Matteyo 10
10
Lefahat Hula 'Tomon Harrihai
(Mar 3:13-19; Luk 6:12-16)
1To ninyia tonyia, iloŋu nyia Yesu lejifak honyi hula 'tomon harrihai, ette isiarana jihosi elohittok ifuhatiere aminiaŋa buo fe itaŋidariere eŋuati iko ediahiti 'daŋ. 2Afureta lefahat hula 'tomon harrihai isi huna: ahosiere, Simone (alla anya 'to Petro,) iko illanyi Andrea; Yakobo iko illanyi Yoane, lonyirok Sebedeyo; 3Filipo, Bartolomeyo, Tomaso, Matteyo eddudduhani musuru, Yakobo lonyi Alfeyo, Tadeyo, 4Simone Aselotanani#10:4 Aselotanani : Atulo ollo obuor ataji honyi afau hosi bebe (imija Luka 6:15). iko Yuda Iskariot, etinyiaŋani Yesu.
Ifak Yesu Aati Hula 'Tomon Harrihai
(Mar 6:7-13; Luk 9:1-6)
5Ifak nyia Yesu aati hula 'tomon harrihai hulia, ette iramana isi jiojio, “Hèfuatta ifauhien Lufajak, buo fe hèjiŋana obo abore gala waati Samaria. 6Ati ifuatta jio aati Israele hulla arai 'to ihuo akioro hunno olitohini 'to. 7Ifuatta, ittittoyete jiojio, ‘Iliaha Olobie ettedou attuna.’ 8Itaŋidarata aŋuak, itubuhuna ayaak, italiboroto aati hullo owoni 'to iko eŋuati belelio, buo fe ifuhara aminiaŋa addi. Ihuo ifuotuna nyia itai asai isiatta buo fe asai. 9Hèlutotti omuk agurusi iloboni hatai. 10#1Kor 9:14; 1Tim 5:18Elle ifuatta itai, hèyatti edee hèmimojok, ara duadi bu agamisi arrihai, kuyya amuha, kuyya atelehi; nyio, osiru jio egiamani ifuotuniere aŋiyo honyi. 11Elle ijiŋana itai obo abore gala, kuyya obo amiji, ottifieuna atulo ollo oremik 'to ifuotuna itai. Itoŋoti ikonyi many idiahatti itai amaji nyia. 12Elle ijiŋana itai obo ahaŋ, ijiatta, ‘Hatawana nelik taji jihatai.’ 13Elle ifuotuni aati ahaŋ nyia itai, ijiara efonya hatai ono nelik taji hatawana diya; buo alla abeŋi isi ifuotuni itai, ijiara inyi hotocohunie jihatai. 14#Ehanita 13:51Buo elle iha obo ahaŋ kuyya abore gala efuotuna itai, kuyya etaniŋio jihatai, idiahatti amaji ania, ipipuahara attuduha to hejek hatai. 15#Mat 11:14; Etterita 19:24-28Ahode, eramak ni jihatai jio, Iholoŋ ono Aŋocio Hiram, obolo adi amehino Hollum jio Sodom iko Gomora agalik amehino honyi jio abore gala ania.
Ettigemita Hunno Ofuonni 'to
(Mar 13:9-13; Luk 21:12-17)
16 #
Luk 10:3
“Imijiete, efak ni itai ihuo akioro ihiji lewwo. Ogenyata ihuo amunuok buo inyalamata ihuo awolosin. 17Ihumata mijio, owoni adi aati hullo ofuonni 'to iniafaru itai ilokikoi. Ofodohie adi is itai ihasik imojiti. 18Te eram hoŋ, ipihoroi adi itai ihosiere mondiri iko hobuok iramaniere Asayyo Ayijok jihosi iko jio Alufajak. 19Elle ipihoroi isi itai ilokikoi, hèlafuhoti anyio adi enne ifuatta itai ikiana kuyya ifuatta adi itai ikiana aŋai? Nyio, ta asaa nyia, iramani adi jihatai anyio enne ifuatta itai ikiana. 20Nyio, obiaŋara adi itai ikianati ta ahuattek hatai; ati, Oloholio olo Monyatai adi ikiana te etuhe hatai. 21#Mar 13:12; Luk 21:16Itinefuni adi ellarak illarak oŋida ottohori, buo fe monyie itinefuni aduri hosi oŋida ottohori. Oyitonie adi aduri esiok hosi, ette itattohoro. 22#Mat 24:9; Mar 13:13; Luk 21:17; Mat 24:13; Mar 13:13Oliwarik adi aati 'daŋ itai te eram hoŋ; ati italuahuno adi lia ollo odihu 'to many isidi. 23Elle ittigemie itai jio obo abore gala, ofuhoti jio obo hama. Nyio, eramak ni itai hode jio, ibiaŋata adi itai ituhonia egiama hatai jio aborejin gala hutto Israele hobeŋ Lonyi Tulo ottu. 24#Luk 6:40; Yoa 13:16; 15:20Obeŋ obo eyiyanani agalik ettiyanani honyi, buo fe obo egiamani obeŋ agalik elettok. 25#Mat 9:34; 12:24; Mar 3:32; Luk 11:15Oremik jio eyiyanani irari ihuo ettiyanani honyi, buo fe egiamani irari ihuo elettok honyi. Elle ifurani isi amonye haŋ Belsebul, ifurani adi buo fe aati hutta haŋ honyi afureta hunno orrohoji 'to bebe.
