Mk 12

Gɑ́ji Jøg-ɑ Ákïrri Bɑɑg Oløg

(Mt 21.33-46; Lk 20.9-19)

1 # Icɑ 5.1-2 Kɑ Yëso ócɑ̈gø köbbi gen kì yethi gɑ́j kinni, “Jɑl megø ɑ́pïïdh ki bɑɑg oløg. Kɑ gø wene ki kyel. Kɑ ogöögø ki bur men nyi biij oløg. Kɑ ogëdø ki ɑkɑnø me bɑ̈r men wïje nyi kur. Kɑ bɑngɑni bëne kïrre jøg mø korii, kɑ ówelø. 2Kì bøli keny-ɑ nyi cyeg jɑmmì, ɑöde yï jøg-ɑ kor bɑg ki bɑ̈ng, kinni o di kɑ̈ne kì yï gen ki bun-ɑ bɑ mee kì ri gïg-ɑ ɑ́nywøl yi bɑngɑni. 3Kɑ bɑ̈ngɑni mɑg gen, kɑ gø pwöd gen, kɑ gø ryem gen ki cingge. 4Kɑ öd-ɑ yï gen ki bɑ̈ng megø. Kɑ wïje kïdhi gen ki kedd. Kɑ gø göggi gen ki gïnrɑj. 5Aöde ki megø, kɑ bɑ̈ngɑni nɑ̈g gen. Kɑ oödø ki møøgø, kɑ mø gïïr kì kelli gen pwöd gen, kɑ kwï gen nɑ̈g gen. 6Kɑ döng-ɑ́ wɑ̈de, wɑ̈n-ɑ mɑɑre. Kì cyɑ̈n cyee, ɑöre wɑ̈de yï jøgɑni, e okööbø kinni, ‘Wɑ̈dɑ ówør yi gen.’ 7De jøg-ɑ kor bɑɑg oløg ri gen ɑ́köbbi gen kinni, ‘Men bɑ wɑ̈d jɑlbɑg. Bïu, nɑ̈g wɑ en, o bɑg gööge ɑ́ miee.’ 8Kɑ gø mɑg gen, kɑ gø nɑ̈g gen. Kɑ gø ywɑɑj gen wɑ̈g kì yij bɑg.”

9Apëjji Yëso kinni, “Wïi bɑngɑni ógöög ɑ dï? Óbï kɑ tyëng-ɑ kor bɑngɑni nɑ̈ge, kɑ bɑg cïbe cinggi ji møøgø. 10#Wör 118.22-23 Wu nuti rɑ̈ngø ki møg-ɑ ógwedø kì yethi wɑ̈jji kwërø kinni,

‘Kït men-ɑ ɑ́bɑny yi bödhhi gyer,

en ɑ ɑ́göög ɑ́ kïn-ɑ mïdhi wïj tuung ød.

11Menɑni ɑ́gwøg-ɑ yi Wë

bɑ gïïngɑ̈ngø kɑ ɑ́lidhii yi wɑ!’ ”

12Kɑ gø dwɑddi gen mɑgø, mɑ́ e ɑ́ngij yi gen kinni ɑ́gɑj-ɑ gen, de ge ɑ́bwøg yi teedø. Kɑ gø wiy gen, kɑ ge ókedhø.

Pyëj kì ri Coli Gwɑ̈j

(Mt 22.15-22; Lk 20.20-26)

13Kɑ ge öd-ɑ yïe ki kwï Jøpɑresì kí kwï jøgi ɑkuud Ërödøs, o ge yɑb gen dhøge, men-ɑ ókööbe ki gïn pere mɑgii yi gen. 14Abëën gen, kɑ gø köbbi gen kinni, “Jɑlpwönyø, ngɑ̈nyi yi wøn kinni, yï bɑ ngeti dyër, o bong ngɑn nyi geny yi yïn, mɑ́ yï pɑ nyi nenni bëëdi ji, de yï nyi pwöny-ɑ yuu-ɑ dyër, ɑ bɑ kwøbbi Jwøk. Bɑ ɑkerø yi Ciggee eni cudi Kɑysɑr ki gwɑ̈j? Nyi cud wøn, wɑlɑ̀ wø ko nyi cud?”

15Kɑ wëënyi gen ngij yi Yëso, ɑköbbe gïn kinni, “Á kipe ngø ɑ rɑngu yɑn? Muuju yɑn ki ngyënyø ɑ́tegø, o lidhɑ.”

