Апостолхэм ашӀэгъэ Ӏофхэр 10
10
ЯПШӀЭНЭРЭШЪХЬ
Корнелый илӀыкӀохэм Петрэ къызэраригъэщагъэр
1Корнелый зыцӀэ лӀы горэ Кесарие къалэм дэсыгъ. Италие хэгъэгум щыщ дзэм хэтхэу, нэбгыришъэ хъурэ купхэм япащэхэм ар ащыщыгъ. 2Ежьыри зэкӀэ иунагъуи Тхьэр агъэлъапӀэщтыгъ#10:2 Тхьэр агъэлъапӀэщтыгъ – джурт лъэпкъым щымыщхэуи сунэт амышӀыгъагъэхэми, синэгогум кӀохэзэ, а хымэхэм Тхьэр агъэлъапӀэщтыгъ., Тхьэм шӀолӀыкӀи фыряӀэу псэущтыгъэх. Джуртхэм ахэт тхьамыкӀэхэм сэдакъэ бэу аритыщтыгъ, Тхьэм елъэӀу зэпытыщтыгъ. 3Щэджэгъоужым сыхьатыр щым#10:3 сыхьатыр щым – зытырахыгъэ алыджыбзэм зэритыр «ябгъонэрэ сыхьат». Ащ къикӀырэр щэджэгъоужым сыхьатыр щыр ары. Джуртхэр а сыхьатым Тхьэм елъэӀух. пэгъунэгъу хъугъэу, Тхьэм имэлэӀич ащ къекӀуалӀи, «Корнелый!» ыӀомэ къеджэзэ, нафэу къыфэлъэгъуагъ.
4Корнелый къэщыни, ынэхэр тедыкъагъэхэу риӀуагъ:
– Зиусхьан, сыда узыфаер?
– УитхьэлъэӀухэри уисэдакъэхэри Тхьэм ыпашъхьэ ихьагъэх, Тхьэми ахэр щымыгъупшэжьыгъэхэу ыгу илъых, – къыриӀожьыгъ мэлэӀичым.
5– ПетрэкӀэ заджэхэрэ Симон къащэнэу Иоппие къалэм лӀыкӀохэр гъакӀох. 6Ар шъошӀэ Симонэу зиунэ хы Ӏушъом Ӏутым ихьакӀ.
7Ар къезыӀогъэ мэлэӀичыр зыӀокӀыжьым, Корнелый иунэӀутхэм ащыщхэу нэбгыритӀурэ иӀофтэбгэ дзэлӀхэм ащыщэу Тхьэр зыгъэлъапӀэрэмрэ къяджи, 8хъугъэ-шӀагъэхэр зэкӀэ афиӀотэжьи, Иоппие къалэм ыгъэкӀуагъэх.
9ЯтӀонэрэ мафэм ахэр гъогум рыкӀохэзэ, къалэм пэгъунэгъу зэхъухэм, сыхьатыр пшӀыкӀутӀу#10:9 сыхьатыр пшӀыкӀутӀум – зытырахыгъэ алыджыбзэм зэритыр «яхэнэрэ сыхьат». Ащ къикӀырэр щэджагъор ары. фэдиз хъугъэу, Петрэ Тхьэм елъэӀунэу унашъхьэм дэкӀоягъ. 10Джащыгъум мэлакӀэ къэлӀагъэти, зыгорэ ышхынэу фэягъ. Шхыныр агъэхьазыр зэхъум, Тхьэм Петрэ зыгорэ къыфигъэлъэгъуагъ. 11Уашъор зэӀухыгъэу, шэкӀ фыжь иным фэдэу зыгорэ къехэу ылъэгъугъ. Ар къопиплӀымкӀэ кӀэшӀагъэу, чӀыгум къырагъэлэлэхыгъэм фэдагъ. 12Сыд фэдэрэ лъэпкъыгъуи щыщхэу лъэкъуиплӀыкӀэ кӀорэ псэушъхьэхэр, ныбэкӀэ цуахъорэ псэушъхьэхэр, ошъогу бзыухэр а шэкӀ фыжьым кӀоцӀылъыгъэх. 13ЕтӀанэ макъэ горэм Петрэ къыриӀуагъ:
– Петрэ, къэтэдж. ШӀобзи, шхы.
14– Хьау, Зиусхьан, – къыӀожьыгъ Петрэ, – ар хъухэщтэп. Мышхыпхъи, хьэрами сэ егъашӀэми сшхыгъэп.
15ЯтӀонэрэу а макъэм Петрэ къыриӀуагъ:
– Тхьэм къабзэу, шхыпхъэу зыфиӀуагъэр о хьэрам умыӀо.
