Mk 13

Mɑ̈ɑ̈gi Rënyi Kengø ki Kwøbø yi Yëso

(Mt 24.1-2; Lk 21.5-6)

1Keny-ɑ ɑ́bëëne wɑ̈g kì yij Kengø, ɑköbbii yi ɑ́kyel kì kelli jøbɑnge kinni, “Jɑlpwönyø, lidh døøji kïttì kí døøji ud!”

2Akööb Yëso kinni, “Udd-ɑ døngø ɑgɑk onennø yi yïn? Bong kït ɑ́kyel kì kelli kïtt-ɑ ógeer gen, men-ɑ ódöng kì kömi megø, e nuti leeng piny.”

Akørr kí Guudi Nying

(Mt 24.3-14; Lk 21.7-19)

3Yëso ɑ́bëëd ɑ piny kì wïj Kïti Dhetun, e rwöm ki Kengø e kete, ɑkedhi Pïtør yïe geki Yɑgob, kí Jøn kí Andrø, kɑ gø köbbi gen kinni, 4“Köbbí wøn, ryɑ̈ngɑni óbï ɑ wën? Á ngïji mɑ ngø ɑ ónyodh kinni bëëne ɑ́cyɑ̈ngi?”

5Kɑ Yëso ócɑ̈gø köbbi gen kinni, “Koru ri wun, o bongi ngɑn-ɑ ópeej wun pɑ̈l. 6Ji mø gïïr óbï ce ge bɑ yɑn, ge ókööbø kinni, ‘Yɑ bene en!’ Kɑ ji mø gïïr peej ge pɑ̈l. 7O keny-ɑ ólïng wun ki kwøbbi liny kí wöddi liny, kɑ pëthi wun ko lïngi, mɑ́ møgɑni bɑ møg bï ceth, de cögi piny nuti. 8Mɑ́ jur ópɑ̈ɑ̈r kömi jur-ɑ kyeelø, kɑ pönhï pɑ̈ɑ̈r-ɑ kömi pönh-ɑ kyeelø. Kɑ piny onhɑ̈nhø kì kɑ̈jj mø gïïr. Kɑ kɑ̈j ómɑ̈gø. O møgɑni óbëëd gɑ mwölli orɑng.

9 # Mt 10.17-20; Lk 12.11-12 “Kɑ nyingi wun yieb wun kidøøj, mɑ́ wu ópeej sinɑgøgg, kɑ wu pwöd kì yethi sinɑgøgg, o wu ócungi kì bøli modïrr geki rɑ̈nhì kipe nyingɑ, kipe kinni, o møg-ɑ ngɑ̈nyi yi wun töng yi wun kì bøli gen. 10De wɑ̈thi jurrì bënn ceg kɑ pwönyø ki wöndøj, e cögi piny nuti bëënø. 11Keny-ɑ ómɑɑg wun kɑ wu køøl be gøny, kɑ pëthi wun ko lïngi kipe møg-ɑ ókømmi yi wun. De nyi kwøb wun møg-ɑ ómëggi wun kì bøli kenyɑni, mɑ́ e pɑth ki wun ɑ ókööbø den-ɑ́ Wëykwërø. 12Dhɑnhø ómen óngeewe kipe kinni o nɑ̈g, kɑ dhɑnhø wɑ̈de ngeewe, kɑ nywøl pɑ̈ɑ̈r-ɑ kömi wëëg gen geki mëëg gen, kɑ gï nɑ̈g gen. 13#Mt 10.22 O wu ómɑɑn yi teedø bëne kipe nyingɑ, de ngɑn-ɑ óngïnø gïti keny-ɑ óthumi møgɑni, óyiel.

Gïn-ɑ Ti ki Böggø

(Mt 24.15-28; Lk 21.20-24)

14 # Dɑn 9.27; 11.31; 12.11 “Gïnrɑj men-ɑ Böggi ólidh yi wun, e ócïb keny-ɑ pɑ døøj ki en, (Yod thɑ́ møgɑni, yïn ɑ ngɑn-ɑ rɑ̈ngø,) kɑ wiy tyëng-ɑ ying Yeudiyɑ̀ rengi gen kelli kïttì. 15#Lk 17.31 Kɑ ngɑn-ɑ wïj óthɑɑng ød ko yïnhi piny, wɑlɑ̀ ko kedhi øde be dwɑ̈ddø ki gïïpiny. 16Kɑ ngɑn-ɑ yij pwödhe ko døøg be kwɑnyi ógødhe. 17Tyëng-ɑ bɑ ɑ́yɑjj geki ɑ́nyödd kì yethi cyɑ̈nggɑni ri gen ódi cyën. 18Kwɑ̈jji wun kipe kinni o møgɑni cög ge pɑ bï kì cwir. 19#Dɑn 12.1; Nyudhø 7.14 Mɑ́ yethi cyɑ̈nggɑni ódi orɑng me dwøng, me nuti pɑ̈nyi bëënø kër-ɑ ɑ́cwɑ̈ɑ̈j piny yi Jwøk gïti ɑnɑn, o koo cigi bëënø. 20O keløg cyɑ̈nggɑni pɑ di ngwöddi yi Wë, bong dhɑnhø me di bodh. De cyɑ̈nggɑni ɑ́ngwöddi yi en kipe ji-ɑ ɑ́yienye.

