Marko 15

Iyarai Yesu Ihosiere Pilato

(Mat 27:1-2, 11-14; Luk 23:1-5; Yoa 18:28-38)

1Nyia motie berien, iwwahuni nyia kuak ehumak elettaha iko lahou buo ettiyanak ifahita iko aati lokikoi 'daŋ, ette isi ifit Yesu, ette inyiamaru inyi addi, ette isiarana jio Pilato. 2Buo Pilato ette ifiyo inyi jiojio, “Iyye Hobu Yudei?”

Itarraŋ Yesu ojio, “Iyye ijio ihuo nyia.”

3Itisiahini nyia ehumak elettaha jio Yesu erre arriai, 4ania, ette Pilato inyiak ifiyo inyi jiojio, “Ibeŋ iyye iwak itarraŋ? Imijie omukajia etisiahita hunne itisiahinierek isi iyye!”

5Ati obeŋ nyia Yesu inyiak itarraŋ, ania, ette Pilato illilliha.

Oŋotoni Aye jio Yesu

(Mat 27:15-26; Luk 23:13-25; Yoa 18:39—19:16)

6To oloŋ ono Neyom ono Allaŋan, ohohitta nyia Pilato jio aati atulo babus abotie alla awahi isi. 7Jio oŋitek hua, ifita nyia obo latulo afure honyi Barabas ibabus iko omuk aati hinyia ottohori 'to atulo to ninyia itaŋalafarik isi gala. 8Ninyia attubanio eluluŋ waati ifiyere Pilato ariŋ enne isiaratta inyi isi toloŋi, 9ette Pilato ifiyo isi ojio, “Iwahata itai ahohi ni jihatai hobu Yudei?” 10Nyio, omijak nyia Pilato bebe jio, inefunie nyia ehumak elettaha Yesu jihonyi ta ahaini hosi.

11Ati isusui nyia ehumak elettaha aati 'daŋ jio ijiara Pilato, ohohi Barabas jihosi. 12Attati Pilato inyiak ifiyo isi jiojio, “Iwahata itai oŋida ani ehan anyio jio latulo elle iloŋoti itai hobu Yudei?”

13Attati isi 'daŋ iwuwoŋita jiojio, “Isihonia inyi likruce!”

14Buo Pilato ette ifiyo isi ojio “Anyio epali enne ihan inyi?”

Ati ihumi nyia tibuo isi iwuwoŋita bebe jiojio, “Isihonia inyi likruce!”

15Awak nyia Pilato itamuno eluluŋ waati, ania ette inyi ihohina Barabas jihosi buo ette itabak Yesu, ette isiarana inyi oŋida isihoni likruce.

Osuhotierek Oseŋer Yesu

(Mat 27:27-31; Yoa 19:2-3)

16Iyarai nyia oseŋer Yesu attua hiloŋoni haŋ enne ittokon ono mondir, ette ittubana eluluŋ oseŋer 'daŋ amaji abotie; 17ette itiyyafana Yesu aboŋo anna ara erigie, ette buo fe iyyiruna egoria hikua, ette itiyyafana ihou honyi. 18Attati isi itterio efonya inyi jiojio, “Hobu Yudei, Moŋ!” 19Abahi nyia isi ahou honyi ta atelek, ette imitana amilak jihonyi, ette irigoŋi ifau ihuo elle itahabuye isi inyi. 20Ninyia atuhi isi asuhotiere inyi, ette isi ihouna addi aboŋo enne erigie nyia, ette itiyyafana inyi aboŋojin honyi. Attati iyaru inyi addi isihoniere likruce.

Isihoni Yesu Likruce

(Mat 27:32-44; Luk 23:26-43; Yoa 19:17-27)

21 # Rom 16:13 Ninyia afuoi isi, oruaŋanie nyia isi iko obo latulo olo Sirine alla anya Simone, monye ba Alesandro iko Rufus. Ottu nyia inyi ta mana attua bore gala. Ta ajore, orosoni nyia isi inyi olororo akruce Yesu. 22Attati isi iyaru Yesu jio obo amaji enne ifurani Golgota onno ojio 'to, “Amaji Hotio Hou.” 23Diya, isiarani nyia isi inyi afino enne iharruahini iko obo aŋallai onno oŋuo gir gir, ati iha nyia Yesu amatan inyi. 24#Afureta 22:18Ania, ette isi isihonia inyi likruce, ette ihihor aboŋojin honyi, ette ibak ehutuŋai, irumaniere ŋai tehiji hosi oremik iyaru anani boŋo. 25Isihoni nyia isi inyi likruce ninyia ara saa hottoŋuan otto motie. 26Igioroni nyia etisiahita huna tenyi, hunno ojiori 'to jio, “Hobu Yudei olo.” 27Isihoni nyia buo fe isi omuk ahahalak arrihai likrucehien; abotie tetteŋet honyi buo ollobo tettehorroŋ honyi. 28#Isaya 53:12[Tania, itasiruni egierita hutto buk Hollum hunno ojiori 'to jio, “Igialani inyi jio arrohojak#15:28 Obeŋ ekori ana jio omuk egierita..”]