16Аущтэу гъогогъуищэ хъугъэ. ЕтӀанэ шэкӀ фыжьыр уашъом дэкӀоежьыгъ.
17Къыфэлъэгъуагъэм къикӀырэм Петрэ егупшысэ пэтэу, Корнелый къыгъэкӀогъэ лӀыхэр Симон иунэ кӀэупчӀэхэзэ, ар къагъотыгъэу къэлапчъэм къыӀууцуагъэх.
18– ПетрэкӀэ заджэхэрэ Симон мы унэм иса? – аӀозэ, джагъэх.
19Петрэ къыфэлъэгъуагъэм егупшысэзэ, Тхьэм ы Псэ ЛъапӀэ къыриӀуагъ:
– Мары, нэбгырищ къыплъэхъу. 20Къэтэджи, ех, угу щэч къимыгъахьэу ахэмэ адакӀу; сыда пӀомэ, ахэр къэзгъэкӀуагъэр сэры.
21Петрэ ехи, лӀыхэм ариӀуагъ:
– Шъо шъузлъыхъурэр сэры. Ӏоф горэ шъуиӀэу шъукъэкӀуагъа?
22– Тэ тыкъэзгъэкӀуагъэр дзэ пащэу Корнелый ары, – къаӀуагъ лӀыхэм. – Ащ шъыпкъагъэ хэлъ, Тхьэм шӀолӀыкӀ фыриӀ, зэкӀэ джурт лъэпкъым лъытэныгъэ зыфыриӀэ лӀы шъыпкъ. Ащ иунэ лӀыкӀохэм ураригъэщэнышъ, къапӀохэрэм ядэӀунэу мэлэӀич лъапӀэ горэм унашъо къыфишӀыгъ.
23Джащыгъум Петрэ ахэр къыригъэблагъэхи, ыхьэкӀагъэх. ЯтӀонэрэ мафэм Петрэ ахэмэ ягъусэу гъогум техьагъ. Иоппие къалэм щыщ ыш заули игъусагъ.
24Ащ къыкӀэлъыкӀорэ мафэм Кесарие къалэм нэсыгъэх. Корнелый иунэкъощхэри иблагъэхэри къыугъоигъэхэу, Петрэрэ игъусэхэмрэ апаплъэщтыгъ. 25Петрэ унэм зехьэм, Корнелый къыпэгъокӀи, ылъакъохэм адэжь зыщыридзыхи, лъэгонджэмышъхьэкӀэ тӀысыгъэ. 26Ау Петрэ Корнелый къыгъэтэджыжьи, ыӀуагъ:
– Къэтэдж, сэри сыцӀыф ныӀэп.
27ЕтӀанэ Петрэ Корнелый дэгущыӀэзэ унэм зехьэм, цӀыфыбэхэр щызэрэугъоигъэхэу ылъэгъугъ.
28– Джурт горэ хымэ лъэпкъым щыщхэм е ахэхьанэу, е яунэ ихьанэу тихабзэкӀэ зэрэмыхъущтыр шъори шъошӀэ, – ариӀуагъ Петрэ ахэмэ. – Ау цӀыф горэ мыкъабзэу е шӀоеу сымылъытэн фаеу Тхьэм зэхысигъэшӀыкӀыгъ. 29Арыти, мы лӀыкӀохэм сыкъызяшъогъащэм, зыми семынэгуеу сыкъэкӀуагъ. Джы сышъоупчӀы, Ӏоф горэ шъуиӀэу сыкъяжъугъэщагъа?
30– МэфиплӀыкӀэ узэкӀэӀэбэжьмэ, мы сыхьатым, щэджэгъоужым сыхьатыр щым#10:30 сыхьатыр щым – еплъ 10:3., сиунэ Тхьэм сыщелъэӀущтыгъ, – къыӀожьыгъ Корнелый. – ОшӀэ-дэмышӀэу щыгъын фыжь лыдхэр щыгъхэу, лӀы горэ сапашъхьэ къиуцуи, 31къыӀуагъ: «Корнелый, Тхьэм уитхьэлъэӀу зэхихыгъ, уисэдакъэхэри щымыгъупшэжьыгъэхэу ыгу илъых. 32ПетрэкӀэ заджэхэрэ Симон къыздащэнэу Иоппие къалэм лӀыкӀохэр гъакӀох. Ар шъошӀ Симонэу зиунэ хыӀушъом Ӏутым ихьакӀ. Ар къэкӀонышъ, къыбдэгущыӀэщт». 33Арыти, занкӀэу къыплъызгъэкӀуагъэх. УкъызэрэкӀуагъэр дэгъоу пшӀагъэ. Джы тэ зэпстэури о къэпӀонэу, Зиусхьаным унашъо къыпфишӀыгъэхэм тядэӀунэу, мы чӀыпӀэм Тхьэм ыпашъхьэ тит.
