Апостолхэм ашӀэгъэ Ӏофхэр 2

ЯТӀОНЭРЭШЪХЬ

Тхьэм ы Псэ ЛъапӀэ ИсускӀэ шӀошъхъуныгъэ зиӀэхэм къызэрафехыгъэр

1Пэнтэкост зыцӀэ мэфэкӀ мэфэшхор#2:1 Пэнтэкост зыцӀэ мэфэкӀ мэфэшхор – коцхэр къызахыжьырэм ыуж, джуртхэм илъэс къэс ятфэнэрэ мазэм агъэмэфэкӀырэ мэфэкӀ мэфэшхор ары. ӀутӀыжъ мэфэкӀ мэфэшхом ыуж, мэфэ шъэныкъо зыблэкӀыхэкӀэ, Пэнтэкост мэфэкӀ мэфэшхор къэсы. «Пэнтэкостым» къикӀырэр «яшъэныкъорэр» ары. къызэсым, шӀошъхъуныгъэ зиӀэхэр зэкӀэ зы чӀыпӀэм щытыгъэх. 2ОшӀэ-дэмышӀэу жьыбгъэшхоу къепщэрэм ибырсыр мэкъэшхо фэдэ макъэ уашъом къехи, унэу зэрысхэм зэкӀэ мэкъэшхор из хъугъэ. 3МашӀом фэдэу бзэгухэр къафэлъэгъуагъэх. А бзэгухэм загощи, ахэмэ ащыщэу хэтрэ цӀыфи зы бзэгу къытенагъэу хъугъэ. 4Тхьэм ы Псэ ЛъапӀэ зэкӀэми агухэм инэу арылъ хъуи, хымабзэхэмкӀэ къэгущыӀэхэу аублагъ, Тхьэм ы Псэ ЛъапӀэ къызэригъэгущыӀагъэхэм фэдэу.

5Дунаим сыдрэ лъэпкъи щыщхэу Тхьэм шӀолӀыкӀ фызиӀэ джуртхэр Ерусалим дэсыгъэх. 6А бырсыр мэкъэшхор къызэхъум, зыфахьын амышӀэу, цӀыфыбэхэр зэхэлъэдагъэх; сыда пӀомэ, хэти ежь ыбзэкӀэ ахэр къэгущыӀэхэу зэхахыгъэти ары. 7Лъэшэу агъэшӀагъоу зэраӀожьыщтыгъ:

– Мы къэгущыӀэрэ лӀыхэр зэкӀэ Галилей хэкум щыщхэба? 8Ащыгъум тэ тщыщэу, хэти ежь ыбзэкӀэ ахэр къэгущыӀэхэу зэхихын ылъэкӀэу сыдэущтэу хъура? 9Партие хэгъэгум щыщхэми, Мидие хэгъэгум щыщхэми, Елам хэгъэгум щыщхэми, Месопотамие хэгъэгум исхэми, хэкухэу Иудейрэ Каппадокиерэ арысхэми, хэкухэу Понтрэ Асиерэ арысхэми, 10хэкухэу Фригиерэ Памфилиерэ арысхэми, Мысырымрэ Либие хэгъэгум щыщ Кириние къалэм пэгъунэгъу лъэныкъомрэ арысхэми, Рим къэлэшхом къикӀыгъэхэми, 11джуртхэми, прозелитхэми#2:11 прозелитыр – зидин зэблэзыхъугъэр ары., Крит хыгъэхъунэм#2:11 хыгъэхъунэ – чӀыгу гъушъэу псы гузэгум итыр ары. щыщхэми, арабхэми, тэ зэкӀэ тыбзэхэмкӀэ Тхьэм Ӏофышхохэу ышӀагъэхэм якъэбар ахэмэ къаӀуатэу зэхэтэхы.

12ЦӀыф пстэуми агъэшӀагъоу, зыфахьын амышӀэу зэраӀожьыщтыгъ:

– Сыдым щыща мы къэхъугъэр?

13Зыгорэхэми акӀэнакӀэхэу къаӀуагъ:

– Сэнэпс ӀэшӀум ыгъэутэшъуагъэх.