16Kɑ ngyënyø ɑ́kyel kɑ̈ɑ̈l gen. Apëjje kinni, “Á ngïji men, kí gweddi men ek?”

Kɑ ge okööbø kinni, “Mø Kɑysɑr.”

17Akööb Yëso kinni, “Keløg ɑ́ kinøw, mëggu jɑmmi Kɑysɑr, Kɑysɑr, kɑ jɑmmi Jwøk mëggu Jwøk.”

Kɑ ge ongɑ̈ngø yi møg-ɑ kømmi yi Yëso.

Pyëj kì ri Dhwödhø kì Yij Thøø

(Mt 22.23-33; Lk 20.27-40)

18 # Gwøg 23.8 Kɑ Jøsɑduk møg-ɑ kööbø kinni i bong dhwödhø kì yij thøø bï-ɑ yï Yëso. Kɑ gø köbbi gen kinni, 19#Jølø 25.5 “Jɑlpwönyø, Mosɑ̀ wø ɑ́gwëde cigg møg kinni, ‘Keløg dhɑnhø ómen othøø, kɑ cyëge wiye, e bong wɑ̈d, lɑge cï ómen, o ómen nyödde ki wïj.’ 20Ádɑ nyiimëëg ɑ́bïryew, kɑ nyeldwøng ónyömø ki dhɑjø, kɑ othøø e bong nywøl mɑ ɑ́wiy yi en. 21Kɑ cyëge lɑg yi nyel-ɑ bɑnge, kɑ nyelɑni othøø, e bong nywøl mɑ ɑ́wiy yi en. Kɑ dɑ̈ɑ̈g gen kɑ̈l-ɑ bɑng gen thyew. 22Kɑ jøgɑni gɑ ɑ́bïryew bënn othøø e bong nywøl mɑ ɑ́wiy yi gen. Athøw ngɑnɑni kì cyɑ̈ɑ̈n gen bënn. 23Ngɑnɑni óbëëd ɑ́ cï men, keny-ɑ ódwöög ji wɑ̈g kì yij thøø? Mɑ́ e ɑ́bëëd ɑ́ dhɑjø kì yï ɑ́bïryew bënn.”

24Aköbbi gen yi Yëso kinni, “Wu ɑ́bɑ̈jji! Gïn-ɑ pere ɑ́bɑ̈jji wun ngɑ̈nyi wun? Bɑ kipe kɑ̀ kwïj wun Wɑ̈jji Kwërø geki tegi Jwøk. 25Mɑ́ keny-ɑ ódhwödh ji kì yij thøø, ge pɑ nyömi wɑlɑ̀ ge pɑ nywøm, de ge óni wëywödd kì mɑl. 26#Kedhø 3.6 Anɑn kipe kwøbbi dwöögi tyëngthøø mɑl, wu nuti rɑ̈ngø kì yij Wɑ̈nyi Mosɑ̀ ki møg-ɑ ógwedø kì ri kwøbbi nyɑ kïrø? Kí keny-ɑ ɑ́kööb Jwøk kinni, ‘Yɑ bene Jwøøg Abrɑhɑm, kí Jwøøg Isɑɑk, kí Jwøøg Yɑgob.’ 27Jwøk pɑth ki Jwøøg tyëngthøø, den-ɑ́ Jwøøg tyëngnëënø. Wu ɑ́bɑ̈jji ki mendwøng!”

Cigg-ɑ Døngø

(Mt 22.34-40; Lk 10.25-28)

28 # Lk 10.25-28 Ákyel kì kelli jøpwönyi Cigg ɑ́bëëd e nud kì kenyɑni, o møg-ɑ ɑ́kømmi yi gen ɑ́lïnge. Kɑ gø lidhe kinni, mø Jøsɑduk ɑ́løøg yi Yëso kidøøj, codhe ɑkedhe yïe kɑ gø pyëje kinni, “Á cigg ɑ́, ɑ mɑl kibøli cigg bënn?”

29 # Jølø 6.4-5 Alöggi Yëso kinni, “Cigg-ɑ mɑl bɑ kinni, ‘Lïng yïn ɑ Isrɑil, Wöw Jwøgí, ɑ bɑ Jwøk kete. 30Mɑɑr Wöw Jwøgí, ki pyëwí bëne, kí wëyí bëne, kí rummí bënn, kí tegí bëne.’ 31#Kwɑrr 19.18 Men ɑ bɑnge bɑ kinni, ‘Mɑɑr ngɑn-ɑ butí ni kɑ̀ mɑɑr rií.’ Bong cigg møøgø mø lod møg ryeet ki döng.”

