Marko 1

Ettittoyo ono Yoane Etifuotoni Batisimo

(Mat 3:1-12; Luk 3:1-18; Yoa 1:19-28)

1Asayyo Ayijok huna huno Yesu Kristo, Lonyi Hollum#1:1 Ofuanani omuk egierita jio, Lonyi Tulo.. 2Itterie isi ihuo igiorok nyia Isaya ekianani Hollum jio:

“Ojio Hollum jio, ‘Efak adi ni eyani sayyo hoŋ to osiere hoi.

Olo adi inyi ihuhumana ekoi hoi.’

3Obo latulo elle iwuwoŋita ihidiofo jio,

‘Ihuhumana ekoi ono Lamonye;

itabisana alori honyi!’ ”

4Tania, iduoŋ nyia Yoane etifuotoni Batisimo ihidiofo. Ittittoyo nyia inyi aati jio#1:4 Igioroni omuk egierita jio: iduoŋ Yoane ihidiofo, ette itifuocio batisimo buo ittittoyo., “Obusana eyyata hatai, ifuotuna batisimo, buo adi Hollum ette ihohina eyyata hatai.” 5Ofuonni nyia aati arriai ta fau Yudea iko to bore gala Yerusalem itayiriere eram honyi. Opuloni nyia isi eyyata hosi buo inyi ette itifuotonia isi batisimo itua owore Yordano.

6 # 2Hob 1:8 Iyyafatio nyia Yoane aboŋojin hunno oyyeuni to hofir konnikonni buo fe ottodok amuhunyo ihuluk honyi. Oŋiyotio nyia inyi namaa iko eesio 'tege. 7Ittittoyo nyia inyi jio, “Ottu adi obo atulo te ehalu hoŋ alla agalik 'to ani. Abeŋ ni ikoddaŋ asiru iridori, ihouniere amuha honyi. 8Etifuotok ni itai batisimo ta aari, ati ottu adi inyi itifuotonia itai batisimo to Loholio Olibo.”

Efuotuna Yesu Batisimo iko Akemio Sittan Inyi

(Mat 3:13—4:11; Luk 3:21-22; 4:1-13)

9To oŋitek hua, ottu nyia Yesu to bore gala Nasaret atta fau Galilea, attati Yoane itifuotonia inyi batisimo to tua owore Yordano. 10Ninyia attu Yesu addi to tua hari, ette inyi igonyuna edou aŋa, ette Loholio Olibo suuna jihonyi tedou ihuo awolo. 11#Etterita 22:2; Afureta 2:7; Mat 3:17; 12:18; Mar 9:7; Luk 3:22Attati ekiana ittuna tedou onno ojio, “Iyye Lonyi hoŋ hode. Amuno ni iyye bebe.”

12Teya teya, ette Oloholio iyaru inyi ihidiofo; 13amaji ninyia itoŋori inyi oŋitek atomuana aŋuan buo Sittan okemio inyi. Owoni nyia aciaŋi diya buo ajilohien oluahie inyi.

Eloŋuna Yesu Ayafohok Aŋuan

(Mat 4:12-22; Luk 4:14-15; 5:1-11)

14Ninyia ifitani Yoane ibabus, ette Yesu leten Galilea ittittoyere Asayyo Ayijok huno Hollum. 15#Mat 3:2Ojio nyia inyi jio, “Attuba asaa, iliaha buo fe Nolobie ono Hollum! Obusana eyyata hatai, iruhoto Asayyo Ayijok.”

16Ninyia illillor Yesu to olotifor tafar enne ittokon ono Galilea, igonyu nyia inyi Simone iko Andrea illanyi ayafohoi aham ta aboyo, nyio, arai nyia isi ahayafok. 17Attati Yesu jiaran jihosi, “Ijifuniete ani, etahutak adi ni itai iloŋutari aati jihoŋ ihuo ayafohok.” 18Teya teya, ette isi ibusana aboyo hosi, ette ijifaru inyi.

19Ninyia alo inyi ahosiere kaiyo, ette inyi igonyuna ellarak arrihai; Yakobo#1:19 Yakobo : te ekiana Ebrei, buo te ekiana Iŋilis, James. iko Yoane lonyirok Sebedeyo. Ihuhumie nyia isi aboyo hosi itua togol hosi. 20Teya teya, ninyia igonyu inyi isi, ette inyi iloŋuna isi, buo isi ette ibusaru monyosi Sebedeyo iko egiamak itua togol, ette ijifaru Yesu.

Atulo Miniaŋa

(Luk 4:31-37)

21Tania, ofuoi nyia Yesu iko lejifak honyi ibore gala Kapernaum. Buo ninyia alum oloŋ ono Sabatto, ette inyi leten ihaji emojit, ette itterio ettiyenio. 22#Mat 7:28-29Illillihai nyia aati bebe ettiyenio honyi, nyio, obeŋ nyia inyi ittiyenio ihuo ettiyanak ifahita. Ittiyenio nyia inyi luŋa ihuo elettok.

