Mt 23

Kyëddi Ji ki Lïngi Kwøbbi Jøpwönyi Cigg geki Jøpɑresì yi Yëso

(Mk 12.38-40; Lk 11.43, 46; 20.45-46)

1Kɑ Yëso jøbɑnge geki teedø köbbe kinni, 2“Jøpwönyi Cigg geki Jøpɑresì bɑ gen ɑ nyi lwøb gïn-ɑ wɑngi yi Ciggi Mosɑ̀. 3Nyi gwøgu møg-ɑ köbbi wun yi gen ceth. De gïg-ɑ gøggi yi gen ko nyi ngøy wun. Mɑ́ ge nyi wɑ̈dh-ɑ kwøb, de møg-ɑ kømmi yi gen pɑ nyi gwøg yi gen. 4Tyëngɑni nyi cøng-ɑ gïg peg møg-ɑ nyi cïb gen wɑ̈thi ji, de ge pɑ yïëy nywɑ̈dø ki lwedø ɑ́kyel. 5#Mt 6.1; Kwɑn 15.38; Jølø 6.8 Gïg-ɑ gøggi yi gen bënn, nyi gwøg yi gen kɑ per kinni o ge nenni yi ji, mɑ́ wɑ̈jj-ɑ rug yi gen nyi gwøg yi gen ge døngø, kɑ ojwɑrri ógudhi gen nyi gwøg yi gen ge bɑ̈rrø, 6ge mɑɑr-ɑ bëëdø kì wɑ̈thi kwømm-ɑ per gen teg kì kɑ̈jji ryëj, kí kwømm-ɑ døj kì sinɑgøgg, 7kí mɑ̈dhhø yi teedø kì yethi kɑ̈jji ngyew, geki cwølli gen yi teedø kinni, ‘Jɑlpwönyø.’ 8De ri wun ko wëggu cwøllø kinni, ‘Jɑlpwönyø.’ Mɑ́ jɑlpwönyi wun nud ɑ́ ɑ́kyel, o wu bɑ nyiimëëg bënn. 9Kɑ ko di dhɑnhø me cwølli yi wun ɑ́ wïyi wun kì kömi piny, mɑ́ wïyi wun bɑ ɑ́kyel kete, en ɑ ngɑn-ɑ ying Pödhi Jwøk. 10Wɑlɑ̀ wu ko nyi yïëy cwøllø yi teedø kinni, ‘Wuö,’ mɑ́ wïi wun bɑ ɑ́kyel en ɑ Mesiy. 11#Mt 20.26-27; Mk 9.35; 10.43-44; Lk 22.26 De ngɑn-ɑ dwøng kì kelli wun óløg bɑ̈ng wun. 12#Lk 14.11; 18.14 Ngɑn-ɑ nyi tïng ree mɑl ódwøøg cyɑ̈n, o ngɑn-ɑ nyi dwøøg ree cyɑ̈n ótïng mɑl.

Cɑyi Gen yi Yëso kipe Wëënyø

(Mk 12.40; Lk 11.39-42, 44, 52; 20.47)

13“Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ Pödhi Jwøk ɑ́cyëëg yi wun kipe ji møøgø; wu pɑ kedhi yije, o ji møøgø nuti wëggu kedhi yije. 14Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ kɑ̈lli thwömm nyii kɑbø yi wun, kɑ wu nyii lɑ̈mø ki lɑm mø bɑ̈rrø, kipe kinni o wu nenni yi teedø. Kömi wun ódi cɑ́y mø døngø.

15“Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu nyi bɑ̈nn-ɑ piny kí nɑ̈mmi omelø, wu oyɑ̈bø ki ngɑn yïëy ki kwøbbi wun. O kenyi yïddi wun, kɑ ngɑnɑni nyi løg wun ngɑn kedhi mɑc, me lod wun ki rɑ̈jø tyel ɑ́ryew!

16“Wun ɑ pëjj-ɑ bɑ cörr, ri wun dɑ cyën, mɑ́ wu nyii kööbø kinni, ‘Keløg dhɑnhø nyi kwöng-ɑ Kengø, bong nyinge, de keløg dhɑnhø nyi kwöng-ɑ dhɑm-ɑ yij Kengø, köme dɑ kwör mi köngɑni.’ 17Wun ɑ dhëgg-ɑ bɑ cörr, ɑ́ gïn ɑ pere teg, dhɑb wɑlɑ̀ Kengø ɑ nyi kwër dhɑb? 18Kɑ wu nyii kööbø kinni, ‘Keløg dhɑnhø nyi kwöng-ɑ këli lɑm, bong nyinge, de keløg dhɑnhø kwöng-ɑ gënh-ɑ muuj kì kömi këli lɑm, köme dɑ kwör mi köngɑni.’ 19Wun ɑ cörr, ɑ́ gïn ɑ pere teg kì kelli gen? Gënh-ɑ muuj wɑlɑ̀ këli lɑm men-ɑ nyi kwër gënh-ɑ muuj? 20Kɑ ɑ́rum bëëde kinøw, ngɑn-ɑ nyi kwöng këli lɑm, nyi kwöng-ɑ gøn geki jɑmm-ɑ wïje bënn. 21O ngɑn-ɑ nyi kwöng Kengø, nyi kwöng-ɑ gøn geki Jwøk ngɑn-ɑ bëëdø kì yije, 22#Icɑ 66.1; Mt 5.34 o ngɑn-ɑ kwöng mɑl, kwöng-ɑ kwøøm Jwøk geki ngɑn-ɑ bëëdø kì wïje.

