Апостолхэм ашӀэгъэ Ӏофхэр 1

АПЭРЭШЪХЬ

Тхьэм ежь ы Псэ ЛъапӀэ апостолхэм къафыригъэхынэу къызэригъэгугъагъэхэр

1,2Теофил#1:1, 2 Теофил – еплъ Лука 1:1. лъапӀ, апэм къыщегъэжьагъэу Тхьэм Исус уашъом зыдищэежьыгъэ мафэм нэсыфэ, Исус ышӀэгъэ Ӏоф пстэури, цӀыфхэм аригъэшӀэгъэ Ӏоф пстэури апэрэ тхылъэу#1:1, 2 апэрэ тхылъыр – «Лука КъэбарышӀур къызэриӀотагъэр» зыцӀэ тхылъыр ары. Еплъ Лука 1:1-4. сэ стхыгъэм ит. Исус, Тхьэм ежь уашъом дищэежьыным ыпэкӀэ, къыхихыгъэ апостолхэм#1:1, 2 апостол – нэмыкӀ цӀыф горэм ыцӀэкӀэ гущыӀэнэуи Ӏоф ышӀэнэуи фитыныгъэ зиӀэр ары. Исус игъогу рыкӀорэ нэбгырэ пшӀыкӀутӀум «апостолхэкӀэ» яджэх. Ахэр Исус илӀыкӀохэу тетыгъо зэритыгъэхэр ары. Тхьэм ы Псэ ЛъапӀэ илъэкӀыкӀэ унашъохэр афишӀыгъ. 3Исус къин зещэчым ыуж, щэч хэмылъэу лӀагъэхэм къызэрахэтэджыкӀыжьыгъэр бэрэ афигъэшъыпкъэжьэу ахэмэ заригъэлъэгъущтыгъ. Мэфэ тӀокӀитӀум къыкӀоцӀ апостолхэм бэрэ заригъэлъэгъущтыгъ, Тхьэм и Тетыгъошхо иӀофхэм яхьылӀагъэуи къадэгущыӀэщтыгъ. 4Исус ахэмэ ягъусэ зэхъум, унашъо афишӀыгъ:

– Къалэу Ерусалим шъудэмыкӀ, ау сэ зигугъу къышъуфэсшӀыгъэу, Ты лъапӀэм шъукъызэригъэгугъагъэм#1:4 Ты лъапӀэм шъукъызэригъэгугъагъэр – Тхьэм ы Псэ ЛъапӀ ары. Еплъ Лука 24:49; Иуан 15:26. шъупаплъ; 5сыда пӀомэ, Иуан псыкӀэ цӀыфхэр ыумэхъыщтыгъэх, ау мэфэ заулэ зытешӀэкӀэ, Тхьэм ежь ы Псэ ЛъапӀэкӀэ шъуиумэхъыщт.

Исус уашъом зэрэдэкӀоежьыгъэр

6Апостолхэр зызэрэугъоихэм, Исус къеупчӀыгъэх:

– Зиусхьан, Израиль ипачъыхьагъу мы мафэхэм зэтебгъэуцожьыщта?

7– Ты лъапӀэм итетыгъошхокӀэ уахътэхэуи лъэхъанэхэуи ыгъэнэфагъэхэр шъушӀэнхэ шъуфитэп, – ариӀожьыгъ Исус. 8– Ау Тхьэм ы Псэ ЛъапӀэ къызышъуфехыкӀэ, лъэкӀ шъуиӀэ хъунышъ, Ерусалими, зэкӀэ Иудей хэкуми, Самарие хэкуми, дунаим ыкъуапэ нэс шыхьат шъукъыщысфэхъущт.

9Исус а гущыӀэхэр къызеӀохэм ыуж, ахэмэ алъэгъоу Тхьэм ар уашъом дищэежьыгъ. Зы ошъуапщэ горэ Исус къышъхьащыхьи, ежь амылъэгъужьы хъугъэ.

10Исус уашъом зыдэкӀоежьым, апостолхэм анэхэр уашъом тырагъэдыкъагъэхэу, ошӀэ-дэмышӀэу лӀитӀу шъошэ фыжькӀэ фэпагъэхэу#1:10 лӀитӀу шъошэ фыжькӀэ фэпагъэхэу – мэлэӀичхэр ары. ахэмэ адэжькӀэ къэуцугъэх.

11Шъо, Галилей цӀыфхэр, – къаӀуагъ а лӀитӀумэ, – сыд пае мыщ дэжьым шъущытэу уашъом шъудэплъыера? Мы Исусэу Тхьэм уашъом дищэежьыгъэр уашъом дэкӀоежьыгъэу зэрэшъулъэгъугъэм фэдэ къабзэу къехыжьыщт.