Пэнтэкост мэфэкӀ мэфэшхом Петрэ цӀыф купышхоу зэхэтхэм апашъхьэ къызэрэщыгущыӀагъэр

14Джащыгъум Петрэ апостол пшӀыкӀузымэ ягъусэу къэтэджи, ымакъэ къыӀэти, гущыӀэр къыублагъ.

– Сшы джуртхэмрэ Ерусалим дэсхэмрэ, мыр зэжъугъашӀэ, къасӀохэрэми шъукъядэӀу. 15Шъо къызэрэшъушӀошӀырэм фэдэу мы лӀыхэр утэшъуагъэхэп, сыда пӀомэ, пчэдыжь сыхьатыр бгъу#2:15 пчэдыжь сыхьатыр бгъу – зытырахыгъэ алыджыбзэм итыр «ящэнэрэ сыхьат». Ащ къикӀырэр пчэдыжьым сыхьатыр бгъур ары. хъугъэ ныӀэп. 16Ау мыщ дэжьым къыщыхъугъэр пегъымбар Иоил#2:16-20 пегъымбар Иоил… зытегущыӀагъэр – еплъ Пегъымбар Иоил тхылъэу ытхыгъэм 2:28-32. Ӏофэу зытегущыӀагъэр ары:

17«Тхьэм моущтэу еӀо: дунаим иаужырэ мафэхэм сэ с Псэ ЛъапӀэ цӀыф пстэуми къафезгъэхыщт. СигущыӀэхэр шъо шъукъохэмрэ шъупхъухэмрэ агухэм къарыслъхьанхэшъ, къязгъэӀощт. ШъуикӀалэхэми Ӏофхэр къафэзгъэлъэгъощтых, шъуинахьыжъхэми пкӀыхьапӀэхэр язгъэлъэгъущтых.

18А мафэхэм къысфэӀорышӀэрэм, хъулъфыгъэми бзылъфыгъэми, сэ с Псэ ЛъапӀэ къафезгъэхыщт, сигущыӀэхэри ахэм агухэм къарыслъхьанхэшъ, къязгъэӀощтых.

19Уашъом Ӏофышхо гъэшӀэгъонхэр къыщызгъэлъэгъощтых, чӀылъэми нэшэнэ гъэшӀэгъонхэр къыщызгъэлъэгъощтых, лъы, машӀо, Ӏугъошхо къэхъущтых.

20Зиусхьаным имэфэшхоу щытхъушхо зиӀэр къэкӀоным ыпэкӀэ, тыгъэри шӀункӀ къэхъущт, мазэри лъым фэдэ хъущт.

21Хэт щыщи Зиусхьаныр къыдэӀэпыӀэнэу елъэӀурэр мыкӀодэу къэнэжьыщт».

22Ащ нэужым Петрэ джыри ипсалъэ къыпидзэжьыгъ:

– Шъо, израиль лӀыхэр, мы гущыӀэхэм шъукъядэӀу: Назарет щыщ Исус ежь зэрэщыщыр шъо Тхьэм къышъуфигъэшъыпкъэжьыгъ. Тхьэм ар къызэригъэшъыпкъэжьыгъэр Исус лъэкӀ зыхэлъ Ӏофышхохэмрэ Ӏофышхо гъэшӀэгъонхэмрэ шъуадэжь зэрэщыригъэшӀагъэхэри, нэшэнэ гъэшӀэгъонхэр зэрэщыригъэгъэлъэгъуагъэхэри ары. 23Тхьэм гухэлъэу ыухэсыгъэм тетэуи, Тхьэм ар къэхъуным ыпэ къэхъунэу зэришӀэщтыгъэм фэдэуи, Исус къышъуӀэкӀэхьагъ. ЦӀыф бзаджэхэм шъо къащым тыряжъугъэӀулӀи, яжъугъэукӀыгъ. 24Ау Тхьэм ар лӀэныгъэм икъин щэчыным хищыжьыгъэу, лӀагъэхэм къахигъэтэджыкӀыжьыгъ; сыда пӀомэ, лӀэныгъэм ар зыӀэкӀиубытэн ылъэкӀыщтыгъэп. 25Пегъымбар Даутэ Исус ехьылӀагъэу моущтэу къыӀуагъ#2:25-28 пегъымбар Даутэ… къыӀуагъ – яплъ Орэд ЛъапӀэхэм 15:8-11.:

«Зиусхьаныр сапашъхьэ итэу слъэгъу зэпытыгъ.

