Marko 16

Ebuhuna Toye

(Mat 28:1-8; Luk 24:1-12; Yoa 20:1-10)

1Ninyia atuho oloŋ Sabatto, ette Maria Madalina iko Salome buo Maria honye Yakobo inyiaŋuno ariaa oŋida isi efuoi iyalana ihuan Yesu. 2Nyia motie berien to Dominika, ninyia iduoŋ oloŋ, ette isi iwany ilume. 3-4Ikikianarai nyia isi, isi hama jiojio, “Ŋai adi olo ifidihoro jihohoi amoruo ette ijiŋit ilume?” (Obolo nyia amoruo ania bebe.) Buo ninyia ibonnoi isi ahide, igonyuna nyia isi amoruo nyia ifidihori addi. 5Ania, ette isi ijiŋara attua ilume, ette igonyuna lobo anyarhaluti itoŋo totto ŋati iŋet buo iyyafatio aboŋo aboŋ. Abaŋi nyia isi bebe.

6Ati ojio nyia anyarhaluti alia jihosi jio, “Hèbaŋata, amijak ni ittifiati itai Yesu olo Nasaret linyia isihoni likruce. Labeŋ inyi tene. Itubuhuni inyi! Imijata amaji ana ninyia itaferihinierek inyi. 7#Mat 26:32; Mar 14:28Ihuania, ifuatta iramana eram ana jio lejifak honyi iko jio Petro jio: ‘Lia, ikiomoro Galilea to osiere hatai. Ifuatta adi itai igonyuna inyi teya ihuo iramak nyia inyi itai.’ ”

8Ania, ette isi ijiŋuna allet, ette iŋioron telume hunna abaŋi buo fe ijiriŋai. Obeŋi nyia isi iramani obo ariŋ jio obo atulo, nyio, abaŋi nyia isi.

ETISIDI AMARUANI ONO ASAYYO HUNA#16:8 Obeŋ etisidi ana jio omuk egierita iko jio enyinyiahita eberien (Ekorita 9-20).

Oleyehino Yesu jio Maria Madalina

(Mat 28:9-10; Yoa 20:11-18)

[9Ninyia ibuhu Yesu toye nyia motie berien to Dominika, oleyehino nyia inyi do jio Maria Madalina, ninyia ifuhari addi jihonyi aminiaŋa hattarik. 10Ette Maria leten, ette iramana orriahat Yesu hinyia ijiriŋai buo fe oyyooi. 11Buo ninyia itaniŋuni isi jio isu Yesu buo fe Maria Madalina igonyu inyi, obeŋi nyia isi iruhi eram ania.

Oleyehino Yesu jio Lejifak Honyi Arrihai

(Luk 24:13-35)

12Ihalu eram ania, oleyehino nyia Yesu jio lejifak honyi arrihai to obo ekoi hama, buo lejifak hulia ofuoi attua matta. 13Ette isi icaharu, ette iramana lejifak hullomuk. Ati obeŋi nyia lejifak hullomuk hulia iruhi eram hosi.

Oleyehino Yesu jio Lejifak Honyi Hula 'Tomon Habotie

(Mat 28:16-20; Luk 24:36-49; Yoa 20:19-23; Ehanita 1:6-8)

14Ihalu erre hunia 'daŋ, oleyehino nyia Yesu jio lejifak honyi hula 'tomon habotie buo isi oŋiye, ette iŋerejanio jihosi. Nyio, ta abiaŋan ono eruk iko ta agolon hossi hosi, obeŋi nyia isi iruhi erre hunyia iramani aati hunyia igonyuni 'to Yesu elle isu. 15#Ehanita 1:8Ette inyi jiaran jihosi, “Ifuatta afau 'daŋ, ittittoyete Asayyo Ayijok jio aati 'daŋ. 16Italahuni adi lia, elle iruk 'to ette ifuotu batisimo. Ati, oŋotoni adi epali jio lia, ollo obeŋ 'to iruk. 17Isiarani adi agolon jio eruhok ihaniere eduariti. Ifuhatie adi isi aminiaŋa ta afure hoŋ, buo fe ikianai te etuhe hunno olufaji. 18Ittallihi adi iriafuna isi duadi bu iniafatie isi amunuok kuyya amati obo eyyeri. Iyabani adi isi ahas hosi jio aŋuak, ette itaŋida isi.”

Iyarai Yesu Lidou

(Luk 24:50-53; Ehanita 1:9-11)

19 # Ehanita 1:9-11 Ninyia latuhok Yesu ekiana jihosi, ette ikafaru inyi idou, ette ititoŋonia iŋati iŋet Hollum. 20Attati lejifak ifuatan, ette ittittoyo imasik 'daŋ, buo Lamonye oluahio isi, buo fe itahutak jio obisi ettittotia hosi te ehanio hosi eduariti. Amen.]

ETISIDI AMARUANI ONNOBO ONO ASAYYO HUNA#16:9-10 Ofuanani omuk eŋierita huno abuk Hollum iko enyinyiahita eberien, esidi onno osuk 'to ana jio, Esidi ono ohodo 'to (v 9-20).

16:9-10

[9Ofuoi nyia aŋoruo hunia jio Petro iko lejifak hullomuk, ette iramana jihosi, te ekenita kaiyo, erre hunyia iramani jihosi. 10Ihalu erre huna, ette Yesu ta ahuan honyi, iramana eram ono etalahuna onno odua 'to buo fe osio 'tulaŋ imasik 'daŋ te etuhe hejifak honyi.]

Currently Selected:

Marko 16: EA2003

Highlight

Copy