29 # Afureta 22:7; 109:25; Mar 14:58; Yoa 2:19 Attati aati 'daŋ hunyia adahai 'to tolia inninniŋa ossi hosi, ette isehina jihonyi emoriti jio, “Aaa! Ijio nyia bu iyye jio, iremik iyye itattur Aaji Emojit enne ittokon itte inyiak iduhonia ihalu oŋitek hunihoi! 30Ihuania, italuahu ahuan hoi, ollu ifau to hide kruce.”

31Ihuo nyia buo fe, itafittaŋie nyia ehumak elettaha iko ettiyanak ifahita Yesu ta ahuattek hosi jiojio, “Italuahu nyia inyi aati hullomuk, buo ittallik italuahuna ahuan honyi! 32Ijiara Olonyimoto, Hobu Israele, ollu ifau to hide kruce, oŋida hohoi egonyu, ette iruk jihonyi.”

Ette buo fe ahahalak hula arrihai, hunyia isihoni likrucehien ikonyi, imorio inyi.

Naye ono Yesu

(Mat 27:45-56; Luk 23:44-49; Yoa 19:28-30)

33Ninyia ara akil fanni, imuluhak nyia edumele afau 'daŋ, many otuk asahien hunihoi. 34#Afureta 22:1Ninyia ara saa hunihoi otto otoriai, ette Yesu iluaha woŋ woŋ jiojio, “Eloi, Eloi, lema Sabakttani?” onno ojio jio, “Hollum hoŋ, Hollum hoŋ, nyio ibasak iyye nani?”

35Itayiruni nyia omuk aati hinyia owotiai 'to diya aluaha honyi, ette jiaran, “Itayiriete, iloŋo inyi Elija!” 36#Afureta 69:21Ette lobo olosi iŋioron, ette idifonia espony itua fino enne iruattiŋo 'to, ette ihasana itelek, ette igumana ihutuk Yesu oŋida ojur, ette jiaran, “Itilauna! Hamijiete, kuyya ollo ottu adi Elija idutuna inyi addi to hide kruce!”

37Ati oluaha nyia Yesu woŋ woŋ, ette iye.

38 # Ajiŋuna 26:31-33 Attati aboŋo etihi otto tua Haji emojit enne ittokon iguasa arrihai to hide many ifau. 39Buo ninyia igonyu lajafit olo oseŋer linyia owotia 'to ihosiere kruce aŋai oye Yesu,#15:39 aŋai oye Yesu : igioroni omuk egierita jio, aŋai oluaha buo fe oye Yesu. ette inyi jiaran, “Hode, ara nyiadi latulo olo Lonyi Hollum!”

40 # Luk 8:2-3 Owoni nyia buo fe omuk aŋoruo diya hunyia omijie 'to alamarai. Ihiji hosi, owon nyia Maria Madalina, iko Salome buo Maria honye Yakobo ollo odiha 'to iko Yosefu. 41Ijifunie nyia aŋoruo hunia Yesu many howon inyi Galilea, iluahiere inyi. Owoni nyia buo fe omuk aŋoruo arriai hunyia ofuonni 'to ikonyi many to Yerusalem.

Anuhana ono Yesu

(Mat 27:57-61; Luk 23:50-56; Yoa 19:38-42)

42-43Ninyia ara akekai ono oloŋ enne ihuhumarik, (inyi oloŋ otto hosiere Sabatto), ottu nyia Yosefu olo Arimeteya, ette itagol ataji, ette leten many jio Pilato imojuniere jihonyi ahuan Yesu. Ara nyia Yosefu atulo olo eluluŋ waati hutto lokikoi Yudei, alla abaŋi aati bebe. Itila nyia inyi attuna ono Nolobie Hollum. 44Illilliha nyia Pilato bebe ninyia itayiru inyi jio laye Yesu. Ania, ette inyi iloŋuna lajafit oseŋer, ette ittittif inyi jio kuyya laye duadi Yesu berien. 45Ninyia itaniŋu inyi jio lajafit alia jio laye Yesu, ania ette inyi iŋatana Yosefu iyari ahuan Yesu. 46Ania, ette Yosefu inyiaŋuna aboŋo enuhit, ette idutuna ahuan Yesu to kruce, ette ibubunana inyi ta aboŋo ania, ette itaferihina inyi lilume ninyia otulani itua moruo, ette ittaboronia amoruo enne ittok ihutuk ilume. 47Iŋiŋialai nyia bo Maria Madalina iko Maria honye Yosefu, ette igonyuna amaji ninyia itaferihinierek ahuan Yesu.

Currently Selected:

Marko 15: EA2003

Highlight

Copy