Апостолхэм ашӀэгъэ Ӏофхэр 20

ЯТӀОКӀЭНЭРЭШЪХЬ

Македоние хэкумрэ Грецие хэгъэгумрэ Паул зэрэкӀуагъэр

1Бырсырышхор зэуцужьым, ИсускӀэ шӀошъхъуныгъэ зиӀэхэр Паул къаригъащэхи, ыгъэгушхуагъэх. ЕтӀанэ аӀапэхэр ыубытыжьи, Македоние хэкум кӀонэу гъогум техьагъ. 2А лъэныкъохэр къыкӀухьэхэзэ, шӀошъхъуныгъэ зиӀэхэр гущыӀабэкӀэ ыгъэгушхохэзэ, Грецием нэсыгъ. 3Ащ мэзищэ щыӀагъ. Сирием къухьэкӀэ кӀон фае зэхъум, джуртхэм гъэбылъыгъэкӀэ аукӀынэу агу зэрэхэлъым пае, Македонием игъогукӀэ ыгъэзэжьынэу тыриубытагъ. 4Паул игъусагъэх мы лӀыхэр: Берие къалэм щыщэу Пирр ыкъо Сосипатер; Фессалоникэ къалэм щыщхэу Аристархрэ Секундрэ; Дербие къалэм щыщэу Гай; етӀанэ Тимофей; етӀанэ Асие хэкум щыщхэу Тихикрэ Трофимрэ. 5Ахэр тэ#20:5 тэ – мы чӀыпӀэм (еплъ 16:10) мы тхылъыр зытхыгъэр Паул игъус, Рим къэлэшхоми дэкӀо. Еплъ 28:16. тапэ итхэу кӀохи, Троадэ къалэм къыщытпэплъагъэх. 6Ау Хьалыгъу мыкӀу-мыпшэ зыщашхырэ мэфэкӀ мэфэшхохэр зыблэкӀыхэм#20:6 Хьалыгъу мыкӀу-мыпшэ зыщашхырэ мэфэкӀ мэфэшхо мафэхэр – еплъ 12:3., Филиппи къалэм къухьэкӀэ тыщежьагъ. Троадэ къалэм мэфитфыкӀэ тынэсыгъ. Ащи мэфиблэ тыщыӀагъ.

Троадэ къалэм Паул лӀагъэхэм Евтих къызэрахигъэтэджыкӀыжьыгъэр

7Тхьэмафэм иапэрэ мафэм хьалыгъу зэготчынэу#20:7 хьалыгъу зэготчынэу – еплъ 2:42. тызэрэугъоигъ. Паул ятӀонэрэ мафэм гъогум техьанэу ыгу риубытагъэти, шӀошъхъуныгъэ зиӀэхэм Тхьэм игущыӀэхэр ариӀохэзэ, чэщныкъом нэсыфэ гущыӀэныр ыкъудыигъ. 8Тэ тызыщызэрэугъоирэ унэ зэтетым иящэнэрэ къат остыгъэ бэу къыщыблэщтыгъэ. 9Евтих зыцӀэ кӀалэ горэ шъхьангъупчъашъхьэм тесыгъ. Паул гущыӀэныр ымыух зэхъум, ар куоу хэчъыягъэти, ящэнэрэ къатым ефэхи, укӀыгъэу къагъотыжьыгъ. 10Паул ехи, кӀалэм зытыридзи, ӀаплӀ рищэкӀи, къыӀуагъ:

– ШъумыгумэкӀ. Ыпсэ хэт!

11Паул етӀанэ къыдэкӀоежьи, хьалыгъур зэгуичи, адрэхэм ягъусэу ышхыгъ. Нэф ошъыфэ, ахэмэ бэрэ адэгущыӀагъэу, ар гъогум техьагъ. 12Агухэр лъэшэу Ӏэтыгъэу, кӀалэр ядэжь псаоу ащэжьыгъ.

Паул Милит къалэм зэрэкӀуагъэр

13Тэ ыпэ къухьэм титӀысхьи, Асс къалэу Паул къызыщидгъэтӀысхьажьыщтым тежьагъ. Паул а къалэм нэс лъэсэу кӀон ыгу хэлъти, Ӏофыр аущтэу ыгъэпсыгъагъ. 14ЕтӀанэ Асс къалэм къызыщытӀокӀэжьым, Паул къухьэм къидгъэтӀысхьи, Митилинэ къалэм тыкӀуагъ. 15А къалэм тыщежьи, ятӀонэрэ мафэм Хиос хыгъэхъунэм фэзанкӀэу тыуцугъ. Ыужырэ мафэм Самос хыгъэхъунэм тыкӀуагъ. Трогиллие къалэм тыщыуцуи, ыужырэ мафэм Милит къалэм тынэсыгъ. 16Асие хэкум уахътэр щимыгъэкӀодыным пае, Паул Ефес къалэм къыщымыуцоу, блэкӀынэу тыриубытэгъагъ. Сыда пӀомэ, амал иӀэмэ, Пэнтэкост зыцӀэ мэфэкӀ мэфэшхор#20:16 Пэнтэкост зыцӀэ мэфэкӀ мэфэшхор – еплъ 2:1. къэсыным ыпэкӀэ, Ерусалим нэсынэу гузажъощтыгъ.

