Апостол Якъубэ тхылъэу ытхыгъэр 2

ЯТӀОНЭРЭШЪХЬ

Ятеплъэ шъуемыплъэу, цӀыф пстэури шъуизэфэдэн фае

1Сшыхэр, ти Зиусхьан Исус Христосэу щытхъушхо зиӀэмкӀэ шӀошъхъуныгъэ шъуиӀэзэ, цӀыфхэм ятеплъэ шъуемыплъэу, пстэури шъуизэфэдэн фае. 2Дышъэ Ӏэлъын ыӀэхъуамбэ пылъэу, щыгъын лъапӀэхэр щыгъэу лӀы бай гори, щыгъыныжъхэр щыгъхэу лӀы тхьамыкӀэ гори шъуизэӀукӀэ къыхэхьагъэу тӀон. 3Щыгъын лъапӀэхэр зыщыгъ лӀым шъуеплъэу, «моу, къеблагъи къэтӀыс» ешъуӀомэ, ау тхьамыкӀэм, «модэ щыт» шъуӀоу, е «мо слъакъохэм адэжь къэтӀыс» ешъуӀомэ, 4ащыгъум цӀыф зэхэдз шъошӀыба? ХьыкумэшӀхэу гупшысэ Ӏаехэр зиӀэхэм афэдэ шъухъугъэба?

5Сшы лъапӀэхэр, шъукъэдаӀу. Мы дунаим ицӀыф тхьамыкӀэхэр арыба Тхьэм къыхихыгъэхэр, шӀошъхъуныгъэмкӀэ баиныгъэ шъыпкъэр агъотыжьыным паий, ежь шӀу зылъэгъухэрэр къызэригъэгугъэгъэ тетыгъошхомкӀэ ӀахьышӀу къалъысыным паий? 6Ау шъо тхьамыкӀэр зэшъупэсыгъэп. Байхэр арыба шъуезгъэзыхэрэри, хьыкумэшӀыхэм апашъхьэ шъуизыщэхэрэри? 7Ахэр арыба шъо къызэрышъуаджэхэрэ цӀэу Исус Христос ыцӀэ лъапӀэ ӀаекӀэ тегущыӀэхэрэр?

8Тхьэм игущыӀэ тхыгъэхэм арытэу#2:8 Тхьэм игущыӀэ тхыгъэхэм арытэу – еплъ Пегъымбар Мусэ ящэнэрэ тхылъэу ытхыгъэм 19:18., типачъыхьэ иунашъоу, «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу» зэриӀорэр шъыпкъагъэкӀэ шъогъэцакӀэмэ, дэгъоу шъошӀэ. 9Ау цӀыфхэм ятеплъэ шъуеплъэу, цӀыф пстэури шъуизэфэмыдэмэ, псэкӀод шъогъахъэ, Тхьэм иунашъохэми шъуатекӀыгъэу мысэ шъохъу. 10Зыгорэ Тхьэм зэкӀэ иунашъохэм ядэӀоу, ау зы унэшъо закъом текӀымэ, унэшъо пстэуми атекӀыгъэу мысэ мэхъу. 11Сыда пӀомэ, «зинэ умышӀэ» зыӀуагъэм#2:11 зыӀуагъэм – еплъ Пегъымбар Мусэ ятӀонэрэ тхылъэу ытхыгъэм 20:13,14., «цӀыфи умыукӀы» ыӀуагъ. Арышъ, зинэ умышӀэу, ау цӀыф горэ уукӀымэ, Тхьэм иунашъо утекӀыгъэу мэхъу.

12Арышъ, Тхьэм иунашъохэу цӀыфхэм шъхьафитыныгъэ яӀэ зыгъэхъухэрэм атетэу Тхьэм хьыкум зытыришӀыхьащт цӀыфхэм зэрафэшъуашэм фэдэу, шъугущыӀ, шъузекӀу. 13Сыда пӀомэ, гукӀэгъу зыгу имылъым Тхьэм гукӀэгъу фимышӀэу хьыкум тыришӀыхьащт. Ау гукӀэгъур гъэмысэным текӀощт.