23Teya teya, ojiŋu nyia obo latulo miniaŋa attua haji emojit, ette iwuwoŋita jiojio, 24“Yesu olo Nasaret, anyio enne iwak iyye jihohoi? Ittu iyye itatturio hohoi? Emijak hohoi ŋai iyye, iyye eyani sayyo Hollum elle ilibo 'to!”

25Ette Yesu iŋerejanio jio aminiaŋa hua jio, “Oduati, ojiŋuna addi jio latulo alia!”

26Teya, ette aminiaŋa hunia inef inyi ihuo aahue, ette ijiŋuna addi buo ituruhoi. 27Illillihai nyia aati 'daŋ bebe, ette ifiyo ahuattek hosi jiojio, “Eii, anyio hirre huna? Ettiyenio aŋejuk 'tadi ana? Iŋerejanio latulo olo jio aminiaŋa te elohittok, buo isi oniŋie ekiana honyi.”

28Teya teya, okuataru nyia olohuo Yesu amasik 'daŋ hutto ŋati Galilea 'daŋ.

Etaŋidario Yesu Aŋuak Arriai

(Mat 8:14-17; Luk 4:38-41)

29Odiotoi nyia bo Yesu iko lejifak honyi arabotie iko Yoane buo Yakobo ta haji emojit, ette boton ihaŋ Simone iko Andrea. 30Ofer nyia hamoni Simone ijotit, nyio, oŋuai nyia inyi iko anahan huan. Teya Teya, ninyia afany Yesu, ette isi iramana jihonyi eram aŋuani ania. 31Attati Yesu leten jio aŋuani ania, ette ittoŋ aani honyi, ette itadet inyi ahide. Teya ette anahan huan iŋatana aŋuani ania, ette inyi ikoddaŋ ihuhumio aŋiyo jihosi.

32Ninyia iddorro oloŋ buo fe ara akekai, iyaŋunie nyia aati jio Yesu aŋuak 'daŋ iko aati miniaŋa. 33Ottubanie nyia aati 'daŋ huttono abore gala ania ihiloŋoni ahaŋ ania. 34Attati Yesu itaŋida aŋuak arriai hunyia owoni 'to iko eŋuati gele gele, buo fe ifuha addi aminiaŋa arriai. Obeŋ nyia inyi aŋatak aminiaŋa ikenuni hirre, nyio, omijani nyia isi inyi.

Ittittoyo Yesu Ifau Galilea

(Luk 4:42-44)

35Ohenyu Yesu nyia taŋatio motie berien, ette iwany totua bore gala jio obo amaji onno oyur, ette mojo diya. 36Ati ottittifiarai nyia ba Simone iko orriahat honyi Yesu. 37Ninyia anyurani isi inyi, ette isi jiaran jihonyi “Ottifiai aati 'daŋ iyye.”

38Buo Yesu ette itarraŋ jiojio, “Hafatta jio amisihi hunnomuk hunia 'daŋ. Oŋida buo fe ani alo ittittoyo diya, nyio, inyi eram ania ninyia attuniere ni.”

39 # Mat 4:23; 9:35 Ania, ette Yesu ilur afau Galilea 'daŋ, buo ittittoyo ihasik imojiti buo fe ifuhatta addi aminiaŋa jio aati.

Itaŋida Yesu obo Atulo

(Mat 8:1-4; Luk 5:12-16)

40Ottu nyia obo atulo ollo owon iko aŋuai belelio jio Yesu, ette irigoŋo ifau, ette ifiyo aluahio jio Yesu jiojio, “Elle iwak iyye, italibo nani.#1:40 Italibo nani : Ojiori nyia jio itihan aŋuai ania atulo ahebuatani tehiji waati 'daŋ iko totua hasik Imojiti.”

41Omehino#1:41 Omehino : igioroni omuk egierita jio, ijoria. nyia Yesu jihonyi bebe, ette ihalamana aani honyi, ette ittir inyi ette jiaran, “Awak ni, toliboro!” 42Teya teya, ette aŋuai nyia idehina atulo alia, ette inyi libori. 43Attati Yesu ihum iramana inyi, ette ifahini inyi addi teya teya, ninyia ajio jihonyi jiojio, 44#Ehumak 14:1-32“Itayirie, hèramak obo atulo eram ania. Ati obotik jio ehumani, ijiara inyi ihum imi iyye. Attati teya, isiarak ehumi jio Hollum, itahutaniere jio aati jio ilibo iyye, ihuo ojiori efahita huno Mose.”

45Ati olo nyia atulo alia ette itasarrahina eram ania imasik 'daŋ. Ihum nyia inyi ikiana bebe eram ania many obiaŋari luŋa Yesu adaha sol ibore gala. Ania, alari Yesu itoŋori jio amasik hunno obiaŋarik aati, buo aati ette ifuanna to masik 'daŋ jihonyi.

Currently Selected:

Marko 1: EA2003

Highlight

Copy