Ефес къалэм щыӀэ чылыс зэӀукӀэм инахьыжъхэм аужырэ къэбарэу Паул ариӀуагъэр

17Милит къалэм тызыщэӀэм, Паул Ефес щыӀэ чылыс зэӀукӀэм инахьыжъхэр къаригъэщагъэх. 18Ахэр къызэкӀохэм, Паул ариӀуагъ:

– Апэрэ мафэм щегъэжьагъэу Асие хэкум сыкъызехьэм, шъуадэжь зэкӀэ щызгъэкӀогъэ уахътэм сищыӀакӀэ зыфэдагъэр шъошӀэ. 19Пэгагъэ зи сыгу имылъэу, бэрэ сыгъызэ, джуртхэм шъэфэу агу хэлъыгъэ бзэджагъэхэу къысашӀэщтыгъэхэмкӀэ къиныбэ сагъэщэчызэ, Зиусхьаным сыфэлажьэщтыгъ. 20ЗишӀуагъэ къышъокӀыщт къэбархэр къышъосӀонхэм зыкӀи зыщысымыдзыеу, цӀыфхэм апашъхьи шъуиунэхэми къащышьозгъэӀугъэх, ащышъозгъэшӀагъэх. 21Джуртхэри алыджхэри япсэкӀодхэм афыкӀэгъожьынхэшъ, Тхьэм зыфагъэзэжьынэуи, Зиусхьанэу ИсускӀэ шӀошъхъуныгъэ зырагъэӀэнэуи афэзгъэпытэзэ, макъэ язгъэӀущтыгъ.

22– Джы къысэхъулӀэщтыр сымышӀэу, Тхьэм ы Псэ ЛъапӀэ сыфэӀорышӀэзэ, Ерусалим сэкӀо. 23Ау Ӏэхъу-лъэхъухэри гузэжъогъухэри сапэ зэрилъхэр Тхьэм ы Псэ ЛъапӀэ сигъашӀэзэ, къэлэ пстэуми къащеушыхьаты. 24СищыӀэныгъэ сэркӀэ лъапӀэу, уасэ иӀэу слъытэрэп, ау Зиусхьан Исус Ӏофэу спшъэ къырилъхьагъэр згъэцэкӀэн фае: Тхьэм ынэшӀу къащифэным ехьылӀэгъэ КъэбарышӀур цӀыфхэм язгъэӀуныр ары.

25– Тхьэм и Тетыгъошхо ехьылӀэгъэ къэбарыр шъозгъэӀузэ, шъо зэкӀэми шъуадэжь къыщыскӀухьэщтыгъ. Шъуащыщэу зыми сынапэ зэримылъэгъужьыщтыр сэшӀэ. 26Арышъ, зы цӀыф ылъ спшъэ къызэрэдэмыфэщтыр непэ шъыпкъэу къышъосэӀо; 27сыда пӀомэ, Тхьэр зыфэе пстэури шъозгъэшӀэным зыщысыдзыягъэп. 28Шъо шъузфэсакъыжь, Тхьэм ы Псэ ЛъапӀэ ухъумакӀоу шъузыфигъэуцугъэ цӀыф купыми шъуфэсакъ. Мэлахъом мэлхэм ынаӀэ зэратыригъэтырэм фэдэу, Зиусхьанми Тхьэми ячылыс зэӀукӀэм щыщхэу, Исус ылъ уасэкӀэ къыщэфыгъэхэм шъунаӀэ атежъугъэт. 29Сыда пӀомэ, сэ дунаим сызехыжьыкӀэ, Ӏэхъогъум шъхьамысыщт тыгъужъ мэхъаджэхэр къызэрэшъухэхьащтхэр сэшӀэ. 30Шъо, ИсускӀэ шӀошъхъуныгъэ зиӀэхэми, цӀыфхэр къышъухэкӀыщтых, зигъогу пхэндж тырагъэхьанхэм пае, шъыпкъагъэр зэзыхъокӀыным пылъыщтхэр. 31Арышъ, шъумычъыеу шъусакъ! Сынэпс къехызэ, илъэсищым чэщи мафи зэпымыоу шъуащыщэу хэти къызэрэжъугурызгъэӀуагъэр зыщышъумыгъэгъупш.

32– Джы Тхьэми ынэшӀу щыфэныгъэ ехьылӀэгъэ гущыӀэхэми шъуафэсэгъазэ. А гущыӀэхэм гурэ псэрэкӀэ кӀуачӀэ шъуагъэгъотын алъэкӀы, Тхьэм ицӀыфхэу ежь зезытыгъэ пстэуми шъурягъусэу ӀахьышӀу къышъулъагъэӀэсыни алъэкӀы. 33Зы цӀыф итыжьыни, идышъи, ищыгъыни сенэцӀыгъэп. 34Сигъусэхэмрэ сэррэ тищыкӀагъэхэр сӀэхэмкӀэ къызэрэзгъэхъагъэр шъошӀэ. 35Моущтэу тыулэузэ, лъэкӀ зимыӀэхэм тадэӀэпыӀэн зэрэфаер лъэныкъо пстэумкӀи шъозгъэлъэгъугъэ. Ежь Зиусхьан Исус гущыӀэхэу къыӀуагъэхэр зыщыдгъэгъупшэжьынхэ фаеп: «Къыуатыным нахьи яптыныр нахь сыхатмаф».

36А гущыӀэхэр къызеӀом, Паул лъэгонджэмышъхьэкӀэ тӀыси, ахэмэ зэкӀэмэ ягъусэу Тхьэм елъэӀугъ. 37ЗэкӀэри лъэшэу гъыгъэх, Паул ӀаплӀи ращэкӀыгъ, ебэугъэх. 38Анахьыбэу агу къезгъэуагъэр Паул ынапэ егъашӀэми амылъэгъужьыщтэу къазэрэриӀуагъэр ары. ЕтӀанэ къухьэм нэс Паул дэкӀотагъэх.

Currently Selected:

Апостолхэм ашӀэгъэ Ӏофхэр 20: AdgNT14

Highlight

Copy