Петрэ Корнелый иунэ къэбарышӀур къызэрэщиӀотагъэр
34ЕтӀанэ Петрэ моущтэу къыӀуатэу ыублагъ:
– Тхьэр цӀыфхэм ятеплъэ емыплъэу, цӀыф пстэури изэфэдэу зэрилъытэрэр шъыпкъэу зэзгъэшӀагъ. 35Сыд фэдэрэ лъэпкъыми щыщэу, ежь шӀолӀыкӀ фыриӀэу шъыпкъагъэр зыгъэцакӀэрэр Тхьэм ештэ. 36КъэбарышӀоу Тхьэм израиль цӀыфхэм анигъэсыгъэр шъо шъошӀэ. Моущтэу зыӀорэ къэбарышӀур ары: Исус Христосэу цӀыф пстэуми я Зиусхьан ары цӀыфхэр Тхьэм езгъэшӀужьырэр. 37Иуан ежь зырагъэумэхъынэу цӀыфхэм макъэ зарегъэӀум ыуж, Галилей хэкум къыщегъэжьагъэу зэкӀэ Иудей хэкум къыщыхъугъэхэр шъо шъошӀэх. 38Назарет щыщ Исус икъэбар шъошӀэ. Тхьэм ежь ы Псэ ЛъапӀэрэ лъэкӀышхомрэ ащ къыфыригъэхыгъэх. Тхьэр ащ зэригъусагъэм пае, шӀу ышӀэу, шэйтаным илъэкӀыкӀэ ригъэзыгъэ цӀыф пстэури ыгъэхъужьхэу къыкӀухьащтыгъ. 39Исус джуртхэм яхэгъэгуи Ерусалими а Ӏофхэу щишӀагъэхэм зэкӀэмэ тэ тыряшыхьат. Ар пкъэум тыраӀулӀи, агъэлӀагъ. 40Ау ящэнэрэ мафэм Тхьэм ар лӀагъэхэм къахигъэтэджыкӀыжьыгъ ыкӀи цӀыфхэм аригъэлъэгъугъ. 41Ау Тхьэм ар зэригъэлъэгъугъэр цӀыф пстэури арэп, Тхьэм ыпэкӀэ къыгъэнэфэгъэгъэ шыхьатхэр ары нахь. Исус лӀагъэхэм къызахэтэджыкӀыжьым, тэ ежь игъусэу дашхэхэу, дешъощтыгъэхэр арых Тхьэм ар зэригъэлъэгъугъэхэр. 42Тхьэм игущыӀэхэр цӀыфмэ ядгъэӀунхэуи, псаухэми, лӀагъэхэми хьыкум атезышӀыхьанэу Тхьэм къыгъэнэфагъэр зэрэ Исусыр къэтыушыхьатынэуи Тхьэм унашъо къытфишӀыгъ. 43Хэтми ИсускӀэ шӀошъхъуныгъэ зиӀэм ипсэкӀодшӀагъэхэр Исус ыцӀэкӀэ зэрэфэгъущтхэмкӀэ пегъымбар пстэури Исус шыхьат фэхъух.
Тхьэм ы Псэ ЛъапӀэ хымэ лъэпкъхэм ащыщхэм къызэрафехыгъэр
44Петрэ а гущыӀэхэр къыӀохэзэ, ахэр зэхэзыхыгъэ пстэуми Тхьэм ы Псэ ЛъапӀэ къафехыгъ. 45Петрэ игъусэхэу къэкӀогъэгъэ шӀошъхъуныгъэ зиӀэ лӀыхэу сунэт ашӀыгъэхэм Тхьэм итынэу ежь ы Псэ ЛъапӀэ хымэ лъэпкъхэм ащыщхэми къызэрафыригъэхыгъэр агъэшӀэгъуагъ; 46сыда пӀомэ, а хымэхэм амышӀэрэ бзэхэмкӀэ къэгущыӀэхэу, Тхьэм щытхъу фашӀэу зэхахыгъ. Джащыгъум Петрэ къыӀуагъ:
47– Мы цӀыфхэу тэщ фэдэу Тхьэм ы Псэ ЛъапӀэ зыгу илъ хъугъэхэр псыкӀэ тэ тыумэхъыхэмэ, зыгорэм ымыдэн ылъэкӀына?
48ЕтӀанэ Исус Христос ыцӀэкӀэ ахэр аумэхъынхэу унашъо ышӀыгъ. Ащ ыуж мэфэ заулэрэ ахэмэ адэжь щыӀэнэу Петрэ къелъэӀугъэх.
Currently Selected:
Апостолхэм ашӀэгъэ Ӏофхэр 10: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
