Апостолхэм ашӀэгъэ Ӏофхэр 22

ЯТӀОКӀЫРЭ ТӀУНЭРЭШЪХЬ

1– Тэ тшыхэри тятэхэри, зызгъэхыежьынэу къышъосӀощтым шъукъедэӀу.

2Ахэмэ Паул джуртыбзэкӀэ адэгущыӀэу зызэхахым, нахь заушъэфыгъ. ЕтӀанэ Паул къыӀуагъ:

3– Сэ сыджурт, Киликие хэкум щыщэу Тарс къалэм сыкъыщыхъугъ. Мы къалэм сыщапӀугъ. Гамалиил#22:3 Гамалиил – еплъ 5:34. сыкӀэлъырысэу, тятэжъхэм я Тэурат хабзэ фэсакъыпэзэ сигъэшӀагъэ. Непэ шъо пстэури Тхьэм шъузэрэфэлажьэрэм фэдэ къабзэу, сыгуи спси етыгъэу Тхьэм сыфэлажьэ. 4Зиусхьаным игъогу рыкӀохэрэм олӀэхэфэкӀэ, къин язгъэщэчыщтыгъ. СицӀыфхэм ахэмэ яхъулъфыгъэхэми ябзылъфыгъэхэми Ӏэхъу атырязгъалъхьэти, хьапсым чӀязгъадзэщтыгъэх. 5Ар зэрэшъыпкъэр дин пэщэшхоми Тхьэмэтэ Хэсэшхом хэт пстэуми къысфаушыхьатын алъэкӀыщт. Ахэмэ Дамаск дэс джурт тшыхэм тхылъхэр афатхыхи, къысатыгъэх. ЕтӀанэ Дамаск сыкӀуагъ, Ӏэхъухэр ателъхэу Зиусхьаным игъогу рыкӀохэрэу ащ щыӀэхэр Ерусалим къязгъэщэнхэшъ, къинкӀэ агъэпщынэнхэм пае.

Паул Зиусхьанэу Исус игъогу зэрэтехьагъэм икъэбар къызэриӀотэжьыгъэр

(Апостол. 9:1-19; 26:12-18)

6– Дамаск сыкӀозэ, къалэм иӀэгъо-благъо сызынэсым, щэджагъом дэжь ошӀэ-дэмышӀэу уашъом къехыгъэ нэфынэшхом сыкъиуцухьагъ. 7ЧӀыгум сытефагъэу, макъэ горэм къысиӀоу зэхэсхыгъ:

– «Шаул, Шаул, сыд пае къин сэбгъэщэчырэ?»

8– «О ухэта, Зиусхьан?» – сӀуагъэ.

– «Назарет щыщ Исусэу къин зэбгъэщэчырэр сэры» – къысиӀожьыгъ ащ. 9Сигъусэхэм нэфынэр алъэгъугъ, ау сэ къыздэгущыӀагъэм ымакъэ зэхахыгъэп.

10– «Сыда сшӀэщтыр, Зиусхьан?» – сӀуагъэ.

– «Къэтэджи, Дамаск кӀо» – къысиӀожьыгъ Зиусхьаным. – «О пшӀэнхэу Тхьэм къыпфигъэнэфагъэхэр зэкӀэ ащ зыгорэм къыщыуиӀощтых». 11А нэфынэшхом къыхэкӀыкӀэ сынэхэм зи амылъэгъужь зэрэхъугъэм пае, сигъусэхэм сӀэ аӀыгъэу Дамаск сыдащагъ.

12– Ананый ыцӀэу, Тэурат хабзэм итхэр ыгъэцакӀэу, Тхьэм шӀолӀыкӀ фызиӀэ лӀы горэ Дамаск дэсыгъ. Джурт пстэуми ащ лъытэныгъэ фыряӀагъ. 13Ар садэжь къакӀуи, къызбгъодахьи, къысиӀуагъ:

– «Сшы Шаул, о унэхэр къэплъэжьыщтых». – Ардэдэм сынэхэр къэплъэжьхи, а лӀыр слъэгъугъэ.

14– «Тхьэр зыфаер зэбгъэшӀэнэу, Шъыпкъагъэр Зиер плъэгъунэуи ащ ымакъэ зэхэпхынэуи тятэжъхэм я Тхьэ укъыгъэнэфагъ», – къыӀуагъ Ананый. – 15«Арышъ, о Ӏофхэу плъэгъугъэхэмрэ зэхэпхыгъэхэмрэ цӀыфхэм зэкӀэ апашъхьэ къыщыпӀохэзэ, Шъыпкъагъэр Зием уришыхьатыщт. 16Джы сыда зызкӀэбгъэгужъорэр? Къэтэджи, зысэгъэумэхъи, Зиусхьаным елъэӀуи, ащ уипсэкӀодшӀагъэхэр угу рырегъэукъэбзыкӀыжьых».

