 11А зы псынэ дэдэм псы ӀэшӀури псы дыджыри къикӀын ылъэкӀына? 12Сшыхэр, ынджыр чъыгым#3:12 ынджыр чъыгыр – смоковницэр ары. зейтун#3:12 зейтун – маслинэр ары. къыпыкӀэн ылъэкӀына? Е сэнэшъхьэ къулэм ынджыр къыпыкӀэн ылъэкӀына? Джащ фэдэу псынэ щыугъэм псы ӀэшӀу къикӀын ылъэкӀыщтэп.

АкъылышӀуагъэу уашъом къикӀырэр

13Шъо шъущыщэу хэта акъылышӀуагъи гулъыти зиӀэр? Ащ изекӀокӀэ дэгъукӀэ гушъэбагъэу акъылышӀуагъэм къикӀырэр иӀэу, ишӀушӀагъэхэр къерэгъэлъагъу. 14Ау шъугъон дыджымрэ зэщыхьанымрэ шъугухэм арылъхэмэ, шъузыщымытхъужь, шъыпкъагъэри шъумыгъэпцӀы. 15Ащ фэдэ акъылышӀуагъэ уашъом къикӀырэп, ар мы дунаим щыщ нахь. Тхьэм ы Псэ ЛъапӀи хэлъэп, джынапцӀэхэр хэлъхэ нахь. 16Сыда пӀомэ, шъугъонырэ зэщыхьанырэ зыдэщыӀэм, Ӏофхэр зэӀыхьагъэ щэхъух, сыдрэ дэигъэри щыӀэ мэхъу.

17Ау уашъом къикӀырэ акъылышӀуагъэр ыпэ рапшӀэу къабзэ, етӀанэ зэшӀужьыныгъэ хэлъ, гушъаб, ӀорышӀ, гукӀэгъу хэлъ зэпыт, шӀу ешӀэ зэпыт, зафэ, тхьагъэпцӀыгъи хэлъэп. 18ЗэшӀужьыныгъэ зышӀыхэрэр ары шъыпкъагъэр къызхэкӀырэ чылапхъэр гупсэфкӀэ цӀыфхэм агухэм арызылъхьэрэр.

Currently Selected:

Апостол Якъубэ тхылъэу ытхыгъэр 3: AdgNT14

Highlight

Copy