ЗыкӀи симыгъэгумэкӀыным пае, ар сиджабгъукӀэ къызгот.

26Арышъ, сыгу мэгушӀо, сыбзэгуи мэгушӀо.

Спкъи гугъэпӀэшӀу иӀэу псэфыжьыщт,

27сыда пӀомэ, лӀагъэхэм ядунаи сэ спсэ къыфэбгъэнэжьыщтэп.

УиӀорышӀэ лъапӀэм ихьадэ бгъэшъущтэп.

28ЩыӀэныгъэм дэжь кӀорэ гъогухэр сэбгъэшӀагъэх.

Уадэжь сэ сыщыбгъэгушӀожьыщт».

29– Сшыхэр, тятэжъышхо Даутэ ехьылӀагъэу гушхоныгъэкӀэ сыкъэгущыӀэн сыфит. Ар дунаим ехыжьыгъагъ ыкӀи чӀалъхьажьыгъагъ, непэ къэсыфэ икъэунэ тадэжь щыӀ. 30Даутэ пегъымбарыгъ, ащи ышӀэщтыгъ, Христосэу#2:30 Христос – пачъыхьэ Даутэ илъэпкъ къытекӀыгъэу, пегъымбархэм къызэраӀуагъэм тетэу, Израиль шъхьафитыныгъэрэ мамыр тетыгъорэ ригъэгъотынхэу Тхьэм Израиль къызэригъэгугъэгъэ пщы лъапӀэр ары. ежь Даутэ къытекӀын фэегъэ цӀыфхэм ащыщыр ежь Даутэ ипачъыхьэ тӀысыпӀэ тыригъэтӀысхьанэу Тхьэм гущыӀэ пытэкӀэ къызэригъэгугъагъэр#2:30 Тхьэм гущыӀэ пытэкӀэ къызэригъэгугъагъэр – яплъ Орэд ЛъапӀэхэм 131:11.. 31Арышъ, Даутэ къэхъущтыр ешӀэти, Христос игугъу ышӀэу#2:31 Даутэ… Христос игугъу ышӀэу – яплъ Орэд ЛъапӀэхэм 15:10. «Тхьэм ар лӀагъэхэм ядунай къыригъэнэжьыщтэп», «ащ ихьади ыгъэшъущтэп» къызеӀом, зыфиӀуагъэр Христос лӀагъэхэм къызэрахэтэджыкӀыжьыщтыр ары. 32А Исусыр ары Тхьэм лӀагъэхэм къахигъэтэджыкӀыжьыгъэр, а Ӏофыми тэ зэкӀэри тыришыхьат. 33Тхьэм Исус уашъом дищэежьи, иджабгъукӀэ зызыгуегъэтӀысхьэм ыуж, Ты лъапӀэм ежь ы Псэ ЛъапӀэу къызэригъэгугъагъэр къыритыгъ, зэрэшъулъэгъурэми зэрэзэхэшъухырэми фэдэу Исус Тхьэм ы Псэ ЛъапӀэ къытфыригъэхыгъ. 34Сыда пӀомэ, Даутэ уашъом дэкӀоежьыгъэп, ау моущтэу къыӀуагъ#2:34-35 Даутэ… къыӀуагъ – яплъ Орэд ЛъапӀэхэм 109:1.:

«Тхьэу Зиусхьаным сэ си Зиусхьан къыриӀуагъ:

35Уипыйхэр лъэгукӀэтын пфэсшӀыфэхэ, сиджабгъукӀэ о щыс».