Хымэ лъэпкъхэм ежь игущыӀэхэр аригъэӀунхэу Зиусхьаным Паул зэригъэкӀуагъэр

17– ЕтӀанэ Ерусалим къэзгъэзэжьи, Тхьэм иунэшхо сычӀахьи, ащ сычӀэтэу сызыщелъэӀум, зыгорэ къысфэлъэгъуагъ. 18Исус сэ слъэгъуи, ащ къысиӀуагъ:

– «ЗыгъэпсынкӀи, шӀэхэу Ерусалим дэкӀ, сыда пӀомэ, шыхьат укъызэрэсфэхъурэр адэщтэп».

19– «Зиусхьан, – къэсӀожьыгъ сэ, – оркӀэ шӀошъхъуныгъэ зиӀэхэр хьапсым зэрэчӀязгъадзэщтыгъэхэри, синэгогухэм зэрэщязгъаощтыгъэхэри мы цӀыфхэм ашӀэ. 20О уишыхьатэу Стефан#22:20 Стефан – еплъ 7:57-60. ылъ загъачъэм, сэ а чӀыпӀэм сыщытыгъ. ЗэраукӀыгъэри афэсыдагъ, зыукӀыгъэхэми ящыгъынхэр афэсыухъумагъэх».

21– «КӀожь», – къысиӀуагъ Зиусхьаным. – «Хымэ лъэпкъхэм адэжь чыжьэу узгъэкӀощт».

Паулрэ рим дзэ пэщэшхомрэ

22Паул мы гущыӀэхэр къеӀофэ, цӀыфхэр едэӀущтыгъэх. Ау мыщ дэжьым мэкъэшхокӀэ къэзэрэгъэкууагъэх:

– А лӀыр дунаим терэмытыжь. Псэуныр фэшъуашэп! – аӀуи.

23Ахэр къэзэрэгъэкуохэзэ, ящыгъынхэр дадзыехэзэ, сапэр датэкъуаещтыгъ. 24Джащыгъум дзэ пэщэшхом дзэлӀхэм Паул пытапӀэм аригъэщагъ. Паул пэуцухэзэ, цӀыфхэр аущтэу зыкӀэкуохэрэр зэригъэшӀэным пае, къамыщкӀэ еохэзэ еупчӀынхэу дзэ пэщэшхом дзэлӀхэм унашъо афишӀыгъ. 25КъамыщкӀэ Паул еонхэм пае, шъо кӀапсэхэмкӀэ зырапхым, Паул ащ дэжьым щыт дзэ пащэм риӀуагъ:

– ХьыкумэшӀым ыпашъхьэ ишъумыщэу, рим цӀыфхэм#22:25 Рим цӀыфхэр – еплъ 16:37. ащыщэу зыгорэм къамыщкӀэ шъуеомэ, шъуихабзэкӀэ хъущта?

26Дзэ пащэм ар зызэхехым, дзэ пэщэшхом дэжь кӀуи, къэбар ригъэшӀагъ.

– Сыда пшӀэрэр? Мы лӀыр рим цӀыфхэм ащыщ, – риӀуагъ ащ.

27Дзэ пэщэшхор Паул къыбгъодахьи, къыриӀуагъ:

– КъысаӀу! О рим цӀыфхэм уащыща?

– Сащыщ, – ыӀуагъ Паул.

28– Рим цӀыфхэм сащыщ хъуным пае, ахъщабэ тезгъэкӀодагъ, – ыӀуагъ дзэ пэщэшхом.

– Ары пакӀошъ, сэ рим цӀыфэу сыкъэхъугъ, – ыӀуагъ Паул.

29Паул еупчӀынхэу щытыгъэхэр ащ лъыпытэу зэкӀэкӀожьыгъэх. Дзэ пэщэшхом Паул рим цӀыфхэм зэращыщыр зешӀэм, Паул Ӏэхъу зэрэтыраригъэлъхьагъэм пае щынагъэ.

Тхьэмэтэ Хэсэшхом ыпашъхьэ Паул зэрэращагъэр

30ЯтӀонэрэ мафэм джуртхэм Паул зэрагъэмысагъэр дзэ пэщэшхом зэригъэшӀэпэнэу фэягъэти, Паул къаригъэтӀэтэжьи, дин пэщэшхохэри Тхьэмэтэ Хэсэшхом хэт пстэури зэрэугъоинхэу унашъо ышӀыгъ. ЕтӀанэ Паул къыщи, апашъхьэ къыригъэуцуагъ.

Currently Selected:

Апостолхэм ашӀэгъэ Ӏофхэр 22: AdgNT14

Highlight

Copy