23 # Kwɑrr 27.30 “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu nyi muuj-ɑ ɑ́kyeel pyɑ̈rø kì ri nɑnɑɑ̀ kí cumɑ̈r kí kɑmun, de møg-ɑ per gen teg kì yethi Cigg ɑ́wiy yi wun, gen ɑ kwøbbi jyɑ̈ng-ɑ tir kí ywøøg yeth geki yïëyø. Bene møgɑni ɑ di dwɑddi gwøgø yi wun ceth, kɑ møg-ɑ nyi gwøg yi wun ko nyi wiy wun. 24Wun ɑ pëjj-ɑ bɑ cörr, wu nyi reg-ɑ yi bɑ̈yø yøw, de ɑmɑlø nyii mwønyø yi wun.

25“Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ tɑ̈mmì geki ɑ́ludhhì nyii lwøgø yi wun kidøøj kì kömi gen, de yethi gen pɑ̈ng yi gïg-ɑ nyi gweem ji geki gïg-ɑ nyi kɑbbi ki döngi pëëth. 26Yïn ɑ Jɑlpɑresì, yï bɑ cwør, nyi lɑw yethi ɑ́ludhhì geki tɑ̈mmì møti, o kömi gen dhïwi gen.

27 # Gwøg 23.3 “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu pɑ̈r ki rörri ji møg-ɑ ógøjø ki böyø me tɑr, o ge nënni ge døøj kì kömi gen, de yethi gen pɑ̈ng yi cu tyëngthøø geki gïgrijjø bënn. 28Wu nɑ gen ceth; wu nenni yi teedø wu døøj kì kömi wun, de pëthi wun pɑ̈ng yi wëënyø kí orøg.

Mɑ̈ɑ̈gi Cɑ́yi Gen ki Kwøbø yi Yëso

(Lk 11.47-51)

29“Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ rörri tyëngtöng mø Jwøk nyii gerø yi wun, kɑ rörri tyëngdøj nyi göggi ki dhwɑ̈ng yi wun. 30Kɑ wu nyii kööbø kinni, ‘Keløg wø di ying-ɑ mø nud kì bøli keny-ɑ́ nud kweyyi wøn, cinggi wøn pɑ di kedhi yi remmi jøtöng ni gen.’ 31Kɑ̀ kööb wun kinøw, wu nyodh-ɑ ri wun kinni, wu bɑ wɑ̈ddi tyëng-ɑ ɑ́nɑ̈g jøtöng! 32De ɑnɑn, tyëgu gwøøg kweyyi wun. 33#Mt 3.7; 12.34; Lk 3.7 Wu bɑ thöllì, wɑ̈ddi thöllì, cɑyø ki mɑc óbɑj yi wun kidï? 34Kɑ ɑ́rum bëëde kinøw, wu óödɑ ki tyëngtöng, kí tyëng-ɑ wɑ̈thi gen pel geki jøpwönyø. Kwï gen ógur yi wun wɑ̈thi yenh ɑrïw, o møøgø ónɑ̈g yi wun, o møøgø ópwöd yi wun kì sinɑgøgg, kɑ nyingi gen guud yi wun kì yethi myërr. 35#Cɑ̈gø 4.8; 2 Kwøb 24.20-21 Codhe, o cu tyëngdøj bënn kì kömi piny bëne ying gen cinggi wun, cɑg kì ri cöngi Abel ngɑn yïe bɑ̈r, gïti ri cöngi Dhekɑriyɑ̀ wɑ̈d Berɑkiyɑ̀, ngɑn-ɑ ɑ́nɑ̈g yi wun kì kɑɑm Kengø geki këli lɑm. 36Yɑ köbb-ɑ wun kidyër kinni, møgɑni bënn óbï kömi rïj men.

Mɑɑr-ɑ Mɑɑr Yerusɑlem yi Yëso

(Lk 13.34-35)

37“Yerusɑlem! Yerusɑlem! Yïn ɑ nyi nɑ̈gø ki jøtöng, kɑ tyëng-ɑ ɑ́ör yïí yi Jwøk bɑ̈llí ki tuggi kïttì. Tyel mø gïïr yɑ ɑ́dwɑdd-ɑ cøngi nyigí ni gyenø kenyi cønge nyige thɑ́ obërre, de yï ɑ́bɑ̈nyi. 38#Jer 22.5 De ɑnɑn, Kengi wun ódöng e lïïwø. 39#Wör 118.26 Mɑ́ yɑ köbb-ɑ wun kinni, yɑ pɑ lidh yi wun këti gïti keny-ɑ ókööb wun kinni, ‘Ngɑn-ɑ bï ki nyingi Jwøng-ɑ Ácwɑ̈ɑ̈j, bɑ ɑgyëdh.’ ”

Currently Selected:

Mt 23: shkDCB

Highlight

Copy