36– Арышъ, израиль цӀыф пстэуми мыр яшъыпкъэу арэшӀ: Мы Исусэу шъо къащым тешъуӀулӀагъэр Тхьэм Зиусхьанэу ыкӀи Христосэу къыгъэхъугъ.

37ЦӀыфхэм ар зызэхахым, агу хэуӀагъ. Ахэмэ Петрэрэ адрэ апостолхэмрэ къараӀуагъ:

– Тшыхэр, сыда тэ тшӀэн фаер?

38– ШъуипсэкӀодшӀагъэхэм шъуафыкӀэгъожьи, Исус Христос ыцӀэкӀэ шъо пстэуми зытэжъугъэумэхъ, Тхьэм шъуипсэкӀодшӀагъэхэр къышъуфигъэгъунхэм пае, – ариӀожьыгъ Петрэ. – Ащыгъум Тхьэм итынэу ежь ы Псэ ЛъапӀэ шъугухэм къарилъхьащт. 39Тхьэм ежь ы Псэ ЛъапӀэ къызыфыригъэхынэу къыгъэгугъагъэхэр шъори, шъуибынхэри, зэкӀэ чыжьэу щыӀэ цӀыфхэри – зэкӀэ цӀыфхэу ежь ибын хъунхэу Зиусхьанэу ти Тхьэ заджэхэрэр ары.

40НэмыкӀ гущыӀабэкӀэ Петрэ ахэмэ афигъэпытэу ялъэӀугъ:

– Мы лъэпкъ къуанчэм Тхьэм зыхежъугъэщыжьи, шъумыкӀодэу зыкъежъугъэгъэнэжь.

41Аущтэу Петрэ игущыӀэхэр зыштагъэхэм зарагъэумэхъыгъ. А мафэм шӀошъхъуныгъэ зиӀэхэм япчъагъэ минищ фэдиз хэхъуагъ. 42Апостолхэм арагъашӀэрэ Тхьэм игущыӀэхэм агу етыгъэу шӀошъхъуныгъэ зиӀэ хъугъэ цӀыфхэр ядэӀущтыгъэх, зэкъошхэм фэдэуи зэхэтыгъэх, хьалыгъур зэгуач зэпытыщтыгъ#2:42 хьалыгъу зэгуач зэпытыщтыгъ – Исус лӀи, лӀагъэхэм къызэрахэтэджыкӀыжьыгъэр агу къагъэкӀыжьызэ, ИсускӀэ шӀошъхъуныгъэ зиӀэхэр зэдашхэх., Тхьэми елъэӀу зэпытыщтыгъэх.

ШӀошъхъуныгъэ зиӀэхэм язэкъошныгъ

43Апостолхэм Ӏофышхо гъэшӀэгъон Ӏаджыхэр ашӀагъэхэти, нэшэнэ гъэшӀэгъон Ӏаджыхэри къагъэлъэгъуагъэхэти, цӀыфхэм зэкӀэ агухэм щынагъо арылъ хъугъэ. 44ШӀошъхъуныгъэ зиӀэхэр зэкӀэ зэгъусагъэх, яӀэри зэкӀэ язэфэдагъ. 45Ямылъкухэмрэ яхьапщыпхэмрэ ащэхи, къыкӀэкӀыгъэм щыщ хэти ищыкӀагъэм фэдиз ратыгъ. 46Зыгу-зыпсэу мафэ къэси Тхьэм иунэшхо щызэӀукӀэ зэпытыщтыгъэх. Яунэхэми хьалыгъур ащызэгуачыщтыгъ, гушӀохэу, агу шъыпкъагъэ зэфилъэу зэдашхэщтыгъэх. 47Тхьэм ищытхъу аӀощтыгъ, цӀыф пстэуми агуи яӀущтыгъ. ЦӀыфхэу мыкӀодхэу къыгъэнэжьхэрэмкӀэ шӀошъхъуныгъэ зиӀэхэм япчъагъэ мафэ къэс Зиусхьаным хигъахъощтыгъ.

Currently Selected:

Апостолхэм ашӀэгъэ Ӏофхэр 2: AdgNT14

Highlight

Copy