Апостол Якъубэ тхылъэу ытхыгъэр 4

ЯПЛӀЭНЭРЭШЪХЬ

Мы дунаим ныбджэгъу уфэхъуныр

1Зэпыинымрэ зэщыхьанымрэ тыдэ къикӀыхэу къышъухахьэхэра? Хъопсэ Ӏаехэу шъугухэм ащызаохэрэр арыба къызхэкӀыхэрэр? 2Зыгорэм шъуфай, ау къыжъудэхъурэп. ШъоукӀы, шъохъуапсэ, ау шъузыфаер къышъуӀэкӀахьэрэп. Шъузэщэхьэ, шъузэпыи. Тхьэм къышъуитынэу шъуелъэӀурэпышъ, зи шъуиӀэп. 3Тхьэм шъуелъэӀуми, зи къышъуитырэп, сыда пӀомэ, Ӏэягъэ шъугухэм арылъэу, шъугухэр зыкӀэхъопсырэ Ӏофхэм атежъугъэкӀодыныр ары Тхьэм шъузфелъэӀурэр.

4Шъо зинэ зышӀэхэрэм шъуафэд. Мы дунаим ныбджэгъу шъуфэхъуным Тхьэм пый шъуфэхъуныр ары къикӀырэр, шъошӀэба ар? Аущтэу хэти дунаим ныбджэгъу фэхъунэу фаер Тхьэм пый фэхъу. 5Хьауми Тхьэм игущыӀэ тхыгъэхэм моущтэу зэрарытыр хьаулыекӀэ шъогугъа: «Тыгухэм арылъ псэр лъэшэу мэшъугъо»? 6Ау тыгухэм арылъым нахьи, Тхьэм ынэшӀу щыфэныгъэ нахь ин. Арышъ, Тхьэм игущыӀэ тхыгъэхэм моущтэу арыт#4:6 Тхьэм игущыӀэ тхыгъэхэм арыт – еплъ ГущыӀэжъхэу пачъыхьэ Сэлмэн ытхыгъэхэм (Притчи) 3:34.: «Тхьэр пэгагъэ зыгу илъ цӀыфым пэуцужьы, ау пэгагъэ зыгу имылъым ынэшӀу къыщефэ».

7Арышъ, Тхьэм шъуфэӀорышӀ. Шэйтаным шъупэуцуи, шъуапашъхьэ икӀынышъ, кӀитхъужьыщт. 8Тхьэм пэгъунэгъу шъухъуи, ежьыри къышъупэгъунэгъу хъущт. ШъуӀэхэр жъугъэкъабзэх, шъо, псэкӀод зышӀэхэрэм, шъугухэр жъугъэкъабзэх, шъо теубытагъэ зимыӀэхэу, акъыл тӀуанэхэр зиӀэхэм. 9Шъунэшхъэй, шъугъ, шъупыхь. Шъуишхын гъынкӀэ, шъуигушӀуагъуи нэшхъэигъэкӀэ зэблэхъугъэ орэхъу. 10Тхьэм ыпашъхьэ зыщыжъугъэцӀыкӀуи, ежьыри шъукъыӀэтыщт.

Пшы хьыкум тепшӀыхьаныр

11Сшыхэр, ӀаекӀэ шъузэтемыгущыӀэжь. ЦӀыфэу зыш ӀаекӀэ тегущыӀэу зыгъэмысэрэр Тхьэм иунашъохэм ӀаекӀэ атегущыӀэ, ахэри егъэмысэх. Ау Тхьэм иунашъохэр бгъэмысэхэмэ, ахэр умыгъэцэкӀагъэхэу мэхъу, хьыкум атепшӀыхьагъэуи мэхъу. 12ЦӀыфхэм унашъохэр афэзышӀэу, хьыкум атезышӀыхьэрэр зы закъу, цӀыфхэр мыкӀодхэу къэзгъэнэжьынэу ыкӀи зыгъэкӀодынэу лъэкӀ ЗиӀэр ары. Ау о хэт ущыщ, уигъунэгъу бгъэмысэнэу?

Узщымытхъужь

13Джы шъукъэдаӀу, шъо, моущтэу зыӀохэрэр: «Непэ е неущ мо къалэм е адрэ къалэм тыкӀонышъ, зы илъэс тыкъэтыщт, щэф-щэжьынымкӀэ ахъщэ къэдгъэхъэщт». 14Ау неущ хъущтыр шъушӀэрэп. ШъуищыӀэныгъэ сыд фэда? Зы тӀэкӀурэ къэлъагъоу, етӀанэ кӀодыжьырэ пахъэм шъуфэд. 15Ау аущтэу шъумыӀоу моущтэу шъуӀон фае: «Зиусхьаныр фаемэ, тыпсэущт, мыхэр е мохэр тшӀэщтых». 16Ау джы шъузышӀошӀыжьы ыкӀи шъузыщэтхъужьы. Ащ фэдэ зыщытхъужьыныр зэкӀэ дэи. 17Арышъ, шӀугъэу ыгъэцэкӀэн фаер гурыӀо пэтми, зымыгъэцакӀэрэм псэкӀод ешӀэ.

Currently Selected:

Апостол Якъубэ тхылъэу ытхыгъэр 4: AdgNT14

Highlight

Copy