Апостолхэм ежьхэм ащыщ хъунэу Иудэ ычӀыпӀэкӀэ Матфый зэрэхахыгъэр

12Ащ нэужым апостолхэр Елеон Ӏуашъхьэм ехыжьхи, Ерусалим агъэзэжьыгъ. Елеон Ӏуашъхьэр Ерусалим игъунэгъоу щыт, шэмбэт гъогум#1:12 шэмбэт гъогу – зы километрэ фэдиз мэхъу. Джурт хабзэм иунашъо тетэу, шэмбэт мафэм зы километрэ нахьыбэ укӀо хъущтэп. икӀыхьагъэ фэдизэу. 13Къалэм дэхьажьхи, ахэр зэрыс унэ лъагэм дэкӀоежьыгъэх; ахэр мыхэр арыгъэх: Петрэ, Иуан, Якъуб, Индрыс; етӀанэ Филипп, Фомэ, Бар-Талмай, Маттэ; Алфей ыкъо Якъуб, Симонэу ихэгъэгу ыпсэ емыблэжьэу фэлажьэщтыгъэр, Якъубэ ыкъо Иуд. 14Бзылъфыгъэ заулэ, Исус янэу Мерэм, Исус ышхэр ягъусэхэу, ахэмэ зэкӀэ зэдаштэу Тхьэм елъэӀу зэпытыщтыгъэх.

15А мафэхэм ИсускӀэ шӀошъхъуныгъэ зиӀэ купэу нэбгыришъэрэ тӀокӀырэ фэдиз хъущтыгъэм Петрэ къыхэуцуи, къыӀуагъ:

16– Сшыхэр, Тхьэм игущыӀэ тхыгъэхэр Тхьэм ы Псэ ЛъапӀэ пачъыхьэ Даутэ ыгу къырилъхьэхи, Иудэ зыцӀэм ехьылӀагъэу къыригъэӀуагъэхэр къэшъыпкъэжьынхэ фэягъэх. А Иудэр ары#1:16 А Иудэр ары… гъогур язгъэлъэгъугъэр – еплъ Лука 22:47. Исус къэзыубытыгъэхэм гъогур язгъэлъэгъугъэр. 17Ари тэ тщыщыгъ, мы Ӏофыми тигъусэу фэлажьэщтыгъ.

18Бзэджагъэу ышӀагъэм пае пкӀэу ратыгъэмкӀэ#1:18 пкӀэу ратыгъэр – еплъ Лука 22:3-6. Иудэ хьасэ къыщэфыгъ.

А хьасэм бгъэгукӀэ хафи, ыныбэ зэгоути, икӀэтӀыйхэр зэкӀэ къикӀыгъэх. 19Ерусалим дэс цӀыф пстэуми Иудэ къехъулӀагъэм икъэбар зэхахыгъ, абзэкӀи а хьасэм АкелдамэкӀэ еджэщтыгъэх. Ащ къикӀырэр «Лъыосэ Хьас».

20ЕтӀанэ Петрэ къыхигъэхъожьыгъ:

– Орэд ЛъапӀэхэм мыщ фэдэу арыт#1:20 Орэд ЛъапӀэхэм арыт – яплъ Орэд ЛъапӀэхэм 68:26; 108:8.:

«ИпсэупӀэ нэкӀ орэхъу. Зи ерэмыс». Мыщ фэдэуи арыт: «Ащ ипшъэрылъ нэмыкӀ горэм ерэштэжьи, ычӀыпӀэ ерэуцожь».

21,22– Арыти, Исус лӀагъэхэм къызэрахэтэджыкӀыжьыгъэр Иудэ ычӀыпӀэкӀэ нэмыкӀ горэм къыддиушыхьатын фае. А шыхьатыр Исус къытхахьэу, къытхэкӀэу зыщытыгъэ лъэхъаным зэкӀэ, Иуан Исус зиумэхъыгъэ мафэм щегъэжьагъэу Тхьэм Исус уашъом дищэежьыфэ, тигъусагъэхэм ащыщын фае.

23Аущтэу нэбгыритӀу агъэуцугъ: Юсыфэу Бар-ШаббэкӀэ заджэхэрэмрэ (ащ Иусти раӀуагъ) Матфыйрэ.

24,25ЕтӀанэ Тхьэм елъэӀухэзэ аӀуагъ:

– Зиусхьан, о цӀыф пстэуми агухэм арылъыр ошӀэ. Мы нэбгыритӀумэ ащыщэу, апостолым иӀоф ышӀэнэу хэпхыгъэр къытэгъэлъэгъу; сыда пӀомэ, Иудэ а Ӏофыр къыгъани, ежь фэшъошэ чӀыпӀэм кӀуагъэ.

26ЕтӀанэ пхъэдз радзи, пхъэдзыр Матфый тефагъ. Аущтэу апостол пшӀыкӀузымэ ягъусэу Матфыий апостол хъугъэ.

Currently Selected:

Апостолхэм ашӀэгъэ Ӏофхэр 1: AdgNT14

Highlight

Copy