32 # Jølø 4.35 Kɑ köbbi yi jɑlpwönyi Cigg kinni, “Jɑlpwönyø, kwøbbí bɑ dyër. Gïn-ɑ ɑ́kwøb yi yïn bɑ dyër kinni, Wë bene Jwøk, bong jwøg megø den-ɑ́ en kete. 33#Odhe 6.6 O kɑ̀ mɑɑr Jwøk yi dhɑnhø ki pyëwe bëne kí rumme bënn, kí tege bëne; kí mɑɑri dhɑnhø ngɑn-ɑ bute ni kɑ mɑɑre ree, møgɑni lod-ɑ gëdhhì geki gïg-ɑ nyi muuj, gɑ møg rɑ̈bbi Jwøk bënn.”

34Keny-ɑ ɑ́lidhii yi Yëso kinni lögge døøj, ɑköbbe gøn kinni, “Yï pɑ lɑ̈wi ki Pödhi Jwøk.”

Kɑ teedø obwøgø pyëjii këti.

Pyëj kì ri Mesiy

(Mt 22.41-46; Lk 20.41-44)

35Yëso ɑ́bëëd e ópwönyø kì yij Kengø, ɑkööbe kinni, “Mesiy nyi cwølli yi jøpwönyi Cigg ɑ́ kwɑɑr Debïd. Møgɑni ócuggi kidï? 36#Wör 110.1 Møgɑni pɑ cuggi, mɑ́ Debïd kiree ɑ́kööb kì ri tegi Wëykwërø kinni,

‘Wɑ̈ɑ ɑ́köbbi yi Jwøng-ɑ Ácwɑ̈ɑ̈j kinni,

Bëëd kì wïj kyëjɑ,

gïti keny-ɑ ócïbɑ tyëng-ɑ mɑɑn yïn thɑ́ tyellí.’

37Cwølli yi Debïd kiree ɑ́ wɑ̈n, de óløg kwɑre kidï?”

Cegi Ji kipe Jøpwönyi Cigg yi Yëso

(Mt 23.1-36; Lk 20.45-47)

Kɑ mø Yëso lïngi yi teedø bëne ki medi pëëth. 38Kɑ okööbø e pwöny-ɑ gen kinni, “Koru ri wun kipe jøpwönyi Cigg, gen ɑ tyëng-ɑ pëthi gen med ki wïïnø ki ɑ́ywödhh mø bɑ̈rrø, o ge nyi yɑb-ɑ mɑ̈dhhø kì kɑ̈jji ngyew. 39Ge nyi yɑb-ɑ bëëdø kì wɑ̈thi kwømm-ɑ døj kì sinɑgøgg, o ge yɑb-ɑ pëggi kɑ̈jj-ɑ døj kì kɑ̈jji ryëj. 40Ge nyii kɑ̈ɑ̈bø ki uddi thwömm, kɑ ge nyii lɑ̈mø ki lɑm me bɑ̈ɑ̈r, ge ceg-ɑ nɑ̈n. Ge óyïddi ki cɑ́y mø døngø.”

Muunyi Thwöm

(Lk 21.1-4)

41Kɑ Yëso pëgg-ɑ piny ree rwööm en ki sɑnduug ngyëny. Kɑ teedø mø gïïr nenne, ge kïdh-ɑ yij sɑndungɑni ki ngyëny. Kɑ tyëngkɑ̈rì mø gïïr kïdh-ɑ yije ki ngyëny mø ngenyø. 42Kɑ ngɑndhɑjø mɑ thwöm, mɑ ɑbuur obëënø. Kɑ kïdh-ɑ yije ki gïrïc ɑ́ryew. 43Kɑ jøbɑnge cwøøle yïe. Kɑ gï köbbe kinni, “Yɑ köbb-ɑ wun kidyër kinni, thwöm-ɑ ɑbuur men, ɑ́muuj ki ngyëny mø lod møg-ɑ ɑ́muuj yi teedø bëne. 44Mɑ́ tyëngɑni bënn ɑ́muuj ɑ ri gïg-ɑ ɑ́döngi piny kì yï gen, de thwöm-ɑ ɑbuur men, ɑ́muuj-ɑ gïg-ɑ nud kì yïe bënn, gɑ møg di mïdhii.”

Currently Selected:

Mk 12: shkDCB

Highlight

Copy