Oŋida Ebaŋ Ŋai
(Luk 12:2-7)
26 #
Mar 4:22; Luk 8:17 “Tania hèbaŋata aati. Asalanie adi erre 'daŋ hunne imuhoi 'to. Omijani adi buo fe erre 'daŋ hunne idimai 'to. 27Erre hunne eramak ni jihatai te edumele, inyiahata luŋa iramuna alla afaŋ; buo fe erre hunne itaniŋuna itai ahahayai, itawoloŋoto to sihidihien hasik. 28Hèbaŋata attok huan buo ittallihi ittohoro oloholio. Ati abaŋata Hollum ollo oremik 'to itamuhina ahuan iko oloholio 'daŋ Iferno. 29Obeŋi soho inyiaŋai olodili arrihai ta amillim? Ati obeŋ obo olodil okuahino ifau alla abeŋ Monyatai awak. 30Ara duadi bu oofir hutto hossi hatai, iheni isi 'daŋ. 31Tania, hèbaŋata, nyio, agalik ayiji hatai ono olodili arriai.
Eruhonia iko Ehara Kristo
(Luk 12:8-9)
32“Lia, elle iruhok 'to ani to hosiere waati, eruhok adi buo fe ni inyi to hosiere Monyoŋ ettedou. 33#2Tim 2:12Ati lia, ollo orisa 'to ani to hosiere waati, arisa adi buo fe ni inyi to hosiere Monyoŋ ettedou.
Afere, Obiaŋara Nelik Fau
(Luk 12:51-53; 14:26-27)
34“Hègigiloti jio attu ni iyaŋuniere nelik ifau. Abeŋ nyia ni attu iyaŋuniere nelik fau, ati eyaŋuno ni afere. 35Attu ni italiwahiniere lonyi iko monye, buo ŋarri iko honye, buo hamoni iko hamoni; 36Arai adi aati hutta haŋ hatai amiorok hoi.
37“Lia, ollo omuno 'to monyonyi kuyya honyonyi agalik onno omunori inyi ani, obeŋ osiru ahejifani hoŋ; buo fe ollo omuno 'to lonyi kuyya ŋarri agalik onno omunori inyi ani, obeŋ osiru ahejifani hoŋ. 38#Mat 16:24; Mat 8:34; Luk 9:23Lia, ollo obeŋ 'to olor akruce honyi ette ijifuno ani, obeŋ inyi osiru ahejifani hoŋ. 39#Mat 16:25; Mar 8:35; Luk 17:23; 17:33; Yoa 12:25Lia, alla awak 'to italuahuna nesu honyi, italitohi adi inyi, buo fe lia, elle italitohi 'to nesu honyi te eram hoŋ, italuahu adi inyi.
Esiorita Huno Hollum
(Mar 9:41)
40 #
Luk 10:16; Yoa 13:20; Mar 9:37; Luk 9:48 “Lia, elle ifuotu 'to itai, ifuotu inyi ani; buo fe lia, elle ifuotu 'to ani, ifuotu inyi lia, elle ifahu 'to ani. 41Lia, elle ifuotu 'to ekianani Hollum nyio ara inyi ahekianani Hollum, ifuotu adi inyi esiorio ono ekianani Hollum. Buo fe lia, elle ifuotu 'to oloyijio ta arahan honyi oloyijio, ifuotu adi esiorio arabotie iko oloyijio. 42Ahode, eramak ni itai jio, lia elle isio 'to omuk aari amatat hunne ilihi 'to jio obo olofiaha tehiji hejifak hoŋ hulo nyio, ara inyi ahejifani hoŋ, obeŋ adi esiorio honyi opuak.
Currently Selected:
Matteyo 10: EA2003
Highlight
Share
Copy
Want to have your highlights saved across all your devices? Sign up or sign in
© The Bible Society in South Sudan 2003