ШӀошъхъуныгъэмрэ шӀушӀэнымрэ

14Сшыхэр, зыгорэм шӀу ымышӀэу, «шӀошъхъуныгъэ сиӀ» ыӀомэ, сыда ащ ишӀуагъэу къэкӀощтыр? Ащ фэдэ шӀошъхъуныгъэм а цӀыфыр мыкӀодэу къыгъэнэжьын ылъэкӀына? 15Шъушы горэм е шъушыпхъу горэм щыгъыни, мафэм ышхыни имыӀэу тӀон. 16«Гъогумафэх, гупсэф шъуиӀэу шъопсэу. Зыжъугъэфаб, зыжъугъэшхэкӀ» ыӀоу шъуащыщэу зыгорэм ахэмэ ариӀоу, ау ящыкӀагъэр аримытмэ, сыда ащ ишӀуагъэу къэкӀощтыр? 17ШӀошъхъуныгъэм иӀоф ащ фэд. ШӀу зымышӀэрэм ишӀошъхъуныгъэ лӀагъэм фэд.

18Ау зыгорэм къыӀонкӀи мэхъу:

– Зы цӀыфым шӀошъхъуныгъэ иӀ, адрэм шӀушӀагъэхэр иӀ. Ащ фэдэ цӀыфым сэ есӀон:

– ШӀушӀагъэхэр зимыгъусэ шӀошъхъуныгъэу зыфапӀорэр сэгъэлъэгъу, шӀоу сшӀэхэрэмкӀэ сишӀошъхъуныгъэ озгъэлъэгъущт.

19Зы Тхьэ нахь зэрэщымыӀэмкӀэ шӀошъхъуныгъэ уиӀ. Ар дэгъу. ДжынапцӀэхэми ар ашӀошъ мэхъушъ, мэкӀэзэзых. 20О, зэхэшӀыкӀ зимыӀэ цӀыф, шӀушӀагъэхэр зимыгъусэ шӀошъхъуныгъэм ишӀуагъэ къызэрэмыкӀощтыр къыбгурызгъэӀонэу уфая? 21Тятэжъышхо Ибрахьимэ#2:21 Ибрахьимэ – еплъ Пегъымбар Мусэ апэрэ тхылъэу ытхыгъэм (УблапӀэм) 22:1-14. ыкъо Исхьакъ къурмэншӀыпӀэм зытырелъхьэм, ышӀагъэм пае Тхьэм ежь дэжькӀэ ащ шъыпкъагъэ иӀэу ылъытагъэба! 22Аущтэу Ибрахьимэ ишӀошъхъуныгъэрэ ишӀушӀагъэхэмрэ зэрэзэгъусагъэхэр олъэгъу. Ибрахьимэ ишӀушӀагъэхэр ары ишӀошъхъуныгъэ изгъэкъугъэхэр. 23Мы гущыӀэхэу Тхьэм игущыӀэ тхыгъэхэм арытхэри#2:23 Тхьэм игущыӀэ тхыгъэхэм арытхэр – еплъ Пегъымбар Мусэ апэрэ тхылъэу ытхыгъэм (УблапӀэм) 15:6. къэшъыпкъэжьыгъэх: «Ибрахьимэ ТхьэмкӀэ шӀошъхъуныгъэ иӀэ хъугъэ. Арыти, Тхьэм ежь дэжькӀэ ащ шъыпкъагъэ иӀэу ылъытагъ». Тхьэм иныбджэгъукӀи Ибрахьимэ еджэщтыгъэх. 24Аущтэу шъолъэгъуба, цӀыфым шӀошъхъуныгъэ зэриӀэм имызакъоу шӀу зэришӀэрэри ары Тхьэм ежь дэжькӀэ ащ шъыпкъагъэ иӀэу зыкӀилъытэрэр?

25Ащ фэдэу бзылъфыгъэ хэтакӀоу Рахьаб#2:25 Рахьаб – еплъ Нун ыкъо Ехьошуа икъэбар зэрыт тхылъым 2:1-21. зыцӀэм джурт лӀыкӀохэр ригъэблагъэхи, нэпэмыкӀ гъогукӀэ зыкӀарегъэтхъужьым, ышӀагъэм пае Тхьэм ежь дэжькӀэ ащ шъыпкъагъэ иӀэу ылъытагъэба? 26Аущтэу псэ зимыӀэ пкъыр зэрэлӀагъэм фэдэу, шӀушӀагъэхэр зимыгъусэ шӀошъхъуныгъэри лӀагъэм фэд.

Currently Selected:

Апостол Якъубэ тхылъэу ытхыгъэр 2: AdgNT14

Highlight

Copy