21“O keløg e dɑ ngɑn köbbi wun kinni, ‘Lidhu, Mesiy èn!’ Wɑlɑ̀ kinni, ‘Lidhu en ɑcɑ̀!’ Møgɑni ko yïëy wun. 22Mesiy mø pɑth ki dyër ócwöb, o jøtöng mø pɑth ki dyër ócwöb, kɑ ge onyudhø ki ngïjjì kí gïïngɑ̈ngø, kipe kinni o tyëng-ɑ ɑ́yieny peej gen pɑ̈l, keløg ɑ́ gïn cuggi. 23De koru ri wun. Møgɑni ɑ́rum ki köbbi wun yi yɑn, e bøli kenyɑni nuti bëënø.

Bëëni Nyɑɑr Dhɑnhø

(Mt 24.29-31; Lk 21.25-28)

24 # Icɑ 13.10; Idhki 32.7; Yöiil 2.10, 31; 3.15; Nyudhø 6.12 “Kì yethi cyɑ̈nggɑni, kì yij orɑng, cɑ̈ng ólunyi, kɑ bong-ɑ cɑr me kɑ̈ɑ̈l yi dwɑ̈y. 25#Icɑ 34.4; Yöiil 2.10; Nyudhø 6.13 Kɑ kyell odyëmø kì mɑl, kɑ gïg-ɑ teg kì mɑl okïïrø. 26#Dɑn 7.13; Nyudhø 1.7 Kì bøli kenyɑni, Nyɑɑr Dhɑnhø ólidh yi ji, e kɑ̈ɑ̈l-ɑ mɑl kì yij pøølø ki tegø me dwøng geki mɑ̈r. 27Kɑ wëywödde öre wɑ̈thi tùngi piny gɑ ɑ́ngwen, be cøngi ji-ɑ ɑ́yieny yi Jwøk.

Pwönyø kì ri Ólɑm

(Mt 24.32-35; Lk 21.29-33)

28“Dïd wun kì ri ólɑm. Kɑ̀ nyi yömi ɑnɑ̈bbe, kɑ yïthhe otwïyø ngɑ̈nyi yi wun kinni, cwir ɑ́cyɑ̈ngi. 29Thyew, keny-ɑ ólidhu møgɑni ge ocwöbø, kɑ wu ngɑ̈nyu wøw kinni, thumi piny ɑ́cyɑ̈ngi ki bëënø.#13.29 bøli kenyɑni ɑ́cyɑ̈ngi; ɑ́cyɑ̈ngi ki cɑ̈gø; wɑlɑ̀ cyɑ̈gi; ɑ́cyɑ̈ngi ki bëënø. 30Yɑ köbb-ɑ wun kidyër kinni, rïj men pɑ thumi ki thøø, e møgɑni bënn nuti cwöbø. 31Mɑl kí piny ólɑ̈ɑ̈ny, de kwøbbɑ pɑ lɑ̈ɑ̈ny.

Bong Ngɑn Ngɑ̈nyi Cyɑ̈ngɑni Wɑlɑ̀ Sɑɑ̀ Menɑni

(Mt 24.36-44)

32 # Mt 24.36 “De cyɑ̈ngɑni wɑlɑ̀ sɑɑ̀ menɑni bong ngɑn ngɑ̈nyi gen, cɑgg ɑ́ wëywödd kì mɑl, wɑlɑ̀ Wɑ̈d den-ɑ́ Wïy kete ɑ ngɑ̈nyii. 33Koru ri wun, kɑ wu nëën wun kidøøj, mɑ́ keny-ɑ óbëën bøli kenyɑni kwïj yi wun. 34#Lk 12.36-38 Menɑni nɑ jɑl mɑ ɑ́weli, kɑ gøle wiye kì cinggi bɑ̈ngge. Kɑ men nyi nyudhe gwøge. Kɑ jɑl-ɑ kor dhø kɑl cege kinni, nëëne kidøøj. 35Kɑ ɑ́rum bëëde kinøw, nëën wun, mɑ́ bøli keny-ɑ óbëën wïi kɑl kwïj yi wun, ócuggø bëënø kì böörø, wɑlɑ̀ dïwɑ̈r, wɑlɑ̀ bɑ̈ɑ̈rø, wɑlɑ̀ mwøl. 36Nëën wun, o wu ócög wu pɑ yuude, wu onenø. 37Møg-ɑ köbbɑ wun, köbbɑ’ teedø bëne kinni, nëën wun!”

Currently Selected:

Mk 13: shkDCB

Highlight

Copy